Ang Bibliya—Kini ba Gikan sa Diyos?

SI Jehova, usa ka Diyos sa waykinutobang gahom ug awtoridad, tinuod nga may katungod nga makigsulti sa iyang tawhanong kalalangan sa bisan unsang paagi nga buot niya. Kon mopalabi siya sa pagpakigsulti pinaagi sa sinulat nga pulong, kinahanglan usab nga iyang tipigan ang iyang mensahe latas sa kapanahonan. Kini ba mao ang kahimtang sa Bibliya?

Mga 1,500 ka tuig una kang Kristo, sa gisugdan pagsulat ang Bibliya, may daghang ubang relihiyosong sinulat nga naglungtad. Bisan pa niana, kanang tanan misangpot nga wala na gamita ug sa kadugayan yanong nangahanaw. Ang pipila nakutkotan sa mga arkeologo ug karon maoy mga pasundayag lamang diha sa mga musiyo. Sa laing bahin, ang mga bahin sa Bibliya nga gisulat sa kapig tulo ka libo ka tuig kanhi wala gayod mahikalimti, ug ang mga kopya nagalungtad abot sa atong adlaw. Kini talagsaon, ilabina tungod sa pagdumot nga mitungha batok sa Bibliya sa tibuok nga kasaysayan. Walay laing basahon ang nahimong tumong sa labihan ka pintas nga pagsupak ug pagdumot. Ang pagbasa o pag-apod-apod sa Bibliya masilotan sa mga multa, sa pagbilanggo, sa pagsakit, ug sa kasagaran kamatayon.

Sa unsang paagi ang usa lamang ka basahon makalahutay ilalom nianang mga kahimtanga? Ang Bibliya mismo nagasugid kanato: “Ang pulong ni Jehova molungtad sa walay kataposan.” (1 Pedro 1:25) Ang pagkamalahutayon ug pagkadili-malaglag sa Bibliya motabang sa pag-ila nga kini balaang Pulong sa Diyos.

Dugang pa, makataronganon nga kita maglaom nga ang mensahe sa Diyos alang sa katawhan mahimong mabatonan sa tibuok kalibotan. Kini ba ang kahimtang sa Bibliya? Mao gayod! Walay laing basahon sa kasaysayan ang nakaamgid sa Bibliya niini. Ang sirkulasyon sa Bibliya gibanabana nga anaa sa 3,000,000,000 nga marka. Dugang pa, walay laing basahon ang nahubad sa daghan kaayong pinulongan. Ang Bibliya karon mabasa na, sa bug-os o sa bahin niini, diha sa kapin sa 1,900 ka lainlaing pinulongan. Ang American Bible Society nagtaho nga karon kini mabatonan na sa 98 porsiento sa populasyon sa kalibotan. Ang The New Encyclopædia Britannica nagatawag sa Bibliya “lagmit ang labing makapaimpluwensiyang katigoman sa mga basahon sa kasaysayan sa tawo.” Nan, dili mapangahason ang pagbatbat nga kini ang labing bantogang basahon sa yuta.

Ang sulod nga panag-uyon sa Bibliya gikan sa sinugdan hangtod sa kataposan sa kaugalingon maoy gamhanang ebidensiya nga kini tinuod nga dinasig sa Diyos. Realistiko ba ang pagdahom nga ang mga sinulat sa kapin sa mga 40 ka lainlaing indibiduwal latas sa yugtong 1,600 ka tuig ngatanan mapamatud-ang may panag-uyon ug may usa ra ka pangunang tema? Kana imposible unta kon itugyan sa sulagma o sa tawhanon lamang nga pagtultol. Bisan pa niana, matuod kini sa 66 ka basahon nga naglangkob sa Bibliya. Ang labaw-tawhanon lamang, dugay-nabuhing intelihensiya ang makapahinabo sa maong talagsaong produksiyon.

Dili Lamang Kasaysayan

Talagsaon ang makasaysayanhong mga unod sa Bibliya. Apan ang mensahe gikan sa Diyos nga langkoban lamang ug makasaysayanhong mga kasayoran diyutay rag bili kanato. Gikinahanglan nato ang giya ug praktikal nga kaalam, ug kana makaplagan usab diha sa Bibliya. Pananglitan, ang Bibliya nagadasig kanato sa pag-ugmad sa “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon”​—mga ulohan nga daghan kaayo ang nasulat niana diha sa mga panid niini. (Galacia 5:22, 23; Colosas 3:12-14) Ang Bibliya nagasugyot sa pagkakugihan, kahinlo, kamatinud-anon, pag-unong sa kaminyoon, pagtahod ug gugma sa isigkatawo; ug kini naundan ug daghan kaayong tambag bahin sa kagawian sa tawo sulod sa pamilya ug sa komunidad.

Kon ipadapat, ang tambag sa Bibliya maila nga mapuslanon gayod. Kini magpahigawas kanato sa kaignorante ug patuotuo. (Juan 8:32) Ang praktikal nga tambag niini walay kaindig. Sa pagkamatuod, kini naundan, sa walay duhaduha, sa balaang kaalam.

Ang pangangkon nga “ang pulong sa Diyos buhi ug gamhanan” bug-os nahiuyon sa paagi sa aktuwal nga pagbag-o sa Bibliya sa mga tawo. (Hebreohanon 4:12) Minilyon karong adlawa nakabuntog sa makadaot nga mga taras sa pagkatawo ug nag-usob sa ilang madaotong kanhing mga gawi sa pagkamaayo ingong resulta sa pagbutang sa kasingkasing sa mga sukdanan sa Bibliya.​—Efeso 4:22.

Unsay mahitabo sa dihang dili pakabanaon ang mga sukdanan sa Bibliya? Ang resulta mao ang kagul-anan ug kasakitan, mga gubat, kakabos, mga sakit nga gipasa sa seksuwal nga paagi, ug nabungkag nga mga panimalay. Kanang mga butanga madahom lamang kay ang dili pagtagad sa Balaang Bibliya nagkahulogan sa pagsalikway sa giya sa Diyos, kinsa maoy naglalang sa tawo ug nahibalo sa iyang mga panginahanglan.

Ang Bibliya nagatagna usab sa umaabot, butang nga imposibleng mabuhat sa mga tawo. Ang pagtungha sa mga gahom sa kalibotan gikan sa Babilonya latas sa kasiglohan hangtod sa atong adlaw mismo matagnaong gipahibalo diha sa Bibliya. (Daniel, kapitulo 2, 7, 8) Dugang pa, halos duha ka libo ka tuig kanhi, nahiapil diha sa Bibliya ang tukmang kabatbatan sa mga kahimtang sa kalibotan niining ika-20ng siglo. (Mateo, kapitulo 24, 25; Marcos, kapitulo 13; Lucas, kapitulo 21; 2 Timoteo 3:1-5; 2 Pedro 3:3, 4; Pinadayag 6:1-8) Ang taas nga listahan sa natuman nga mga tagna sa Bibliya nagapasalig kanato nga tinuod ang palaaboton sa usa ka malipayong kaugmaon sumala sa gibatbat diha sa mga panid niini.

Atong Responsabilidad

Kining tanan maoy dakong ebidensiya nga ang Diyos tinuod nga nakigsulti sa mga tawo. Tinuod, gipasa sa Diyos ang iyang mensahe pinaagi sa kamot sa mga tawong dili hingpit. Apan kini dili katarongan sa pagtuo nga ang Bibliya kulang sa pagkamatinud-anon kay sa unta binaba nga mensahe gikan sa Diyos, o sa usang gipahayag pinaagi sa mga manulonda, o sa usang milagrosong gisulat sa langit ug gihatag sa mga tawo sa yuta.

Bisan pa niana, ang pag-ila sa balaang sinugdanan sa Bibliya nagapahamtang diha kanato sa usa ka responsabilidad. Matarong nga dahomon ni Jehova nga kita magbasang regular sa iyang Pulong. (Salmo 1:1, 2) Kinahanglanon ang hustong tinamdan alang sa mabungahong pagbasa sa Bibliya. Kinahanglang ibutang sa hunahuna sa usa nga ang Bibliya dili pagabasahon nga samag kini usa lamang ka basahon. Ang usa kinahanglang magbasa niini, “dili ingon nga pulong sa mga tawo, kondili, maingon nga sa pagkamatuod mao kini, ingon ang pulong sa Diyos.”​—1 Tesalonica 2:13.

Ang pila ka butang diha sa Bibliya basin lisod hisabtan. Apan pinaagi sa subsob nga pagbasa, ang usa ka tawo motubo sa pagsabot ug makabatog mas kompletong hulagway sa kabubut-on sa Diyos ug sa iyang mga katuyoan. (Hebreohanon 5:14) Tingali ikaw dili pa bug-os kombinsido nga ang Bibliya mao ang balaang Pulong sa Diyos. Apan, nahauyon niana, sa unsang paagi ikaw makapahayag sa pagtuo o dili pagtuo sa Bibliya kon ikaw wala makatuon niana pag-ayo?

Bisan pa sa pagkamaduhaduhaon karong adlawa mahitungod sa balaang sinugdanan niini, ang mainampingong pagsusi sa Balaang Bibliya nakapahinabo sa daghang naghunahuna nga mga tawo sa pagpatugbaw sa mga pulong ni apostol Pablo: “Pasagdi ang Diyos makitang maminatud-on, bisan pag ang tanang tawo makaplagan nga bakakon”!​—Roma 3:4.

[Graph sa panid 4]

(Alang sa aktuwal nga pagkahan-ay, tan-awa ang publikasyon)

Ang Bibliya karon mabatonan na sa 98 porsiento sa populasyon sa kalibotan

Walay laing basahon sa kasaysayan ang nakaamgid sa gibanabanang sirkulasyon sa Bibliya nga 3,000,000,000. Ang The New Encyclopædia Britannica nagtawag niini “lagmit ang labing makapaimpluwensiyang katigoman sa mga basahon sa kasaysayan sa tawo”

[Mga hulagway sa panid 4]

Ang Bibliya nakalahutay, samtang ang ubang relihiyosong mga sinulat nahimong mga pasundayag lamang sa musiyo

Ibabaw: Asiryanhong asoy sa Lunop

Tuo: Mga pag-ampo ngadto sa Ehiptohanong diyos si Ra

[Credit Line]

Duha: Kortesiya sa Trustees of The British Museum

[Hulagway sa panid 5]

Kay gisulat sa mga 40 ka lainlaing tawo latas sa yugtong 1,600 ka tuig, ang Bibliya nagasunod sa usa ka pangunang tema gikan sa sinugdanan hangtod sa kataposan. Ang labaw-tawhanon, dugay-nabuhing intelihensiya lamang ang makapahinabo sa maong talagsaong produksiyon

Ang pagtungha sa mga gahom sa kalibotan gikan sa Babilonya latas sa kasiglohan hangtod sa atong adlaw matagnaong gipahibalo diha sa Bibliya. (Daniel 2, 7, 8)

Tuo: Caesar Augustus

[Credit Line]

Museo della Civiltà Romana, Roma

[Hulagway sa panid 6]

Halos duha ka libo ka tuig kanhi, tukmang gitagna sa Bibliya ang mga kahimtang sa kalibotan karong adlawa. (Mateo 24, 25; Marcos 13; Lucas 21; 2 Timoteo 3:1-5; 2 Pedro 3:3, 4; Pinadayag 6:1-8) Ang pagkatukma sa tagna sa Bibliya nagapasalig kanato nga ang saad sa Diyos sa usa ka paraisong yuta tinong matuman

[Credit Line]

Reuters/Bettmann nga mga Letrato sa Balita