Magpadayon sa Pagpasidaan Bahin sa Talagsaong Buhat ni Jehova
“Si Jehova motindog ingon sa didto sa Bukid sa Perasim, siya masuko ingon sa didto sa walog nga haduol sa Gabaon.”—ISAIAS 28:21.
1, 2. Unsang talagsaong buhat ang gihimo ni Jehova alang sa Iyang katawhan sa adlaw ni David?
USA gayod ka katingalahang lihok! Usa ka labing talagsaong buhat! Kana ang gihimo ni Jehova alang sa iyang katawhan sa karaang panahon balik sa ika-11ng siglo W.K.P. Ug kining katingalahang lihok maoy usa ka sumbanan alang sa labi pang talagsaong buhat nga hapit na niyang himoon sa dili na madugay. Unsa ba kadtong karaang lihok? Wala madugay tapos mapalingkod si David ingong hari sa Jerusalem, miatake ang silingang mga Pilistehanon, ug nakabikil kadto sa katingalahang lihok ni Jehova. Nahauna, gisulong sa mga Pilistehanon ang walog sa Rephaim. Si David nangutana kang Jehova kon unsay iyang pagabuhaton ug gisugo sa pag-atake. Kay misunod sa pulong ni Jehova, si David bug-os nagparot sa gamhanan Pilistehanong kasundalohan didto sa Baal-perasim. Apan ang mga Pilistehanon wala moangkon sa kapildihan. Sa wala madugay namalik sila aron gun-obon ug laglagon sa dugang ang walog sa Rephaim, ug sa makausa pa si David nangayog pagtultol gikan ni Jehova.
2 Sa maong panahon gisugo siya sa pag-adto sa luyo sa mga Pilistehanon kauban sa iyang mga manggugubat. Si Jehova miingon: “Sa diha nga ikaw makadungog sa dinahunog sa pagmartsa sa tumoy sa mga kahoy nga morales, sa maong panahon molihok ka nga mahukmanon, kay sa maong panahon si Jehova nag-una kanimo aron sa paglaglag sa kampo sa mga Pilistehanon.” Ug kadto ang nahitabo. Si David nagpaabot hangtod si Jehova nagpatungha sa dinahunog sa pagmartsa sa tumoy sa mga kahoy nga morales—tingali pinaagig kusog nga hangin. Dihadiha, si David ug ang iyang mga manggugubat milukso gikan sa gitagoan ug miatake sa nalinga nga mga Pilistehanon, nga nagparot kanila uban sa daghang pagpamatay. Ang relihiyosong mga diyosdiyos nga gibiyaan sa mga Pilistehanon sa natad-panggubatan gitigom ug gilaglag.—2 Samuel 5:17-25; 1 Cronicas 14:8-17.
3. Nganong ang katingalahang lihok ni Jehova nakaikag sa mga Hudiyo sa adlaw ni Isaias, ug nganong kini angay makaikag sa Kakristiyanohan karong adlawa?
3 Kadto usa ka talagsaong buhat, usa ka katingalahang lihok, nga gihimo ni Jehova batok sa mga Pilistehanon ug dapig sa iyang dinihogang hari. Kining talagsaong lihok makaiikag sa linain tungod kay si propeta Isaias nagpasidaan nga buhaton ni Jehova ang butang nga sama ka katingalahan ug gamhanan batok sa espirituwal nga mga palahubog sa Juda. Busa, ang dili-matinuohong relihiyosong mga pangulo sa adlaw ni Isaias kinahanglang magmatikod. Ang Kakristiyanohan karong adlawa angay usab magmatikod tungod kay ang nahitabo sa Juda maoy usa ka sumbanan alang sa kataposang dulnganan sa Kakristiyanohan.
“Ang Higdaanan Napamatud-ang Hamubo Kaayo”
4, 5. (a) Sa unsang paagi tin-awng giilustrar ni Isaias ang dili-hayahay nga kahimtang sa relihiyosong mga pangulo sa iyang adlaw? (b) Unsay hinungdan sa pagkadili-hayahay sa Kakristiyanohan karong adlawa?
4 Nahauna, giyagyag ni Isaias ang kamatuoran nga ang mga kasabotan nga gisaligan niadtong karaang espirituwal nga mga palahubog maoy usa ka limbong, usa ka bakak. Dayon tin-aw niyang giilustrar ang dili-hayahay nga kahimtang niadtong naglaom sa maong bakak. Miingon siya: “Ang higdaanan napamatud-ang hamubo kaayo aron katuy-oran, ug ang habol hiktin kaayo sa dihang ibukot niya sa iyang kaugalingon.” (Isaias 28:20) Si bisan kinsa nga motuy-od sa iyang kaugalingon ibabaw sa usa ka higdaanan nga hamubo kaayo makadiskobreng ang iyang mga tiil mahigawas nga tugnawon. Sa laing bahin, kon siya motikungkong aron maigo ang mubong higdaanan, ang hanig sa higdaanan hiktin kaayo ug dili gihapon mahabolan ang dakong bahin sa iyang lawas. Bisan pag unsay iyang buhaton, ang pila ka bahin sa iyang lawas mahigawas nga tugnawon.
5 Kana mao ang kahimtang, sa simbolikong pagkasulti, niadtong nagbutang sa ilang pagsalig sa dalangpanan nga bakak sa adlaw ni Isaias. Kini mao usab ang dili-hayahay nga kahimtang niadtong si kinsa karong adlawa nagabutang sa ilang pagsalig diha sa dalangpanan nga bakak sa Kakristiyanohan. Sila atua sa gawas nga tugnawon, ingnon ta. Dili karon panahon sa pagpangitag kahayahay sulod sa kalibotanong mga kahikayan alang sa pakigdait ug kasegurohan. Ilalom sa landong sa umaabot nga mga buhat sa paghukom sa Diyos, ang mga pakigkombuya uban sa politikanhong mga pangulo dili motaganag kahayahay alang sa Kakristiyanohan.
Katingalahang Lihok ni Jehova
6. Sa unsang paagi si Jehova milihok batok sa Juda, ug sa unsang paagi siya molihok batok sa Kakristiyanohan?
6 Tungod kay sa tin-aw nagbatbat sa dili-hayahay nga kahimtang sa dili-matinumanong Jerusalem sa iyang adlaw—ug sa modernong dili-matinumanong Kakristiyanohan—si Isaias nagpadayon sa pag-ingon: “Si Jehova motindog ingon sa didto sa Bukid sa Perasim, siya masuko ingon sa didto sa walog nga haduol sa Gabaon, aron iyang himoon ang iyang lihok—ang iyang lihok katingalahan—ug aron iyang himoon ang iyang buhat—ang iyang buhat talagsaon.” (Isaias 28:21) Oo, si Isaias nagpasidaan, sa duol na si Jehova motindog sama sa iyang gibuhat sa Baal-perasim. Apan sa maong panahon siya molihok batok sa iyang dili-matinuohong katawhan, ug iyang buhaton kana sama sa dili-mabangbang nga baha sa tubig nga mobul-og agi sa usa ka lungag sa nagkatumpag nga paambakan. Ang pakigsaad sa Jerusalem uban sa kamatayon madayag nga walay kapuslanan. Sa susamang paagi, si Jehova molihok sa haduol na batok sa Kakristiyanohan, ug iyang madiskobrehan nga ang tanan niyang makapahubog nga mga kasabotan uban niining kalibotana mawalay kahulogan. Mabungkag ang iyang dako kaayong organisasyon ug matibulaag ang iyang mga sumusunod. Ang iyang bakak nga mga diyosdiyos sa bug-os pagasunogon.
7. Nganong ang mga katuyoan ni Jehova maylabot sa Juda ginganlag “katingalahan” ug “talagsaon”?
7 Nganong gitawag ni Isaias ang lihok ni Jehova batok sa Jerusalem nga usa ka katingalahan ug talagsaong buhat? Aw, ang Jerusalem mao ang sentro sa pagsimba ni Jehova ug ang siyudad sa dinihogang hari ni Jehova. (Salmo 132:11-18) Ingon nga mao kana, kini wala gayod sukad malaglag. Ang templo niana wala gayod sukad masunog. Ang harianong balay ni David, nga niadto natukod sa Jerusalem, wala gayod sukad mapukan. Ang maong mga butang imposible. Talagsaon kaayo nga si Jehova maghunahuna sa pagtugot nga mahitabo kanang mga butanga.
8. Unsang pasidaan ang gihatag ni Jehova mahitungod sa iyang umaabot talagsaong buhat?
8 Apan gihatag ni Jehova ang makataronganong pasidaan pinaagi sa iyang mga propeta nga hapit nang mahitabo ang makapakurat nga mga hitabo. (Miqueas 3:9-12) Pananglitan, ang propetang si Habakkuk, kinsa nagkinabuhi sa ikapitong siglo W.K.P., miingon: “Tan-aw, kamong katawhan, taliwala sa mga nasod, ug sud-onga ninyo, ug tutoki ninyo nga may katingala ang usag usa. Mahibulong; kay adunay usa ka kalihokan nga ginabuhat niya sa inyong mga adlaw, nga dili ninyo katuohan bisan pag kini ginasugilon. Kay ania akong patindogon ang mga Caldeanhon, ang nasod nga mayugtanon ug mapahinaykon, nga nagaadto sa halapad kaayong mga dapit sa yuta aron sa pagpanag-iya sa mga puluy-anan nga dili iyaha. Makahahadlok ug makalilisang kini.”—Habakkuk 1:5-7.
9. Sa unsang paagi gituman ni Jehova ang iyang pasidaan batok sa Jerusalem?
9 Niadtong 607 W.K.P., gituman ni Jehova ang iyang pasidaan. Kay gitugotan ang Babilonyanhong kasundalohan sa pagsulong sa Jerusalem, gitugotan niya sila sa pagguba sa siyudad ug sa templo. (Lamentaciones 2:7-9) Dugang pa, gitugotan niya nga ang Jerusalem malaglag sa ikaduhang panahon. Ngano? Aw, tapos sa 70 ka tuig nga pagkabihag, ang mahinulsolong mga Hudiyo namalik sa ilang yutang-natawhan, ug sa kadugayan ang laing templo natukod sa Jerusalem. Ugaling, sa makausa pa, ang mga Hudiyo nagpahilayo kang Jehova. Sa unang siglo K.P., gikutlo ni Pablo ang mga pulong ni Habakkuk ngadto sa mga Hudiyo sa iyang adlaw, sa ingon nagpasidaan nga adunay umaabot nga pagpadapat sa tagna. (Buhat 13:40, 41) Si Jesus mismo nagpasidaan sa tino nga ang Jerusalem ug ang templo niini pagalaglagon tungod sa kakulang sa pagtuo sa bahin sa mga Hudiyo. (Mateo 23:37–24:2) Namati ba kadtong unang-siglong mga Hudiyo? Wala. Sama sa ilang mga katigulangan, bug-os nilang gisalikway ang pasidaan ni Jehova. Busa, gisubli ni Jehova ang iyang katingalahang buhat. Ang Jerusalem ug ang iyang templo nalaglag niadtong 70 K.P. pinaagi sa Romanong mga kasundalohan.
10. Sa unsang paagi si Jehova molihok batok sa Kakristiyanohan sa haduol na?
10 Nan, nganong may si bisan kinsang maghunahuna nga dili buhaton ni Jehova ang susamang butang sa atong panahon mismo? Ang kamatuoran mao, iyang pagatumanon ang iyang katuyoan bisan pag mopatim-aw kini nga katingalahan ug talagsaon sa mga maduhaduhaon. Niining panahona ang tumong sa iyang paglihok mao unya ang Kakristiyanohan, nga, sama sa karaang Juda, nangangkong nagasimba sa Diyos apan nahimong labihan ka daotan. Pinaagi sa iyang Dakong David, si Kristo Jesus, si Jehova moabot diha sa “mga Pilistehanon” sa Kakristiyanohan sa usa ka takna nga wala nila dahoma. Pagabuhaton niya ang iyang talagsaong buhat sa punto nga wagtangon ang tanang mga bahin sa relihiyosong mga sistema sa Kakristiyanohan.—Mateo 13:36-43; 2 Tesalonica 1:6-10.
Pasidaan Bahin sa Lihok ni Jehova
11, 12. Sa unsang paagi ang mga Saksi ni Jehova nagpasidaan mahitungod sa umaabot nga mga paghukom ni Jehova?
11 Sa daghang katuigan nagpasidaan ang mga Saksi ni Jehova mahitungod niining umaabot nga buhat sa paghukom ni Jehova. Gipunting nila nga ang kalaglagan sa Jerusalem ug sa iyang templo sa 607 W.K.P. ug unya sa 70 K.P. maoy matagnaong mga pasidaan kon unsay mahitabo sa Kakristiyanohan. Dugang pa, ilang gipasundayag nga ang Kakristiyanohan, tungod sa iyang apostasiya, nahimong bahin sa imperyo sa kalibotan sa bakak nga relihiyon, ang Dakong Babilonya. Tungod niini, ang mga paghukom sa Diyos sa Dakong Babilonya sa linain ipahamtang sa Kakristiyanohan, sanglit siya ang labing dakog sala nga bahin nianang satanasnong kahugpongan.—Pinadayag 19:1-3.
12 Ang mga Saksi ni Jehova nagpunting sa matagnaong pasidaan sa Bibliya nga sa nahaigong panahon ni Jehova, ang politikanhong mga hinigugma sa Dakong Babilonya mobalitok kaniya. Nga gisimbolohan kini sa napulo ka sungay sa mapulang mapintas nga mananap, ang Pinadayag nagpasidaan: “Ang napulo ka sungay nga imong nakita, ug ang mapintas nga mananap, siya magadumot sa bigaon [Dakong Babilonya] ug siya ilang pagalaglagon ug pagahuboan, ug pagakan-on ang iyang mga unod ug sa bug-os siya ilang pagasunogon pinaagig kalayo.” (Pinadayag 17:16) Ang relihiyosong Kakristiyanohan pagasunogon ug pagalaglagon uban sa tanang ubang bakak nga relihiyon. Kini unya maoy katingalahang lihok ni Jehova, ang iyang talagsaong buhat alang sa atong adlaw.
13. Sa unsang paagi ang mga sanong ngadto sa mga pasidaan ni Jehova karong adlawa susama sa nahibalag ni Isaias?
13 Sa dihang ipahayag sa mga Saksi ni Jehova ang pasidaan niining umaabot nga katalagman, kasagaran sila matamayong pagakataw-an. Ang mga tawo mahibulong kon kinsa ba sila sa ilang hunahuna nga magasulti nianang mga butanga. Ang Kakristiyanohan mopatim-aw nga lig-on kaayo, establisado na kaayo. Aw, gibati sa pipila nga ang iyang kahimtang nagauswag pa. Ang mga gobyerno nga sa nangagi nagpiot kaniya karong bag-o nagtugot ug mas dakong kagawasan sa kalihokan. Bisan pa niana, hinunoa, ang Kakristiyanohan angay manimati sa tambag ni Isaias: “Ayaw kamo pagpakita nga mga mabiaybiayon, aron ang inyong mga bugkos dili himoong lig-on, kay adunay usa ka kalaglagan, nga butang gihukman na, nga akong hingdunggan gikan sa Soberanong Ginoo, si Jehova sa mga panon, alang sa tibuok nga yuta.”—Isaias 28:22; 2 Pedro 3:3, 4.
14. Sa unsang paagi ang mga bugkos sa Kakristiyanohan mahimong mas lig-on ug mas hugot?
14 Sa kinadak-ang bahin, ang Kakristiyanohan magpadayong masupakon sa Hari ug sa Gingharian. (2 Tesalonica 2:3, 4, 8) Sa samang panahon, hinunoa, ang iyang mga bugkos mahimong mas lig-on ug mas hugot. Sa laing mga pulong, ang iyang kalaglagan sa dugang ug dugang pa mahimong tino. Si Jehova dili mobulag sa iyang desisyon nga ipalaglag ang Kakristiyanohan maingon nga siya wala mobulag sa iyang desisyon sa pagtugot sa kalaglagan sa Jerusalem ug sa iyang templo niadtong 607 W.K.P.
“Gumula Ka Gikan Kaniya”
15. Unsang dalan sa kaikyasan ang bukas alang sa mga tawong matarong ug kasingkasing?
15 Sa unsang paagi may makaikyas sa dulnganan sa Kakristiyanohan? Balik sa mga adlaw sa Israel, gipadala ni Jehova ang matinumanong mga manalagna sa pagpabalik sa mga tawong matarong ug kasingkasing sa putling pagsimba. Karong adlawa, iyang gipatungha ang iyang mga Saksi, nga karon mokabat sa minilyon, alang sa susamang katuyoan. Sa walay kahadlok ilang ginayagyag ang patay sa espirituwal nga kahimtang sa Kakristiyanohan. Sa pagbuhat niana, matinumanon nilang gipalanog ang samag-hampak nga mga pahayag sa paghuyop sa trompeta sa Pinadayag kapitulo 8 ug 9. Dugang pa, makugihon silang nagmantala sa tambag nga gitala sa Pinadayag 18:4: “Gumula ka gikan kaniya, akong katawhan, . . . kon dili mo buot makadawat sa bahin sa iyang mga hampak.” Ang “kaniya” nga gitumong dinhi mao ang Dakong Babilonya, ang imperyo sa kalibotan sa bakak nga relihiyon, nga ang labing inilang membro niana mao ang Kakristiyanohan.
16. Sa unsang paagi ang minilyon migula sa bakak nga relihiyon?
16 Sukad 1919, ug ilabina sukad 1922, ang midaghan nga panon sa mga maaghop, sa pagsanong sa maong pag-awhag, namiya sa Dakong Babilonya. Sa sinugdan libolibo, dayon ginatos ka libolibo, ug karon minilyon mibulag sa bakak nga relihiyon, ilabina ang Kakristiyanohan, ug miikyas ngadto sa putling pagsimba. (Isaias 2:2-4) Sila nahibalo nga pinaagi lamang sa maong pagbiya sa Dakong Babilonya nga sila makalikay sa pagkaagom sa iyang mga hampak, nga mosangko sa iyang pagkalaglag inig-abot sa panahon nga ipatuman na ang talagsaong buhat ni Jehova.
17, 18. Sa unsang paagi si Jehova nahimong purongpurong sa dayandayan ug kulentas sa kaanyag alang sa iyang katawhan?
17 Gibatbat sa propetang Isaias ang malipayong kahimtang niadtong mobarog dapig sa putling pagsimba. Siya nagaingon: “Nianang adlawa si Jehova sa mga panon mahimong usa ka purongpurong sa dayandayan ug ingong usa ka kulentas sa kaanyag alang sa mga nahibilin sa iyang katawhan, ug ingong usa ka espiritu sa hustisya alang sa usang nagalingkod sa paghukom, ug ingong kagahom niadtong mopahilayo sa panaggubat gikan sa ganghaan.”—Isaias 28:5, 6.
18 Tungod sa ilang pagkamaunongon sa kamatuoran, si Jehova mao ang dili-himalatyong purongpurong sa himaya alang sa mga membro sa matinumanon ug maalamong ulipon nga matang. Kini matuod ilabina sukad 1926. Nianang tuiga ang Enero 1 nga isyu sa The Watch Tower nagpasiugda sa bililhong panginahanglan sa pagpadako sa ngalan ni Jehova diha sa usa ka makapatandog nga artikulong nag-ulohan “Kinsay Magpasidungog Kang Jehova?” Sukad niadto, ang dinihogang mga Kristohanon nagmantala nianang ngalana sa tibuok kalibotan nga walay sama sukad masukad. Niadtong 1931 sila labaw pang nailhan langkit kang Jehova pinaagi sa pagdawat sa ngalang mga Saksi ni Jehova. Dugang pa, ang usa ka dakong panon sa ubang mga karnero nanggula usab sa Kakristiyanohan ug sa ubang bahin sa Dakong Babilonya. Kini sila usab nagsagop sa ngalan sa Diyos. Ang sangpotanan? Si Jehova mismo—inay ang temporaryong nasodnong independensiya—ang nahimong purongpurong sa dayandayan ug kulentas sa kaanyag alang sa kapig upat ka milyong tawo diha sa mga 212 ka kayutaan ug kaislahan sa dagat. Pagkadakong kadungganan ang nabatonan nila sa pagdala sa ngalan sa bugtong buhi ug matuod nga Diyos!—Pinadayag 7:3, 4, 9, 10; 15:4.
“Ang Espiritu ni Jehova Mopuyo sa Ibabaw Niya”
19. Kinsa ang usang naglingkod sa paghukom, ug sa unsang paagi si Jehova nahimong usa ka espiritu sa hustisya alang kaniya?
19 Alang kang Jesus, “ang usang naglingkod sa paghukom,” si Jehova nahimong “usa ka espiritu sa hustisya.” Sa dinhi si Jesus sa yuta, siya wala magpadaog sa makapahubog nga espiritu sa kalibotanong mga pakigkombuya. Karong adlawa, ingong naentronong Hari ni Jehova, siya napuno sa balaang espiritu, nga nagatultol kaniya sa paghimog timbang, tin-aw-sa-panan-awng mga desisyon. Diha kang Jesus ang tagna natuman: “Ang espiritu ni Jehova mopuyo sa ibabaw niya, ang espiritu sa kaalam ug sa pagsabot, ang espiritu sa tambag ug sa kagahom, ang espiritu sa kahibalo ug ang pagkahadlok kang Jehova.” (Isaias 11:2) Sa pagkamatuod, pinaagi kang Jesus, si Jehova “magahimo sa hustisya nga latid ug sa pagkamatarong nga pamato.” (Isaias 28:17) Samtang ang nahubog sa espirituwal nga mga kaaway dag-on sa kalaglagan, ang hustisya ipatuman nganha sa balaang ngalan ug unibersohanong pagkasoberano ni Jehova.
20, 21. Sa unsang paagi ang mga pulong sa Isaias 28:1-22 mag-apektar kanimo?
20 Nan, pagkamaayo sa kahulogan niining tagna sa Isaias kapitulo 28 alang kanato karong adlawa! Kon molikay kita sa espirituwal nga mga palahubog sa Kakristiyanohan ug mohawid sa putling pagsimba, kita panalipdan sa dihang pagahimoon ni Jehova ang iyang katingalahang lihok ug iyang talagsaong buhat. Pagkadako sa atong kalipay nga masayod niini! Ug pagkamalipayon nato sa pagpalandong nga sa pagkahitabo niining mga butanga, ang tanan mapugos sa pagkasayod nga si Jehova sa mga panon milihok alang sa iyang matinumanong katawhan ug alang sa iyang kaugalingong kabayawan pinaagi ni Jesu-Kristo!—Salmo 83:17, 18.
21 Busa hinaot ang tanang tinuod nga mga Kristohanon mopadayon sa pagpasidaan nga walay kahadlok bahin sa katingalahang lihok ni Jehova. Pasagdi nga sila molahutay sa pagsugilon mahitungod sa iyang talagsaong buhat. Samtang buhaton nila kana, ipamantala nila sa tanan nga ang atong dili-matarog nga paglaom anaa sa Gingharian sa Diyos ubos sa iyang naentronong Hari. Hinaot ang ilang kadasig, determinasyon, ug pagkamaunongon makaamot ngadto sa walay-kataposang pagdayeg sa atong makagagahom sa tanang Diyos, si Jehova.—Salmo 146:1, 2, 10.
Makahinumdom Ka Ba?
◻ Nganong ang Kakristiyanohan anaa sa dili-hayahay nga kahimtang?
◻ Unsay katuyoan ni Jehova alang sa Jerusalem, ug nganong kadto “katingalahan” ug “talagsaon”?
◻ Unsang pasidaan ang gimantala sa mga Saksi ni Jehova maylabot sa Kakristiyanohan, ug unsang reaksiyon ang ilang nahibalag?
◻ Sa unsang paagi ang katawhan makaikyas sa dulnganan sa Kakristiyanohan?
[Hulagway sa panid 24]
Sublion ni Jehova ang iyang katingalahang buhat, karong panahona batok sa Kakristiyanohan