‘Pagkinabuhi nga Gihunahuna Kanunay ang Adlaw ni Jehova’
SUMALA SA GIASOY NI LYLE REUSCH
GIKAN sa pinakauna nakong nahinumdoman, ang among pamilyahanong kinabuhi nasentro sa usa ka kusganong pagtuo sa umaabot nga bag-ong kalibotan sa pagkamatarong. Ang akong inahan ug amahan nagbasa kanamong mga anak gikan sa Bibliya mahitungod ‘sa bag-ong mga langit ug bag-ong yuta’ ug mahitungod ‘sa baka ug oso mag-uban sa pagsibsib, sa leyon nga mokaon sa kompay sama sa torong baka, ug usa lamang ka bata ang magamando kanila.’ Kay ilang gihimo kana nga tinuod kaayo, akong gihanduraw ang akong kaugalingon nga ako kadtong gamay nga bata.—2 Pedro 3:11-13; Isaias 11:6-9.
Sa mga 1890 ang akong lolo, si August Reusch, nakakat-on sa pasukaranang mga kamatuoran sa Bibliya pinaagi sa pagsinulatay uban kang Charles T. Russell. Kaylap niyang gisangyawan ang sulod ug palibot sa iyang pinuy-anan sa Northwest Territory sa Canada, nga karon Yorkton, Saskatchewan. Siya sublisubling mitambag sa iyang mga anak: “Mga bata, bantayi ang 1914!” Tungod sa pagtuo nga ang adlaw ni Jehova maoy haduol na kaayo nahupngan ang akong amahan sa kaamgohan sa pagkadinalian nga mipadayon sa tibuok niyang kinabuhi ug kana nahimong usa ka dalan sa kinabuhi alang kanako.
Si Mama ug Papa mao ang kahugpongan sa pagkamaabiabihon. Ang usa ka grupo sa pagtuon sa Bibliya sa Saskatoon, Saskatchewan, Ecclesia of Bible Students magtigom nga regular sa among balay. Ang nagapanaw nga mga ministro (gitawag nga mga pilgrim) mag-istaran sa among balay. Ang akong igsoon nga lalaki, si Verne, ug ang akong igsoon nga babaye, si Vera, ug ako nakapahimulos sa espirituwal. Anaa kanunay ang kaamgohan sa katinuoran sa mensahe sa Gingharian ug sa dinalian nga panginahanglan sa pagsulti sa uban bahin niini. (Mateo 24:14) Wala nako damha nga sa umaabot nga katuigan gugolon nako ang dakong bahin sa akong kinabuhi sa pagpadayon sa buluhaton niining mga magpapanaw pinaagi sa pag-alagad ingon nga nagapanawng magtatan-aw sa mga Saksi ni Jehova.
Niadtong 1927, si Papa nagbalhin sa pamilya ngadto sa Berkeley, California. Unya, panahon sa grabeng kapit-osan sa pinansiyal niadtong 1933, ako migraduwar sa hayskol. Ang akong igsoon, si Verne, ug ako nag-isip sa among kaugalingon nga bulahan nga nakapanarbaho sa planta sa Ford Motor Company sa Richmond, California. Bisan pa niana, usa ka adlaw sa tingpamulak sa 1935, akong napalandong: ‘Kon ako kinahanglan nga motrabaho, maayo pa nga ako motrabaho alang sa kon unsay maayo.’ Niadtong adlawa ako miluwat, ug sa sunod nga adlaw ako misulat ug usa ka aplikasyon sa pag-alagad sa Bethel, ang tibuok-kalibotang hedkuwarter sa mga Saksi ni Jehova, sa Brooklyn, New York. Human sa pagtambong sa kulbahinam nga kombensiyon sa Washington, D.C., sa Hunyo 1935, ako gidawat alang sa Bethel nga pag-alagad.
Bethel nga Pag-alagad
Si Nathan Knorr, ang tigdumala sa pabrika, nagtudlo kanako nga motrabaho sa pag-atiman sa tinukod. Ako lamang ang trabahante. Ingon nga 20-anyos nga batan-on, ako mibati nga hinungdanon kaayo. Akoa ang tanan nga pagbuot sa buhatan, ug walay usa ang magsukitsukit kanako kon unsa ang akong gibuhat. Si Brader Knorr nakadayeg sa paagi sa akong pagtuman sa akong buluhaton, apan siya nakasabot sa usa ka suliran sa tinamdan. Siya padayong mitabang kanako aron ako makaugmad ug pagkamapainubsanon.
Ugaling lang, nadugaydugay una nako hiamgohi nga si Brader Knorr naningkamot gayod sa pagtabang kanako. Busa ako nangayo ug pasaylo tungod sa akong tinamdan ug mipahayag ug determinasyon sa pagbuhat ug mas maayo. Kana mao ang sinugdanan sa usa ka taas, ug mabination nga relasyon uban kang Brader Knorr, kinsa niadtong Enero 1942 nahimong ikatulong presidente sa Watch Tower Society.
Gawas sa pagbuhat sa trabaho sa pagmentenar, ako nakakat-on sa pagpaandar sa halos tanan sa mga makina sa tahianan ug libro o sa pagtabang niana nila. Sa wala madugay ako nagtrabaho sa buluhaton sa opisina, nga nagsulat ug nagpadalag mga asaynment sa trabaho sa tibuok pabrika. Ang tingpamulak ug ting-init sa 1943 mao ang linain nga panahon sa pagkapuliki ug kahinam. Ang kalibotan diha sa kinatung-an sa Gubat sa Kalibotan II ug ang mga Saksi ni Jehova nag-antos sa mga pagsamok, pagdakop, ug sentensiya sa pagkabilanggo pinasukad sa tanang matang sa dili-matarong nga mga sumbong. Sa 1940 ang Korte Suprema sa T.B. nagmando nga ang mga tunghaan makapugos sa mga estudyante sa pagsaludar sa bandera. Kini nagpatungha sa sunodsunod nga kapintasan diha sa 44 sa mga 48 ka estado niadto. Ang mga bata nga mga Saksi gipalagpot sa mga tunghaan, ang mga ginikanan gidakop, ug ang magubotong mga panon naggukod sa mga Saksi pagawas sa lungsod. Daghang indibiduwal ang gipusil, ang uban gibulitag alkitran ug gibutangag balhibo.
Sa dihang ang mga Saksi ni Jehova nakigbugno diha sa mga korte, ang daghang papeles sama sa mga sugo sa korte, mga sumaryo sa ebidensiya, ug mga dokumento nga gihimo sa legal nga kawani sa Sosyedad miabot sa akong talad aron imprentahon. Ang tanan kanamo mitrabaho ug daghang oras nga ekstrang panahon aron maabot ang mga gitagal nga petsa. Ang misangpot nga mga hukom sa Korte Suprema sa Mayo ug Hunyo sa 1943—sa dihang 12 sa 13 ka mga kaso ang gidesisyonan pabor sa mga Saksi ni Jehova—nahimong bahin sa mga talaan sa legal nga kasaysayan. Ako mapasalamaton nga nakakitang direkta kon sa unsang paagi si Jehova nagbukas sa dalan sa pagpanalipod ug legal nga pagtukod sa maayong balita.—Filipos 1:7.
Ang Tunghaan sa Teokratikanhong Ministeryo
Sa pila ka paagi kami wala kaayo masangkapi niadtong mga adlawa sa pagtuman sa dako kaayong buluhaton nga gitagna sa Mateo 24:14, nga mao, ‘iwali ang maayong balita sa Gingharian sa tibuok nga yuta sa dili pa moabot ang kataposan.’ Si Brader Knorr, ingon nga presidente sa Sosyedad, nakasabot sa panginahanglan sa usa ka edukasyonal nga programa. Uban sa uban pang lalaking membro sa pamilyang Bethel, akong nadawat ang imbitasyon sa pagpalista sa “Abanteng Kurso sa Teokratikanhong Ministeryo.” Kadto sa kadugayan naugmad nga Tunghaan sa Teokratikanhong Ministeryo, nga naglihok diha sa mga kongregasyon sa mga Saksi ni Jehova sukad 1943.
Kami nagtigom sa lawak tigomanan sa pamilyang Bethel sa Lunes sa gabii, Pebrero 16, 1942, ug si Brader Knorr mihatag sa unang nagatudlo nga pakigpulong. Ang iyang ulohan maoy “Mga Manuskrito sa Bibliya.” Si Brader T. J. Sullivan mao ang magtatan-aw sa tunghaan ug mihatag kanamog tambag aron sa pagtabang kanamo nga mouswag. Sa nahaigong panahon ako gihatagan niining asaynment sa pagkamagtatan-aw sa tunghaan sa Bethel, diin akong gilantaw nga usa ka dakong pribilehiyo. Apan panahon na usab sa disiplina.
Ako nahimong sobra ka hinawayon ug walay tahod sa pagtambag sa usa ka tigulang igsoong lalaki, busa si Brader Knorr prangka nga miingon kanako: “Walay usa ang moapresyar sa diha nga imong gamiton ang awtoridad sa dili maayong paagi.” Sa diha nga iyang gitin-aw ang iyang punto ug misanting ang akong mga dalunggan, ang dagko brawon nga mga mata ni Brader Knorr milumo. Diha sa malulutong tingog, siya mibasa sa Salmo 141:5: “Pasagding ang matarong mobunal kanako; kana maoy pagkamaluluton: ug pasagding siya magbadlong kanako; kana maoy usa ka maayong lana, nga dili magbuak sa akong ulo.” (King James Version) Akong gigamit kanang tekstoha sa daghang panahon sa dihang maoy akong responsabilidad ang paghatag ug makatul-id nga tambag sa uban.
Una sa pagsugod sa Tunghaan sa Teokratikanhong Ministeryo, diyutay ra kanamo ang adunay higayon sa paghatag ug daghang pakigpulong publiko. Sa dihang si Brader Rutherford namatay, si Brader Knorr nanlimbasog sa pag-ugmad sa iyang katakos sa pakigpulong. Ang akong lawak sa Bethel maoy sa ubos gayod sa iyang puy-anan, ug ako makadungog kaniya nga nagbansay sa iyang pakigpulong. Sa pagkatinuod dinosena ka beses, iyang gibasang kusog ang pakigpulong publiko nga “Kalinaw—Molungtad ba Kini?” una niya kadto ipakigpulong sa Cleveland nga kombensiyon niadtong 1942.
Nagpanaw
Human ako makaalagad ug 13 ka tuig sa Bethel, si Brader Knorr nagtudlo kanako sa pag-alagad sa kanataran ingon nga magtatan-aw sa distrito. Sa pagpahimangno kanako bahin sa akong bag-ong asaynment, siya miingon: “Lyle, ikaw karon may higayon sa pagpaniid nga direkta kon sa unsang paagi si Jehova makiglabot sa iyang katawhan.” Uban niini sa hunahuna ug sa duha ka maleta sa kamot, ako misugod sa akong karera ingon nga nagapanawng magtatan-aw sa Mayo 15, 1948. Una mosugod sa buluhaton sa distrito, ako nag-alagad ingon nga magtatan-aw sa sirkito sa pipila ka bulan.
Ang unang kompaniya, o kongregasyon, nga akong gialagaran mao ang usa ka gamay nga kongregasyon sa banika sa Waseca, Minnesota. Ako abanteng nagsulat ngadto kang Dick Cain, ang alagad sa kompaniya (ingon nga maoy pagtawag niadto sa nagadumalang magtatan-aw) sa pagsugat kanako sa tren. Siya espesyal payunir, ug aron mamenosan ang iyang galastohan, siya bag-o pang mibalhin gikan sa iyang inarkilahan nga lawak, diin siya nagpalabay sa tingtugnaw, ngadto sa iyang puy-anan sa ting-init, nga usa ka tolda. Ugaling lang, sa Minnesota ang Mayo dili eksaktong panahon sa ting-init! Niadtong gabhiona, nga nagkurog sulod sa tolda, ako nahibulong kon kaha ako nahiangay ba niining paagiha sa kinabuhi. Ako gisip-on nga grabe nga milungtad ug mga semana, apan ako nakalahutay.
Niadtong sayong mga katuigan sa dihang nagduaw sa nagkalainlaing mga kongregasyon ug mga sirkito, ako nag-istar sa mga balay sa mga igsoon ug nagdaladalag usa ka maleta. Ako nakasinati sa tanang matang sa tulganan, lakip na ang pagkatulog sa salog sa kusina, sa mga sopa sa salas, sa igang walay-bentilasyon nga mga pulangki. May panahong ako nagpuyo sa mga balay diin ang usa ka membro sa pamilya nagsupak sa among tinuohan. Sa Wisconsin, ang usa ka dili-magtutuo nga bana mitutok kanako sa tibuok semana iniglakaw ug inig-abot nako. Sa dihang siya mipauli nga nakainom usa ka gabii niana, ug ako nakadungog kaniya nga nanghulga nga “pusilon ko kanang si Tanpulano,” ako nakahukom nga kadto panahon na sa pagpahawa. Apan ang dili-maayong mga kasinatian maoy talagsa ra ug nakadugang lang ug kadasig sa akong asaynment. Sila maoy makapahimuot sa kaulahian.
Ako Nakakaplag ug Kauban
Akong nahinumdoman kana pag-ayo. Sa usa ka sirkitong asembliya sa Tiffin, Ohio, akong nahibalag ang usa ka maanyag, brawon-ug-mata batan-ong dalaga, si Leona Ehrman, nga taga-Fort Wayne, Indiana. Siya usab namatuto sa Kristohanong pagtuo ug matinumanong payunir sa daghang katuigan. Ang pagpanaw kanunay wala makahatag ug higayon sa pagpangulitawo, apan padayon kaming nagkasuod pinaagig pagsulatay. Unya, sa 1952, ako misukna, “Mosugot ka ba?” ug siya miingon, “Oo, mosugot ako!” ug mao nga kami nagkasabot. Kami nagminyo. Kami kasagaran pangutan-on ngano nga wala na lang kami mopuyo nga may balay ug pamilya, apan kami moingon nga aduna kamiy usa ka pamilya—mga igsoong lalaki, mga igsoong babaye, mga amahan, ug mga inahan diha sa mga 44 ka estado diin kami nag-alagad.—Marcos 10:29, 30.
Ang pipila nangutana, ‘Wala ba kamo kapoya ug mobati nga gustong moundang?’ Oo, dili lang kas-a. Apan tali kanamong duha, sa dihang ang usa maluya, ang lain molig-on. Usa ka higayon misulat ako ngadto sa akong igsoong lalaki, si Verne, nga mihangyo kaniya maylabot sa posibilidad nga motrabaho uban kaniya sa iyang negosyo sa pagpamintal. Siya mitubag nga kanunay niya kanang gipangandoy tungod kay kami suod kaayo sa dihang nagtubo. Bisan pa niana, siya mitambag kanako nga timbangtimbangon pag-ayo ang akong desisyon. Unya akong nahinumdoman ang kanunay gisubling mga pulong ni Brader Knorr ngadto sa mga membro sa pamilyang Bethel: “Wala kinahanglana ang dakong panlimbasog aron sa pag-undang; gikinahanglan ang kaisog ug integridad sa pagpabilin sa inyong asaynment.” Kana nagpabiling maayong tambag.
Walay minyong nagapanawng magtatan-aw ang magpabilin ug dugay sa iyang tinudlong-buluhaton kon walay usa ka asawa nga matinumanon ug mapaluyohon, ingon nga si Leona mao alang kanako. Tungod sa iyang madasigon, mahigugmaong personalidad ug mapadayonong masadyaong tinamdan diha sa mga kongregasyon siya gimahal sa linibo. Wala ako kapoyi sa pagsulti unsa ka dako ang akong paghigugma kaniya. Kana, ako, nakapaneguro, nakatabang kaniya sa pagpabilin usab sa buluhaton.
Nakasaksi sa Panalangin ni Jehova
Ang pangunang buluhaton sa magtatan-aw sa distrito nasentro sa sirkitong asembliya, diin siya mag-alagad matag semana ingong tsirman, publikong mamumulong, ug magtatan-aw sa tunghaan. Ang panalangin ni Jehova niini nga kahikayan maoy dayag gikan sa kamatuoran nga ginatos sa mga sirkitong asembliya nga akong gidumala, walay usa ang napakyas. Tinuod, may pipila nga nabalda, apan walay usa ang gikanselar.
Sa Wooster, Ohio, sa tingpamulak sa 1950, sa dihang akong gipahibalo ang pangataposang awit sa gabii nga sesyon sa Sabado, usa ka magubotong panon nga kapin sa usa ka libo ka magsusupak naporma sa gawas sa teatro diin ang asembliya gihimo. Ang magubotong panon nagdala ug kinahonkahon sa mga daot nga itlog aron ilabay kanamo sa dihang kami mogawas. Busa among gitimbangtimbang ang kahimtang ug gipadayon ang programa pinaagi sa mga awit, mga kasinatian, ug dihadiha nga mga pakigpulong sa Bibliya. Ang 800 ka mga Saksi nagpabilin nga kalmado ug mapailobon.
Sa alas 2:00 s.b., ang panahon maoy tugnaw sa hilabihan. Ingon nga daw pag-andam alang sa paggawas, ang mga atendant nagpagawas sa mga hose sa sunog ug misugod sa paghugas sa mga itlog nga mitugdon sa atubangan sa asiras. Ang magubotong panon naporma na usab, nga mibiya sa dili-tugnawng pondohanan sa bus sa duol. Apan ang gibuhat sa mga atendant nakapalinga, ug sa hilom among gipapauli ang nanambong agi sa ganghaan sa likod. Ug ang tanan luwas nga nakaabot sa ilang mga sakyanan. Ang pagsamok sa magubotong panon nahitabo sa ubang mga asembliya sa Ohio, sa Canton, Defiance, ug Chillicothe. Apan ang kapintasan sa magubotong panon nagkamenos, sa dihang ang mga desisyon sa Korte Suprema sa T.B.A. nga pabor kanamo nasabtan niadtong mga malinapason.
Sa wala madugay tungod sa mga suliran sa panglawas gikinahanglan ang kausaban. Sa mga tungatunga sa 1970’s, ang Sosyedad malulutong nagtudlo kanako sa pag-alagad ingon nga magtatan-aw sa sirkito sa usa ka amihanang dapit sa California diin ang mga kongregasyon maoy duol ra sa usag usa ug dunay mga pasilidad sa pag-atiman sa panglawas. Samtang ang katungdanan sa distritong magtatan-aw naglangkit sa daghang pagpanaw ug pag-atiman ug pagdumala sa daghang sirkito, ang katungdanan sa magtatan-aw sa sirkito naglangkit sa paghikay sa mga sirkitong asembliya ug pagtudlo ug pagbansay sa bahin sa programa. Dugang pa, ang Tunghaan sa Payunir nga Pag-alagad kinahanglan nga hikayon ug alagaran. Busa ang buluhaton sa nagapanawng mga magtatan-aw, distrito o sirkito, maoy usa ka bug-os panahon, magantihong paagi sa kinabuhi.
Padayong Nagpaabot sa Adlaw ni Jehova
Sa una nakong mga nahinumdoman mga kapin sa 70 ka tuig kanhi, ako mibati sa kanunay ug maidlot nga kaamgohan sa pagkadinalian. Ang Armageddon sa kanunay, sa akong hunahuna, moabot sa adlaw tapos sa ugma nga adlaw. (Pinadayag 16:14, 16) Sama sa akong amahan, ug sa iyang amahan una kaniya, ako nagkinabuhi sumala sa gidasig sa apostol, “nga gihunahuna kanunay ang presensiya sa adlaw ni Jehova.” Ako kanunay naglantaw sa gisaad bag-ong kalibotan ingon nga usa ka ‘katinuoran bisan wala makita.’—2 Pedro 3:11, 12; Hebreohanon 11:1.
Kini nga paglaom nga nahatisok kanako gikan sa pagkabata sa dili madugay matuman ra gayod. “Ang baka ug oso mag-uban sa pagsibsib,” “ang leyon mokaon sa kompay sama sa torong baka,” ug “usa ka gamayng bata ang magamando kanila.” (Isaias 11:6-9) Kanang makadasig sa kasingkasing nga mga saad mao ang gipasalig sa mga pulong ni Jehova ngadto kang Juan sa Pinadayag 21:5: “Ang Usa nga nagalingkod sa trono miingon: ‘Tan-awa! Akong ginabag-o ang tanang mga butang.’ Usab siya miingon: ‘Isulat mo, kay kining mga pulonga maoy kasaligan ug matuod.’”