Jehova—“Usa ka Maisog nga Persona sa Gubat”

ANG abtik kaayong mga sundalo sa Ehipto nalaglag. Diha sa daplin sa Pulang Dagat, ang patayng mga lawas sa mga nagsakay sa karro ug mga sundalong nagkabayo nabanlas sa balod, ug ang mga hinagiban sa gubat nagkatag sa daplin sa dagat. Gipangulohan ni Moises, ang mga lalaki sa Israel masadyaong nag-awit sa awit sa kadaogan: “Magaawit ako kang Jehova, kay siya nabayaw sa hilabihan. Ang kabayo ug ang mga nagkabayo iyang gilabog sa dagat. Si Jehova maoy usa ka maisog nga persona sa gubat. Si Jehova mao ang iyang ngalan.”​—Exodo 15:1, 3.

Ang kadaogan ni Jehova sa Pulang Dagat sa pagkamatuod maoy usa ka kapahayagan sa iyang pagkalabaw diha sa panggubatan. Mihawa ang Israel sa Ehipto nga daw andam makiggubat apan kulang sa kasarang sa pakiggubat. Pinaagi sa usa ka haligi nga panganod nga nahimong haligi nga kalayo inigkagabii, gidala sila ni Jehova gikan sa Rameses ngadto sa “daplin sa kamingawan” sa Etham. (Exodo 12:37; 13:18, 20-22) Unya si Jehova miingon kang Moises: “Sultihan mo ang mga anak sa Israel, nga managbalik sila ug ipahimutang nila ang ilang kampo sa dili pa moabot sa Pihahirot sa taliwala sa Migdol ug sa dagat sa dapit sa Baal-zephon. . . . Unya si Paraon magaingon mahitungod sa mga anak sa Israel, ‘Nagsaag sila sa yuta.’ . . . Ug iyang gukdon sila.” (Exodo 14:1-4) Sa masinugtanon, mibalik ang Israel ug mipanaw ngadto sa Pihahirot. Gitaho sa mga espiya ni Paraon ang gitakobang kalibog, ug sumala sa gitagna, gipanawag ni Paraon ang iyang mga sundalo aron sa paggukod.​—Exodo 14:5-9.

Usa ba ka Laang—Alang sa Israel o Kang Paraon?

Gilibotan sa mga bukid, ug dagat sa atubangan, sa likod mga Ehiptohanon, ang nangalisang nga mga Israelinhon daw nalaang, busa nangayo sila sa Diyos ug tabang. Gitigom ang mga tawo, si Moises miingon: “Ayaw kahadlok. Barog nga malig-on ug tan-awa ang kaluwasan ni Jehova, nga iyang pagabuhaton karon kaninyo. Kay ang mga Ehiptohanon nga inyong nakita karon, dili na gayod ninyo makita pag-usab. Si Jehova mismo ang makig-away alang kaninyo, ug maghilom kamo.” (Exodo 14:10-14) Matuod sa maong saad, “ang haligi nga panganod mibalhin gikan sa ilang atubangan ug nagpahimutang sa ilang likod. Busa kini nahatunga sa kampo sa mga Ehiptohanon ug sa kampo sa Israel. . . . Ug ang usa nga pundok wala moduol sa lain sa tibuok gabii.”​—Exodo 14:15-20.

Sumala sa sugo ni Jehova, gibakyaw ni Moises ang iyang sungkod ibabaw sa dagat ug “nabulag” nga tungod niana nakaikyas ang mga Israelinhon. Ug usa ka katingalahang milagro nahitabo! (Exodo 14:16, 21) Usa ka kusog nga hangin gikan sa silangan misugod sa pagbulag sa mga tubig sa Pulang Dagat, napormang usa ka agianan nga igog gilapdon aron ang tibuok nasod​—duolan sa tres milyones​—makaagi nga nakahana sa gubat. Sa wala ug sa tuo nga linya sa Israelinhon, ang “nabagtok” nga tubig nagbarog samag duha ka dakong haligi.​—Exodo 15:8.

Ang mga Israelinhon, nga gitabangan sa kahayag gikan sa haligi nga kalayo, nakaikyas nga miagi sa nauga sa hangin nga salog sa dagat. Sa pagkabuntag, ang kataposan sa mga Israelinhon nakaabot na sa daplin. “Ug ang mga Ehiptohanon migukod, ug ang tanang mga kabayo ni Paraon, ang iyang mga karro ug ang iyang mga sundalong nagkabayo nagsugod sa paggukod kanila, ngadto sa tunga sa dagat.” Ang mga manggugukod midasdas sa pagsulod sa laang!​—Exodo 14:23.

“Gigubot [ni Jehova] ang kampo sa mga Ehiptohanon. Ug iyang gipanguha ang mga ligid sa ilang mga karro busa naglisod sila sa pagpadagan niini.” Karon gituyhad ni Moises ang iyang kamot ibabaw sa dagat, ug “ang dagat mibalik sa iyang naandang kahimtang.” Ang mga haligi nga tubig nahagsa ug misugod sa paglamoy sa mga Ehiptohanon. Sila misulay sa pagkalagiw, “apan giuyog [sila] ni Jehova sa tunga sa dagat.” Walay naluwas! Sa dakong kalipay ang mga Israelinhon miawit sa ilang awit sa kadaogan ngadto kang Jehova.​—Exodo 14:24–​15:3; Salmo 106:11.

Si Jehova Nakiggubat Alang Kang Josue

Si Jehova napamatud-ang “usa ka maisog nga persona sa gubat” diha sa ubang mga gubat. Ang usa mao ang gubat sa Ai. Ang unang pag-atake sa siyudad napakyas tungod sa daotang buhat ni Achan. Sa dihang nahusay kining butanga, si Jehova mihatag kang Josue ug mga instruksiyon sa gubat.​—Josue 7:1, 4, 5, 11-26; 8:1, 2.

Gisunod ang mga instruksiyon ni Jehova, sa pagkagabii gibanhigan ni Josue ang likod sa siyudad, sa kasadpang bahin niini. Ang iyang kinadakoang puwersa gibalhin ngadto sa amihanan sa usa ka walog nga gawas lamag diyutay sa Ai ug daw andam na sa pag-atake sa atubangan. Ang kalalakin-an sa Ai nabitik sa laang. Natugob gihapon sa kalipay tungod sa ilang miaging kadaogan sa gubat, sila nanagan paggawas sa siyudad sa pag-atake sa mga Israelinhon. Nagpakaaron-ingnong miatras, nanagan ang mga Israelinhon paingon sa “dalan sa kamingawan,” gidala sa layo ang mga kaaway gikan sa Ai.​—Josue 8:3-17.

Sa eksaktong panahon, si Jehova miingon kang Josue: “Ilabog ang bangkaw nga anaa sa imong kamot patunong sa Ai, kay ihatag ko kana sa imong kamot.” Sa pagsignal niini, ang mga nanagbanhig miatake sa siyudad, gilaglag kini pinaagi sa espada ug kalayo. Nakakita sa kalayo, ang kaawayng mga puwersa sa gawas nangaluya. Si Josue, mibali gikan sa pag-atras ngadto sa pag-atake, nababoy ang mga kaaway diha sa tunga sa iyang duha ka puwersa. Usa ba kini ka tawhanong kadaogan? Dili. Ang mga Israelinhon nakadaog tungod kay, sama sa giingon ni Josue sa ulahi kanila: “Si Jehova nga inyong Diyos mao ang usa nga nakig-away alang kaninyo.”​—Josue 8:18-27; 23:3.

Ang Gubat sa Kishon

Ang pagkalabaw ni Jehova sa gubat gipakita na usab sa Walog sa Kishon, duol sa Megiddo. Gidaogdaog sa hari sa Canaan nga si Jabin ang Israel sulod sa 20 ka tuig. Ang iyang mga sundalo, ubos sa pagdumala ni Sisera, adunay 900 ka karro nga may puthawng singkaw diha sa mga ligid niini​—daw usa sila ka dili mapildi nga sundalo niadtong mga adlawa.​—Maghuhukom 4:1-3.

Bisan pa niana, pinaagi sa manalagnang babaye nga si Debora, gisugo ni Jehova si Maghuhukom Barak sa pagtigom ug napulo ka libong mga manggugubat sa ibabaw sa Bukid sa Tabor aron sa pakig-away sa mga sundalo ni Jabin. Mireaksiyon dayon si Sisera tungod sa pagkakita nga midaghan ang mga sundalo, midalidali sa pag-adto gikan sa Haroseth ngadto sa sulog nga suba sa Kishon, sa taliwala sa Bukid sa Tabor ug Megiddo. Siya sa walay duhaduha naghunahuna nga dinhi sa patag, ang kulang ug hinagibang mga sundalong magbabaktas sa Israel wala gayoy purohan batok sa iyang mga karro. Wala siya maghunahuna, hinunoa, nga siya nagapakig-away batok sa langitnong Kaaway.​—Maghuhukom 4:4-7, 12, 13.

Gisugo ni Jehova si Barak sa pagbalhin gikan sa hilwas nga kabungtoran sa Tabor ngadto sa walog, nga naglaang sa mga sundalo ni Sisera ngadto sa gubat. Unya si Jehova miatake! Tungod sa dakong baha ang panggubatan nahimong kalapokan, ang mga sundalo ni Sisera wala makalihok. Sa kalibog, napildi dayon sa mga sundalo sa Israel ang ilang mga kaaway. “Ang tanang kampo ni Sisera nahulog sa sulab sa pinuti. Walay usa ka tawo nga nahabilin.” Ang nagdakong baha sa Kishon nakaungot sa mga karro sa Canaanhon ug hayan nabanlas ang mga patayng lawas.​—Maghuhukom 4:14-16; 5:20, 21.

Kadaogan Batok sa Gog ug sa Iyang Panon

Kining karaang mga hitabo naghatag ug mga panan-aw-daan sa dakong kadaogan ni Jehova sa umaabot. Nangawan-kawan mao ang usa ka gubat nga mahitabo “sa ulahing bahin sa mga tuig.” Sumala sa tagna ni Ezekiel, andamon ni Gog, nga simbolo sa “magmamando niining kalibotana,” si Satanas nga Yawa, ang usa ka internasyonal nga puwersa sa pag-atake. Siya maoy manguna sa iyang mga sundalo sa pagsulong sa mahulagwayong “kabukiran sa Israel,” sa ato pa, ang nabayaw nga espirituwal nga kahimtang sa Kristohanong “Israel sa Diyos.”​—Ezekiel 38:1-9; Juan 12:31; Galacia 6:16.

Unsay makaaghat ni Gog sa iyang bug-os nga pag-atake sa katawhan sa Diyos? Ang tagna nagpunting ngadto sa ilang malinawon, mauswagon sa espirituwal nga kahimtang. Si Gog miingon: “‘Sulongon ko ang yuta sa hawan nga banika. Sulongon ko ang mga tawo nga nagpuyong malinawon, nga nagpuyo sa kasegurohan, silang tanan nga nagpuyo nga walay mga kuta, ug walay mga kandado ug mga trangka sa ilang mga ganghaan.’ Sa pagkuha sa mga inagaw ug sa pag-ilog sa tukbonon . . . [sa] usa ka katawhan . . . mga nakatigom ug bahandi ug kabtangan.”​—Ezekiel 38:10-12.

Sa katibuk-an, ang katawhan ni Jehova dili dato sa materyal nga paagi. Hinunoa, sila nakapamungag daghang espirituwal nga mga bahandi ingong resulta sa ilang tibuok-kalibotang pagsangyaw nga buluhaton. “Usa ka dakong panon . . . nga gikan sa tanang kanasoran” ang ginatigom karon, nga may gidaghanong kapin sa upat ka milyon. (Pinadayag 7:9, 10) Pagkadakong bahandi gayod! Si Satanas​—naglagot tungod niining espirituwal nga kauswagan—​maningkamot sa pagpapha sa katawhan sa Diyos.

Apan ang pagsulong sa mahulagwayong yuta sa Israel, si Gog, sa ingon, nagaatake kang Jehova nga Diyos mismo. “Ang akong kaligotgot magautbo sa akong ilong,” nagaingon si Jehova, nga maoy moatake alang sa iyang katawhan. Ang mga sundalo ni Gog malaglag diha sa kagubot. “Ang tagsatagsa ka pinuti sa tawo mahimong batok sa iyang igsoong lalaki.” Unya buhian ni Jehova ang iyang malaglagong mga gahom​—“ulan nga makapabaha ug dagkong mga ulan-nga-yelo, kalayo ug asupri.” Sama diha sa Pulang Dagat, sa Ai, ug sa Kishon, si Jehova sa makausa pa makiggubat alang sa iyang katawhan ug magahimaya sa iyang ngalan. “Ako magapadako sa akong kaugalingon ug magabalaan sa akong kaugalingon ug magapaila sa akong kaugalingon atubangan sa mga mata sa daghang mga nasod; ug sila makaila nga ako mao si Jehova.”​—Ezekiel 38:18-23.

Ang makasaysayanhong talaan sa mga gubat ni Jehova sa karaang panahon naghatag kanato ug rason alang sa bug-os nga pagsalig diha sa iyang umaabot nga kadaogan sa panahon sa “dakong kasakitan.” (Mateo 24:21, 22) Kanunay nga nagagahom, labaw ang hunahuna ni Jehova sa iyang mga kaaway ug makapamaniobra sa mga kahimtang alang sa kaluwasan sa iyang katawhan. Gani, ang gitagna ni Isaias mahitabo unya: “Si Jehova mogula sama sa usa ka tawong gamhanan. Sama sa usa ka manggugubat iyang pukawon ang kadasig. Siya mosinggit, oo, siya mosinggit ug suliyaw sa gubat; ibabaw sa iyang mga kaaway siya magpakita sa iyang kaugalingon nga mas gamhanan.” (Isaias 42:13) Diha sa mga mata sa iyang mga Saksi, siya sa walay kataposan mao si JEHOVA, ANG “MAISOG NGA PERSONA SA GUBAT”!​—Exodo 15:3.

[Mapa sa panid 25]

(Alang sa aktuwal nga pagkahan-ay, tan-awa ang publikasyon)

Ang dalan sa Paggawas gikan sa Ehipto

GOSHEN

Memphis

Rameses

Succoth

Migdol

Pihahiroth

Etham

[Mga hulagway sa panid 26]

Dinhi, sa dapit sa Ai, gidala ni Jehova si Josue ug ang Iyang katawhan ngadto sa usa ka dakong kadaogan

Ang mga tubig sa Kishon misaka dihadiha, nakadugang sa kaparotan sa mga kaaway ni Jehova

[Credit Line]

Mga Hulagway: Pictorial Archive (Near Eastern History) Est.