Gidungog ba sa Diyos ang Imong mga Pag-ampo?
“WALA gayod nako hibatyagi nga gidungog ang akong mga pag-ampo,” miingon ang usa ka babayeng nagpuyo sa Hokkaido, Hapon. Niining bahina siya wala mag-inusara. Gibati sa daghang tawo nga ang ilang pag-ampo wala gayod tubaga. Ngani, ikaw tingali nahibulong kon dunggon ba sa Diyos ang imong mga pag-ampo.
Gitumong sa minilyon ang ilang dimaihap nga mga pag-ampo ngadto sa dimaihap nga mga diyos. Nganong maorag daghan kaayong mga pag-ampo ang wala tubaga? Aron mahibaloan, atong susihon una ang mga matang sa mga pag-ampo nga ilang gitanyag.
Unsay Giampo sa Pipila?
Sa panahon sa Bag-ong Tuig, duha sa tulo ka bahin sa populasyon sa Hapon, o mga 80 ka milyong mga tawo, mag-ampo sa kapilya sa Shinto o sa mga templo nga Buddhista. Sila mohatag ug mga sensilyo ingong mga halad ug moampo alang sa maayong suwerte ug kahilwasan sa pamilya.
Sa Enero ug Pebrero—sa dili pa ang mabudlay nga mga pasulit aron makasulod sa kolehiyo—ang mga estudyante magpanon ngadto sa mga kapilya sama sa usa diha sa Tokyo nga ilado sa iyang diyos sa edukasyon. Ilang isulat ang ilang mga hangyo diha sa kahoyng mga plaka sa pag-ampo ug ibitay kini sa mga lipak nga kahoy diha sa mga tugkaran sa mga kapilya. Labing menos 100,000 niining mga plakaha ang nadayandayan diha sa palibot sa usa ka iladong ampoanan sa Tokyo panahon sa pasulit sa 1990.
Daghan sa mga pag-ampo nalangkit sa panglawas. Sa usa ka kapilya sa Kawasaki, Hapon, ang mga tawo mag-ampo aron panalipdan batok sa AIDS. “Ang kahulogan sa pag-ampo batok sa AIDS,” mibatbat ang pari sa kapilya, “mao nga kini nagpahimo sa mga tawo nga maalamon sa ilang paggawi.” Apan kana lang ba ang ginaampo didto?
Sa laing templo, usa ka edarang babaye ang miampo alang sa “dihadiha nga kamatayon.” Ngano? Tungod kay buot niyang taposon na ang iyang pag-antos sa dugay nang sakit ug dili buot nga mahimong palas-anon sa iyang pamilya.
Diha sa usa ka gitawag nga Kristohanong nasod, ang kapitan sa usa ka tem sa potbol miampo alang sa kadaogan ug proteksiyon gikan sa kadaot sa iyang tem. Ang mga Katoliko sa Polandia nag-ampo alang sa ilang personal nga kaayohan ug nagdayandayan sa ilang Madonna uban sa alahas kon nagtuo sila nga gidungog ang ilang mga pag-ampo. Daghang tawo ang mohugop sa mga simbahan sama sa bantog nga Guadalupe sa Siyudad sa Mexico, ug Lourdes, sa Pransiya, nangaliyupo alang sa milagrosong mga pagkaayo.
Sa Silangan o Kasadpang hemisperyo, ang mga tawo mag-ampo alang sa daghan ug sa nagkadaiyang personal nga mga katarongan. Tataw, buot nilang madungog ug tubagon ang ilang mga pag-ampo. Apan, realistikanhon ba ang pagdahom nga ang tanang mga pag-ampo patalinghogan? Kumosta ang imong kaugalingong mga pag-ampo? Kini ba gitubag? Sa pagkamatuod, dunggon ba gayod sa Diyos ang mga pag-ampo?