Salig sa Nagaluwas nga Bukton ni Jehova

“Oh Jehova, . . . mahimo unta ikaw nga among bukton sa matag buntag, oo, ang among kaluwasan sa panahon sa kagul-anan.”—ISAIAS 33:2.

1. Sa unsang diwa si Jehova adunay gamhanang bukton?

SI Jehova adunay usa ka gamhanang bukton. Hinuon, sanglit “Ang Diyos Espiritu,” kana dili usa ka bukton nga unod. (Juan 4:24) Sa Bibliya, ang masambingayong bukton naghawas sa katakos sa pagpangusog. Busa, maoy pinaagi sa iyang bukton nga ang Diyos nagaluwas sa iyang katawhan. Sa pagkamatuod, ‘sama sa usa ka magbalantay sa karnero, ang Diyos nagapasibsib sa iyang panon. Ginatigom niya ang mga nating karnero diha sa iyang bukton, ug ginakugos niya sila diha sa iyang dughan.’ (Isaias 40:11; Salmo 23:1-4) Pagkalayo sa kapeligrohan ang gibati sa katawhan ni Jehova diha sa mahigugmaon niyang bukton!​—Itandi sa Deuteronomio 3:24.

2. Unsang mga pangutanaha ang angay natong hisgotan?

² Giunsa sa bukton ni Jehova pagluwas ang iyang katawhan, sa nangagi ug karon? Unsang tabang ang gihatag sa Diyos kanila ingong usa ka kongregasyon? Ug nganong ang iyang katawhan makasalig sa iyang nagaluwas nga bukton sa tanan nilang mga kagul-anan?

Nagalihok ang Nagaluwas nga Bukton sa Diyos

3. Sa unsa gipasidungog sa Kasulatan ang pagkaluwas sa Israel gikan sa Ehipto?

³ Una pagawsa ang mga Israelinhon gikan sa pagkaulipon sa Ehipto 3,500 ka tuig kanhi, ang Diyos miingon sa iyang propetang si Moises: “Sultihi ang mga anak sa Israel, ‘Ako mao si Jehova, ug ako magadala kaninyo gikan sa mga mabug-at nga lulan sa mga Ehiptohanon ug pagawson kamo gikan sa pagkaulipon nila, ug pagatubson ko gayod kamo pinaagi sa bukton nga tinuy-od ug pinaagi sa dagkong mga paghukom.’” (Exodo 6:6) Sumala kang apostol Pablo, gipagawas sa Diyos ang mga Israelinhon gikan sa Ehipto “pinaagi sa bukton nga binakyaw.” (Buhat 13:17) Gipasidungog ngadto sa Diyos sa mga anak ni Core ang pagpukan sa Yutang Saad, nga miingon: “Dili pinaagi sa ilang kaugalingong pinuti nga napanag-iya nila ang yuta, ug ang ilang bukton mismo dili mao ang naghatag kanila sa kaluwasan. Kay kadto mao ang imong tuo nga kamot ug imong bukton ug ang kahayag sa imong nawong, tungod kay ikaw nahimuot kanila.”​—Salmo 44:3.

4. Sa unsang paagi ang pagsalig sa nagaluwas nga bukton ni Jehova gibaslan sa mga adlaw sa pagsulong sa Asirya?

⁴ Ang bukton ni Jehova mitabang usab sa iyang katawhan sa mga adlaw sa pagsulong sa Asirya. Niadtong panahona ang propetang si Isaias miampo: “Oh Jehova, ipakita kanamo ang kaluoy. Kami naglaom diha kanimo. Mahimo unta ikaw nga among bukton sa matag buntag, oo, among kaluwasan sa panahon sa kagul-anan.” (Isaias 33:2) Ang maong pag-ampo gitubag sa dihang gipatay sa manulonda sa Diyos ang 185,000 sa kampo sa Asirya, nga nagpapauli kang Haring Senakerib gikan sa Jerusalem “uban sa nawong nga maulawon.” (2 Cronicas 32:21; Isaias 37:33-37) Ang pagsalig diha sa nagaluwas nga bukton ni Jehova kanunay nga gibaslan.

5. Unsay gibuhat sa gamhanang bukton ni Jehova alang sa gilutos nga mga Kristohanon sa pagkatapos sa Gubat sa Kalibotan I?

⁵ Ang gamhanang bukton sa Diyos nagluwas sa gilutos nga dinihogang mga Kristohanon sa pagkatapos sa Gubat sa Kalibotan I. Niadtong 1918 ang hedkuwarter sa Nagamandong Lawas giatake sa ilang mga kaaway, ug ang iladong mga igsoong lalaki gipriso. Kay nahadlok sa kalibotanong mga gahom, ang mga dinihogan halos mihunong sa ilang buluhatong pagsangyaw. Apan giampo nila nga kana mabuhi pag-usab ug mahinloan sila sa sala sa pagkawalay-kalihokan ug sa kahugawan sa kahadlok. Ang Diyos mitubag pinaagi sa pagpahinabo nga mapagawas ang naprisong mga igsoong lalaki, nga nahukmang walay sala wala madugay human niadto. Ingong sangpotanan sa mga kamatuoran nga gipahayag panahon sa ilang kombensiyon niadtong 1919 ug pagbubo sa nagpalihok nga espiritu sa Diyos, ang mga dinihogan nabuhi pag-usab alang sa way-kahadlok nga pag-alagad kang Jehova ingong pangataposang katumanan sa Joel 2:28-32.​—Pinadayag 11:7-12.

Tabang Diha sa Kongregasyon

6. Giunsa nato pagkahibalo nga posible ang pag-antos sa masulayong kahimtang diha sa usa ka kongregasyon?

⁶ Kay ang Diyos nagasuportar sa iyang kongregasyon sa katibuk-an, ang iyang bukton nagatuboy sa mga indibiduwal diha niana. Hinuon, ang mga kahimtang dili hingpit sa bisan diing kongregasyon kay ang tanang tawo dili man hingpit. (Roma 5:12) Busa may panahong ang pila ka alagad ni Jehova usahay makasinatig masulayon nga kahimtang diha sa usa ka kongregasyon. Pananglitan, bisan tuod si Gayo mihimog “usa ka buhat sa pagtuo” sa pag-abiabi sa nagduaw nga mga igsoon, si Diotrepes wala magdawat kanila ug misulay pa sa pagpalagpot sa mga maabiabihon gikan sa kongregasyon. (3 Juan 5, 9, 10) Bisan pa niana, gitabangan ni Jehova si Gayo ug ang uban sa pagpadayon sa pagpakitag pagkamaabiabihon sa pagpaluyo sa buluhatong pagsangyaw sa Gingharian. Ang mainampoon nga pagsalig sa Diyos angay magtabang kanato sa pagpadayon sa pagbuhat sa mga buhat sa pagtuo samtang gipaabot nato nga iyang tul-iron ang usa ka kahimtang nga basin magasulay sa atong pagtuo.

7. Bisan pa sa unsang mga kahimtang diha sa kongregasyon sa Corinto nga gituman sa maunongong mga Kristohanon ang ilang pagpahinungod sa Diyos?

⁷ Pananglitan nga ikaw nakig-uban sa kongregasyon sa Corinto sa unang siglo. Sa usa ka panahon, nameligro ang panaghiusa niadto tungod sa mga pundokpundok, ug ang pagtugot sa imoralidad nagpameligro sa espiritu niadto. (1 Corinto 1:10, 11; 5:1-5) Ang mga magtutuo nagkihaay sa usag usa sa kalibotanong mga korte, ug ang pipila naglalis mahitungod sa lainlaing mga butang. (1 Corinto 6:1-8; 8:1-13) Ang panag-away, kasina, kasuko, ug kagubot nagpalisod sa kinabuhi. Ang pipila nagduhaduha gani sa awtoridad ni Pablo ug nagtamay sa iyang katakos sa pagpamulong. (2 Corinto 10:10) Bisan pa niana, ang mga maunongon nga nakig-uban sa maong kongregasyon nagtuman sa ilang pagpahinungod sa Diyos nianang masulayong panahon.

8, 9. Unsay atong pagabuhaton kon atubangon nato ang usa ka masulayong kahimtang diha sa kongregasyon?

⁸ Kon motungha ang usa ka masulayong kahimtang, kinahanglang mounong kita sa katawhan sa Diyos. (Itandi ang Juan 6:66-69.) Magmapailobon kita sa usag usa, kay nakaamgo nga kinahanglag taastaas nga panahon ang pila ka indibiduwal aron sa pagsul-ob sa “bag-ong pagkatawo” ug pagsul-ob sa kahangawa, kalulot, pagpaubos sa hunahuna, kalumo, ug hataas nga pailob. Sanglit ang mga alagad sa Diyos magkalain usab ug kagikan, kitang tanan kinahanglang magpakitag gugma ug magpinasayloay.​—Colosas 3:10-14.

⁹ Tapos sa daghang katuigan sa pag-alagad kang Jehova, usa ka igsoon miingon: “Kon may usa ka butang nga labing hinungdanon kanako, kini mao ang pagpabiling suod sa makitang organisasyon ni Jehova. Gitudloan ako sa akong sayo nga kasinatian unsa ka makadaot sa espirituwal ang pagsalig sa tawhanong pangatarongan. Sa dihang ang akong kaisipan nakahukom sa maong punto, maoy akong determinasyon ang pagpabilin sa matinumanon nga organisasyon. Sa unsang laing paagi mabatonan sa usa ang pag-uyon ug panalangin ni Jehova?” Gimahal ba nimo sa susama ang imong pribilehiyo sa pag-alagad kang Jehova uban sa iyang malipayon nga katawhan? (Salmo 100:2) Kon mao, dili nimo tugotan nga may magpahilayo kanimo gikan sa organisasyon sa Diyos o daoton ang imong relasyon uban sa Usa kansang bukton nagaluwas sa tanan nga nahigugma kaniya.

Tabang sa Diha nga Atakehon Kita sa mga Pagpanulay

10. (a) Sa unsang paagi ang pag-ampo nagatabang sa katawhan sa Diyos sa pag-atubang sa pagsulay? (b) Unsang pasalig ang gihatag ni Pablo sa 1 Corinto 10:13?

¹⁰ Ingong matinumanong mga indibiduwal nga nakig-uban sa organisasyon sa Diyos, atong nabatonan ang iyang tabang sa panahon sa pagsulay. Pananglitan, kita tabangan niya sa paghupot sa atong integridad kaniya sa diha nga kita atakehon sa pagpanulay. Hinuon, angay mag-ampo kita nga nahiuyon sa mga pulong ni Jesus: “Ayaw kami pagdad-a sa panulay, kondili luwasa kami gikan sa usang daotan,” si Satanas nga Yawa. (Mateo 6:9-13) Sa pagkamatuod, kita nagahangyo sa Diyos nga dili niya itugot nga kita mapakyas sa diha nga kita matental sa pagsupak kaniya. Ginatubag usab niya ang atong mga pag-ampo alang sa kaalam sa pagbuntog sa mga pagsulay. (Santiago 1:5-8) Ug ang mga alagad ni Jehova makapaneguro sa iyang tabang, kay si Pablo miingon: “Walay makaabot kaninyo nga pagpanulay gawas kon unsay kasagaran sa mga tawo. Apan ang Diyos matinumanon, ug dili niya itugot nga kamo pagapanulayon sa labaw sa inyong maarangan, apan uban sa pagpanulay siya magatagana usab ug lutsanan aron kamo makaarang sa pag-antos niana.” (1 Corinto 10:13) Unsa ang tinubdan sa maong pagpanulay, ug sa unsang paagi ang Diyos nagataganag lutsanan?

11, 12. Sa unsang mga pagpanulay nga nagpadaog ang mga Israelinhon, ug sa unsang paagi kita makabenepisyo sa ilang mga kasinatian?

¹¹ Ang pagpanulay nagagikan sa mga kahimtang nga makatukmod nato nga mahimong dili matinumanon sa Diyos. Si Pablo miingon: “Kining mga butanga nahimong atong mga panig-ingnan, aron dili kita mahimong mga tawo nga nangandoy sa makadaot nga mga butang, sama nga [ang mga Israelinhon] nangandoy kanila. Dili kita mahimong mga tigsimbag diyosdiyos, sama sa gibuhat sa pipila kanila; sumala sa nahisulat: ‘Ang katawhan nanglingkod ug nanginom, ug sila nanindog aron sa pagsayaw.’ Dili kita magpakighilawas, sama nga ang pipila kanila nagbuhat sa pakighilawas, nga unya nangamatay lamang, kawhaag-tulo ka libo kanila sa usa ka adlaw. Dili nato ibutang si Jehova sa pagsulay, sama nga ang pipila kanila nagbutang kaniya sa pagsulay, nga unya nangalaglag lamang pinaagi sa mga bitin. Dili kita mahimong bagulbolan, sama nga ang pipila kanila nagbagulbol, nga nangalaglag lamang sa maglalaglag.”​—1 Corinto 10:6-10.

¹² Gipangandoy sa mga Israelinhon ang makadaot nga mga butang sa dihang nagpadaog sila sa pagpanulay nga mahimong hakog sa pagpamunit ug pagkaon sa buntog nga milagrosong gitagana sa Diyos. (Numeros 11:19, 20, 31-35) Sayosayo niana, sila nahimong mga tigsimbag diyosdiyos sa dihang tungod sa pagkawala diha ni Moises mitungha ang pagsulay nga mao ang pagsimba sa baka. (Exodo 32:1-6) Kaliboan nangalaglag kay sila nagpadaog sa pagsulay ug mihimog pakighilawas uban sa mga babayeng Moabihanon. (Numeros 25:1-9) Sa dihang ang mga Israelinhon nagpadaog sa pagsulay ug nagbagulbol mahitungod sa pagpatay sa rebelyosong si Core, Datan, Abiram, ug ilang mga kauban, 14,700 ang nalaglag gumikan sa usa ka hampak nga gipadala sa Diyos. (Numeros 16:41-49) Makabenepisyo kita gikan sa maong mga kasinatian kon atong amgohon nga walay mausa sa maong mga pagpanulay ang dako kaayo nga dili kana masuklan sa mga Israelinhon. Makahimo unta sila niana kon sila nagbaton ug pagtuo, kon sila mapasalamaton sa mahigugmaong pag-atiman sa Diyos, ug kon sila nagpabili sa pagkamatarong sa iyang Kasugoan. Unya ang bukton ni Jehova makaluwas unta kanila, maingon nga kini makaluwas kanato.

13, 14. Sa unsang paagi si Jehova nagataganag lutsanan sa dihang moatubang ang iyang mga alagad sa pagsulay?

¹³ Ingong mga Kristohanon, giatubang nato ang mga pagpanulay nga kasagaran sa katawhan. Bisan pa niana, kita makapabiling matinumanon sa Diyos pinaagi sa pag-ampo alang sa iyang tabang ug pagbuhat aron sa pagsukol sa pagpanulay. Ang Diyos matinumanon, ug dili niya itugot nga kita pagapanulayon sa labaw sa atong maarangan. Kon kita maunongon kang Jehova, dili gayod imposible nga mabuhat nato ang iyang kabubut-on. Siya magatagana sa lutsanan pinaagi sa paglig-on kanato sa pagsukol sa pagsulay. Pananglitan, sa dihang pagalutoson, basin kita matental nga mokompromiso sa paglaom nga makaikyas sa pagsakit o kamatayon. Apan kon kita nagasalig sa gamhanang bukton ni Jehova, ang pagpanulay dili moabot sa punto diin siya dili makalig-on sa atong pagtuo ug maghatag kanatog igong kusog sa paghupot sa integridad. Sumala sa giingon ni apostol Pablo: “Kita gipiit sa tanang paagi, apan dili napiotan nga dili na makalihok; kita nangalibog, apan dili sa bug-os walay lutsanan; kita gilutos, apan wala pasagding mabiniyaan; kita gibunalan hangtod sa pagkapukan, apan wala malaglag.”​—2 Corinto 4:8, 9.

¹⁴ Si Jehova nagalig-on usab sa iyang katawhan pinaagi sa paggamit sa iyang espiritu ingong tigpahinumdom ug magtutudlo. Kini magpahinumdom sa Kasulatanhong mga punto ug motabang kanato sa pagsabot kon unsaon sa pagpadapat niana aron sa pagsukol sa pagpanulay. (Juan 14:26) Nasabtan sa matinumanong mga alagad ni Jehova ang mga isyu nga nalangkit sa usa ka pagpanulay ug wala hilimbongi sa pagsunod sa daotang dalan. Ang Diyos naghimog lutsanan pinaagi sa paghimo nilang makaarang sa pag-antos bisan hangtod sa kamatayon nga dili magpadaog sa pagpanulay. (Pinadayag 2:10) Gawas sa pagtabang sa iyang mga alagad pinaagi sa iyang espiritu, gigamit ni Jehova ang iyang mga manulonda alang sa kaayohan sa iyang organisasyon.​—Hebreohanon 1:14.

Tabang sa Personal nga mga Butang

15. Unsang personal nga tabang ang atong makaplagan diha sa Ang Awit ni Solomon?

¹⁵ Kadtong nakig-uban sa organisasyon ni Jehova makabaton sa iyang tabang sa personal nga mga butang. Pananglitan, ang pipila tingali nagpangitag usa ka Kristohanong kapikas. (1 Corinto 7:39) Kon adunay kapakyasan, basin makatabang ang pagpalandong sa haring si Solomon sa Israel. Napakyas siya sa pag-angkon sa kamot sa usa ka Sulamitang dalaga diha sa kaminyoon tungod kay gihigugma niya ang usa ka ubos nga magbalantay sa karnero. Ang talaan sa hari sa maong butang matawag Ang Awit sa Pakyas nga Gugma ni Solomon. Tingalig makatulo ang atong mga luha kon mapakyas kita sa atong romantikong mga singkamot sa usa ka kaso, apan nakalabang si Solomon sa iyang kapakyasan, ug mao usab kita. Ang espiritu sa Diyos makatabang nato sa pagpadayag sa pagpugong-sa-kaugalingon ug sa ubang diyosnong mga hiyas. Ang iyang Pulong motabang nato sa pagdawat sa kasagaran makapaguol nga kamatuoran nga ang usa ka tawo dili mahimong makabatog romantikong gugma alang lang kang bisan kinsa. (Awit ni Solomon 2:7; 3:5) Bisan pa niana, Ang Awit ni Solomon nagpakita nga mahimong posible ang pagkaplag sa usa ka isigkamagtutuo nga mahigugma pag-ayo kanato. Labi pang hinungdanon, kining “kinalabwang awit” natuman diha sa gugma sa Maayong Magbalantay, si Jesu-Kristo, alang sa iyang “pangasaw-onon” nga 144,000 dinihogang mga sumusunod.​—Awit ni Solomon 1:1; Pinadayag 14:1-4; 21:2, 9; Juan 10:14.

16. Ang “kasakitan diha sa ilang unod” nga nasinati sa minyong mga Kristohanon mahimong maglakip sa unsa?

¹⁶ Bisan kadtong maminyog usa ka magtutuo may “kasakitan sa ilang unod.” (1 Corinto 7:28) Aduna unyay mga kabalisa ug mga kabalaka nga naglangkit sa bana ug asawa ug sa ilang mga anak. (1 Corinto 7:32-35) Ang sakit tingali mopatunghag bug-at nga mga lulan ug kalisdanan. Tungod sa paglutos o ekonomikanhong kalisod basin malisdan ang usa ka Kristohanong amahan sa pagtagana sa mga kinahanglanon sa pangabuhi sa iyang pamilya. Ang mga ginikanan ug mga anak basin magkabulag tungod sa pagkabilanggo, ug ang pipila tingali sakiton ug basin patyon pa. Apan nianang tanang kahimtang, kita makasukol sa pagpanulay sa paglimod sa pagtuo kon kita magasalig gayod sa nagaluwas nga bukton ni Jehova.​—Salmo 145:14.

17. Unsang pamilyahanong suliran ang naantos ni Isaac ug Rebeka sa tabang sa Diyos?

¹⁷ Tingali kinahanglang antoson nato ang pipila ka pagsulay sa dugay nga panahon. Pananglitan, ang usa ka anak lalaki basin makapahinabo sa kaguol sa iyang diyosnong mga ginikanan tungod sa pagminyog dili magtutuo. Kana nahitabo sa pamilya sa patriarkang si Isaac ug sa iyang asawa nga si Rebeka. Ang ilang 40-anyos nga anak lalaki si Esau naminyog duha ka babayeng Hetehanon nga maoy “tinubdan sa kapaitan sa espiritu alang kang Isaac ug kang Rebeka.” Ngani, “si Rebeka nagpadayon sa pag-ingon kang Isaac: ‘Gikayugtan ko kining akong kinabuhi tungod sa mga anak nga babaye ni Heth. Kon si Jacob [ilang laing anak lalaki] mangasawa ugaling gikan sa mga anak nga babaye ni Heth sama niini kanila gikan sa mga anak nga babaye sa yuta, unsay kapuslanan sa kinabuhi alang kanako?’” (Genesis 26:34, 35; 27:46) Dayag, ang matarong nga kalag ni Rebeka gisakit sa maong nagpadayong suliran. (Itandi ang 2 Pedro 2:7, 8.) Bisan pa niana, ang bukton ni Jehova nagsangga kang Isaac ug Rebeka, nga nakapaarang nila sa pag-antos sa maong pagsulay samtang gihuptan ang lig-ong relasyon uban Kaniya.

18. Unsang personal nga pagsulay ang giantos ni C. T. Russell sa tabang sa Diyos?

¹⁸ Makapaguol sa dihang ang usa ka bawtismadong membro sa pamilya mohinay sa pag-alagad sa Diyos. (Itandi sa 2 Timoteo 2:15.) Bisan pa niana, ang uban miantos gani sa espirituwal nga pagkawala sa usa ka kapikas, sama kang Charles T. Russell, ang unang presidente sa Watch Tower Society. Ang iyang asawa mibulag sa Sosyedad ug mibiya kaniya sa 1897, tapos sa halos 18 anyos nga kaminyoon. Nangayog legal nga separasyon ang iyang asawa niadtong 1903, ug kadto gitugot sa 1908. Dayag ang iyang kaguol sa gisultihan niya ang iyang asawa diha sa usa ka sayosayong sulat: “Tim-os akong nag-ampo sa Ginoo alang sa imong kaayohan. . . . Dili ko ikaw dat-ogan sa mga asoy sa akong kasubo, ni pukawon ang imong mga kaluoy pinaagi sa pagbatbat sa akong mga gibati, samtang matag karon ug unya akong makita ang imong mga sinina ug ubang mga butang nga tin-aw nga magpahinumdom kanako sa imong kanhing pagkatawo​—nga puno kaayo sa gugma ug kaluoy ug pagkamatinabangon​—ang espiritu ni Kristo. . . . Oh, palandonga nga mainampoon ang akong igasulti. Ug magmasaligon nga ang labing makaguol kanako, ang dulot nga epekto sa emosyon, dili mao ang akong kaugalingong kamingaw sa nahibilin kong kinabuhi, kondili ang imong pagkapukan, pinangga ko, ang imong walay-kataposang kapildihan, sumala sa akong makita.” Bisan pa sa maong kaguol sa kasingkasing, nabatonan ni Russell ang pagpaluyo sa Diyos hangtod sa kataposan sa iyang yutan-ong kinabuhi. (Salmo 116:12-15) Si Jehova kanunay nagatuboy sa iyang maunongong mga alagad.

Gikan sa Tanang Kagul-anan

19. Unsay atong angay hinumdoman kon mopadayon ang makapaguol nga mga suliran?

¹⁹ Ang katawhan ni Jehova nakaila kaniya ingong “usa ka Diyos sa mga buhat sa kaluwasan,” Usa “nga nagapas-an sa matag adlaw sa atong palas-anon.” (Salmo 68:19, 20) Busa, ingong nagpahinungod nga mga indibiduwal nga nakig-uban sa iyang yutan-ong organisasyon, dili gayod kita magpadaog sa kawalay-paglaom kon mopadayon ang makapaguol nga mga suliran. Hinumdomi nga “ang Diyos alang kanato maoy usa ka dalangpanan ug kusog, usa ka panabang nga daling hikaplagan panahon sa mga kagul-anan.” (Salmo 46:1) Ang atong pagsalig kaniya kanunay nga pagabaslan. “Ako nangutana kang Jehova, ug ako iyang gitubag,” matud ni David, “ug gikan sa tanan kong kahadlok ako iyang giluwas. . . . Kini nga sinakit misangpit, ug si Jehova mismo midungog. Ug gikan sa tanan niyang kagul-anan iya Siyang giluwas.”​—Salmo 34:4-6.

20. Unsang pangutana ang nagpabilin nga pagahisgotan pa?

²⁰ Oo, ang atong langitnong Amahan nagaluwas sa iyang katawhan gikan sa tanang kagul-anan. Siya nagapaluyo sa iyang yutan-ong organisasyon, nga nagataganag tabang sa mga butang maylabot sa kongregasyon ug sa personal nga mga butang. Sa pagkamatuod, “si Jehova dili magabiya sa iyang katawhan.” (Salmo 94:14) Apan sunod natong hisgotan ang ubang paagi nga si Jehova nagatabang sa iyang katawhan sa tinagsa. Sa unsang paagi ang atong langitnong Amahan nagalig-on sa iyang mga alagad nga may sakit, may mental nga depresyon, nagmasulob-on tungod sa pagbangotan, o naguol tungod sa ilang mga kasaypanan? Sumala sa atong makita, niining mga butanga usab, kita may katarongan sa pagsalig sa gamhanang bukton ni Jehova.

Unsay Imong Tubag?

◻ Sa unsang paagi ang bukton ni Jehova nagluwas sa nangaging mga panahon?

◻ Sa unsang paagi si Jehova nagatabang sa iyang katawhan diha sa kongregasyon karong adlawa?

◻ Unsang tabang ang ginatagana sa Diyos diha sa personal nga mga butang?

◻ Unsay atong pagabuhaton kon mopadayon ang makapaguol nga mga suliran?

[Hulagway sa panid 8, 9]

Gipagawas sa Diyos ang mga Israelinhon gikan sa Ehipto “pinaagi sa usa ka bukton nga binakyaw”