Kon Nganong Sila Mogamit ug mga Relikyas sa Pagsimba

NAPLES, Italya. Handurawa nga atua ikaw didto sa unang mga tuig sa ika-18ng siglo sa atong Komung Panahon. Diha sa katedral niini, ang taga-Irlandiyang pilosopo si George Berkeley nagbarog sa atubangan sa usa ka iladong relihiyoso nga relikyas. Maduhaduhaon niyang gitan-aw ang maorag nahimong likido nga dugo ni “San Gennaro,” ang Katolikong “san” Januarius.

Wala kaayoy kausaban ang Naples niining bahina. Pananglitan, bisan pa sa dili maayong klima sa usa ka higayon sa mga katuigang dili pa dugay, ang simbahan gidagsaan na usab ug mga tawo, maorag may milagrong nahitabo. Ang relikyas ug ang prosesyon nga gipangunahan sa kardinal nga arsobispo mainit nga giabiba. Oo, kini maoy laing higayon sa daghan nang higayon nga ang dugo ni “San Gennaro” mopatim-aw nga nahimong likido. Ang mga milagro nga nalangkit niining relihiyosong relikyas gitahong nagakahitabo sukad sa ika-14ng siglo.

Sumala sa tradisyong Katoliko, ang relikyas (gikan sa Latin relinquere, nagkahulogang “sa pagbilin”) maoy mga butang nga nabilin sa usa ka tawong giisip nga santo. Sama sa gihisgotan sa Dizionario Ecclesiastico, ang mga relikyas sa “bug-os nga diwa, mao ang lawas o mga bahin sa lawas ug mga abo sa Santo, sa mas halapad nga diwa ang butang nga nadapat sa lawas sa santo ug busa takos nga pagasimbahon.”

Ginauyonan sa Papa

Sa walay duhaduha, daghan ang nagahatag ug masimbahong pagtagad sa relihiyosong mga relikyas tungod sa mga milagro kuno nga nalangkit niana. Ang pag-uyon sa papa daw laing hinungdan sa ilang popularidad.

Labing menos upat ka papa sa kataposang 70 ka tuig ang nakahatag ug linaing pagtagad sa mga relikyas. Usa ka basahong Katoliko nagbutyag nga sama sa nag-una kaniya nga si Pio XI, si Papa Pio XII “adunay mga relikyas sa santo sa Lisieux.” Si Paulo VI “adunay usa ka tudlo ni apostol [Tomas] diha sa lamesa sa iyang lawak-tun-anan,” ug si Juan Paulo II “aduna, diha sa iyang apartment, ug mga bahin sa . . . patayng lawas” ni “San Benedicto” ug “San Andres.”​—30 giorni, Marso 1990, panid 50.

Tungod sa pag-uyon sa papa, dili ikahibulong nga ang pagpangitag mga relikyas alang sa pribado ug publikong pagsimba nagakadaghan. Apan ang pagsimba ba sa relihiyosong mga relikyas makapahimuot sa Diyos?

[Hulagway sa panid 3]

Patonganag relikyas, usa ka butanganan nga diha ginatipigan ang relihiyosong mga relikyas

[Credit Line]

Courtesy of the Bristish Museum