Ang Bisan Unsa nga Relihiyon ba Igo Na?

“Ang gidangatan sa atong kapanahonan maoy makapasubo. Nagkinahanglan kitag usa ka relihiyon, apan dili kita makakitag usa ka Diyos nga haom niini.”—Lucian Blaga, Romanyano nga magbabalak ug pilosopo

“Ang relihiyon ug ang klero nahimo, ug tingali magpabilin sa taas pang panahon, nga apil sa pinakadagkong mga kaaway sa kauswagan ug kagawasan.”​—Khristo Botev, Bulgariano nga magbabalak

ANG kauban nga mga pangutlo nagpalanog sa gumonhap nga nasinati sa daghang sinserong mga tawo. Sa kahiladman mobati silag panginahanglan sa relihiyon, apan ang misteryosong Diyos nga ginatudlo sa klero maoy usa ka Diyos nga dili nila masabtan ug mahigugma. Dugang pa, nakaamgo sila nga ang klero ug ang ilang mga relihiyon dako ug nahimo sa pagbabag sa tawhanong kauswagan ug kagawasan. Oo, bisan pag sa mausbawon naila ang panginahanglan sa relihiyon, ang mga tawong matinud-anon dili modawat sa bisan unsa lang nga relihiyon.

Usa ka Importante nga Kalainan

Ang relihiyon may usa ka pangunang bahin diha sa kahulmahan ug kasaysayan sa katawhan. Ang The New Encyclopædia Britannica naghisgot sa relihiyon “ingong usa ka kamatuoran sa kasinatian, kultura, ug kasaysayan sa tawo” ug nagkanayon: “Ang mga ebidensiya sa relihiyosong mga tinamdan ug mga pag-unong anaa sa tanang bahin sa kinabuhi sa tawo.” Apan ang kasaysayan nagpadayag nga walay usa sa dagkong mga relihiyon sa kalibotan ang nahimong panalangin alang sa katawhan.

Ang Indian nga estadista nga si Jawaharlal Nehru kas-a mikomento: “Ang talan-awon sa gitawag relihiyon, o sa maong kahimtang organisadong relihiyon, kon kaha sa India ug sa ubang dapit, naghupong nato sa kalisang.” Sa pagpalandong sa mga gubat nga gibugno ug sa mga krimen nga gibuhat diha sa ngalan sa relihiyon, ikaw ba sa kamatinud-anon makasupak niya?

Sa ika-18ng siglo, ang Pranses nga pilosopo nga si Voltaire mipahayag sa usa ka makaiikag nga kalainan. Misulat siya: “Ang relihiyon, sumala ninyo, nakapatunghag dimaihap maot-ug-dungog nga mga binuhatan. Angay hinuon nga inyong ingnon nga patuotuo, ang patuotuo nga nagahari ibabaw sa atong masulob-ong yuta. Ang patuotuo mao ang labing pintas nga kaaway sa maputling pagsimba nga angay tang ihatag ngadto sa Supremong Usa.” Gipakigbisogan ni Voltaire ang relihiyosong pagkadili-matinugoton sa iyang adlaw, apan nagpadayon siya sa paghupot sa iyang pagtuo sa Diyos ingong Maglalalang sa uniberso. Nakasabot siya sa kalainan tali sa matuod nga relihiyon ug sa bakak.

Ang Panginahanglan sa Pagpili

Dili ang tanan mouyon kang Voltaire. Ang pipila moangkon nga dunay kaayohan diha sa tanang relihiyon; busa, mobati sila nga dili na kinahanglan nga pangitaon ang tinuod nga relihiyon. Ang ingon nga mga tawo angay mamati sa pasidaan nga gihatag sa propeta nga si Isaias, kinsa misulat: “Alaot kadtong nagatawag sa daotan nga maayo ug maayo sa daotan, kadtong nagailis ug kangitngit sa kahayag ug kahayag sa kangitngit, kadtong nagailis ug mapait sa matam-is ug matam-is sa mapait!” (Isaias 5:20) Ang bakak nga relihiyon nagpatungha kon unsay daotan alang sa katawhan. Misangpot kana sa espirituwal nga kangitngit ug nagbilin ug kapait diha sa mga baba sa mga tawong matinud-anon ug kasingkasing.

Busa, ang pagpili dili maoy tali sa pagkaateyista ug pagtuo sa bisan unsa nga relihiyon. Dili ingon niana kayano. Sa diha nga maila sa usa ang panginahanglan sa Diyos, siya kinahanglan nga mangita sa tinuod nga relihiyon. Sumala sa maayo nga pagpahayag niini sa tigdukiduki si Émile Poulat diha sa Le Grand Atlas des Religions (The Large Atlas of Religions): “Ang mga butang nga ginatudlo ug ginabaod sa [mga relihiyon] nagkalain kaayo nga imposible ang pagtuo kanilang tanan.” Nahiuyon niini, ang Pranses nga Encyclopædia Universalis (Universal Encyclopedia) nag-ingon: “Kon ang ika-21ng siglo mobalik sa relihiyon, . . . kinahanglan nga mohukom ang tawo kon kaha ang sagradong mga butang ginatanyag kaniya maoy matuod o bakak.”

Kon Unsaon Pagpili sa Husto nga Relihiyon

Unsa ang mogiya kanato sa pagpili sa husto nga relihiyon? Husto ang Encyclopædia Universalis sa gipasiugda niini ang kahinungdanon sa kamatuoran. Ang usa ka relihiyon nga nagatudlog kabakakan dili mahimong tinuod. Ang kinadak-ang propeta nga sukad nabuhi sa yuta mipahayag: “Ang Diyos Espiritu, ug kadtong nagasimba kaniya kinahanglang magasimba pinaagi sa espiritu ug kamatuoran.”​—Juan 4:24.

Kanang propetaha mao si Jesu-Kristo, ug siya mipahayag usab: “Magbantay kamo batok sa mini nga relihiyosong mga magtutudlo, si kinsa moanha kaninyo nga nasapotan ingon sa mga karnero apan sa pagkamatuod maoy hakog nga mga lobo. Inyo silang maila pinaagi sa ilang mga bunga. . . . Ang matag maayo nga kahoy mamunga ug maayo nga bunga, apan ang usa ka dunot nga kahoy mamunga ug daot nga bunga.” (Mateo 7:15-17, Phillips) Sa pagkakita sa daot nga bunga sa “bantogan” nga mga relihiyon sa kalibotan, ug bisan sa mga sekta ug mga kulto nga nanungha, daghang sinserong katawhan ang nahidangat sa pag-isip kanilang tanan ingong ‘dunot nga mga kahoy,’ nga sa yano dili igo. Apan sa unsang paagi makaplagan nila ang tinuod nga relihiyon?

Dayag imposible nga matun-an ang tanang libolibo nga relihiyon sa sulod ug sa gawas sa Kakristiyanohan sa dili pa himoon ang pagpili. Bisan pa, kon​—sumala sa giingon ni Jesus​—gamiton nato ang kamatuoran ug mga bunga ingon nga mga sukdanan, mahimong hiilhan ang matuod nga relihiyon.

Kamatuoran ug mga Bunga

Si Jesus naghisgot ug kamatuoran. Mahitungod niini, unsang pundok sa mga magtutuo ang nagasalikway sa relihiyosong kabakakan nga nagsumikad sa karaang mitolohiya ug sa Gregong pilosopiya nga nakatuhop sa kadaghanan nga relihiyon? Usa sa ingon nga bakak mao ang pagtulon-an nga ang tawhanong kalag kinaiyanhon nga dili mamatay.a Kining pagtulon-ana nagpatungha sa nagpasipala-sa-Diyos nga doktrina sa impiyernong-kalayo.

Si Jesus naghisgot usab ug mga bunga. Mahitungod niini, may nasayran ka ba nga usa ka relihiyon nga nagpatunghag tiunay internasyonal nga pag-ubanay diin ang kababagan tungod sa rasa, pinulongan, ug nasyonalidad mabuntog pinaagi sa gugma ug mutuwal nga pagsinabtanay? May nasayran ka bang usa ka tibuok-kalibotan relihiyosong komunidad kansang mga membro mopalabi nga pagalutoson inay tugotan ang mga politiko o relihiyosong mga lider sa pagsiba kanila sa pagdumot sa ilang mga igsoong lalaki ug mga babaye ug pagpatay kanila sa ngalan sa nasyonalismo o relihiyon? Ang usa ka relihiyon nga nagsalikway nianang relihiyosong kabakakan ug nagpatungha sa maong mga bunga mohatag ug lig-ong ebidensiya sa pagkatinuod, dili ba?

Tinuod nga Relihiyon Ginatuman Karong Adlawa

May ingon ba nga relihiyon? Oo, aduna. Apan kinahanglan imong angkonon nga kini dili usa sa dagkong mga relihiyon sa kalibotan. Angay ba nga matingala kita niini? Dili. Sa bantog niyang Wali sa Bukid, si Jesus mipahayag: “Sumulod kamo sa pultahan nga masigpit; tungod kay dako ug sangkad ang dalan nga padulong sa kalaglagan, ug daghan ang nagaagi niini; samtang masigpit ang pultahan ug hiktin ang dalan nga padulong sa kinabuhi, ug diyutay ra ang nakatultol niini.”​—Mateo 7:13, 14.

Busa hain man hikaplagan ang tinuod nga relihiyon? Sa bug-os nga kamapainubsanon ug kamatinud-anon, kami magaingon nga ang mga Saksi ni Jehova naglangkob sa usa ka internasyonal nga komunidad nga nagasubay niining ‘masigpit ug hiktin nga dalan.’ Tinuod, ang pangunang mga relihiyon sa pagkamatamayon nagatawag sa mga Saksi ni Jehova nga usa ka sekta. Apan kana mao gayod ang pagtawag sa apostatang relihiyosong mga lider sa unang siglo sa unang mga Kristohanon.​—Buhat 24:1-14.

Nganong ang mga Saksi ni Jehova masaligon nga nagbaton sila sa tinuod nga relihiyon? Buweno, sila naglangkob sa usa ka internasyonal nga panag-igsoonay nga nakaabot sa kapig 200 ka kayutaan ug nagabuntog sa mga pagkabahinbahin tungod sa nasyonalidad, rasa, pinulongan, ug ranggo diha sa katilingban. Ug dili sila motuo sa mga doktrina​—bisan unsa ka karaan—​nga tin-awng nagasupak sa ginaingon sa Bibliya. Apan sa unsang paagi nahidangat sila sa maong kaibgan nga situwasyon? Ug unsay nalangkit sa pagtuman sa tinuod nga relihiyon? Kini ug ang ubang pangutana mahitungod sa relihiyon pagahisgotan sa sunod duha ka artikulo.

[Footnote]

[Hulagway sa panid 7]

Ang mga Krusada maoy bahin sa dunot nga mga bunga sa bakak nga relihiyon

[Credit Line]

Bibliothèque Nationale, Paris

[Hulagway sa panid 8]

Ang tinuod nga relihiyon mamunga ug maayong mga bunga