Pagtuman sa Putling Relihiyon Alang sa Kaluwasan

“Ang relihiyon nga putli ug lunsay sa panan-aw sa Diyos ang Amahan madayag sa kaugalingon pinaagi sa mga butang sama sa . . . pag-amping sa kaugalingon nga dili mahugawan sa kalibotan.”—SANTIAGO 1:27, Phillips.

1. Sa unsang paagi gibatbat ang relihiyon, ug kinsa sa makataronganon ang may katungod sa pagtino sa kalainan tali sa bakak nga relihiyon ug sa matuod?

ANG relihiyon gibatbat ingong “ang pahayag sa pagtuo ug pagtahod sa tawo sa usa ka labaw-tawhanon nga gahom nga giila ingon nga maglalalang ug magmamando sa uniberso.” Nan, sa makataronganon kinsa ang may katungod sa pagtino sa kalainan tali sa matuod nga relihiyon ug bakak nga relihiyon? Tino nga kini ang Usa nga pagatuohan ug pagatahoron, ang Maglalalang. Sa katin-aw gilaraw ni Jehova diha sa iyang Pulong ang iyang baroganan mahitungod sa matuod nga relihiyon ug sa bakak.

Ang Pulong “Relihiyon” Diha sa Bibliya

2. Giunsa pagsaysay sa mga diksiyonaryo ang orihinal Gregong pulong nga gihubad “paagi sa pagsimba” o “relihiyon,” ug sa unsang mga paagi sa pagsimba kini ikapadapat?

² Ang Gregong pulong nga gihubad “paagi sa pagsimba,” o “relihiyon,” mao ang thre·skeiʹa. Ang A Greek-English Lexicon of the New Testament mibatbat sa maong pulong ingong “ang pagsimba sa Diyos, relihiyon, ilabina sa dihang kini gipahayag diha sa relihiyosong serbisyo o kulto.” Ang Theological Dictionary of the New Testament dugang nagtaganag mga detalye, nga nagaingon: “Gilalis ang kasaysayan sa pulong; . . . dapig ang modernong mga eskolar sa usa ka koneksiyon sa therap- (‘pag-alagad’). . . . Ang kalainan sa kahulogan mamatikdan usab. Ang maayong diwa maoy ‘relihiyosong kadasig’ . . . , ‘pagsimba sa Diyos,’ ‘relihiyon.’ . . . Apan may daotan usab nga diwa, sama pananglitan, ‘relihiyosong paghingapin.’ ‘sayop nga pagsimba.’” Busa, ang thre·skeiʹa mahimong hubaron nga “relihiyon” o “paagi sa pagsimba,” maayo kaha o daotan.

3. Giunsa paggamit ni apostol Pablo ang pulong nga gihubad nga “paagi sa pagsimba,” ug unsang makaiikag nga komento ang gihimo sa paghubad sa Colosas 2:18?

³ Kining pulonga makita sa kaupat ka beses lang diha sa Kristohanon Gregong Kasulatan. Gigamit kinig kaduha ni apostol Pablo sa pagpasabot sa bakak nga relihiyon. Sa Buhat 26:5, siya nahitala nga nag-ingon nga una mahimong usa ka Kristohanon, “sumala sa labing mapig-otong sekta sa among paagi sa pagsimba [“relihiyon,” Phillips] ako nagkinabuhi nga usa ka Pariseo.” Sa iyang sulat ngadto sa mga taga-Colosas, siya mipasidaan: “Ayaw itugot nga may tawo nga maghikaw kaninyo sa ganti si kinsa magkalipay sa pagpapulopaubos ug sa usa ka paagi sa pagsimba sa mga manulonda.” (Colosas 2:18) Ang ingon nga pagsimbag manulonda dayag naglungtad sa Prigia niadtong mga adlawa, apan kadto usa ka matang sa bakak nga relihiyon.a Makaiikag, samtang pipila ka hubad sa Bibliya naghubad sa thre·skeiʹa ingong “relihiyon,” sa Colosas 2:18, kadaghanan nagagamit sa pulong “pagsimba.” Sa way-pagkausab ang New World Translation nagahubad sa thre·skeiʹa nga “paagi sa pagsimba,” nga ang usa ka potnot diha sa Reference Bible nagahisgot sa matag panahong ang kapuling hubad “relihiyon” maoy gigamit diha sa Latin nga mga bersiyon.

“Mahinlo ug Walay-Hugaw” Gikan sa Panglantaw sa Diyos

4, 5. (a) Sumala ni Santiago, kansang baroganan bahin sa relihiyon ang labing hinungdanon? (b) Unsay makapakawang sa paagi sa pagsimba sa usa ka tawo, ug unsay gipasabot sa pulong nga gihubad “kawang”?

⁴ Ang laing duha pa ka paghisgot sa pulong thre·skeiʹa anaa sa sulat sa disipulo nga si Santiago, usa ka membro sa nagamandong lawas sa unang-siglo Kristohanong kongregasyon. Misulat siya: “Kon may si bisan kinsa nga morag usa ka ugdang nga magsisimba [“usa ka ‘relihiyoso,’” Phillips] ug unya wala magpugong sa iyang dila, apan nagapadayon sa paglimbong sa iyang kaugalingong kasingkasing, ang paagi sa pagsimba [“relihiyon,” Phillips] sa maong tawo maoy kawang. Ang paagi sa pagsimba [“relihiyon,” Phillips] nga mahinlo ug walay-hugaw gikan sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo diha sa ilang kasakitan, ug pag-amping sa kaugalingon nga walay buling sa kalibotan.”​—Santiago 1:26, 27.

⁵ Oo, ang pagsunod sa baroganan ni Jehova mahitungod sa relihiyon mahinungdanon kon buot natong makabaton sa iyang pag-uyon ug maluwas ngadto sa bag-ong kalibotan nga iyang gisaad. (2 Pedro 3:13) Gipakita ni Santiago nga sa iyang kaugalingon ang usa ka tawo morag tinuod nga relihiyoso apan ang iyang paagi sa pagsimba mahimong kawang. Ang Gregong pulong nga gihubad dinhi nga “kawang” nagkahulogan usab nga “walay hinungdan, walay sulod, dili-mabungahon, walay pulos, walay gahom, walay kamatuoran.” Kini matuod kon ang usa nga nagaangkong usa ka Kristohanon wala magpugong sa iyang dila ug wala magagamit niana sa pagdayeg sa Diyos ug sa paglig-on sa iyang isigka-Kristohanon. Siya “magalimbong sa iyang kaugalingong kasingkasing” ug wala magatuman sa “relihiyon nga putli ug lunsay sa panan-aw sa Diyos.” (Phillips) Ang panglantaw ni Jehova mao ang hinungdanon.

6. (a) Unsa ang tema sa sulat ni Santiago? (b) Unsang kinahanglanon alang sa putling pagsimba ang gipasiugda ni Santiago, ug unsay giingon sa modernong-adlaw Nagamandong Lawas mahitungod niini?

⁶ Si Santiago wala maghisgot sa tanang butang nga gikinahanglan ni Jehova maylabot sa putling pagsimba. Nahiuyon sa katibuk-ang tema sa iyang sulat, nga mao ang pagtuo nga gipamatud-an sa mga binuhatan ug ang panginahanglan nga magpabilin nga dili higala sa kalibotan ni Satanas, gipasiugda niya ang duha lang ka kinahanglanon. Ang usa mao “pag-atiman sa mga ilo ug mga balong babaye sa ilang kasakitan.” Kini naglangkit sa tinuod Kristohanong gugma. Kanunay gipakita ni Jehova ang mahigugmaong kabalaka alang sa mga ilo ug sa mga babayeng balo. (Deuteronomio 10:17, 18; Malakias 3:5) Usa sa unang mga buhat sa unang-siglong nagamandong lawas sa Kristohanong kongregasyon maoy alang sa Kristohanong mga babayeng balo. (Buhat 6:1-6) Si apostol Pablo mihatag ug detalyadong mga instruksiyon sa pagtaganag mahigugmaong pag-atiman sa kabos nga mga tigulang babayeng balo nga nagpamatuod nga matinumanon latas sa katuigan ug walay pamilya nga makatabang kanila. (1 Timoteo 5:3-16) Ang modernong-adlaw Nagamandong Lawas sa mga Saksi ni Jehova susamang naghatag ug tukmang mga instruksiyon mahitungod sa “Pag-atiman sa mga Kabos,” nga nagaingon: “Ang matuod nga pagsimba naglangkit sa pag-atiman sa mga matinumanon ug mga maunongon nga tingali nagkinahanglag materyal nga hinabang.” (Tan-awa ang librong Organisado sa Pagtuman sa Atong Ministeryo, mga panid 122-3.) Ang mga lawas sa mga ansiano o tinagsa ka Kristohanon nga nagmapinasagdanon niining bahina nagasalikway sa usa ka hinungdanong bahin sa paagi sa pagsimba nga mahinlo ug walay-hugaw gikan sa panglantaw sa atong Diyos ug Amahan.

“Walay Buling Gikan sa Kalibotan”

7, 8. (a) Unsang ikaduhang kinahanglanon alang sa matuod nga relihiyon ang gihisgotan ni Santiago? (b) Nakab-ot ba sa klero ug mga pari ang maong kinahanglanon? (c) Unsay ikaingon mahitungod sa mga Saksi ni Jehova?

⁷ Ang ikaduhang kinahanglanon sa matuod nga relihiyon nga gihisgotan ni Santiago mao “ang pag-amping sa kaugalingon nga walay buling gikan sa kalibotan.” Miingon si Jesus: “Ang akong gingharian dili bahin niining kalibotana”; nahiuyon niana, ang iyang matuod nga mga sumusunod mahimong “dili bahin sa kalibotan.” (Juan 15:19; 18:36) Ikaingon ba kini mahitungod sa klero ug mga pari sa bisan hain sa mga relihiyon niining kalibotana? Ginaduso nila ang Hiniusang Kanasoran. Gidawat sa daghan sa ilang mga pangulo ang imbitasyon sa papa nga magkatigom sa Assisi, Italya, niadtong Oktubre 1986 aron hiusahon ang ilang mga pag-ampo alang sa kalamposan sa gipasiugda-sa-HK “Internasyonal nga Tuig sa Kalinaw.” Bisan pa niana, kawang ang ilang paningkamot, kon ipasukad sa minilyon nga napatay sa mga gubat sa maong tuig ug sa mga katuigan sukad niadto. Ang klero kasagaran nga makigsandurot sa nagamando politikanhong partido, samtang sa kamaluibon nagahimog sekretong mga kasabotan uban sa kaatbang aron si bisan kinsa ang magmando magaisip nila nga “mga higala.”​—Santiago 4:4.

⁸ Ang mga Saksi ni Jehova nakahimog dungog alang sa ilang kaugalingon ingong mga Kristohanon nga nagpabiling neyutral sa politikanhong kahikayan ug sa mga gubat niining kalibotana. Sila nagbaton sa maong baroganan diha sa tanang kontinente ug sa tanang nasod, sumala sa gipamatud-an sa mga taho sa prensa ug sa mga rekord sa modernong kasaysayan sa tanang bahin sa kalibotan. Sila sa pagkamatuod “walay buling gikan sa kalibotan.” Ang ila mao ang “relihiyon nga putli ug lunsay sa panan-aw sa Diyos.”​—Santiago 1:27, Phillips.

Ubang mga Ilhanan sa Matuod nga Relihiyon

9. Unsa ang ikatulong kinahanglanon alang sa matuod nga relihiyon, ug ngano?

⁹ Kon ang relihiyon maoy “pagtahod sa usa ka labaw-tawhanong gahom nga nailhang maglalalang ug magmamando sa uniberso,” tino nga kinahanglang itumong sa matuod nga relihiyon ang pagsimba ngadto sa bugtong matuod nga Diyos, si Jehova. Kinahanglang kini dili maglubog sa pagsabot sa katawhan mahitungod sa Diyos pinaagi sa pagtudlo nianang paganong mga ideya sama sa usa ka tulog-bahin nga diyos nga niana ang Amahan nagpakig-ambit sa iyang pagkamakagagahom sa tanan, kahimayaan, ug pagkawalay-kataposan uban sa duha pa ka persona diha sa usa ka misteryosong Trinidad. (Deuteronomio 6:4; 1 Corinto 8:6) Kinahanglang magpaila usab kini sa way-kasamang ngalan sa Diyos, si Jehova, ug magpasidungog nianang ngalana, sa pagkamatuod magdala sa ngalan sa Diyos ingong usa ka organisadong katawhan. (Salmo 83:18; Buhat 15:14) Niini ang iyang mga magtutuman kinahanglang mosunod sa panig-ingnan ni Kristo Jesus. (Juan 17:6) Unsang katawhan karong adlawa ang nakakab-ot sa maong kinahanglanon gawas sa Kristohanong mga Saksi ni Jehova?

10. Aron ang usa ka relihiyon makatanyag ug kaluwasan ngadto sa bag-ong kalibotan, unsay kinahanglang buhaton niini, ug ngano?

¹⁰ Si apostol Pedro miingon: “Dugang pa, walay kaluwasan diha kang bisan kinsa, kay walay laing ngalan [Jesu-Kristo] sa silong sa langit ang gikahatag taliwala sa mga tawo nga pinaagi niana kita mamaluwas.” (Buhat 4:8-12) Busa, ang putling relihiyon nga motanyag ug kaluwasan ngadto sa bag-ong kalibotan sa Diyos kinahanglang magdasig ug pagtuo diha kang Kristo ug sa bili sa halad-lukat. (Juan 3:16, 36; 17:3; Efeso 1:7) Dugang pa, kinahanglang motabang kini sa matuod nga mga magsisimba sa pagpasakop kang Kristo ingong nagamandong Hari ug dinihogang Hataas nga Saserdote ni Jehova.​—Salmo 2:6-8; Filipos 2:9-11; Hebreohanon 4:14, 15.

11. Sa unsa ipasukad ang matuod nga relihiyon, ug unsa ang baroganan sa mga Saksi ni Jehova mahitungod niini?

¹¹ Ang putling relihiyon kinahanglang ipasukad sa gipadayag nga kabubut-on sa usa ka matuod nga Diyos ug dili sa ginamag-tawong mga tradisyon o mga pilosopiya. Wala unta kitay nasayran bahin kang Jehova ug sa iyang kahibulongang mga katuyoan, ni bahin kang Jesus ug sa halad-lukat, kon dili pa tungod sa Bibliya. Ang mga Saksi ni Jehova nagsilsil diha sa katawhan sa dili-matarog nga pagsalig sa Bibliya. Nagpamatuod usab sila pinaagi sa ilang matag-adlaw nga pagkinabuhi nga sila uyon sa pahayag ni apostol Pablo: “Ang tibuok nga Kasulatan dinasig sa Diyos ug mapuslanon alang sa pagtudlo, sa pagbadlong, sa pagtul-id sa mga butang, . . . aron ang tawo sa Diyos bug-os nga may-katakos, nga nasangkapan sa hingpit alang sa tanang maayong buhat.”​—2 Timoteo 3:16, 17.

Ang Matuod nga Relihiyon—Usa ka Dalan sa Kinabuhi

12. Dugang sa pagtuo, unsa ang gikinahanglan aron ang pagsimba mahimong matuod, ug sa unsang mga bahin nga ang matuod nga relihiyon usa ka dalan sa kinabuhi?

¹² Si Jesus mipahayag: “Ang Diyos Espiritu, ug ang mga nagasimba kaniya kinahanglang magasimba pinaagi sa espiritu ug sa kamatuoran.” (Juan 4:24) Busa, ang matuod nga relihiyon, o paagi sa pagsimba maoy dili usa ka seremonyal, rituwalistikanhon, panggawas nga pasundayag sa pagkadiyosnon. Ang putling pagsimba maoy espirituwal, nga gipasukad sa pagtuo. (Hebreohanon 11:6) Hinuon, ang maong pagtuo kinahanglang paluyohan ug mga binuhatan. (Santiago 2:17) Ang matuod nga relihiyon nagasalikway sa popular nga mga hilig. Nagasunod kini sa mga sukdanan sa Bibliya sa moralidad ug sa mahinlong sinultihan. (1 Corinto 6:9, 10; Efeso 5:3-5) Ang mga magtutuman niini sinserong naningkamot sa pagpamunga ug mga bunga sa espiritu sa Diyos diha sa ilang kinabuhing pamilyahanon, diha sa ilang sekular nga trabaho, diha sa tunghaan, ug bisan diha sa ilang lulinghayaw. (Galacia 5:22, 23) Ang mga Saksi ni Jehova naningkamot nga dili gayod mahikalimot sa tambag ni apostol Pablo: “Busa, kon kaha nagakaon kamo o nagainom o nagabuhat sa bisan unsa, buhata ninyo ang tanang butang alang sa himaya sa Diyos.” (1 Corinto 10:31) Dili lang pormalismo ang ilang relihiyon; kini usa ka dalan sa kinabuhi.

13. Unsay nalangkit sa matuod nga pagsimba, ug nganong ikaingon nga ang mga Saksi ni Jehova tinuod relihiyosong katawhan?

¹³ Siyempre, ang matuod nga relihiyon naglangkit sa espirituwal nga mga kalihokan. Kini nagaapil sa personal ug pamilyahanong pag-ampo, sa regular nga pagtuon sa Pulong sa Diyos ug mga tabang sa pagtuon sa Bibliya, ug pagtambong sa matuod Kristohanong mga tigom sa kongregasyon. Ang naulahi buksan ug tiklopan pinaagi sa mga awit sa pagdayeg kang Jehova ug pinaagi sa mga pag-ampo. (Mateo 26:30; Efeso 5:19) Ang makapalig-ong espirituwal nga mga ulohan gitugkad pinaagi sa mga diskurso ug pangutana-ug-tubag nga mga panaghisgot sa pinatik nga materyal nga mabatonan sa tanan. Ang maong mga tigom kasagarang himoon diha sa hinlo apan dili maartihong mga Kingdom Hall, nga gigamit lamang alang sa relihiyosong mga katuyoan: regular nga mga tigom, mga kasal, mga serbisyo sa paglubong. Gitahod sa mga Saksi ni Jehova ang ilang mga Kingdom Hall ug ang dagkodagkong mga Assembly Hall ingong mga dapit nga gipahinungod sa pagsimba kang Jehova. Lahi sa daghang simbahan sa Kakristiyanohan, ang mga Kingdom Hall dili sosyal nga mga klab.

14. Unsay ipasabot sa pagsimba alang sa Hebreohanon-ug-sinultihang katawhan, ug unsang kalihokan ang nagapalahi sa mga Saksi ni Jehova karong adlawa?

¹⁴ Nakita nato ganina nga ang mga eskolar naglangkit sa Gregong pulong nga gihubad nga “paagi sa pagsimba” o “relihiyon” sa berbong “pag-alagad.” Makaiikag, ang Hebreohanong katumbas, ang ‛avo·dhahʹ, mahubad nga “pag-alagad” o “pagsimba.” (Itandi ang mga potnot sa Exodo 3:12 ug 10:26.) Alang sa mga Hebreohanon, ang pagsimba nagkahulogang pag-alagad. Ug kini mao ang kahulogan niini alang sa matuod nga mga magsisimba karong adlawa. Ang usa ka hinungdanon kaayo, linaing ilhanan sa matuod nga relihiyon mao nga ang tanan nga nagatuman niini nakig-ambit sa diyosnong pag-alagad sa pagwali “niining maayong balita sa gingharian . . . sa tanang gipuy-ang yuta alang sa usa ka pamatuod sa tanang nasod.” (Mateo 24:14; Buhat 1:8; 5:42) Unsang relihiyona ang ilado sa tibuok nga kalibotan tungod sa publikong pagsangyaw niini sa Gingharian sa Diyos ingong bugtong paglaom sa katawhan?

Usa ka Positibo, Makapahiusang Gahom

15. Unsa ang usa ka talagsaong kinaiyahan sa matuod nga relihiyon?

¹⁵ Ang bakak nga relihiyon makapabahin. Nakapahinabo kini, ug nagapahinabo pa, sa dinumtanay ug sa pag-ulag dugo. Sa kasukwahi, ang matuod nga relihiyon makapahiusa. Si Jesus miingon: “Pinaagi niini ang tanan mahibalo nga kamo akong mga tinun-an, kon kamo may gugma sa inyong taliwala.” (Juan 13:35) Ang gugma nga makapahiusa sa mga Saksi ni Jehova molapas sa nasodnon, sosyal, ekonomiko, ug rasanhong mga utlanan nga nagbahin sa nahibiling katawhan. Ang mga Saksi “nagabarog nga malig-on diha sa usa ka espiritu, uban sa usa ka kalag nag-usa nga nakigbisog alang sa pagtuo sa maayong balita.”​—Filipos 1:27.

16. (a) Unsang “maayong balita” ang ginawali sa mga Saksi ni Jehova? (b) Unsang mga tagna ang natuman diha sa katawhan ni Jehova, ug unsang mga panalangin ang misangpot?

¹⁶ Ang “maayong balita” nga ilang ginawali mao nga sa dili madugay ang dili-mausab nga katuyoan sa Diyos matuman na. Ang iyang kabubut-on pagatumanon, “maingon didto sa langit, dinhi usab sa yuta.” (Mateo 6:10) Ang mahimayaong ngalan ni Jehova pagabalaanon, ug ang yuta mamahimong usa ka paraiso, diin ang matuod nga mga magsisimba mabuhi sa walay kataposan. (Salmo 37:29) Sa literal minilyong tawo sa tanang nasod nagapakig-uban sa mga Saksi ni Jehova, nga nagaingon, ingong katumanan sa tagna sa Bibliya: “Mokuyog kami kaninyo, kay among nadunggan nga ang Diyos nagauban kaninyo.” (Zacarias 8:23) Si Jehova nagapanalangin sa iyang katawhan. “Ang gamay nga usa” sa pagkatinuod nahimong “usa ka gamhanang nasod,” usa ka tibuok-kalibotang kongregasyon nga bug-os nahiusa sa tanang bahin​—sa hunahuna, sa buluhaton, sa pagsimba. (Isaias 60:22) Kini butang wala gayod mahimo sa bakak nga relihiyon.

Ang Kadaogan sa Putling Relihiyon

17. Unsay umaabot alang sa Babilonya nga Bantogan, ug sa unsang paagi kini mahitabo?

¹⁷ Ang Pulong sa Diyos nagtagna sa pagkalaglag sa tibuok-kalibotang imperyo sa bakak nga relihiyon, nga sa simboliko gitawag “Babilonya nga Bantogan.” Ang Bibliya naghawas usab sa “mga hari,” o politikanhong mga magmamando, sa yuta pinaagi sa simbolong mga sungay sa usa ka mapintas nga mananap. Kini nagatug-an kanato nga ibutang sa Diyos sa mga kasingkasing sa maong mga magmamando ang katuyoan sa pagbalitok ug paglaglag sa bug-os niining samag-bigaong institusyon ni Satanas nga Yawa.​—Tan-awa ang Pinadayag 17:1, 2, 5, 6, 12, 13, 15-18.b

18. Unsang dakong hinungdan ang gihatag sa Bibliya sa paglaglag sa Babilonya nga Bantogan, ug kanus-a nagsugod ang bakak nga relihiyon niining makalilisang nga dalan?

¹⁸ Nganong angay sa kalaglagan ang Babilonya nga Bantogan? Ang Bibliya nagatubag: “Nakaplagan diha kaniya ang dugo sa mga propeta ug sa mga balaan ug sa tanan niadtong gipatay sa yuta.” (Pinadayag 18:24) Sa pagpakita nga nahitabo kanang pagkasad-an sa dugo nga gihimo sa bakak nga relihiyon una pa sa pagkatukod sa Babilonya, gibadlong ni Jesus ang mga relihiyosong pangulo sa Jerusalem, nga nakig-anib sa Babilonya nga Bantogan, sa miingon siya: “Mga serpente, mga kaliwat sa mga halas nga malala, unsaon ninyo pagkalagiw sa pagkahinukman sa Gehenna? . . . Pagapanilngon kaninyo ang tanang matarong nga dugo nga naula sa yuta, gikan sa dugo sa matarong nga si Abel.” (Mateo 23:33-35) Oo, ang bakak nga relihiyon, nga nagsugod sa yuta panahon sa pagrebelde sa Eden, kinahanglang manubag tungod sa iyang makalilisang nga pagkasad-an ug dugo.

19, 20. (a) Unsay buhaton sa matuod nga mga magsisimba tapos ikapatuman ang paghukom diha sa Babilonya nga Bantogan? (b) Unsa unya ang mahitabo, ug unsang palaaboton ang mabuksan atubangan sa tanang matuod nga mga magsisimba?

¹⁹ Tapos sa kalaglagan sa Babilonya nga Bantogan, ang matuod nga mga magsisimba sa yuta moduyog sa ilang mga tingog sa langitnong koro nga nagaawit: “Dayega si Jah, kamong katawhan! . . . Kay gipatuman niya ang paghukom diha sa dakong bigaon . . . , ug gipanimaslan niya ang dugo sa iyang mga ulipon diha sa iyang kamot. . . . Ug ang aso gikan kaniya nagautbo hangtod sa hangtod.”​—Pinadayag 19:1-3.

²⁰ Unya pagalaglagon ang ubang mga bahin sa makitang organisasyon ni Satanas. (Pinadayag 19:17-21) Tapos niini, si Satanas, ang magtutukod sa tanang bakak nga relihiyon, ug ang iyang mga demonyo igatambog sa bung-aw. Sila dili na unya libre sa paglutos sa matuod nga mga magsisimba ni Jehova. (Pinadayag 20:1-3) Ang putling relihiyon unya magmadaogon ibabaw sa bakak. Ang matinuohon nga mga lalaki ug mga babaye nga nagapamati sa balaang pasidaan sa pagkalagiw karon gikan sa Babilonya nga Bantogan magbatog kahigayonan nga molabang buhi ug mosulod sa bag-ong kalibotan sa Diyos. Didto, sila makaarang sa pagtuman sa matuod nga relihiyon ug masimbahong mag-alagad kang Jehova sa walay kataposan.

[Footnote]

Tigia ang Imong Memorya

◻ Kansang baroganan bahin sa relihiyon ang labing hinungdanon, ug ngano?

◻ Unsang duha ka kinahanglanon alang sa matuod nga relihiyon ang gipasiugda ni Santiago?

◻ Unsa ang ubang mga kinahanglanon alang sa putling pagsimba?

◻ Unsang “maayong balita” ang ginawali sa mga Saksi ni Jehova?

◻ Sa unsang paagi ang matuod nga relihiyon magmadaogon ibabaw sa bakak nga relihiyon?

[Hulagway sa panid 17]

Ang relihiyosong mga pangulo nagtigom sa Assisi, Italya, sa Oktubre 1986

[Hulagway sa panid 19]

Ang matuod nga relihiyon naglangkit sa pagtigom alang sa pagsimba