Sa Unsang Paagi Kita Makabayad Kang Jehova?
SI JEHOVA nga Diyos nagahatag ug labing maayong pananglitan sa pagpanghatag. Siya naghatag sa tanang katawhan ug “kinabuhi ug gininhawa ug tanang butang.” (Buhat 17:25) Ang Diyos nagpasubang sa iyang adlaw pareho alang sa mga daotan ug matarong. (Mateo 5:45) Sa pagkamatuod, ‘si Jehova nagahatag ug ulan gikan sa langit ug kapanahonan nga makapabunga, nga nagabuhong sa atong mga kasingkasing sa kadagaya sa pagkaon ug kasadya.’ (Buhat 14:15-17) Ngani, “matag maayong gasa ug tanang hingpit nga hatag maoy gikan sa kahitas-an, kay kini nagagikan sa Amahan sa langitnong mga kahayag”!—Santiago 1:17.
Gawas sa tanang materyal nga mga gasa sa Diyos, siya nagapadala ug espirituwal nga kahayag ug kamatuoran. (Salmo 43:3) Ang mga maunongon nga mga alagad ni Jehova sa madagayaon napanalanginan sa espirituwal nga pagkaon nga iyang ginaabiyo sa igong panahon pinaagi “sa matinumanon ug maalamong ulipon.” (Mateo 24:45-47) Kita makabenepisyo gikan sa mga espirituwal nga tagana sa Diyos sanglit iyang gihimong posible alang sa mga makasasala ug himalatyong katawhan nga mapasig-uli kaniya. Sa unsang paagi? Pinaagi sa kamatayon sa iyang Anak, si Jesu-Kristo, kinsa naghatag sa iyang kinabuhi ingong lukat alang sa daghan. (Mateo 20:28; Roma 5:8-12) Pagkadakong gasa gikan sa mahigugmaong Diyos, si Jehova!—Juan 3:16.
Posible ba ang Bisan Unsang Bayad?
Mga kasiglohan sa wala pa ikatagana ang lukat, ang dinasig nga salmista sa tim-os nakapabili sa hinatag-Diyos nga kaluoy, kagawasan, ug tabang nga siya nakasulti: “Unsa man ang akong ikabayad kang Jehova alang sa tanan niyang mga kaayohan kanako? Ang kopa sa dakong kaluwasan akong pagadawaton, ug sa ngalan ni Jehova ako magatawag. Ang akong mga panaad akong pagabayran kang Jehova, oo, sa atubangan sa tanan niyang katawhan.”—Salmo 116:12-14.
Kon kita sa bug-os kasingkasing nagpahinungod kang Jehova, kita mosangpit sa iyang ngalan diha sa pagtuo ug magabayad sa mga panaad nga gihimo ngadto kaniya. Ingong mga Saksi ni Jehova, kita makadayeg sa Diyos pinaagi sa pagsulti ug maayo mahitungod kaniya sa tanang panahon ug sa pagpahayag sa mensahe sa iyang Gingharian. (Salmo 145:1, 2, 10-13; Mateo 24:14) Apan kita dili makapadato kang Jehova, kinsa ang nanag-iya sa tanang butang, o makabayad kaniya alang sa tanang kaayohan niya kanato.—1 Cronicas 29:14-17.
Ang paghimog mga donasyon alang sa pagpauswag sa intereses sa Gingharian dili usa ka paagi sa pagbayad o pagpadato kang Jehova. Hinuon, ang maong pagpanghatag mohatag kanato ug mga higayon sa pagpadayag sa atong gugma sa Diyos. Ang mga kontribusyon nga gihatag, dili gumikan sa mahakogong tinguha o alang sa publisidad ug kadayegan, kondili tungod sa manggihatagon nga espiritu ug sa pagtuboy sa matuod nga pagsimba, nagadala sa maghahatag ug kalipay ug mga panalangin gikan kang Jehova. (Mateo 6:1-4; Buhat 20:35) Ang usa makasiguro ug bahin sa maong pagpanghatag ug sa sangpotanang kalipay niini pinaagi sa regular nga pagpinig ug pipila gikan sa iyang materyal nga mga kabtangan alang sa pagsuportar sa matuod nga pagsimba ug pagtabang sa mga takos tabangan. (1 Corinto 16:1, 2) Kini ba pagahimoon pinaagi sa ikapulo o diyesmos?
Magdiyesmos ba Ka?
Si Jehova nagsulti pinaagi sa iyang propetang si Malakias: “Dad-a ninyo ang tibuok nga ikapulo ngadto sa balay nga tipiganan, aron nga adunay kalan-on diha sa akong balay; ug sulayi ninyo ako, palihog, niining paagiha, . . . kondili ba pagabuksan ko kaninyong mga katawhan ang mga tamboanan sa kalangitan ug sa pagkamatuod igabubo ko kaninyo ang usa ka panalangin hangtod nga wala nay pagkinahanglan.” (Malakias 3:10) Ang laing hubad mabasa: “Dad-a ang tibuok nga diyesmos ngadto sa tipiganan.”—An American Translation.
Ang diyesmos maoy ikanapulo nga bahin sa butang. Kini ang 10 porsiento nga ginahatag o ginabayad ingong usa ka alkabala. Ang paghatag ug diyesmos ilabi na nga ginahimo alang sa relihiyosong mga katuyoan. Kini nagkahulogan sa paghatag sa ikanapulo sa abot sa usa aron sa pagtuboy sa pagsimba.
Ang patriarkang si Abraham (Abram) mihatag kang Melquisedec ang hari-saserdote sa Salem ug ikapulo sa mga inagaw sa kadaogan batok kang Chedorlaomer ug sa iyang mga kaalyado. (Genesis 14:18-20; Hebreohanon 7:4-10) Sa kaulahian, si Jacob nagpanaad sa paghatag ug ikapulo sa iyang materyal nga kabtangan ngadto sa Diyos. (Genesis 28:20-22) Sa matag kaso, ang paghatag ug ikapulo maoy boluntaryo, kay kadtong sayong mga Hebreohanon wala pay mga balaod nga mag-obligar kanila sa paghatag ug diyesmos.
Diyesmos Ilalom sa Balaod
Ingong katawhan ni Jehova, ang mga Israelitas nakadawat ug mga balaod sa diyesmos. Kini sa dayag naglangkit sa paggamit ug duha ka ikapulo sa tinuig nga mga abot, bisan tuod ang pila ka mga iskolar naghunahuna nga duna lamay usa ka tinuig nga diyesmos. Walay diyesmos ang bayran sa panahon sa Igpapahulay nga tuig, sanglit walay madahom nga abot. (Levitico 25:1-12) Ang mga diyesmos gihatag ingong dugang sa mga unang bunga nga ihalad sa Diyos.—Exodo 23:19.
Ang ikanapulo sa abot sa yuta ug sa mga prutasan ug daw nagalakip sa usbaw sa mga kahayopan ug mga panon maoy ginadala sa santuwaryo ug ihatag ngadto sa mga Levita, kinsa walay nadawat nga panulondon sa yuta. Sa baylo, sila mohatag ug ikanapulo sa kon unsay ilang madawat sa pagsuportar sa Aaronikong pagkasaserdote. Dayag ang lugas nagiok na ug ang bunga sa parras ug sa kahoyng olibo nahimo nang bino ug lana una pa sa diyesmos. Kon ang usa ka Israelita buot mohatag ug salapi inay kay sa produkto, siya makahimo sa ingon, lamang kon dugangan niya ug ikalimang bahin sa maong kantidad.—Levitico 27:30-33; Numeros 18:21-30.
Ang laing diyesmos usab morag gigahin. Ang kasagaran, kini pagagamiton sa usa ka pamilya sa dihang magtigom ang mga tawo alang sa mga pangilin. Apan komosta naman kon ang distansiya paingon sa Jerusalem layo kaayo ug dili sayon ang pagtumod niining diyesmosa? Mao nga ang lugas, bag-ong bino, lana, ug mga hayop ibaligya aron masapi nga sayon dad-on. (Deuteronomio 12:4-18; 14:22-27) Sa kataposan sa matag ikatulo ug ikaunom ka tuig sa siklo sa pito-tuig nga igpapahulay, ang diyesmos ginapinig alang sa mga Levita, langyawng mga molupyo, mga balo, ug mga ilo.—Deuteronomio 14:28, 29; 26:12.
Ilalom sa Kasugoan, walay silot sa pagkapakyas sa paghatag ug ikapulo. Hinunoa, gibutang ni Jehova ang katawhan ilalom sa kusganong moral nga obligasyon sa paghatag sa mga ikapulo. May panahon nga kinahanglang ilang ideklarar sa iyang atubangan nga ang ikapulo nabayran sa bug-os. (Deuteronomio 26:13-15) Ang bisan unsang sa kadaotan gipugngan giisip ingong butang gikawat gikan sa Diyos.—Malakias 3:7-9.
Ang diyesmos maoy dili bug-at nga kahikayan. Sa pagkamatuod, sa dihang ang mga Israelitas nagsunod ning mga balaora, sila nahimong mauswagon. Ang diyesmos nagtuboy sa matuod nga pagsimba nga wala magpasiugdag hinobra kon sa unsang paagi ang mga materyal nga pagtagana alang niana pagahimoon. Mao nga, ang pagdiyesmos nga kahikayan misangpot sa kaayohan sa tanan diha sa Israel. Apan ang pagdiyesmos ba alang sa mga Kristohanon?
Dapat ba Magdiyesmos ang mga Kristohanon?
Sa pipila ka panahon, ang pagdiyesmos maoy kasagaran diha sa dapit sa Kakristiyanohan. Ang The Encyclopedia Americana nag-ingon: “Kini . . . sa inanay nahimong naandan pag-abot sa ika-6 nga siglo. Ang Konsilyo sa Tours sa 567 ug ang ikaduhang Konsilyo sa Macon sa 585 nagpaluyo sa pagdiyesmos. . . . Ang mga pag-abuso nahimong naandan, ilabina sa dihang ang katungod sa pagkolekta sa masubsob gihatag o gibaligya ngadto sa mga ordinaryong magbubuhat sa simbahan. Sugod kang Papa Gregorio VII kining tulomanon gipahayag nga ilegal. Daghang magbubuhat kanhi ang nagpakita sa ilang mga katungod sa diyesmos sa mga monasteryo ug mga sanga sa katedral. Ang Repormasyon wala magpapas sa pagdiyesmos, ug ang tulumanon gipadayon diha sa Romano Katolikong Simbahan ug diha sa Protestanteng mga nasod.” Ang pagdiyesmos gipapas o sa hinayhinay gialid-an diha sa daghang kayutaan, ug diyutayng mga relihiyon ang karon nagatuman niini.
Busa, karon, ang mga Kristohanon ba gibaoran sa pagdiyesmos? Sa iyang konkordansiya sa Bibliya, si Alexander Cruden nag-ingon: “Ang atong Manluluwas, ni ang iyang mga apostoles walay bisan unsang mando niining kalihokan sa pagdiyesmos.” Sa pagkamatuod, ang mga Kristohanon wala sugoa sa pagdiyesmos. Ang Diyos mismo nagtapos sa Moisesnong Balaod, uban ang iyang kahikayan sa diyesmos, nga naglansang niana sa kahoy sa pagsakit ni Jesus. (Roma 6:14; Colosas 2:13, 14) Imbes nga sugoon sa paghatag ug tinong kantidad alang sa galastohan sa kongregasyon, ang mga Kristohanon, hinuon, mohatag ug boluntaryong mga kontribusyon.
Pasidunggi si Jehova Pinaagi sa Imong Bililhong mga Butang
Hinuon, kon ang usa ka Kristohanon sa boluntaryo mopalabi sa paghatag ug ikanapulo sa iyang abot sa pagpauswag sa matuod nga pagsimba, wala man ing Kasulatanhon nga pagtutol sa iyang paghimo sa maong donasyon. Sa usa ka sulat kuyog sa iyang donasyon, usa ka-15 anyos nga batang lalaki sa Papua New Guinea nagsulat: “Sa ako gamay pa, ang akong amahan kanunay mosulti kanako, ‘Kon ikaw magsugod nag trabaho, kinahanglan imong ihatag ang unang bunga kang Jehova.’ Akong nahinumdoman ang mga pulong sa Proverbio 3:1, 9, nga nagaingon nga kita kinahanglan mohatag sa inunahang bunga kang Jehova sa pagpasidungog kaniya. Busa ako nanaad sa pagbuhat niini, ug karon kinahanglan akong tumanon ang akong saad. Ako nalipay kaayo sa pagpadala niining salapi sa pagtabang sa buluhaton sa Gingharian.” Ang Bibliya wala magaawhag sa mga Kristohanon sa pagbuhat sa ingong panaad. Hinuon, ang dungganong pagpanghatag maoy usa ka maayong paagi sa pagpakitag dulot nga kaikag sa pagtuboy sa matuod nga pagsimba.
Ang usa ka Kristohanon mahimong mopili sa dili pagbutang ug tinong limiti sa donasyon nga iyang himoon sa pagpauswag sa pagsimba kang Jehova nga Diyos. Sa pag-ilustrar: Samtang diha sa asembliya sa mga Saksi ni Jehova, duruha ka tigulang mga sister naghisgot bahin sa donasyon nga mahimong ihatag alang sa buluhaton sa Gingharian. Usa ka sister, nga nag-edad ug 87 anyos, nangutana kon pila bay abton sa pagpalit ug pagkaon sa dapit sa asembliya aron ikadonar niya ang samang kantidad. Ang laing sister, kinsa nag-edad ug 90, miingon: ‘Ihatag lang ang gihunahuna nimong takos—ug dugangi pod.’ Usa ka maayong tinamdan ang gipakita ning mas gulang nga sister!
Sanglit ang katawhan ni Jehova nagdedikar sa tanang ilaha ngadto kaniya, sila malipayon nga mohatag ug salaping mga donasyon ug ubang kontribusyon sa pagsuportar sa matuod nga pagsimba. (Itandi sa 2 Corinto 8:12.) Sa pagkamatuod, ang paagi sa Kristohanon sa pagpanghatag nagahatag ug higayon sa pagpahayag ug halalom nga pagpabili alang sa pagsimba kang Jehova. Ang samang pagpanghatag dili limitado sa diyesmos, o ikapulo, ug duna tingaliy mga kahimtang nga ang usa mapalihok sa paghatag ug dako pa sa pagpauswag sa intereses sa Gingharian.—Mateo 6:33.
Ang apostol nga si Pablo miingon: “Pasagdi ang matag-usa nga mohimo sumala sa pagbuot sa iyang kasingkasing, dili nga magapanuko o ingon nga pinugos, kay ang Diyos nagahigugma sa malipayong maghahatag.” (2 Corinto 9:7) Kon ikaw mohatag nga malipayon ug madagayaon sa pagsuportar sa matuod nga pagsimba, ikaw maayo unyag kahimtang, kay ang maalamong Proverbio nagaingon: “Pasidunggi si Jehova pinaagi sa imong bililhong mga butang ug pinaagi sa mga inunahang bunga sa tanan nimong abot. Unya ang imong mga tipiganan sa abiyo mapuno sa kadagaya; ug magaawas sa bag-ong bino ang imong mga pigsanan.”—Proverbio 3:9, 10.
Kita dili makapadato sa Labing Hataas. Siya ang nagapanag-iya sa tanang bulawan ug salapi, sa mga mananap sa kaliboan ka kabukiran, ug bililhong mga butang nga dili maihap. (Salmo 50:10-12) Dili gayod kita makabayad sa Diyos alang sa tanang kaayo niya kanato. Apan kita makapakita sa atong halalom nga pagpabili kaniya ug sa pribilehiyo sa paghatag ug sagradong pag-alagad alang sa iyang kadayeganan. Ug kita makasiguro nga dagayang mga panalangin modagayday kanila nga nagahatag ug daghan sa pagtuboy sa putli nga pagsimba ug nagapasidungog sa mahigugmaon ug manggihatagong Diyos, si Jehova.—2 Corinto 9:11.
[Kahon sa panid 29]
KON SA UNSANG PAAGI ANG PIPILA MOAMOT SA BULUHATON SA GINGHARIAN
◻ MGA KONTRIBUSYON ALANG SA TIBUOK KALIBOTANG BULUHATON: Daghan ang mopinig o mobadyet ug kantidad nga ilang ikahulog sa mga kahon sa kontribusyon nga gitiman-an: “Mga Amot Alang sa Tibuok Kalibotan nga Buluhaton sa Sosyedad—Mateo 24:14.” Sa matag bulan, ang mga kongregasyon magpadala niining kantidara sa pangunang-buhatan sa Brooklyn, Nueva York, o sa pinakaduol nga sangang buhatan.
◻ MGA GASA: Ang boluntaryong mga donasyon nga salapi ikapadalang direkta sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang buhatan sa Sosyedad. Ang alahas o ubang mahalong butang, ikadonar usab. Ang mubong sulat nga magapahayag nga kana maoy laktod nga donasyon angay magauban sa maong mga amot.
◻ KONDISYONAL-DONASYONG KAHIKAYAN: Ang kuwarta ikahatag ngadto sa Watch Tower Society nga huptang sinalig hangtod sa kamatayon sa nagdonar, uban ang probisyon nga enkaso sa personal nga panginahanglan, kini iuli sa nagdonar.
◻ SEGURO: Ang Watch Tower Society kanganlan nga manununod sa usa ka polisa sa seguro o life-insurance o sa plano sa pagretiro/pensiyon. Ang Sosyedad angay pahibaloon sa maong kahikayan.
◻ MGA KUWENTA SA BANGKO: Mga kuwenta sa bangko, mga sertipiko sa deposito, o kuwenta sa usa alang sa pagretiro mahimong ikabutang in trust for o gihimong payable on death to Watch Tower Society, nahasubay sa lokal nga latid sa bangko. Ang Sosyedad dapat pahibaloon sa maong mga kahikayan.
◻ STOCKS AND BONDS: Ang mga stock ug bond mahimong ikadonar sa Watch Tower Society pinaagi sa dihadiha nga gasa o ubos sa usa ka kahikayan nga ang kitaon padayon nga madawat sa nagdonar.
◻ BALAY UG YUTA: Ang arang ikabaligya nga balay ug yuta mahimong ikadonar sa Watch Tower Society pinaagi sa dihadiha nga gasa o magbilin ug luna alang sa nagdonar samtang buhi, nga siya makapadayon sa pagpuyo dinha sa sulod sa iyang pagkinabuhi. Ang usa angay nga mokontak usa sa Sosyedad una pa dokumentohan ang bisan unsang balay ug yuta ngadto sa Sosyedad.
◻ WILLS AND TRUSTS: Ang mga kabtangan o salapi mahimong ikabilin sa Watch Tower Bible and Tract Society of Pennsylvania pinaagi sa usa ka legal pagkahimo nga testamento, o ang Sosyedad mahimong kanganlan ingong manununod sa usa ka kasabotan sa trust. Ang usa ka trust nga usa ka relihiyosong organisasyon ang makabenepisyo mahimong may tinong bentaha bahin sa buluhisan. Usa ka kopya sa testamento o kasabotan sa trust kinahanglan ipadala sa Sosyedad.
Alang sa dugang impormasyon mahitungod ning mga butanga, pagsulat sa Treasurer’s Office, Watch Tower Bible and Tract Society of the Philippines, P.O. Box 2044, 1099 Manila, o sa labing duol nga sangang-buhatan sa Sosyedad.