Usa ka Ministeryo ba Alang Kanimo?

SI Jehova nagpakita sa iyang kamahinatagon pinaagi sa hingpit nga pagtagana sa yuta alang sa atong kalipay sa kinabuhi. Siya sa kamahinatagon nagtugot nga magpabilin kining maong mga tagana bisan human sa pagrebelde ni Adan ug Eva. Lain pa, iyang gipahayag ang iyang kinalabwang gugma pinaagi sa pagpadala sa iyang Anak aron maluwas ang nagatuong katawhan gikan sa kadaotan sa sala.​—Mateo 5:45; Juan 3:16.

Sa unsang paagi makasanong kita sa maong gugma? Si Jesus miingon nga atong higugmaon si Jehova nga atong Diyos uban sa atong tibuok kasingkasing, kalag, hunahuna, ug kusog. Kini nagsugyot nga atong nautang kaniya ang atong pagsimba ug kamaunongon ug nga kita kinahanglang magkinabuhi nga uyon sa iyang kabubut-on.​—Marcos 12:30; 1 Pedro 4:2.

Apan unsay nalangkit sa pagtuman sa kabubut-on sa Diyos? Aduna bay usa ka pag-alagad nga atong ikahatag kaniya​—usa ka ministeryo nga angay natong pakig-ambitan?

Gikinahanglan ang mga Ministro

Gilibog sa mga iglesya ang katawhan kon sa unsang paagi simbahon ug alagaran ang Diyos. Apan, ang Bibliya nagpakita nga adunay usa lamang ka matuod nga relihiyon, “usa ka Ginoo, usa ka pagtuo, usa ka bawtismo; usa ka Diyos ug Amahan sa tanang mga tawo.” Si Jesus miingon: “Ang matuod nga mga magsisimba, magasimba sa Amahan diha sa espiritu ug kamatuoran.” Busa sila gitambagan: “Kamo kinahanglang magasulti sa usa ka butang, ug . . . wala unta kaninyoy mga pagbahinbahin.”​—Efeso 4:3-6; Juan 4:23; 1 Corinto 1:10.

Ang kalibog kon unsa ang matuod nga relihiyon misugod sa Eden sa dihang gihagit ni Satanas ang katungod sa pagkasoberano ni Jehova pinaagi sa pagkuwestiyon sa paagi sa pagmando sa Diyos. (Genesis 3:1-6, 13) Gilig-on ni Satanas karon kini nga pagbatok sa Diyos pinaagi sa bakak nga mga pagtulon-ang gipakaylap sa malimbongong mga ministro sa relihiyon kinsa “nagpadayon sa pagtakoban sa ilang kaugalingon ingong mga ministro sa pagkamatarong.” Busa ang Bibliya nagaingon: “Mga hinigugma, ayaw ninyo pagtuohi ang tanang dinasig nga pulong . . . kay daghan ang bakak nga mga propeta nga managpanungha sa kalibotan.”​—2 Corinto 11:14, 15; 1 Juan 4:1.

Makalilipay, ang Diyos mihimog mga lakang sa paghusay niining isyuha sa pagmando. Kay gipadala ang iyang Anak sa paglukat sa katawhan, siya karon naghimo kang Jesus nga Hari sa langitnong Gingharian sa Diyos, nga may gahom sa paglaglag kang Satanas ug sa iyang mga propeta, o mga ministro. Kini magtino nga ang kabubut-on sa Diyos matuman dinhi sa yuta, alang sa walay kataposang panalangin sa mga tawong masinugtanon.​—Daniel 7:13, 14; Hebreohanon 2:9.

Gilubog ni Satanas kini nga mga kamatuoran. (2 Corinto 4:4) Busa, kinahanglan mag-alagad kita ingong mga ministro sa Diyos, iyagyag ang kabakakan ni Satanas ug magapamatuod sa kamatuoran. Kita wala pugsa ni Jehova niini nga pag-alagad. Buot niya nga kita, sama kang Jesus, motanyag sa atong kaugalingon sa kinabubut-on agig apresasyon kaniya ug sa iyang nabuhat alang kanato.​—Salmo 110:3; Hebreohanon 12:1-3.

Ang Kristohanong Ministeryo

Si Jesus “miadto sa kasiyudaran ug kabalangayan, nagasangyaw ug nagamantala sa maayong balita sa gingharian sa Diyos.” (Lucas 8:1) Iyang gibansay usab ang iyang mga tinun-an nga mahimong mga ministro sama kaniya ug nagpadala kanila sa pagsangyaw. (Mateo 10:1-14, 27) Sa ulahi, siya nagsugo kanila nga magpadayon sa ministeryo hangtod sa kinatumyang bahin sa yuta.​—Mateo 28:19, 20; Buhat 1:8.

Kining sugoa nahipatong diha sa matuod nga mga Kristohanon, ug ang espiritu sa Diyos nagpalihok kanila sa pagsangyaw. Sama sa nahitabo sa Pentekostes 33 K.P., ang tanang midawat sa maayong balita midawat sa kaakohan sa paghimog publikong kapahayagan sa ilang pagtuo.​—Buhat 2:1-4, 16-21; Roma 10:9, 13-15.

Apan, ang kadaghanang mga tawo dili buot nga mahimong mga ministro. Si Peter, usa sa mga Saksi ni Jehova, miingon: “Kasagarang gilantaw sa mga lalaki sa Alemanya kini nga makauulaw ang paghisgot sa relihiyon. ‘Trabaho kana sa mga klero,’ matud nila.” Sumala kang Tony, usa ka misyonaryo sa daghan nang katuigan, ang mga tawo sa Inglaterra nakaingon: “Maayo ang imong gisulti, ug ako nagtuo nga maayong mga tawo ang mga Saksi ni Jehova. Apan ang pagduaw sa ganghaan ug ganghaan sa pagsangyaw​—dili ko kana mabuhat.” Gitun-an ni Ben makadiyut sa Bibliya ang usa ka lalaking taga Nigeria kinsa miingon kaniya: “Dili ko makaarang sa pagpadayag sa akong kaugalingon nga magsangyaw sa publiko gikan sa balay ug balay; apan mohatag ako ug kuwarta sa inyong kongregasyon aron tabangan kadtong andam mobuhat niana.” Oo, ang kadaghanang mga tawo kulang sa pagtuo nga gikinahanglan alang sa Kristohanong ministeryo.

Bisan pa, ang ministeryong pagsangyaw maoy kaakohan sa tanan diha sa Kristohanong kongregasyon, bisan ug unsay edad o sekso. Dili lamang kini alang sa mga ansiano ug sa ministeryal nga mga alagad, nga ‘nagapanguna,’ kondili alang usab kini sa mga Kristohanon sa katibuk-an. Ang tanan gitambagan: “Itanyag ngadto sa Diyos ang usa ka halad sa pagdayeg, sa ato pa, ang bunga sa mga ngabil nga nagahimog publikong kapahayagan sa iyang ngalan. . . . Magmasinugtanon kamo sa nagapanguna taliwala kaninyo.”​—Hebreohanon 13:15, 17.

Nagpakigpulong sa nagkasagol nga panon sa iyang Wali sa Bukid, si Jesus miingon: “Dili ang tanang magaingon kanako, ‘Ginoo, Ginoo,’ ang makasulod sa gingharian sa mga langit, kondili ang nagatuman lamang sa kabubut-on sa akong Amahan nga anaa sa mga langit.” Sa laing okasyon iyang gipakita nga ang pagbuhat sa kabubut-on sa Diyos naglakip sa pagsangyaw ngadto sa mga di-magtutuo. Ang iyang mga tinun-an miagda kaniya sa paghunong una sa pagsangyaw sa pipila ka Samarianhon aron makakaon, apan siya miingon: “Ang akong pagkaon mao ang pagbuhat sa kabubut-on sa nagpadala kanako ug sa pagtapos sa iyang buluhaton.”​—Mateo 7:21; Juan 4:27-38.

Kini ba ang Angay Nimong Karera?

Ang mga tawo kasagaran mopili sa pagpangitag materyal nga pagkaon ug bahandi. Apan sayosayo pa sa Wali sa Bukid, gitambagan ni Jesus ang iyang mga mamiminaw batok sa mabalak-ong pagpangita niining mga butanga. “Hinunoa,” siya miingon, “pagtigom kamog mga bahandi alang kaninyo didto sa langit . . . Nan, padayon sa pagpangita pag-una sa gingharian ug sa pagkamatarong sa [Diyos].”​—Mateo 6:20, 33.

Ang pagpangita pag-una sa Gingharian nagpasabot nga dili nato tugotang ang ubang mga intereses maoy mangibabaw sa atong ministeryo. Apan, ang pagbuhat niini wala magpasabot nga nahigawas ang tanang butang. Pananglitan, ang Bibliya nagdasig kanato nga dili pasagdan ang tinuod nga mga obligasyon sa pamilya. Atong lantawon nga ang tanang tawo aduna niining mga obligasyona. Ang pagpasagad niini maoy paglihok sa paagi nga supak sa Kristohanong pagtuo. (1 Timoteo 5:8) Bisan pa niana, atong buhaton kutob sa atong maarangan diha sa ministeryo samtang magaatiman sa atong ubang mga kaakohan sa timbang nga paagi.

Si Jesus miingon: “Kining maayong balita sa gingharian igawali . . . alang sa pagpamatuod sa tanang kanasoran; ug unya moabot ang kataposan.” (Mateo 24:14) Ang konteksto sa maong tagna nagbutang sa katumanan niini sa atong adlaw. Sukad sa 1914 ang maayong balita mao nga ang Gingharian sa Diyos gigamhan na sa paglihok nga uyon sa pagkasoberano ni Jehova ug batok ni Satanas ug sa iyang kalibotan. (Pinadayag 11:15-18) Angay natong hunahunaon nga seryoso ang mga nalangkit niini. Ang kataposan moabot, ug kinahanglang tumanon nato ang buluhatong pagsangyaw sa dili pa kana moabot. Ang mga kinabuhi nameligro; kita makatabang sa pagluwas sa daghan kanila.

Kab-ota ang Mas Bug-os pa nga Ministeryo

Kadaghanan sa mga Saksi ni Jehova nagagugol ug napulo o kapin pa nga mga oras matag bulan sa pagpakig-ambit sa maayong balita ngadto sa uban. Kaliboan ang nagagugol ug duha o kapin pa nga mga oras matag adlaw diha sa pagsangyaw ingong mga auxiliary payunir, ug ang uban padayong nag-alagad ingong mga regular ug espesyal payunir. Sila nakasabot sa pagkadinalian niining buluhatona ug buot nga moambit sa mas bug-os pa kutob sa maarangan aron matapos kining buluhatona sa dili pa moabot ang kataposan niining di-malipayong kalibotan.

Ikaw ba aktibo na nga Saksi ni Jehova? Nan kab-ota ang mas bug-os pa nga pagpakigbahin diha sa pag-alagad. Pauswaga ang imong kahanas sa pagsangyaw ug pagpanudlo, paningkamoti nga makahimog labaw pa diha sa ministeryo. Kon ikaw anaa sa posisyon nga mahimong usa ka payunir, buhata kana. Kon ang imong mga sirkumstansiya sa pagkatinuod dili motugot kanimo sa pagpayunir, nan dasiga kadtong kinsa makahimo sa pagkab-ot alang niini nga pag-alagad.

Kon ikaw dili pa usa ka dedikadong Saksi ni Jehova, ayaw pag-ingon nga ang ministeryo dili alang kanimo. Ang laing tawo nga ginganlag Peter, usa ka mekanikal nga enhinyero, supak kaayo sa pagpakigbahin sa iyang asawa sa maayong balita ngadto sa uban. “Sa unsang paagi mapugngan ko ang akong asawa sa pagsangyaw sa maayong balita sa balay ug balay?” siya nangutana. Human sa daghang tuig sa pag-obserbar kaniya sa iyang hugot nga pagtuo mahitungod sa kamatuoran sa Pulong sa Diyos, siya mihukom sa pagtuon usab sa Bibliya. Karon, sama sa iyang asawa, siya usa na ka dedikado, bawtismadong ministro sa maayong balita.

Busa ayaw babagi ang imong kaugalingon gikan sa pribilehiyo sa pag-alagad kang Jehova. Gidasig namo kamo sa pagtuon sa Bibliya ug sa pagpakig-uban sa matuod nga mga Kristohanon sa ilang mga tigom. Kini motabang kanimo nga maumol ang imong kinabuhi nga kaharmoniya sa pagkamatarong sa Diyos ug matukod ang malig-ong pagtuo diha sa iyang mga katuyoan. Kon mauswagon ka niini, ikaw usab mahimong takos ingong ministro sa Diyos. Ikaw unya makapribilehiyo sa pagpakig-ambit sa pagtuman niining sugoa ni Jesus: “Busa panglakaw kamo ug paghimog mga tinun-an . . . magtudlo kanila sa pagtuman sa tanang butang nga gisugo ko kaninyo.”​—Mateo 28:19, 20.

Oo, dunay usa ka ministeryo diin ikaw makaambit, ug kini labi pang dinalian sukad masukad alang kanimo nga pagabuhaton.

[Kahon sa panid 25]

Usa ka nars nga dunay pamilya nga atimanon miingon: “Ako mobiyahe kapig usa ka oras kada adlaw ngadto sa ospital nga akong gitrabahoan, busa abi nako ug dili ako makaauxiliary payunir. Apan giorganisar ko ug maayo ang akong mga kalihokan aron makig-ambit sa pag-alagad sa kanataran sayo kada buntag sa dili pa motrabaho, sa panahon sa pagpahulay sa trabaho, ug sa mga libreng adlaw. Imong mahanduraw ang akong kalipay sa dihang, sa kataposan sa bulan, nakagugol ako ug 117 ka oras sa pagsangyaw! Nakapahimutang ug 263 ka magasin, 22 ka suskrisyon sa mga magasin ug nakasugod ug 3 ka pagtuon sa Bibliya.”

[Kahon sa panid 27]

Si Michael dunay pito ka anak, ug dako siyag posisyon diha sa usa ka kolehiyo sa Nigeria. Usa usab siya ka ansiano sa Kristohanong kongregasyon. Sama siyag paglantaw sa kaliboang mga Saksi:

“Gilantaw ko ang ministeryo ingong akong karera ug kanunayng nahinumdom nga si Pablo miingon: ‘Ako ang nagtanom, si Apolos ang nagbisibis, apan ang Diyos ang nagpatubo.’ Ang akong asawa ug ako ‘nagtanom’ sa makadiyut nga balay ug balay nga mga panaghisgot sa maayong balita. Kami ‘nagbisibis’ pinaagi sa pagbalik duaw niadtong nagpakitag interes sa pagtudlo kanila gikan sa Bibliya, sama sa giingon ni Jesus nga atong buhaton. Ang senemanang pagtuon sa Bibliya nakatabang ug daghan tawo—sa pila ka kahimtang ang tibuok panimalay—sa pagdangat sa pagkahibalo sa kamatuoran.”