Si Jehova Nahigugma sa mga Malipayong Maghahatag

“Pasagdi nga ang matag usa magahatag sumala sa pagbuot sa iyang kasingkasing, dili nga magapanuko ni ingon nga pinugos, kay ang Diyos nahigugma sa mga malipayong maghahatag.”​—2 CORINTO 9:7.

1. Sa unsang paagi ang Diyos ug si Kristo maoy malipayong mga maghahatag?

SI Jehova mao ang unang malipayong maghahatag. Siya malipayong mihatag ug kinabuhi sa iyang bugtong Anak ug gigamit siya aron malalang ang mga manulonda ug katawhan. (Proverbio 8:30, 31; Colosas 1:13-17) Gihatagan kita sa Diyos ug kinabuhi ug gininhawa ug tanang mga butang, apil sa mga ulan gikan sa langit ug mabungahong mga panahon, nga nabuhong ang atong mga kasingkasing sa kalipay. (Buhat 14:17; 17:25) Sa pagkamatuod, ang Diyos ug ang iyang Anak, si Jesu-Kristo, maoy malipayong mga maghahatag. Sila malipayong nagahatag nga walay mahakogon nga espiritu. Gihigugma pag-ayo ni Jehova ang kalibotan sa katawhan nga “iyang gihatag ang iyang bugtong Anak, aron ang motuo kaniya dili malaglag kondili makabaton ug kinabuhing dayon.” Ug si Jesus sa walay pagpanuko ‘mihatag sa iyang kalag ingong lukat alang sa daghan.’​—Juan 3:16; Mateo 20:28.

2. Sumala kang Pablo, unsang matanga sa maghahatag ang gihigugma sa Diyos?

² Busa, ang mga alagad sa Diyos ug Kristo, angay nga maoy malipayong mga maghahatag. Ang maong paghatag maoy gidasig sa ikaduhang sulat ni apostol Pablo ngadto sa mga Kristohanon sa Corinto, nga gisulat sa mga 55 K.P. Tataw nga naghisgot bahin sa kinabubut-on ug pribadong mga amot nga salapi nga gihatag ilabina sa pagtabang sa nagkinahanglang mga Kristohanon sa Jerusalem ug sa Judea, si Pablo miingon: “Pasagdi nga ang matag usa magahatag sumala sa pagbuot sa iyang kasingkasing, dili nga magapanuko ni ingon nga pinugos, kay ang Diyos nahigugma sa mga malipayong maghahatag.” (2 Corinto 9:7; Roma 15:26; 1 Corinto 16:1, 2; Galacia 2:10) Unsay pagsanong sa katawhan sa Diyos sa kahigayonan sa paghatag? Ug unsay atong makat-onan gikan sa tambag ni Pablo bahin sa paghatag?

Natukmod sa Mainandamong mga Kasingkasing

3. Sa unsang sukod nga gisuportahan sa mga Israelinhon ang pagtukod sa tabernakulo sa pagsimba ni Jehova?

³ Ang mainandamong mga kasingkasing maoy nagtukmod sa katawhan sa Diyos sa paghatag sa ilang kaugalingon ug sa ilang mga kahinguhaan sa pagsuportar sa balaang katuyoan. Pananglitan, ang mga Israelinhon sa mga adlaw ni Moises malipayong misuportar sa pagtukod sa tabernakulo alang sa pagsimba ni Jehova. Ang mga kasingkasing sa pipila ka babaye nagtukmod kanila sa pagbilik sa balhibo sa kanding, samtang ang ubang mga lalaki nag-alagad ingong mga artesano. Ang mga tawo malipayong mihatag ug bulawan, plata, kahoy, lino, ug ubang mga butang ingong kinabubut-ong “amot alang kang Jehova.” (Exodo 35:4-35) Sila mahinatagon kaayo nga ang nahatag nga mga materyales “igo aron sa paghuman sa tanan nga trabaho, ug sobra pa kay sa gikinahanglan.”​—Exodo 36:4-7.

4. Unsay tinamdan ni David ug sa uban labot sa pag-amot sa templo?

⁴ Sa milabay ang mga siglo, si Haring David miamot ug dako sa templo ni Jehova nga pagatukoron sa iyang anak nga si Solomon. Sanglit si David ‘may kalipay sa balay sa Diyos,’ iyang gihatag ang iyang “linain nga bahandi” nga bulawan ug plata. Ang mga prinsipe, mga punoan, ug ang uban ‘nagpuno sa ilang kamot ug gasa alang kang Jehova.’ Unsa ang epekto? Aw, “ang katawhan nangalipay tungod sa ilang paghatag nga kinabubut-on, tungod kay uban sa usa ka hingpit nga kasingkasing sila nanghatag kang Jehova sa kinabubut-on”! (1 Cronicas 29:3-9) Sila maoy malipayong mga maghahatag.

5. Sa unsang paagi gisuportahan sa mga Israelinhon ang tinuod nga pagsimba sa milabay ang mga siglo?

⁵ Sulod sa daghang kasiglohan, ang mga Israelinhon nakapribilehiyo sa pagsuportar sa tabernakulo, sa ulahi nga mga templo, ug sa mga pag-alagad sa mga saserdote ug sa mga Levihanon didto. Pananglitan, sa mga adlaw ni Nehemias ang mga Hudiyo mihukom sa pag-amot aron mapatunhay ang putli nga pagsimba, nahibalo nga dili gayod nila angay pasagdan ang balay sa Diyos. (Nehemias 10:32-39) Sa susama karong adlawa, ang mga Saksi ni Jehova malipayong nagahatag ug kinabubut-ong mga donasyon sa pagtukod ug sa pagmentinar sa mga dapit nga tigomanan ug sa pagsuportar sa matuod nga pagsimba.

6. Paghatag ug mga panig-ingnan sa malipayong paghatag sa mga Kristohanon.

⁶ Ang unang mga Kristohanon maoy malipayong mga maghahatag. Pananglitan, si Gayo naghimog “usa ka matinumanong buluhaton” tungod sa iyang pagkahimong maabiabihon sa mga nagapanaw alang sa intereses sa Gingharian, sama nga ginapaabot sa mga Saksi ni Jehova ang ilang pagkamaabiabihon ngadto sa nagapanawng mga magtatan-aw nga karon gipadala sa Watch Tower Bible and Tract Society. (3 Juan 5-8) Nagkinahanglag kuwarta ang pagpabiyahe niining mga igsoona ngadto sa mga kongregasyon ug sa pagpaabot sa pagkamaabiabihon ngadto kanila, apan pagkamapuslanon niini sa espirituwal!​—Roma 1:11, 12.

7. Sa unsang paagi gigamit sa mga taga Filipos ang ilang materyal nga kahinguhaan?

⁷ Ang mga kongregasyon sa katibuk-an migamit sa ilang materyal nga kahinguhaan sa pagpalambo sa mga intereses sa Gingharian. Pananglitan, gisultihan ni Pablo ang mga magtutuo sa Filipos: “Kay bisan didto sa Tesalonica, gipadad-an ninyo akog hinabang dili lamang sa makausa ra kondili sa makaduha alang sa akong panginahanglan. Dili nga ginatinguha ko ang inyong mga gasa, kondili nga ginatinguha ko nga mabulahan usab kamo.” (Filipos 4:15-17) Ang mga taga Filipos malipayong mihatag, apan unsang mga butang ang nakatukmod sa maong malipayong paghatag?

Unsay Nagtukmod sa Malipayong Paghatag?

8. Sa unsang paagi imong kapamatud-an nga ginapalihok sa espiritu sa Diyos ang katawhan sa Diyos aron mahimong malipayong mga maghahatag?

⁸ Ang balaang espiritu ni Jehova, o aktibong gahom, maoy nagapalihok sa iyang katawhan nga mahimong malipayong mga maghahatag. Sa dihang ang mga Kristohanon sa Judea nanginahanglan, ang espiritu sa Diyos maoy nagpalihok sa ubang mga magtutuo sa pagtabang kanila sa materyal. Aron madasig ang mga Kristohanon sa Corinto sa pagbuhat kutob sa ilang mahimo sa paghatag ug mga amot, si Pablo mikutlo sa panig-ingnan sa mga kongregasyon sa Macedonia. Bisan tuod giagoman sa mga magtutuo sa Macedonia ang paglutos ug kawalad-on, sila nagpakitag inigsoong gugma pinaagi sa paghatag ug labaw pa sa ilang maarangan. Ilang gipangayo ang pribilehiyo sa paghatag! (2 Corinto 8:1-5) Ang kawsa sa Diyos wala bug-os magadepende sa mga amot sa mga adunahan. (Santiago 2:5) Ang iyang kabus sa materyal dedikadong mga alagad mao ang nanguna s pagsuportar sa buluhaton sa pagsangyaw sa Gingharian. (Mateo 24:14) Bisan pa, sila wala mag-antos tungod sa ilang pagkamanggihatagon, kay ang Diyos sa walay pagkapakyas motagana alang sa mga panginahanglan sa iyang katawhan niining buluhatona, ug ang gahom sa likod sa pagpatunhay niini ug pag-uswag mao ang iyang espiritu.

9. Sa unsang paagi ang pagtuo, kahibalo, ug gugma nalangkit sa malipayong paghatag?

⁹ Ang malipayong paghatag ginaagda sa pagtuo, kahibalo, ug gugma. Si Pablo miingon: “Maingon nga kamo [mga taga Corinto] dagaya man sa tanang butang, sa pagtuo ug sa pulong ug sa kahibalo ug sa tanang pagkamainiton ug sa among gugma alang kaninyo, hinaot nga madagayaon kamo niining maong matang sa paghatag. Ako nagasulti niini dili ingon nga pagsugo kaninyo, kondili tungod sa pagkamasingkamoton sa uban ug sa pagsulay sa pagkatinuod sa inyong gugma.” (2 Corinto 8:7, 8) Ang pag-amot alang sa kawsa ni Jehova, ilabina kon ang maghahatag limitado ug kahinguhaan, nagkinahanglag pagtuo sa umaabot nga mga tagana sa Diyos. Ang mga Kristohanong dagaya sa kahibalo buot moalagad sa katuyoan ni Jehova, ug kadtong dagaya sa gugma alang kaniya ug sa iyang katawhan malipayong mogamit sa ilang mga kahinguhaan sa pagpalambo sa iyang kawsa.

10. Nganong ikaingon nga ang panig-ingnan ni Jesus mopalihok sa mga Kristohanon aron sa paghatag nga malipayon?

¹⁰ Ang panig-ingnan ni Jesus maoy nagapalihok sa mga Kristohanon sa paghatag nga malipayon. Human sa pag-awhag sa mga taga Corinto sa paghatag ug gugma, si Pablo miingon: “Kay kamo nasayod sa dili-takos nga kalulot sa atong Ginoong Jesu-Kristo, nga bisan tuod siya dato, siya nahimong kabus alang kaninyo aron nga pinaagi sa iyang kakabus kamo mahimong dato.” (2 Corinto 8:9) Adunahan didto sa langit kay kang bisan kinsang ubang anak sa Diyos, gibiyaan ni Jesus kining tanan ug nagpakahisama sa tawo. (Filipos 2:5-8) Pinaagi sa pagkahimong kabus niining dili-hakog nga paagi, hinunoa, si Jesus nakaamot sa pagbalaan sa ngalan ni Jehova ug mihatag sa iyang kinabuhi ingong usa ka halad lukat alang sa kaayohan sa katawhan nga modawat niana. Nahiuyon sa panig-ingnan ni Jesus, dili ba angay mohatag kita nga malipayon sa pagtabang sa uban ug sa pag-amot aron sa pagbalaan sa ngalan ni Jehova?

11, 12. Sa unsang paagi ang maayong pagplano mopahimo kanatong malipayong mga maghahatag?

¹¹ Ang maayong plano magpaposible sa malipayong paghatag. Gisultihan ni Pablo ang mga taga Corinto: “Sa unang adlaw sa matag semana, ang matag usa kaninyo kinahanglang magagahin ug magatigom sumala sa iyang pag-uswag, aron nga inig-abot ko wala nay himoon nga pagpangolekta.” (1 Corinto 16:1, 2) Sa samang pribado ug kinabubut-ong paagi, kadtong nagatinguha sa paghatag ug mga amot aron sa pagpalambo sa buluhaton sa Gingharian karong adlawa maayong mogahin ug pipila sa ilang mga kinitaan alang sa maong katuyoan. Ingong resulta sa maayong pagplano, ang indibiduwal nga mga Saksi, mga pamilya, ug mga kongregasyon makaamot sa pagpauswag sa matuod nga pagsimba.

¹² Ang pagtuman sa mga plano sa pag-amot mopahimo kanatong malipayon. Sama sa giingon ni Jesus, “adunay dakong kalipay ang paghatag kay sa pagdawat.” (Buhat 20:35) Busa ang mga taga Corinto makadugang sa ilang kalipay pinaagi sa pagsunod sa tambag ni Pablo sa pagtapos sa ilang usa ka tuig nga plano sa pagpadalag mga pundo ngadto sa Jerusalem. “Kini pagakahimut-an sa pagdawat sumala sa kon unsay anaa sa tawo, dili sumala sa unsay wala kaniya,” siya miingon. Kon may usa nga moamot sumala sa kon unsay anaa kaniya, kini gipabilhan gayod ug dako. Kon kita mosalig sa Diyos, siya makapaangay-angay sa mga butang aron kadtong hamugaway magmahinatagon, dili usikan, ug kadtong kabus dili makulangan nga makapaluya sa ilang kusog ug katakos sa pag-alagad kaniya.​—2 Corinto 8:10-15.

Mainampingon nga Pagdumala sa Pagpanghatag

13. Nganong ang mga taga Corinto makasalig sa pagdumala ni Pablo sa mga amot?

¹³ Bisan tuod si Pablo ang nagdumala sa kahikayan sa pag-amot aron ang nanginahanglang mga magtutuo makapahimulos sa materyal nga hinabang ug aron makabahin nga labi pang madasigon sa buluhatong pagsangyaw, siya ug ang uban wala gayod magkuha ug kuwarta diha sa pundo aron ibayad sa ilang mga serbisyo. (2 Corinto 8:16-24; 12:17, 18) Si Pablo nagtrabaho aron may ikasustento siya sa iyang materyal nga mga panginahanglan imbes magpabug-at sa pinansiyal sa bisan unsang kongregasyon. (1 Corinto 4:12; 2 Tesalonica 3:8) Busa, sa gihatag ang ilang mga donasyon ngadto kaniya, gipiyal sa mga taga Corinto kini ngadto sa usa ka kasaligan, kugihang alagad sa Diyos.

14. Kon bahin sa kagamitan sa mga amot, unsa ang rekord sa Watch Tower Society?

¹⁴ Sukad nahimong korporasyon ang Watch Tower Bible and Tract Society sa 1884, ang mga mag-aamot may pamatuod nga usa kini ka kasaligang tagdumala sa tanang mga donasyon nga gipiyal diha niini alang sa buluhaton sa Gingharian ni Jehova. Sumala sa karta niini, ang Sosyedad naningkamot sa pagtagana sa labing dakong panginahanglan sa tanang tawo, ang panginahanglan alang sa espirituwal nga mga butang. Kini gihimo diha sa porma sa literatura sa Bibliya ug instruksiyon kon unsaon sa pagbaton sa kaluwasan. Karong adlawa, gipakusog ni Jehova ang pagtigom sa mga karnerohon ngadto sa iyang nagadakong organisasyon, ug ang iyang panalangin sa maalamong paggamit sa mga amot sa buluhaton sa pagsangyaw sa Gingharian maoy tin-aw nga ebidensiya sa balaang pag-uyon. (Isaias 60:8, 22) Kami masaligon nga siya magpadayon sa pagpalihok sa mga kasingkasing sa malipayong mga maghahatag.

15. Nganong may mga panahong maghisgot kining magasina ug mga amot?

¹⁵ May mga panahong gamiton sa Sosyedad ang mga tudling niining basahona sa pagpukaw sa mga magbabasa sa ilang pribilehiyo sa paghimog kinabubut-ong mga amot alang sa tibuok-kalibotang buluhaton sa pagsangyaw sa Gingharian. Kini dili pagpanukot ug amot, kondili pahinumdom lang sa tanan nga nagatinguha sa pagsuportar sa “balaang buluhaton sa maayong balita” samtang ginapauswag sila sa Diyos. (Roma 15:16; 3 Juan 2) Gigamit sa Sosyedad ang tanang salaping giamot sa labing madaginoton nga paagi aron maila ang ngalan ug Gingharian ni Jehova. Ang tanang mga amot malipayong ginadawat, ginapasalamatan, ug gigamit sa pagpakaylap sa maayong balita sa Gingharian sa Diyos. Pananglitan, pinaagi niini ang misyonaryong mga kalihokan ginasuportahan sa daghang mga nasod, ug ang mga pasilidad sa pag-imprinta nga hinungdanon sa pag-apod-apod sa kahibalo sa Bibliya ginamentinar ug gipadako. Dugang pa, ang mga kontribusyon sa tibuok-kalibotang buluhaton gigamit sa pagkobre sa dakong galastohan sa paggamag mga Bibliya ug binase sa Bibliya nga mga publikasyon maingon man sa mga cassette sa audio ug video. Sa maong mga paagi ang intereses sa Gingharian mapalambo sa malipayong mga maghahatag.

Dili Pinugos

16. Bisan tuod pipila lamang ka mga Saksi ni Jehova ang sapian, nganong gipabilhan ang ilang mga amot?

¹⁶ Pipila lang ka Saksi ni Jehova ang sapian. Bisan tuod nagahatag sila ug makasaranganong mga kantidad sa pagpalambo sa intereses sa Gingharian, ang ilang mga amot bililhon. Sa dihang nakita ni Jesus ang kabus nga balong babaye nga naghulog ug duha ka diyot sa panudlanan sa templo, siya miingon: “Kini nga babayeng balo, bisag kabus, nakahulog ug labaw kay kanilang tanan. Kay silang tanan [uban nga miamot] miamot gikan sa ilang naghingapin nga kahamugaway, apan kining babayehana gikan sa iyang kapit-os mihatag sa tanan nga iyang kabuhian.” (Lucas 21:1-4) Bisag gamay ang iyang gasa, siya maoy usa ka malipayong maghahatag​—ug ang iyang amot giapresyar.

17, 18. Unsa ang diwa sa mga pulong ni Pablo diha sa 2 Corinto 9:7, ug unsay gipasabot sa Gregong pulong nga gihubad “malipayon”?

¹⁷ Mahitungod sa hinabang nga gihimo alang sa mga Kristohanon sa Judea, si Pablo miingon: “Pasagdi nga ang matag usa magahatag sumala sa pagbuot sa iyang kasingkasing, dili nga magapanuko ni ingon nga pinugos, kay ang Diyos nahigugma sa mga malipayong maghahatag.” (2 Corinto 9:7) Tingali ang gipasabot sa apostol mao ang bahin sa Proverbio 22:8 diha sa Septuagint version, nga nag-ingon: “Panalanginan sa Diyos ang malipayong maghahatag; ug motagana sa kakulangan sa iyang mga binuhatan.” (The Septuagint Bible, gihubad ni Charles Thomson) Gipulihan ni Pablo ang “gipanalanginan” ug “nahigugma,” apan dunay kalangkitan kini, kay ang ani sa mga panalangin maoy resulta sa gugma sa Diyos.

¹⁸ Ang malipayong maghahatag malipay gayod nga mohatag. Gani, gikan sa Gregong termino nga gihubad “malipayon” diha sa 2 Corinto 9:7 nagagikan ang pulong “masadya”! Human gipunting kini, ang eskolar nga si R. C. H. Lenski miingon: “Ang Diyos nahigugma sa masadyaon, mangayaon, malipayong maghahatag . . . [kansang] pagtuo gilukongan sa mga pahiyom kon makaatubang siya ug higayon sa paghatag.” Ang usa ka tawo nga may samang mangayaon nga espiritu dili magpanukong mohatag o napugos apan kinasingkasing ang iyang paghatag. Ingon ka ba niana ka malipayon bahin sa paghatag sa pagsuportar sa intereses sa Gingharian?

19. Sa unsang paagi ang unang mga Kristohanon naghatag ug mga amot?

¹⁹ Ang unang mga Kristohanon wala magpasag mga sibot o nagabansay sa ikapulo pinaagi sa pag-amot sa ikanapulong bahin sa ilang kita alang sa relihiyosong mga katuyoan. Hinunoa, ang ilang mga amot bug-os nga kinabubut-on. Si Tertullian, nga nakabig sa Kristiyanidad sa mga 190 K.P., misulat: “Bisag may kaban kita sa bahandi, kini dili makapalit ug kaluwasan, sama sa usa ka relihiyon nga may iyang prisyo. Hayan kausa sa usa ka bulan, kon gusto niya, ang matag usa mohatag ug gamayng amot; kon kini iyang ikalipay, ug kon siya makaarang; kay dili kini pinugsanay; ang tanan kinabubut-on.”​—Apology, Kapitulo XXXIX.

20, 21. (a) Unsay gipamulong sa unang gula niining magasina bahin sa pribilehiyo sa pagsuportar sa kawsa sa Diyos sa pinansiyal nga paagi, ug sa unsang paagi aplikado kini bisan karon? (b) Unsay mahitabo kon atong pasidunggan si Jehova uban sa atong bililhong mga butang?

²⁰ Ang kinabubut-on nga paghatag maoy naandan sa modernong-adlaw nga mga alagad ni Jehova. May mga panahon, hinunoa, nga wala bug-os pahimusli sa pipila ang ilang pribilehiyo sa pagsuportar sa kawsa sa Diyos pinaagi sa pag-amot. Sa Pebrero 1883, pananglitan, kining magasina nag-ingon: “Gipas-an sa pipila ang bug-at kaayong pinansiyal nga palas-anon alang sa uban, nga sa ingon ang ilang gahom sa paghatag ug pinansiyal nga tabang nagamenos tungod sa sobrang kahago ug kakapoy, ug busa ang ilang pagkamapuslanon nadaot; ug dili lamang kana, apan sila nga . . . wala gayod makasabot sa kahimtang, nawad-an ug kahigayonan sa pagkadawat ug mga panalangin tungod sa ilang pagkadili mahinatagon sa pag-amot sa pinansiyal nga paagi.”

²¹ Samtang ang dakong panon nagaganayan ngadto sa organisasyon ni Jehova karong adlawa, ug samtang ang buluhaton sa Diyos nagakadako ngadto sa Sidlakang Uropa ug sa ubang mga dapit nga gidili kaniadto, dunay nagadugang nga panginahanglan alang sa pagpadako sa mga planta sa pag-imprinta ug ubang mga pasilidad. Dugang mga Bibliya ug ubang mga publikasyon ang kinahanglang patikon. Daghang teokratikanhong mga proyekto ang gisugdan na ug himo; hinunoa, ang uban niini matrabaho dayon kon adunay igong pundo. Siyempre, kami may pagtuo nga motagana ang Diyos sa gikinahanglan, ug kami nahibalo nga kadtong ‘nagapasidungog kang Jehova uban sa ilang bililhong mga butang’ pagapanalanginan. (Proverbio 3:9, 10) Sa pagkamatuod, “siya nga nagapugas ug daghan magaani usab ug daghan.” Si Jehova ‘magapadato kanato sa tanang matang sa pagkamanggihatagon,’ ug ang atong malipayong paghatag mopahimo sa kadaghanan sa pagpasalamat ug sa pagdayeg kaniya.​—2 Corinto 9:6-14.

Ipakita ang Inyong Pagkamapasalamaton sa mga Gasa sa Diyos

22, 23. (a) Unsa ang dili maasoy nga gasa nga gihatag sa Diyos? (b) Sanglit giapresyar man nato ang mga gasa ni Jehova, unsa ang angay natong buhaton?

²² Napukaw tungod sa tim-os nga pagkamapasalamaton, si Pablo mismo miingon: “Salamat sa Diyos tungod sa iyang gasa nga dili maasoy sa pulong.” (2 Corinto 9:15) Ingong “halad-pasighiuli” alang sa mga sala sa dinihogang mga Kristohanon ug sa kalibotan, si Jesus mao ang pasukaranan ug alagianan alang sa gasa ni Jehova nga dili maasoy sa pulong. (1 Juan 2:1, 2) Kana nga gasa mao “ang labaw nga dili-takos nga kalulot sa Diyos” nga iyang gipakita sa iyang katawhan sa yuta pinaagi ni Jesu-Kristo, ug kini dagaya alang sa ilang kaluwasan ug kahimayaan ug kabayawan ni Jehova.​—2 Corinto 9:14.

²³ Tim-os natong pasalamatan si Jehova alang sa iyang gasa nga dili maasoy sa pulong ug sa daghan pang ubang espirituwal ug materyal nga mga gasa nga iyang gihatag sa iyang katawhan. Gani, ang pagkamaayo sa atong langitnong Amahan kanato katingalahan kaayo nga kini dili-matukib sa tawhanong gahom sa pagpahayag! Ug sa pagkatinuod kini angay motukmod kanato nga mahimong malipayong mga maghahatag. Nan, uban ang kinasingkasing nga apresasyon, himoon nato ang kutob sa atong maarangan aron mapalambo ang kawsa sa atong mahinatagong Diyos, si Jehova, ang una ug pangunang malipayong Maghahatag!

Nahinumdom Ka Ba?

◻ Ang mainandamong mga kasingkasing maoy nag-aghat sa katawhan ni Jehova sa pagbuhat ug unsa?

◻ Unsay nag-aghat sa malipayong paghatag?

◻ Sa unsang paagi gigamit sa Watch Tower Society ang tanang mga amot nga madawat niini?

◻ Unsang matanga sa maghahatag ang gihigugma sa Diyos, ug sa unsang paagi atong ikapasundayag ang atong pasalamat alang sa Iyang daghang mga gasa?

[Hulagway sa panid 15]

Sa dihang ang tabernakulo gitukod pa, kuging mitrabaho ang mga Israelinhon ug mihatag ug dagayang mga amot alang kang Jehova

[Hulagway sa panid 18]

Ang mga amot nga sama sa kabus nga babayeng balo giapresyar ug bililhon