Mga Talan-awon Gikan sa Yutang Saad

Duawa ang Yuta, Duawa ang mga Karnero!

LIBOLIBO nga mga Kristohanon nakaduaw sa Yutang Saad, kay mibati nga ang pagkakita sa mga dapit diin nahimo ang mga panghitabo makatabang nila sa pagsabot sa Bibliya, nga maghimo niana nga labi pang makahuloganon. Ug kini nakatabang gayod.

Kon ikaw nakaduaw sa literal o nakaduaw sa hunahuna pinaagi sa pagtuon sa mga libro ug mga artikulo mahitungod sa yuta, komosta man ang pagduaw sa mga karnero? ‘Unsay kalabotan sa mga karnero sa Yutang Saad?’ basin mahibulong ka. Sa pagkamatuod, ang mga karnero dako kaayong bahin sa kinabuhi sa kapanahonan sa Bibliya nga ang pagduaw sa Yutang Saad, sa usa ka diwa, dili kompleto kon dili iapil ang mga karnero.

Ang mga letrato nga imong makita dinhi mahimong bahin sa imong pagduaw, sanglit ang mga karnero nga tingali makita diha sa rehiyon karong adlawa sama kaayo sa mga karnero nga kasagaran sa panahon sa Bibliya.a Ang ilang lapad nga ikog punog tambok. (Levitico 7:3; 9:19) Ang baga nga balhibo kasagaran puti. Apan hinumdomi nga ang dakong panon ni Jacob nag-apil sa “mga karnero nga kabang, ug . . . maitom-itom nga mga karnero.”​—Genesis 30:32.

Kining samang asoy nagailustrar nga ang usa ka tawong may dakong panon sa mga karnero giisip nga bahandianon. (Genesis 30:43) Atong mabasa mahitungod kang Job: “Ang iyang mga kahayopan nakaabot sa pito ka libong mga karnero ug tulo ka libong mga kamelyo ug lima ka gatos nga pares sa baka ug lima ka gatos nga asnong baye . . . [Siya] maoy labing bantogan sa tanang mga taga-Sidlakan.” (Job 1:3; 42:12) O hinumdomi nga si Nabal may 3,000 ka mga karnero ug 1,000 ka mga kanding. Sa imong hunahuna unsa ang iyang kahimtang ug impluwensiya sa adlaw ni David? (1 Samuel 25:2) Apan sa eksakto nganong ang usa ka dakong panon sa kahayopan maoy dakong bahandi?

Kadto tungod kay ang mga karnero naghatag sa ilang magbalantay o tag-iya ug bililhong mga produkto. Ang balhibo mismo maoy usa ka nagapadayong tinubdan sa katigayonan. Ang Proverbio 31:13, 21, 22 nagatabang nato sa pagsabot sa unsang paagi ang usa ka maalamon, kugihang asawa makagamit niana sa pagtahig biste alang sa iyang pamilya o mga sapot nga ikabaligya. (Job 31:20) Ang balhibo maoy usa ka hinungdanong galamiton sa negosyo. Kana gipasabot diha sa komento nga ang usa ka Moabihanong hari “nahimong usa ka tigbuhig karnero, ug mibayad siya ngadto sa hari sa Israel sa usa ka gatos ka libong nating karnero ug usa ka gatos ka libong wala-maguntingi nga laking karnero.” (2 Hari 3:4) Oo, sila maoy “wala-maguntingi” nga mga karnero; ang ilang dagayang balhibo nakadugang sa ilang bili.

Ang mga laking karnero, mga toro, mahimong magbatog talagsaong mga sungay, sama diha sa letrato sa too. Kini ba magpahinumdom kanimo nga ang sungay sa usa ka toro gigamit sa pagpahibalo sa Tinghugyaw? (Levitico 25:8-10) Ang susamang mabaw nga mga sungay gigamit sa pagpalanog sa mga pasidaan o pagmando sa mga maneobra sa panggubatan.—Maghuhukom 6:34; 7:18, 19; Joel 2:1.

Hisabtan, kon ikaw may usa ka panon sa mga karnero, ikaw makasalig sa tinubdan sa pagkaon kay ang mga karnero nahiapil sa limpiyong mga hayop nga makaon sa mga Israelinhon. (Deuteronomio 14:4) Ang karne (unod sa karnerong gulang o nati) mahimong lat-an o asalon. Ang inasal nga karnero maoy pangunang pagkaon sa tinuig nga Paskuwa. (Exodo 12:3-9) Ang mga karnero regular usab nga tinubdan ug gatas, nga ginainom ug ginahimong keso.​—1 Samuel 17:17, 18; Job 10:10; Isaias 7:21, 22.

Dili kompleto ang pagduaw sa mga karnero kon dili himatikdan ang pagkasuod sa panon ug sa iyang magbalantay. Ang usa ka matinumanong magbalantay nagmahal sa iyang mga karnero. Sumala sa gihisgotan ni Jesus, sila makaila sa tingog sa ilang magbalantay ug mosanong sa dihang iyang tawgon pinaagi sa ngalan. (Juan 10:3, 4) Kon may usang mawala, ang matinagdanong magbalantay mangita niana. Sa dihang hikit-an ang nawalang karnero, kana tingali iyang pas-anon ug dad-on balik sa panon.​—Lucas 15:4, 5.

Gigamit ni David ang iyang kaugalingong kasinatian uban sa usa ka panon sa gipanig-ingon niya ang iyang kaugalingon sa usa ka karnero nga ang iyang Magbalantay mao si Jehova. Si David may panalipod, kay ang mga karnero gipanalipdan batok sa moatakeng kahayopan. Ang mga karnero makasunod sa pagpanguna sa ilang mabinationg magbalantay. Kon sila masamad, iyang tambalan ang ilang mga samad, tingali pinaagig makahupay nga lana. Pagkasukwahi ang mahakogong mga buhat sa mga pangulo sa Israel, nga gibatbat sa Ezekiel 34:3-8!

Ang Bibliya naundan ug daghang matagnaon ug masambingayong mga pagtumong sa mga karnero. Busa ang imong pagduaw, pagsinati, sa mga karnero sa Yutang Saad makapalalom sa imong pagsabot sa mga termino sama sa “gamayng panon,” “ang Kordero sa Diyos,” ug “ubang mga karnero.”​—Lucas 12:32; Juan 1:36; 10:16.

[Mga footnote]

[Picture Credit Line sa panid 24]

Pictorial Archive (Near Eastern History) Est.

[Picture Credit Line sa panid 25]

Garo Nalbandian