Paghimaya sa Bag-ong Kalibotan sa Kagawasan sa Diyos
“[Ang Diyos] magapahid sa tanang luha gikan sa ilang mga mata, ug ang kamatayon wala na, ni pagbalata ni paghilak ni kasakit maanaa pa.”—PINADAYAG 21:4.
1, 2. Kinsa lamang ang makadala ug tinuod nga kagawasan, ug unsay atong matun-an gikan sa Bibliya mahitungod Kaniya?
ANG kasaysayan nagpalig-on sa pagkamatuod sa gisulti ni propetang Jeremias: “Ang dalan sa yutan-ong tawo wala diha sa iyang kaugalingon. Wala sa tawo nga nagalakaw bisan ang pagtultol sa iyang lakang.” Kinsa lamang ang sa tukma makatultol sa lakang sa tawo? Si Jeremias nagpadayon: “Sawaya ako, Oh Jehova.” (Jeremias 10:23, 24) Oo, si Jehova lamang ang makadala sa tinuod nga kagawasan gikan sa mga suliran nga naghampak sa tawhanong pamilya.
2 Ang Bibliya naundan sa daghang mga pananglitan sa katakos ni Jehova sa pagdala ug kagawasan kanilang nagaalagad kaniya. “Ang tanang butang nga nasulat kaniadto gisulat alang sa atong pagkakat-on, nga pinaagi sa atong pag-antos ug pinaagi sa paghupay gikan sa Kasulatan kita mahimong makabaton ug paglaom.” (Roma 15:4) Ang mga paghukom ni Jehova batok sa bakak nga pagsimba natala usab, ug kini nagsilbi ingong “pasidaan kanato kinsa hing-abtan sa kataposan ning sistema sa mga butang.”—1 Corinto 10:11.
Pagpahigawas sa Iyang Katawhan
3. Sa unsang paagi gipakita ni Jehova ang iyang katakos sa pagpahigawas sa iyang katawhan sa Ehipto?
3 Usa ka pananglitan sa katakos sa Diyos sa pagpahamtang ug paghukom batok sa bakak nga pagsimba ug sa pagpahigawas kanila nga nagabuhat sa iyang kabubut-on nahitabo sa dihang ang iyang katawhan sa karaang mga panahon naulipon sa Ehipto. Ang Exodo 2:23-25 nagaasoy: “Ang ilang singgit sa tabang nakadangat sa matuod nga Diyos tungod sa pagkaulipon. Sa igong panahon gidungog sa Diyos ang ilang pag-agulo.” Sa makalilisang nga pagpasundayag sa iyang pagkalabaw ibabaw sa bakak nga mga diyos sa Ehipto, ang Labing Gamhanang Diyos nagdala ug napulo ka mga hampak nianang nasora. Ang matag hampak gilaraw sa pagpakaulaw sa usa ka diyos sa Ehipto, nga nagpakita nga sila mini ug dili makatabang sa mga Ehiptohanon nga nagsimba kanila. Sa ingon ang Diyos naglibre sa iyang katawhan ug naglaglag kang Paraon ug sa iyang kasundalohan sa Pulang Dagat.—Exodo, mga kapitulo 7 hangtod 14.
4. Nganong walay inhustisya sa Diyos sa pagpahamtang sa iyang mga paghukom batok sa Canaanhon?
4 Sa dihang ang Diyos nagdala sa Israel ngadto sa Canaan, ang iyang nagsimbag-demonyo nga mga molupyo gilaglag ug ang yuta gihatag sa katawhan sa Diyos. Ingong Soberano sa Uniberso, si Jehova may katungod sa pagpahamtang sa iyang mga paghukom diha sa linuog nga mga relihiyon. (Genesis 15:16) Ug labot sa Canaanhong relihiyon, ang Bible Handbook ni Halley nag-ingon: “Ang pagsimba sa . . . Canaanhong mga diyos gilangkoban sa kinabug-osang kawalay pagpugong nga mga pagpatuyang; ang ilang mga templo maoy sentro sa bisyo. . . . Ang mga Canaanhon nagsimba, pinaagi sa imoral nga pagpatuyang, ingong relihiyosong seremonya, sa presensiya sa ilang mga diyos; ug unya, pinaagi sa pagpatay sa ilang panganay, ingong sakripisyo alang ning mao rang mga diyos. Morag, sa dakong sukod, ang yuta sa Canaan nahimong usa ka matang sa Sodoma ug Gomorra sa nasodnong gilapdon.” Siya nagdugang: “Ang buhilaman ba sa maong dulomtanang kahugawan ug kapintasan may katarongan bisag gamay sa paglungtad? . . . Ang mga arkeologo nga nagkalot sa kagun-oban sa mga siyudad sa Canaan nahibulong nga wala dayon sila laglaga sayosayo sa Diyos kaysa iyang gihimo.”
5. Sa unsang paagi ang pagpahigawas sa Diyos sa iyang karaang katawhan nagsilbi ingong hularan alang sa atong panahon?
5 Kining asoya bahin sa paglihok sa Diyos batok sa bakak nga pagsimba, nga nagpahigawas sa iyang katawhan-sa-tugon, ug naghatag ug yutang saad kanila nagsilbi nga hularan sa mga butang nga umaabot. Kana nagatudlo sa haduol kaayong umaabot sa dihang ang Diyos modugmok niining bakak nga mga relihiyon sa kalibotan ug sa ilang mga tigpaluyo ug mopasulod sa iyang modernong-adlaw nga mga alagad ngadto sa bag-ong kalibotan sa pagkamatarong.—Pinadayag 7:9, 10, 13, 14; 2 Pedro 3:10-13.
Tinuod nga Kagawasan sa Bag-ong Kalibotan sa Diyos
6. Unsa ang pila ka kahibulongang mga kagawasan nga itagana sa Diyos sa bag-ong kalibotan?
6 Sa bag-ong kalibotan, ang Diyos magapanalangin sa iyang katawhan sa tanang kahibulongang mga bahin sa kagawasan nga iyang gituyo alang sa tawhanong pamilya. May kagawasan unya gikan sa pagdaodaog sa politikal, ekonomiko, ug bakak relihiyosong mga elemento. May kagawasan unya gikan sa sala ug kamatayon, nga ang katawhan may kalaoman sa pagkinabuhi sa walay kataposan ibabaw sa yuta. “Ang matarong mismo magpanag-iya sa yuta, ug sila magapuyo ibabaw niana sa walay kataposan.”—Salmo 37:29; Mateo 5:5.
7, 8. Unsa ang mahimong kasinatian sa pagbatog balik sa hingpit nga panglawas sa bag-ong kalibotan?
7 Dili madugay pagkatapos mapasulod kanang bag-ong kalibotan, ang iyang mga molupyo milagrosong ipasig-uli sa hingpit nga panglawas. Ang Job 33:25 nag-ingon: “Ang iyang unod mabag-o kaysa iyaha sa bata; siya mahabalik sa mga adlaw sa iyang pagkabatan-on.” Ang Isaias 35:5, 6 nagasaad: “Nianang panahona ang mga mata sa buta mangabuka, ug ang mga igdulongog sa mga bungol makadungog. Nianang panahona ang bakol mokatkat sama sa lagsaw, ug ang dila sa amang magaawit sa kangaya.”
8 Kamo nga may pisikal nga mga kakulian gumikan sa katigulangon o huyang nga panglawas, hunahunaa ang imong kaugalingon diha sa bag-ong kalibotan nga magmata matag buntag nga himsog ug piskay. Ang imong mga pangunot nahimong hamis, himsog nga panit—wala nay pagkinahanglan sa losyon alang sa panit. Ang imong nahanap o dili makakita nga mga mata napasig-uli sa hingpit nga panan-aw—wala nay pagkinahanglan sa mga antiyohos. Ang bug-os nga igdulongog napasig-uli—isalibay kanang mga abag sa pandungog. Ang nakimay nga mga kamot ug tiil karon kusgan na ug lig-on—isalikway na kanang mga baston, sungkod, ug wheelchair. Wala nay sakit—ilabog kanang tanang mga tambal. Sa ingon, ang Isaias 33:24 nagtagna: “Walay molupyo ang moingon: ‘Masakiton ako.’” Siya usab nagpahayag: “Sa kasadya ug kalipay sila makadawat, ug ang kaguol ug kaminghoy mokalagiw palayo.”—Isaias 35:10.
9. Sa unsang paagi ang gubat taposon hangtod sa hangtod?
9 Wala nay bisag kinsa ang isakripisyo sa gubat. “[Ang Diyos] nagapahunong sa mga gubat hangtod sa kinatumyan sa yuta. Ang pana iyang gibali ug giputolputol ang bangkaw; ang mga karo iyang gisunog sa kalayo.” (Salmo 46:9) Ang mga hinagiban sa gubat dili na gayod pagatugotan sa Magmamando sa Gingharian sa Diyos, si Kristo Jesus, kinsa ang Isaias 9:6 nagtawag nga “Prinsipe sa Pakigdait.” Ang bersikulo 7 nagadugang: “Sa kadagaya sa prinsipenhong pagmando ug sa pakigdait walay kataposan.”
10, 11. Unsay kahulogan sa bug-os nga kalinaw alang sa yuta?
10 Pagkadakong panalangin unya kana alang sa katawhan, ug ning yutaa, nga mahimong libre sa mga hinagiban sa gubat! Ngani, sa presenteng panahon, ang mga hinagiban nga gigamit sa miaging mga gubat sa gihapon nagalaglag sa mga tawo. Sa usa ka nasod, sa Pransiya, kapin sa 600 ka mga eksperto sa pagbungkag-ug-bomba ang namatay sukad sa 1945 samtang nagahipos sa nahibilin nga mga bomba gikan sa miaging mga gubat. Ang pangulo sa ahensiya sa pagbungkag-ug-bomba nagsaysay: “Kami sa gihapon makakaplag ug mobutohay nga mga bola sa kanyon gikan sa Franco-Prussian nga Gubat sa tuig 1870. May nga lanaw nga napuno sa makahilo nga mga granada gikan sa Gubat sa Kalibotan I . Panagsa, usa ka mangunguma sakay sa traktora makaligis ug batok-tangke nga mina sa Gubat sa Kalibotan II ug boom, tapos. Kining mga butanga naa sa tanang dapit.” Duha ka tuig kanhi ang The New York Times nagkomento: “Sa 45 ka mga tuig sukad sa kataposan sa Gubat sa Kalibotan II, [mga grupo sa pagbungkag-ug-bomba] nakakuha sa yutang [Pranses] ug 16 milyones mga bala sa kanyon, 490,000 ka mga bomba ug 600,000 mga mina ilalom sa tubig. . . . Minilyong acre nagpabiling gikoralan, kutob sa tuhod ang gitas-on sa tapok sa armas ug gilibotan sa mga paskin nga nagapasidaan: ‘Ayawg Hilabti. Makamatay!’”
11 Pagkadakong kalainan sa bag-ong kalibotan! Ang matag usa may maayong balay, dagaya sa pagkaon, ug ang magantihon, malinawong buluhaton sa paghimo sa tibuok yuta ngadto sa usa ka paraiso. (Salmo 72:16; Isaias 25:6; 65:17-25) Dili na gayod ang mga tawo, ug ang yuta, pagapaulanan sa minilyon nga mobutong mga himan. Ang ingong bag-ong kalibotan mao ang naa sa hunahuna ni Jesus sa dihang siya nagsulti ngadto sa usa nga nagpakita ug pagtuo kaniya: “Ikaw magauban kanako sa Paraiso.”—Lucas 23:43.
Tibuok Globo nga Edukasyon Alang sa Kinabuhi
12, 13. Unsang tibuok globo edukasyonal nga buluhaton ang gitagna ni Jesus ug ni Isaias alang sa atong panahon?
12 Sa dihang ang usa ka tawo makakat-on mahitungod sa bag-ong kalibotan sa Diyos, siya usab makakat-on nga sa atong adlaw, si Jehova nakapatungha ug tibuok-kalibotang kongregasyon nga giorganisar alang sa matuod nga pagsimba. Kini ang mahimong uyok sa bag-ong kalibotan, ug ang Diyos nagagamit niini karon sa pagtudlo sa uban mahitungod sa iyang mga katuyoan. Kining Kristohanong organisasyon nagahimog tibuok globong pagpanudlo nga buluhaton sa kasama ug gidak-on nga wala masukad makita. Si Jesus nagtagna nga kini pagabuhaton. Siya miingon: “Kining maayong balita sa gingharian igawali sa tibuok pinuy-anang yuta alang sa pagpamatuod sa tanang kanasoran; ug unya moabot ang kataposan.”—Mateo 24:14.
13 Si Isaias usab naghisgot niining globonhong pagpanudlo nga buluhaton: “Mahinabo sa ulahing bahin sa mga adlaw [sa atong panahon] nga ang bukid sa balay ni Jehova [iyang tinuboy matuod nga pagsimba] pagatukoron nga lig-on . . . ug dinha ang tanang mga nasod magaganayan. Ug daghang katawhan sa tino magaadto ug moingon: ‘Umari, kamong katawhan, ug kita manungas sa bukid ni Jehova, . . . ug siya magatudlo kanato sa iyang mga dalan, ug kita magalakaw sa iyang mga alagianan.’”—Isaias 2:2, 3.
14. Sa unsang paagi nato mailhan ang katawhan sa Diyos karong adlawa?
14 Busa, ang tibuok globo nga buluhaton sa pagwali mahitungod sa Gingharian sa Diyos lig-ong pamatuod nga kita duol na sa kataposan ning daotang sistema ug ang matuod nga kagawasan haduol na. Sila nga nagaduaw sa mga tawo dala ang punog-paglaom nga mensahe sa bag-ong kalibotan sa Diyos ginahubit sa Buhat 15:14 ingong “katawhan alang sa ngalan sa [Diyos].” Kinsa ang nagdala sa ngalan ni Jehova ug naghatag ug tibuok globo nga pagpamatuod mahitungod ni Jehova ug iyang Gingharian? Ang makasaysayanhong talaan sa ika-20ng siglo nagatubag: mga Saksi ni Jehova lamang. Karong adlawa sila may gidaghanon nga kapin sa upat ka milyon diha sa kapin 66,000 ka mga kongregasyon sa tibuok kalibotan.—Isaias 43:10-12; Buhat 2:21.
15. Kon bahin sa politikanhong mga kalihokan, sa unsang paagi nato mailhan ang tinuod nga mga alagad sa Diyos?
15 Laing kalig-onan nga ang mga Saksi ni Jehova nagatuman sa mga propesiya mahitungod sa buluhatong pagwali-sa-Gingharian giasoy sa Isaias 2:4: “Sila magasalsal sa ilang mga espada ingong mga lipya sa daro ug ilang mga bangkaw ingong mga galab. Ang nasod dili na mobakyaw ug espada batok sa laing nasod, ni sila makakat-on pa sa gubat.” Busa silang nagahimo sa globonhong buluhaton sa pagwali mahitungod sa pagmando sa Gingharian sa Diyos angay nga ‘dili na mokat-on pa sa gubat.’ Si Jesus nag-ingon nga kinahanglan sila “dili bahin sa kalibotan.” (Juan 17:16) Kini nagkahulogan nga sila kinahanglan neyutral sa politikal nga mga kalihokan, walay dapigan sa mga panagbingkil ug mga gubat sa mga nasod. Kinsa ang dili bahin sa kalibotan ug wala na makakat-on sa gubat? Usab, ang makasaysayanhong talaan sa ika-20ng siglo nagpamatuod: mga Saksi ni Jehova lamang.
16. Unsa kamalukpanon ang globonhong edukasyonal nga buluhaton sa Diyos?
16 Ang tibuok globong edukasyonal nga buluhaton sa mga Saksi ni Jehova magpadayon bisan human sa pagtapos sa Diyos niining presenteng daotang kalibotan. Ang Isaias 54:13 nagpahayag: “Ang tanan nimong mga anak pagatudloan ni Jehova.” Pagkamalukpanon kaayo niining pagpanudlo nga ang Isaias 11:9 nagtagna: “Ang yuta sa tino mapuno sa kahibalo kang Jehova ingon sa mga tubig nga nagatabon sa dagat.” Ang padayon nga pagtudlo kinahanglan unya dili lamang alang sa mga nakalabang sa kataposan niining karaang kalibotan ug mga anak nga tingali matawo sa bag-ong kalibotan apan alang usab sa binilyon nga pagabanhawon. Ngadtongadto, ang matag tawo nga magkinabuhi sa ibabaw sa yuta pagatudloan sa paggamit sa iyang kaugalingong pagbuot sa husto sulod sa mga utlanan sa balaod sa Diyos. Ang sangpotanan? “Ang mga maaghop mismo magapanag-iya sa yuta, ug sa pagkatinuod makakaplag sa labihang kalipay sa kadagaya sa pakigdait.”—Salmo 37:11.
Dagkong mga Kagawasan Bisan Karon
17. Unsa ang gisulti ni Moises nga buhaton sa karaang katawhan sa Diyos?
17 Sa dihang ang karaang mga Israelinhon hapit nang mosulod sa Yutang Saad, si Moises nakigsulti kanila ug miingon: “Nagtudlo ako kaninyo ug mga tulomanon ug hudisyal nga mga paghukom, maingon gayod sa gisugo kanako ni Jehova nga akong Diyos, aron inyong pagabuhaton sa taliwala sa yuta nga inyong pagasudlon sa pagpanag-iya. Ug pagabantayan ug pagatumanon ninyo sila, tungod kay kini mahimong kaalam sa inyong bahin ug salabotan sa inyong bahin sa atubangan sa mga mata sa katawhan nga makadungog niining tanang mga tulomanon, ug sa tino sila magaingon, ‘Kining bantogang nasod sa walay duhaduha usa nga maalamon ug may salabotan nga katawhan.’ Kay naa bay bantogang nasod nga may mga diyos nga duol kaniya sa paagi nga si Jehova nga atong Diyos diha sa atong tanang pagtawag kaniya?”—Deuteronomio 4:5-7.
18. Unsang kahibulongang mga kagawasan ang mabatonan bisan karon nilang nagaalagad sa Diyos?
18 Karong adlawa ang minilyon nga nagsimba kang Jehova usab hapit nang mosulod sa yutang saad—ang bag-ong kalibotan. Tungod kay ilang gituman ang mga balaod sa Diyos, naa siya duol kanila ug sila mailhan gikan sa tanang laing katawhan. Ang Diyos nakapahigawas na kanila gikan sa mini relihiyosong mga ideya, pagpihig ug rasa, pag-abuso sa droga, nasyonalismo, gubat, ug makaylapong mga sakit nga napasag-pakigsekso. Dugang pa, iya silang napahiusa sa dili mabungkag internasyonal nga panagsoonay sa gugma. (Juan 13:35) Sila wala mabalaka mahitungod sa umaabot apan “nagaawit nga mangayaon tungod sa maayong kahimtang sa kasingkasing.” (Isaias 65:14) Pagkadagkong mga kagawasan ang ilang gitagamtam bisan karon tungod sa pag-alagad sa Diyos ingong ilang Magmamando!—Buhat 5:29, 32; 2 Corinto 4:7; 1 Juan 5:3.
Pagpahigawas sa Uban Gikan sa Bakak nga mga Pagtuo
19, 20. Sa unsang paagi ang katawhan gipahigawas pinaagi sa pagtulon-an sa Bibliya mahitungod sa kahimtang sa mga patay?
19 Daghan sa gisangyawan sa mga Saksi ni Jehova usab nakadangat sa pagkaplag niining mga kagawasana. Pananglitan, sa kayutaan diin ang pagsimba sa katigulangan nagapadayon, ang mga Saksi ni Jehova nagapahibalo sa uban nga ang patay dili buhi sa laing dapit ug dili makadaot sa mga buhi. Ang mga Saksi mopunting ngadto sa Ecclesiastes 9:5, nga nagapahayag “ang mga buhi nasayod nga sila mangamatay; apan ang mga patay, sila dili na mahibalo sa bisan unsa.” Sila usab motudlo sa Salmo 146:4, diin nagaingon nga sa dihang ang tawo mamatay “siya mobalik sa iyang abog; sa maong adlaw ang iyang mga hunahuna mahanaw.” Busa ang Bibliya nagpakita nga walay multohong espiritu o imortal nga kalag nga makaayo o makadaot sa mga buhi. Busa, dili kinahanglanon ang pag-usik sa gihagoang salapi sa pagbayad sa mga serbisyo sa mga diwatahan o sa mga pari.
20 Ang maong tukmang kahibalo sa Bibliya nagapahigawas sa katawhan gikan sa bakak nga mga pagtulon-an sa kalayonhong-impiyerno ug purgatoryo. Sa dihang ang mga tawo makakat-on sa kamatuoran sa Bibliya nga ang mga patay walay kahibalo, nga sama sa nahinanok sa pagkatulog, sila dili na mabalaka mahitungod sa kon unsay mahitabo sa ilang namatay nga mga hinigugma. Inay, sila nagapanlantaw sa kahibulongang panahon nga gihisgotan ni apostol Pablo sa dihang siya miingon: “May pagkabanhaw sa mga matarong ug dili matarong.”—Buhat 24:15.
21. Kinsa ang sa walay duhaduha malakip nga pagabanhawon, ug unsay malagmit ilang reaksiyon?
21 Sa pagkabanhaw ang mga patay mapasig-uli sa kinabuhi ibabaw sa yuta nga sa walay kataposan nahigawas sa gipanunod nga Adamikong kamatayon. Sa walay duhaduha ang mga binanhaw molakip sa mga kabataan nga gisakripisyo sa Canaanhong mga diyos, sama kang Moloch, batan-ong mga lalaki nga gisakripisyo sa mga diyos sa Aztec, ug dili maihap nga minilyon nga gisakripisyo sa diyos sa gubat. Pagkadakong kahingangha ug kalipay nilang kanhi mga biktima sa bakak nga mga pagtuo! Ang maong mga binanhaw malipayong makapahayag: “Hain man ang imong mga hampak, Oh Kamatayon? Hain man ang imong kamalaglagon, Oh Sheol?”—Oseas 13:14.
Pangitaa si Jehova
22. Kon buot natong mabuhi sa bag-ong kalibotan sa Diyos, unsay kinahanglan natong huptan sa hunahuna?
22 Buot ba nimong magkinabuhi sa matarong bag-ong kalibotan sa Diyos, diin may tinuod nga kagawasan? Kon mao, nan isilsil sa imong kasingkasing ang mga pulong sa 2 Cronicas 15:2: “Si Jehova nagauban kanimo samtang kamo uban pa kaniya; ug kon inyong pangitaon siya, pasagdan niya ang iyang kaugalingon nga makaplagan ninyo, apan kon inyo siyang isalikway iya usab kamong isalikway. Ug hupti sa hunahuna nga ang inyong sinserong paningkamot sa pagkat-on labot sa Diyos ug sa pagpahimuot kaniya dili makawang. Ang Hebreohanon 11:6 nag-ingon nga ang Diyos “nagaganti kanilang sa ugdang nagapangita kaniya.” Ug ang Roma 10:11 nagabatbat: “Ang tanan nga nagatuo kaniya dili mapakyas.”
23. Nganong atong himayaon ang bag-ong kalibotan sa kagawasan sa Diyos?
23 Anaa na sa kapunawpunawan ang bag-ong kalibotan sa tinuod nga kagawasan sa Diyos. Didto “ang kalalangan mismo mapahigawas usab gikan sa kaulipnan sa pagkadunot ug magbaton sa mahimayaong kagawasan sa mga anak sa Diyos.” Ug ang “[Diyos] magapahid sa tanang luha gikan sa ilang mga mata, ug ang kamatayon wala na, ni pagbalata ni paghilak ni kasakit manaa pa.” (Roma 8:21; Pinadayag 21:4) Unya ang tanang mga alagad ni Jehova mohangad sa ilang mga ulo ug malipayong modayeg sa bag-ong kalibotan sa kagawasan sa Diyos pinaagig paghugyaw, ‘Salamat kanimo, Jehova, tungod sa tinuod nga kagawasan sa kataposan!’
Sa Unsang Paagi Nimo Tubagon?
◻ Sa unsang paagi gipasundayag ni Jehova ang iyang katakos sa pagpahigawas sa iyang katawhan?
◻ Unsang kahibulongang mga kagawasan ang maanaa didto sa bag-ong kalibotan sa Diyos?
◻ Sa unsang paagi si Jehova nagaedukar sa katawhan alang sa kinabuhi?
◻ Unsa ang pila ka mga kagawasan ang ginatagamtam sa katawhan sa Diyos bisan karong adlawa pinaagi sa pag-alagad kang Jehova?
[Hulagway sa panid 10]
Si Jehova nagpakita sa iyang pagkalabaw sa mga bakak nga diyos sa Ehipto, pinaagi sa pagpahigawas sa iyang mga magsisimba
[Hulagway sa panid 12, 13]
Karong adlawa, ang tinuod nga mga alagad sa Diyos mailhan pinaagi sa pagtuman sa iyang globonhong edukasyonal nga buluhaton ug sa pagdala sa iyang ngalan