Ang Kaminyoon ba Mao Lamang ang Yawi sa Kalipay?

“Siya may kagawasan sa pagpamana kang bisan kinsa nga buot niya, basta diha lamang sa Ginoo. Apan labi pa siyang malipayon kon magpabilin siya sa iyang kahimtang.”​—1 CORINTO 7:39, 40.

1. Sa unsang paagi gibatbat sa Kasulatan si Jehova, ug unsay iyang nahimo alang sa iyang mga linalang?

SI Jehova maoy usa ka “malipayong Diyos.” (1 Timoteo 1:11) Ingong Dagayang Magtatagana sa “tanang maayong mga gasa ug tanang hingpit nga regalo,” iyang gipaabot ngadto sa tanan niyang intelihenting mga linalang​—tawhanon ug espirituhanon​—ang ila gayod nga gikinahanglan aron magmalipayon diha sa iyang pag-alagad. (Santiago 1:17) Mahitungod niana, ang langgam nga tumang nakaawit, ang naghagwa-hagwang itoy, o nagadulang lumod tanan nagpamatuod nga gilalang ni Jehova ang mga hayop aron tagamtamon ang kinabuhi diha sa ilang tagsatagsang mga pinuy-anan. Ang salmista balaknon pa ganing nakaingon nga “ang mga kahoy ni Jehova nangatagbaw, ang mga sidro sa Lebanon nga iyang gitanom.”​—Salmo 104:16.

2. (a) Unsay nagpakita nga nakakaplag ug kalipay si Jesus sa pagtuman sa kabubut-on sa iyang Amahan? (b) Unsay mga katarongan nga malipayon ang mga tinun-an ni Jesus?

² Si Jesu-Kristo mao ‘ang tukma nga hulad sa pagkamao sa Diyos.’ (Hebreohanon 1:3) Nan, dili ikahibulong nga si Jesus angay tawgong “ang malipayon ug bugtong Manggagahom.” (1 Timoteo 6:15) Kita iyang gitagan-an ug usa ka maayong pananglitan kon unsa ka matagbawon ang pagtuman sa kabubut-on ni Jehova kay sa pagkaon, nga mohatag ug tuman nga kalipay. Si Jesus usab nagpakita kanato nga dunay kalipay ang paglihok nga may kahadlok sa Diyos, sa ato pa, may lalom nga pagtahod ug maayong pagkahadlok nga makapasuko Kaniya. (Salmo 40:8; Isaias 11:3; Juan 4:34) Sa dihang namauli ang 70 ka tinun-an “nga malipayon” human sa pagbiyahe aron sa pagsangyaw sa Gingharian, si Jesus “nalipay diha sa balaang espiritu.” Human gipahayag ang iyang kalipay ngadto sa iyang Amahan diha sa pag-ampo, siya miliso sa iyang mga tinun-an ug miingon: “Malipayon ang mga mata nga nakakita sa mga butang nga inyong nakita. Kay sultihan ko kamo, Daghan ang mga propeta ug mga hari ang naninguha nga makakita sa mga butang inyong nakita apan wala makakita niini, ug makadungog sa mga butang nga inyong nadunggan apan wala makadungog niini.”​—Lucas 10:17-24.

Mga Katarongan nga Magmalipayon

3. Unsa ang pipila ka katarongan sa pagkalipay?

³ Dili ba malipay ang atong mga mata sa pagkakita sa mga butang nga atong nakita sa katumanan sa Pulong ug sa mga katuyoan ni Jehova niining panahon sa kataposan? Dili ba angay matugob kita sa kalipay nga nakasabot sa mga tagna nga wala gayod masabti sa matinumanong mga propeta ug mga hari sama kang Isaias, Daniel, ug David? Dili ba kita malipay sa pag-alagad sa malipayong Diyos, si Jehova, ubos sa pagkapangulo sa malipayong Manggagahom, ang atong Haring Jesu-Kristo? Siyempre malipayon gayod kita!

4, 5. (a) Aron magpabiling malipayon diha sa pag-alagad ni Jehova, unsa ang kinahanglan natong likayan? (b) Unsa ang pipila ka butang nga makaamot sa kalipay, ug unsang pangutana ang mobangon niini?

⁴ Kon kita buot magpabiling malipayon diha sa pag-alagad sa Diyos, hinunoa, kinahanglang dili nato ipasukad ang atong unang mga kinahanglanon sa kalipay diha sa kalibotanong mga ideya. Kini dali nga makapalubog sa atong hunahuna tungod kay naglakip kini sa materyal nga bahandi, mapagawalong paagi sa kinabuhi, ug sa susama niini. Ang bisan unsang “kalipay” nga ipasukad niining mga butanga dili magdugay, kay lumalabay man kining kalibotana.​—1 Juan 2:15-17.

⁵ Ang kadaghanan sa dedikadong mga alagad ni Jehova nahibalo nga ang pagkab-ot sa kalibotanong mga tumong dili mohatag ug tinuod nga kalipay. Ang atong langitnong Amahan lamang ang nagataganag espirituwal ug materyal nga mga butang nga makaamot sa matuod nga kalipay sa iyang mga alagad. Pagkamapasalamaton nato alang sa espirituwal nga pagkaon nga iyang ginahatag kanato pinaagi “sa matinumanon ug maalamong ulipon”! (Mateo 24:45-47) Kita mapasalamaton usab sa pisikal nga pagkaon ug sa ubang materyal nga mga butang nga atong ginadawat gikan sa mahigugmaong kamot sa Diyos. Unya, usab, anaa ang katingalahang gasa sa kaminyoon ug sa nalangkit nga mga kalipay sa panimalaynong kinabuhi. Dili ikahibulong nga tim-os nga gipahayag ang panghinaot ni Noemi alang sa iyang nabalong mga umagad nga babaye niining mga pulonga: “Hinaot unta nga hatagan kamo ug gasa ni Jehova, ug kamo makakaplag ug kapahulayan ang matag usa sa balay sa iyang bana.” (Ruth 1:9) Busa ang kaminyoon mao ang yawi nga makaabli sa pultahan sa dakong kalipay. Apan ang kaminyoon ba mao lamang ang bugtong yawi sa pag-abli sa ganghaan sa usa ka malipayong kinabuhi? Ang mga batan-on ilabina ang kinahanglang seryosong mosusi kon kini ba tinuod.

6. Sumala sa Genesis, unsa ang pangunang katuyoan sa kahikayan sa kaminyoon?

⁶ Sa pagsobli sa kabatbatan sa sinugdanan sa kaminyoon, ang Bibliya nag-ingon: “Gibuhat sa Diyos ang tawo sa iyang kaugalingong dagway, sa dagway sa Diyos gibuhat niya sila; lalaki ug babaye iyang gibuhat sila. Ug gipanalanginan sila sa Diyos ug miingon ang Diyos kanila: ‘Sumanay ug dumaghan kamo ug pun-on ninyo ang yuta ug magagahom kamo niini.’” (Genesis 1:27, 28) Pinaagi sa pagsugod ni Jehova sa kaminyoon, si Adan gigamit sa pagpatungha sa tawhanong mga linalang, busa ginapadaghan ang tawhanong rasa. Apan dunay mas labaw niini kay sa kaminyoon.

“Diha Lamang sa Ginoo”

7. Unsang kinahanglanon sa kaminyoon nga gipaningkamotang makab-ot sa usa ka matinumanong patriarka?

⁷ Sanglit si Jehova nga Diyos mao man ang Tagmugna sa kaminyoon, atong malaoman nga mohatag siya ug mga sukdanan alang sa panagtiayon nga mosangpot ug kalipay sa iyang mga alagad. Sa mga panahon sa patriarka, ang pakigminyo sa mga tawong dili magsisimba ni Jehova wala gayod idasig. Gipapanumpa ni Abraham ang iyang sulogoon nga si Elieser kang Jehova nga dili siya magkuha ug asawa alang sa anak sa patriarka nga si Isaac gikan sa mga Canaanhon. Mipanaw ug layo si Elieser ug matinuorong gisunod ang mga instruksiyon ni Abraham aron ‘makita ang babaye nga gitagana ni Jehova sa anak sa iyang agalon.’ (Genesis 24:3, 44) Sa ingon giminyoan ni Isaac si Rebecca. Sa dihang ang ilang anak nga si Esau mipilig mga asawa gikan sa paganong mga Hitihanon, kining mga babayehana “nahimong kapaitan sa kalag kang Isaac ug Rebecca.”​—Genesis 26:34, 35; 27:46; 28:1, 8.

8. Unsang restriksiyon ang gipahamtang diha sa kaminyoon pinaagi sa Kasugoan sa pakigtugon, ug ngano?

⁸ Ubos sa Kasugoan sa pakigtugon, ang pakigminyo ug mga lalaki ug mga babaye sa ginganlang mga nasod sa Canaan gidili. Gisugo ni Jehova ang iyang katawhan: “Ayaw pagpakigminyo kanila. Ayaw ihatag ang inyong anak nga babaye ngadto sa ilang anak nga lalaki, ni mokuha sa ilang anak nga babaye alang sa inyong anak nga lalaki. Kay siya magapasalaag sa imong anak nga lalaki gikan sa pagsunod kanako, ug sila moalagad sa lain nga mga diyos; ug ang kasuko sa Diyos mosilaob batok kaninyo, ug siya magalaglag kaninyo sa madali.”​—Deuteronomio 7:3, 4.

9. Unsang tambag bahin sa kaminyoon ang gihatag sa Bibliya ngadto sa mga Kristohanon?

⁹ Dili ikahibulong nga ang samang mga restriksiyon bahin sa pagdili sa pagminyo niadtong dili magsisimba ni Jehova aplikado sulod sa Kristohanong kongregasyon. Gitambagan ni apostol Pablo ang iyang isigkamagtutuo: “Ayaw kamo pakighiusa sa mga dili-magtutuo. Kay unsa may pakiglambigitan sa matarong ug sa daotan? O unsay may pakig-ambitan sa kahayag ug kangitngit? Dugang pa, unsa may pakig-uyonan ni Kristo kang Bilyal? O unsa may iya sa magtutuo nga pakig-uyonan sa dili-magtutuo?” (2 Corinto 6:14, 15) Kanang tambaga aplikado sa nagkalainlaing mga paagi ug siyempre aplikado sa kaminyoon. Ang tin-aw nga sugo ni Pablo ngadto sa tanang dedikadong mga alagad ni Jehova mao nga ilang minyoan ang usa ka tawo “diha lamang kon siya nahiusa uban sa Ginoo.”​—1 Corinto 7:39, potnot.

Dili Makaminyo “Diha sa Ginoo”

10. Unsay ginahimo sa daghang dili-minyong mga Kristohanon, ug unsang mga pangutana ang mobangon?

¹⁰ Daghang dili-minyong mga Kristohanon mipili sa pagsunod sa panig-ingnan ni Jesu-Kristo pinaagi sa pag-ugmad sa gasa sa pagkadili-minyo. Nan sa makausa pa, tungod kay wala pa makakita sa pagkakaron ug mahadlokon-sa-Diyos nga kapikas ug busa magminyo “diha sa Ginoo,” misalig ang daghang maunongong mga Kristohanon kang Jehova ug nagpabiling dili-minyo kay sa magminyo ug dili-magtutuo. Ang espiritu sa Diyos mopatungha diha sulod kanila ug mga bunga sama sa kalipay, kalinaw, pagtuo, ug pagpugong sa kaugalingon, nga mopahimo kanila sa pagpabiling maputling pagkadili-minyo. (Galacia 5:22, 23) Apil niadtong malamposong nakalahutay niini nga pagsulay sa pagmahal sa Diyos mao ang ubay-ubay natong Kristohanong mga igsoong babaye, nga kanila kita may lalom nga pagtamod. Sa nagkalainlaing nasod, mas daghan sila kay sa mga igsoong lalaki ug busa adunay dakong bahin sa buluhatong pagsangyaw. Ngani, “si Jehova mismo nagahatag sa pulong; ang kababayen-an nga nanagmantala sa maayong balita maoy usa ka dakong panon.” (Salmo 68:11) Sa pagkamatuod, daghang dili-minyong mga alagad sa Diyos nga lalaki ug babaye nagamaunongon tungod kay sila ‘may pagsalig kang Jehova uban sa ilang bug-os nga kasingkasing, ug siya nagatul-id sa ilang mga dalan.’ (Proverbio 3:5, 6) Apan kadto bang dili pa makaminyo karon “diha sa Ginoo” tino nga dili-magmalipayon?

11. Mahitungod sa unsa nga makasalig ang mga Kristohanon nga nagapabiling dili-minyo agig pagtahod sa mga prinsipyo sa Bibliya?

¹¹ Atong hinumdoman nga kita maoy mga Saksi sa malipayong Diyos, si Jehova, nga nag-alagad ubos sa malipayong Manggagahom si Jesu-Kristo. Busa kon ang atong pagtahod sa mga pagdili nga tin-awng gipadayag diha sa Bibliya mopalihok kanatong magpabiling dili-minyo tungod kay walay makit-ang usa ka kapikas sa kaminyoon “diha sa Ginoo,” makataronganon ba ang paghunahuna nga pasagdan kita sa Diyos ug ni Kristo nga magmagul-anon? Dili gayod. Busa, kita angay mohinapos nga posibleng magmalipayon ingong mga Kristohanon bisag dili pa minyo. Si Jehova mopahimo kanatong tinuod nga malipayon minyo man kita o dili.

Ang Yawi sa Tinuod nga Kalipay

12. Unsay nagpakita sa kaso sa masinupakong mga manulonda bahin sa kaminyoon?

¹² Ang kaminyoon dili mao lamang ang yawi sa kalipay alang sa tanang mga alagad sa Diyos. Tagda, pananglitan, ang mga manulonda. Sa wala pa ang Lunop, giugmad sa ubang mga manulonda ang mga kailibgon nga dili-kinaiyanhon alang sa espirituhanong mga linalang, nawad-ag katagbawan tungod kay dili sila makaminyo, ug nagmateryalisar sa unodnong mga lawas aron makakuhag mga babaye ingong mga asawa. Sanglit kay kini nga mga manulonda “mibiya man sa ilang angay nga puloy-anan,” ang Diyos “nagtagna [kanila] nga ginapos sa mga talikala nga dayon ilalom sa tuman nga kangitngit alang sa paghukom sa dakong adlaw.” (Judas 6; Genesis 6:1, 2) Dayag, ang Diyos wala gayod maghikay nga magminyo ang mga manulonda. Sa ingon ang kaminyoon sa yano dili mao ang yawi sa ilang kalipay.

13. Nganong malipayon ang balaang mga manulonda, ug unsay nagpaila niini alang sa tanang mga alagad sa Diyos?

¹³ Bisan pa, ang matinumanong mga manulonda malipayon. Sa gipahimutang ni Jehova ang mga patukoranan sa yuta ang “mga bitoon sa kabuntagon nagdungan sa pag-awit ug ang tanang [manulondaong] mga anak sa Diyos misinggit sa kalipay.” (Job 38:7, The New Jerusalem Bible) Nganong ang balaang mga manulonda malipayon? Tungod kay sila kanunay nga nagaalagad kang Jehova nga Diyos, “nagpatalinghog sa tingog sa iyang pulong” aron tumanon kana. Sila mangayaon sa “pagbuhat sa iyang ikalipay.” (Salmo 103:20, 21, potnot) Oo, ang kalipay sa balaang mga manulonda nagagikan sa matinumanong pag-alagad kang Jehova. Kana mao ang yawi sa tinuod nga kalipay sa mga tawo usab. Alang sa maong butang, ang minyong dinihogang mga Kristohanon nga malipayong nagaalagad sa Diyos karon dili magminyo inigkabanhaw diha sa langitnong kinabuhi, apan magmalipayon sila ingong espiritu nga mga linalang nga nagatuman sa kabubut-on sa Diyos. Busa, minyo man o dili, ang tanang maunongong mga alagad mahimong magmalipayon tungod kay ang tinuod nga pasukaranan sa kalipay mao ang matinumanong pag-alagad sa Maglalalang.

“Labi Pang Maayo Kay sa mga Anak nga Lalaki ug mga Anak nga Babaye”

14. Unsang matagnaong saad ang gihatag ngadto sa mahadlokon-sa-diyos nga mga eunoko sa karaang Israel, ug nganong daw katingalahan kini?

¹⁴ Bisan kon ang usa ka maunongong Kristohanon dili gayod magminyo, ipaneguro sa Diyos ang iyang kalipay. Makadasig kining mga pulonga nga matagnaong gipahayag ngadto sa mga eunoko sa karaang Israel: “Kini mao ang giingon ni Jehova sa mga eunoko nga nagabantay sa akong mga adlaw nga igpapahulay ug nagapili sa mga butang nga nakapahimuot kanako ug nagapadayon sa akong tugon: ‘Ngadto kanila ihatag ko sa sulod sa akong balay ug sa sulod sa akong mga kuta ang usa ka handomanan ug ang usa ka ngalan nga labi pang maayo kay sa mga anak nga lalaki ug sa mga anak nga babaye. Akong hatagan sila ug usa ka ngalan nga walay kataposan, nga dili maputol.’” (Isaias 56:4, 5) Ang usa tingali magdahom nga kining mga tawhana saaran ug asawa ug mga anak aron magpabilin ang ilang ngalan. Apan sila gisaaran ug “labi pang maayo kay sa mga anak nga lalaki ug mga anak nga babaye”​—usa ka walay kataposang ngalan sulod sa balay ni Jehova.

15. Unsay ikaingon bahin sa katumanan sa Isaias 56:4, 5?

¹⁵ Kon kining mga eunoko pagaisipong usa ka matagnaong larawan nga nalangkit “ang Israel sa Diyos,” sila naghawas sa mga dinihogan kinsa nagpakadawat ug puloy-anan nga dayon sulod sa espirituwal nga balay o templo, ni Jehova. (Galacia 6:16) Tino, kining tagnaa aplikado sa literal ngadto sa mahadlokon-sa-diyos nga mga eunoko sa karaang Israel kinsa pagabanhawon. Kon ilang dawaton ang halad lukat ni Kristo ug magpadayon sa pagpili nianang pagakahimut-an ni Jehova, sila makadawat ug “usa ka ngalan nga walay kataposan” diha sa bag-ong kalibotan sa Diyos. Kini aplikado usab diha sa “ubang mga karnero” niining panahona sa kataposan kinsa nagapalabay sa pakigminyo ug pagkahimong ginikanan aron lang ikapahinungod ang ilang kaugalingon sa bug-os pa diha sa pag-alagad ni Jehova. (Juan 10:16) Ang uban kanila tingalig mamatay nga dili-minyo ug walay anak. Apan kon sila matinumanon, diha sa pagkabanhaw sila makadawat ug “labi pang maayo kay sa mga anak nga lalaki ug anak nga mga babaye”​—usa ka ngalan “nga dili gayod maputol” diha sa bag-ong sistema sa mga butang.

Kaminyoon Dili Mao Lamang ang Yawi sa Kalipay

16. Nganong ikaingon nga ang kaminyoon dili kanunay mohatag ug kalipay?

¹⁶ Ang ubang mga tawo mibati nga ang kalipay bug-os gayod nga nalangkit sa kaminyoon. Hinunoa, kinahanglang dawaton, nga bisan sa taliwala sa mga alagad ni Jehova karong adlawa, ang kaminyoon dili gayod mohatag kanunay ug kalipay. Kini makasulbad ug pipila ka problema apan sagad mopahinabog ubang mga problema nga mas malisod sulbaron kay sa naagian sa tawong dili-minyo. Si Pablo miingon nga ang kaminyoon mohatag ug ‘kasakit sa unod.’ (1 Corinto 7:28) May mga panahong ang tawong minyo “mabalaka” ug “nabahin.” Sagad makita niyang malisod ang “pag-alagad kanunay sa Ginoo nga walay kababagan.”​—1 Corinto 7:33-35.

17, 18. (a) Unsay gitaho sa ubang nagapanawng mga magtatan-aw? (b) Unsang tambag ang gihatag ni Pablo, ug nganong makaayo ang pagpadapat niini?

¹⁷ Ang kaminyoon ug pagkadili-minyo maoy mga gasa nga gikan sa Diyos. (Ruth 1:9; Mateo 19:10-12) Aron magmalamposon sa bisan hain niining kahimtanga, hinunoa, ang mainampoong pagpalandong hinungdanon. Ang nagapanawng mga magtatan-aw nagtaho nga daghang mga Saksi ang nagminyo nga bata pa kaayo, nga kasagaran nahimong mga ginikanan nga dili pa sila andam mangabaga sa moresulta unyang mga responsabilidad. Ang pipila niining mga kaminyoona nangabungkag. Nakasagubang ang ubang mga magtiayon sa ilang mga problema, apan ang ilang kaminyoon wala makahatag kanila ug kalipay. Sama sa gisulat sa usa ka Ingles nga dramatista nga si William Congreve, nga kadtong magdalidali sa pagminyo “magbasol sa ilang mahinaykong lihok.”

¹⁸ Ang mga magtatan-aw sa sirkito nagreport usab nga ang ubang batan-ong mga igsoong lalaki nagpugong sa pag-aplay sa pag-alagad sa Bethel o sa pagbolunter alang sa Ministerial Training School tungod sa kinahanglanon sa pagpabiling dili-minyo sa dugaydugay nga panahon. Apan si Pablo mihatag ug tambag sa dili pagminyo hangtod ang usa “molapas na sa pagbuswak sa pagkabatan-on,” sa ato pa, sa paghulat hangtod molurang ug diyutay ang unang bul-og sa kailibgon sa sekso. (1 Corinto 7:36-38) Ang mga tuig nga gipalabay sa pagkinabuhi ingong dili-minyong hamtong mohatag sa usa ka tawo ug hamiling kasinatian ug salabotan, nagabutang kaniya diha sa mas maayong posisyon sa pagpilig usa ka kapikas sa kaminyoon o sa paghimo sa maayong pagkapalandong nga desisyon sa pagpabiling dili-minyo.

19. Unsa ang angay natong panglantaw sa mga butang kon kita wala gayoy tinuod nga panginahanglang magminyo?

¹⁹ Ang pipila kanato milapas na sa pagbuswak sa pagkabatan-on, uban sa kusganong kailibgon niini sa pagpakigsekso. Tingali kita nakapalandong panalagsa sa mga panalangin sa kaminyoon apan sa pagkamatuod adunay gasa sa pagkadili-minyo. Tingali nakita ni Jehova nga epektibo kitang makaalagad kaniya sa kahimtang nga dili-minyo ug walay tinuod nga panginahanglang magminyo, diin tingali kita mapugos sa pagbiya sa atong pipila ka pribilehiyo diha sa iyang pag-alagad. Kon ang kaminyoon dili usa ka personal nga panginahanglan ug kita wala mapanalangini ug kapikas, tingalig ang Diyos adunay laing butang nga gitagana alang kanato. Busa magbaton kita ug pagtuo nga siya motagana sa atong panginahanglan. Ang labing dakong kalipay mosangpot gikan sa mapaubsanong pagdawat nga mopatim-aw nga mao ang kabubut-on sa Diyos alang kanato, sama sa Hudiyohanong mga igsoon nga ‘midawat ug mihimaya sa Diyos’ dihang nakaamgo nga iyang gipahinulsol ang mga Hentil aron sila makabaton ug kinabuhi.​—Buhat 11:1-18.

20. (a) Unsang tambag bahin sa pagkadili-minyo ang gihatag dinhi ngadto sa batan-ong mga Kristohanon? (b) Unsang pasukaranang punto mahitungod sa kalipay ang matuod?

²⁰ Busa, ang kaminyoon mahimong usa ka yawi sa kalipay, ugaling kini makabukas usab ug ganghaan sa mga problema. Usa ka butang ang tino: Ang kaminyoon dili mao lamang ang paagi sa pagkaplag ug kalipay. Kay natagad na ang tanan, maalamon diay, ilabina alang sa batan-ong mga Kristohanon, sa pagsulay sa paghatag luna alang sa daghang tuig sa pagkadili-minyo. Ang maong mga tuig magamit ug maayo sa pag-alagad kang Jehova ug sa pag-uswag sa espirituwal nga paagi. Bisan pilay edad o espirituwal nga kauswagan, hinunoa, kining pasukaranang punto nagpabiling tinuod alang sa tanang bug-os nga nagpahinungod sa Diyos: Ang tinuod nga kalipay makaplagan diha sa matinumanong pag-alagad kang Jehova.

Unsaon Nimo Pagtubag?

◻ Nganong malipayon ang mga alagad ni Jehova?

◻ Nganong ang kaminyoon dili mao ang yawi sa labing dakong kalipay?

◻ Bahin sa pagpilig kapikas sa kaminyoon, unsay gikinahanglan sa katawhan ni Jehova?

◻ Nganong makataronganon ang pagtuo nga ang mga Kristohanong nagpabiling dili-minyo mahimong magmalipayon?

◻ Unsa ang kinahanglang admitihon mahitungod sa kaminyoon ug kalipay?