Usa ka Lukat Ilis sa Daghan

NIADTONG Marso 31, 1970, usa ka ayroplanong jet ang gi-hijack duol sa Mount Fuji sa Hapon. Gibihag sa siyam ka membro sa usa ka pundok nga nailhang Japanese Red Army Faction ang kapin sa 120 ka pasahero ug mga tripulante ug namugos nga hatagan sila ug luwas nga biyahe ngadto sa Amihanang Korea.

Sa dihang milandig ang ayroplano sa Seoul, sa Republika sa Korea, ang Hapones nga bise-ministro sa transportasyon si Shinjiro Yamamura mibolunter sa pagriyesgo sa iyang kinabuhi alang sa mga gibihag. Misugot sa pagdawat kaniya ingong garantiya alang sa ilang kaugalingong kaluwasan, gibuhian sa mga hijacker ang tanang mga bihag gawas sa piloto. Unya sila milupad ngadto sa Pyongyang, diin didto sila misurender sa mga awtoridad sa Amihanang Korea. Si Gn. Yamamura ug ang piloto sa ulahi mipauli sa Hapon nga wala maunsa.

Niining hitaboa, usa ka tawo ang nag-alagad isip usa ka kapuli alang sa mga kinabuhi sa kapin sa 120 ka bihag. Kini makatabang kanato sa pagsabot kon sa unsang paagi mahatag sa usa ka tawo ang iyang kinabuhi ingong lukat ilis sa daghan. Apan aron masabtan ang doktrina sa Bibliya bahin sa lukat, atong susihon pa sa bug-os kining ulohana.

Alang sa usa ka butang, kinahanglan atong tun-an sa detalyado ang sinugdanan sa sala. “Maingon nga pinaagi sa usa ka tawo ang sala misulod sa kalibotan ug ang kamatayon misulod pinaagi sa sala, ug niana ang kamatayon mikuyanap ngadto sa tanang tawo tungod kay silang tanan nakasala,” misaysay ang Bibliya. (Roma 5:12) Sa unsang paagi kana nahitabo? Ang tawo nga gihisgotan didto mao si Adan, ang unang tawo nga gilalang. Imong mabasa ang historikal nga asoy bahin sa paglalang kaniya ug kon unsay misangpot sa iyang pagbulag gikan sa sukdanan sa Diyos. Kini gipadayag diha sa unang tulo ka kapitulo sa basahon sa Bibliya sa Genesis.

Ang asoy nagpakita nga dihay usa ka tighulhog nga dili makita sa dihang unang nakasala si Adan. Aron matagbaw ang iyang kailibgon sa gahom, kana nga tighulhog naglaraw sa pagmando kang Adan ug sa tanan unya niyang mga anak. Ang tighulhog mao si Satanas nga Yawa. Gitawag usab siya nga “ang serpente nga karaan” tungod kay migamit siya ug usa ka bitin sa pag-agak kang Adan sa pagpakasala. (Pinadayag 12:9) Bisan tuod gisultihan sa mahigugmaong Maglalalang sa katawhan si Adan sa pagtahod sa Iyang katungod sa paghukom kon unsa ang maayo ug daotan, gihaylo sa bitin ang asawa ni Adan, si Eva, sa pagsupak sa Diyos. Unya iyang gidani ang iyang bana sa pagsupak. Pinaagi niana nga dalan, gipadayag ni Adan ang iyang pagkaindependente gikan sa Diyos, kinabubut-on nga nahimong makasasala, ug makapasa lamang nianang matanga sa kinabuhi ngadto sa iyang mga anak.

Kita nagaantos gihapon sa mga resulta. Sa unsang paagi? Buweno, ang Maglalalang makataronganong mimando nga kon si Adan ug Eva motuyo sa pagpili sa pagsupak, ang resulta mao ang kamatayon. Busa, pinaagi sa pagpakasala, gibaligya ni Adan ang tanang katawhan ngadto sa pagkaulipon sa sala ug kamatayon.​—Genesis 2:17; 3:1-7.

Sa unsang paagi matubos ang katawhan gikan nianang makasasalang kahimtang? Si Jesu-Kristo mianhi sa yuta aron “sa paghatag sa iyang kalag ingon nga lukat ilis sa daghan,” ug kini maoy nagbukas sa dalan sa pagtubos sa katawhan.​—Mateo 20:28.

Pagtabon ug Pagpahigawas

Ang Bibliya nagpakita nga ang paagi sa pagtubos sa katawhan naglangkit sa duha ka lakang: (1) pagpalit ug balik ug (2) pagpahigawas. Mahitungod sa Gregong pulong (lyʹtron) nga gihubad nga “lukat,” ang eskolar sa Bibliya nga si Albert Barnes misulat: “Ang pulong lukat nagkahulogan sa literal nga usa ka kantidad nga ibayad sa pagtubos sa mga bihag. Sa panahon sa gubat, kon ang mga binilanggo madala sa kaaway, ang kuwarta nga pangayoon alang sa ilang kagawasan gitawag ug lukat; sa ato pa, kini mao ang paagi diin sila pagabuhian. Busa ang bisan unsang butang nga mopahigawas kang bisan kinsa sa usa ka kahimtang sa silot, o pag-​antos, o sala, gitawag nga usa ka lukat.”

Oo, “ang bisan unsang butang nga mopahigawas kang bisan kinsa” matawag nga usa ka lyʹtron. Busa kining Grego nga pulong nagpasiugda sa buhat o sa paagi sa pagpahigawas.a

Gigamit ni apostol Pablo ang nalangkit nga pulong an·tiʹly·tron sa pagpasiugda sa bili sa kantidad nga gibayad ingong lukat. Diha sa 1 Timoteo 2:6, siya misulat nga “gihatag [ni Jesus] ang iyang kaugalingon” ingon nga “katumbas nga lukat alang sa tanan.” Mikomento bahin niini, ang Greek and English Lexicon to the New Testament ni Parkhurst nag-ingon: “Kini tukmang nagpasabot sa bili nga pinaagi niini ang mga bihag matubos gikan sa kaaway; ug kanang matanga sa pag-ilisay diin ang kinabuhi sa usa tubson sa kinabuhi sa lain.” Ang gipasiugda dinhi mao ang katumbas nga kinaiyahan o ang pagkaepektibo sa bili sa lukat nga gibayad aron matimbang ang mga timbangan sa hustisya. Sa unsang paagi ang halad lukat ni Jesus maisip nga “katumbas nga lukat”?

Usa ka Katumbas nga Lukat

Gibaligya ni Adan ang tanang katawhan, apil na kita, ngadto sa sala ug kamatayon. Ang kantidad, o silot, nga iyang gibayad mao ang iyang hingpit tawhanong kinabuhi, nga may posibilidad nga mabuhi sa walay kataposan. Aron mabawi kini, laing hingpit tawhanong kinabuhi​—usa ka katumbas nga lukat​—ang kinahanglang ibayad. Apan, walay usa ang natawo gikan sa dili-hingpit nga mga tawo ang nakatagana sa gikinahanglang hingpit tawhanong kinabuhi. (Job 14:4; Salmo 51:5) Sa iyang kaalam, hinunoa, gibuksan sa Diyos ang dalan sa kaikyasan gikan niini nga mga kalisod. Iyang gibalhin ang hingpit nga kinabuhi sa iyang bugtong Anak gikan sa kalangitan ngadto sa tagoangkan sa usa ka dalagang ulay, gitugotan siya nga mahimugso ingong hingpit nga tawo. (Lucas 1:30-38; Juan 3:16-18) Kini nga pagtulon-an bahin sa pagkatawo ni Jesus gikan sa dalagang ulay dili maoy usa ka sugilanon nga minugna aron mapasidunggan ang tagmugna sa usa ka relihiyon. Hinunoa, gibatbat niini ang usa ka makataronganong lakang sa tagana sa Diyos sa lukat.

Aron makab-ot ang pagtubos, kinahanglang ampingan ni Jesus ang mahinlong rekord sa tanang higayon nga dinhi siya sa yuta. Iyang nahimo kini. Unya siya namatay diha sa haladnon nga kamatayon. Niining paagiha, gibayran ni Jesus ang bili sa iyang hingpit nga tawhanong kinabuhi ingong lukat sa pagluwas sa katawhan. (1 Pedro 1:19) Busa kita tukmang makaingon nga “usa ka tawo namatay alang sa tanan.” (2 Corinto 5:14) Oo, “diha kang Adan ang tanan nangamatay, maingon man usab diha kang Kristo ang tanan mangabuhi.”​—1 Corinto 15:22.

Usa ka Tawo Ilis sa Daghan

Diha sa hitabo nga pag-hijack nga gihisgotan sa sinugdan, ang mga bihag walay paagi aron sila buhian, bisan pag dato sila. Gikinahanglan ang tabang sa gawas, ug ang tawo nga nag-alagad ingong usa ka kapuli kinahanglang makaabot sa pipila ka kondisyon. Matuod gihapon kini sa mas lalom nga paagi labot sa lukat nga gikinahanglan aron matubos ang katawhan. Usa ka salmista misulat: “Sila . . . nga nangandak sa kadaghan sa ilang bahandi, walay usa kanila sa bisan unsang paagi ang makabawi sa iyang igsoon, o mohatag ngadto sa Diyos ug lukat alang kaniya; (kay ang pagtubos sa ilang kalag bililhon kaayo nga walay bayad nga paigo alang niini).” (Salmo 49:6-8) Tinuod, dihay panginahanglan ug tabang sa gawas alang sa katawhan. Ang kinabuhi sa usa ka tawo igo na sa pagtubos sa tanang katawhan kon makab-ot niya ang mga kondisyon nga gikinahanglan aron matimbang ang mga timbangan sa Diyos sa hustisya. Si Jesu-Kristo lamang ang bugtong hingpit nga tawo nga nakaabot sa mga kuwalipikasyon.

Si Jehova nga Diyos maoy nagtagana sa kaluwasan sa katawhan pinaagi sa pagbayad sa lukat pinaagi ni Jesu-Kristo. Apan labaw pa ang nahimo sa Diyos. Iyang gisentensiyahan ug kamatayon si Satanas nga Yawa, ang usa nga maoy miagak sa katawhan ngadto sa sala. (Pinadayag 12:7-9) Sa dili madugay gaposon ni Jehova kanang usa nga sad-an ug sa kataposan mopahamtang sa silot pinaagi sa ‘pagtambog kaniya ngadto sa linaw nga kalayo ug asupri,’ nga nagasimbolo sa walay kataposang kalaglagan. (Pinadayag 20:1-3, 7-10, 14) Uban sa pagkawala niining daotang espiritu nga linalang ug pinaagi sa pagpadapat sa lukat, matagamtam sa katawhan ang kaluwasan dili lamang sa paghawid sa sala ug sa kamatayon kondili sa impluwensiya usab ni Satanas. Kay nahigawas ug uban sa merito sa halad lukat ni Kristo nga ipadapat sa bug-os, ang masinugtanong katawhan mouswag ngadto sa tawhanong kahingpitan.

Ang Kahikayan sa Lukat ug Ikaw

Sa dihang nakahibalo sa halad lukat ni Jesu-Kristo, daghan sa mga taga Oryente miapresyar gayod sa nahimo sa Diyos alang kanila. Si Kazuo maoy usa ka pananglitan. Nahimong sentro sa iyang kinabuhi ang paghingos ug tinir sa pintal ug ang resulta niini nga pagkahubog. Dihang nagmaneho nga nahubog niini, daghang higayon naguba niya ang iyang mga sakyanan. Tulo sa iyang mga higala naghikog human nga ilang gidaot ang ilang panglawas. Si Kazuo misulay usab sa paghikog. Sa ulahi, siya misugod sa pagtuon sa Bibliya. Napukaw sa kamatuoran nga iyang nakat-onan, siya mihukom sa pagtul-id sa iyang kinabuhi. Nakigbisog siya sa iyang batasan sa pag-abuso sa iyang lawas ug tinir sa pintal, ug dihay daghang mga kakulian. Siya nabahin sa iyang kailibgon sa unod ug sa pagpangandoy sa paghimo sa matarong. Pagkadako sa iyang kalipay nga nakapangayo sa Diyos ug pasaylo diha sa pag-ampo pinaagi sa bili sa halad lukat ni Jesu-Kristo! Pinaagi sa pag-ampo ug sa tabang sa Kristohanong mga higala, nabuntog ni Kazuo ang iyang bisyo ug karon nag-alagad kang Jehova ingong usa ka malipayong ministro nga may mahinlo nga konsensiya.

Nahinumdom ka ba kang Chisako, nga gihisgotan sa nag-unang artikulo? Pinaagi sa usa ka pagtuon sa Bibliya, siya nakadangat usab sa pagsabot sa mahigugmaong kahikayan sa lukat. Siya dulot kaayong natandog sa dihang nahibalo nga gihatag sa Diyos ang iyang Anak aron mahigawas ang katawhan gikan sa sala. Gipahinungod ni Chisako ang iyang kinabuhi ngadto kang Jehova. Bisan karon, sa edad nga 77, siya nagagugol ug mga 90 ka oras kada bulan sa pagsulti sa uban mahitungod sa dakong gugma ni Jehova ug sa dili-takos nga kalulot nga iyang gipakita.

Ang lukat angay nga hinungdanon usab alang kanimo. Pinaagi niana, ang Diyos magabukas ug dalan ngadto sa matuod nga kagawasan alang sa katawhan​—kagawasan gikan sa sala ug kamatayon. Usa ka dakong umaabot nga walay kataposang kinabuhi diha sa paraiso sa yuta ang anaa sa unahan alang niadtong modawat sa halad lukat ni Jesu-Kristo. Palihog pakigkita sa mga Saksi ni Jehova ug susiha sa imong kaugalingon kon sa unsang paagi matagamtam mo ang kagawasan gikan sa sala ug kamatayon pinaagi sa mahigugmaong kahikayan sa lukat.

[Footnote]

[Picture Credit Line sa panid 5]

Kortesiya sa Mainichi Shimbun