Pagsultig mga Dila​—Usa ka Nagtubo Talagsaong Panghitabo

“USA ka gahom mikontrolar sa akong dila ug ang mga pulong migula lamang nga samag tubig. Pagkamakapalipay kadto! Dihay gibating labawng-kahinlo. Lahi na kaayo ako sukad niadto,” miingon ang usa nga nakabatog talagsaong kasinatian sa pagsultig usa ka “wala-mailhing dila.”

Anaa ang imong kahubitan sa usa ka tawo bahin sa iyang unang kasinatian sa pagsultig “wala-mailhing dila.” ‘Apan unsa man kana?’ tingalig mangutana dayon ang pipila. Kini nagpunting sa usa ka batasan o pagtulon-an sa pipila ka simbahan diin ang mga lalaki ug mga babaye nangangkong napalihok sa espiritu sa Diyos sa pagsulti sa langyaw o katingad-ang mga dila nga wala nila mahibaloi.

Kini maoy nagtubo relihiyosong katingad-anan. Giisip niadto nga ingong usa ka panghitabo nga iya lamang sa mga magtutuong Pentekostal, ang pagsultig mga dila karon misaylo na sa tradisyonal sektaryanhong mga utlanan nga naapil na ang mga Baptist, Episcopaliano, Luterano, Metodista, Presbyteriano, ug mga Romano Katoliko. Ang kahimtang sa tawo nga ilalom niini gihubit ingon nga daw gibayaw, nagsalimoang, nalamat, ug napunawan. Ang uban gani nagtawag niini nga daw-nabuangbuang nga kasinatian. Adunay pagkamisteryoso ug pagkamadanihon ang pagsultig mga dila.

Nganong May Tinguha Karon sa Gasa sa mga Dila?

Diha sa iyang librong Tongues of the Spirit, si Cyril G. Williams nagsugyot nga tingalig may “kalangkitan [kini] sa pagbati sa kapakyasan, ug tinguha alang sa ‘mga dila.’” Iyang gihubit kini ingong usa ka pangpahupay nga mekanismo nga may “makaayong bili ingong tigpakunhod sa tensiyon” ug “tigwala sa gibating kagubot sa sulod.” Ang gibating kapakyasan diha sa buluhaton sa simbahan, emosyonal nga tensiyon, kapakyasan sa karera, pagbangotan, kabingkilan sa panimalay, o sakit diha sa pamilya gikutlo ingong mga hinungdan nga nakadugang sa maong mahugyawon nga sinultihan.

Sa susama, sa The Psychology of Speaking in Tongues, si John P. Kildahl miingon nga ang “kabalaka hinungdanon sa pag-ugmad sa katakos sa pagsultig mga dila.” Pinaagi sa kaugalingong panukiduki ug mainampingong panukitsukit, nakaplagan nga “kapin sa 85% sa mga tigsultig-dila nakasinatig tinuod nga kabalaka sa wala pa sila makasultig mga dila.” Pananglitan, usa ka inahan gusto nga mosultig mga dila aron siya makaampo alang sa iyang anak nga lalaki nga may sakit nga kanser. Usa ka tawo misugod sa pagsultig mga dila sa panahong siya dili makadesisyon sa gitanyag nga promosyon sa trabaho. Usa ka babaye misugod sa pagsultig mga dila sulod sa usa ka semana human nga misulod ang iyang bana sa usa ka organisasyon nga nagatabang sa mga alkoholiko sa pagbuntog sa ilang pagkagiyan.

Unsay Masinati sa Usa?

Lain pa nga nakasultig mga dila sa unang higayon mitaho: “Nanginit ang akong tibuok nga kalawasan, ug gipanugnaw ug mitulo ang dagkong mga singot, nangurog ug namuypoy ang akong mga tiil.” Duyog sa kasinatian sa pagsultig-dila, anaa kanang talagsaong paggawi nga makapatugaw sa uban. Pananglitan, “usa ka batang babaye hapit natuk-an sa iyang kaugalingong laway samtang siya mituyhad diha sa lingkoranan, ang iyang liog nagpatong sa likod niini, ang iyang mga tikod diha sa salog, ang iyang mga tiil migahi.” Sa usa ka miting sa kongregasyon “usa ka tawo misirko gikan sa usa ka tumoy sa simbahan ngadto sa lain.”

“Alang sa ubang mga tawo,” misulat si Propesor William J. Samarin, ang “pagsultig mga dila maoy usa ka kahimtang sa pagkanabawtismohan sa Balaang Espiritu.” Kon wala kini, sila “pabation nga may nakulang kanila.” Gilantaw usab kini “ingong usa ka tubag sa pag-ampo, usa ka pasalig sa gugma sa Diyos ug pagkadinawat.” Ang uban miingon nga kini mihatag kanila ug malinawon nga pagbati sa sulod, kalipay, ug kalinaw, ug may “mas dakong pagbati sa gahom” ug “mas malig-ong pagbati sa kon kinsa siya.”

Ang mahugyawong sinultihan ba sa pagkatinuod maoy ebidensiya sa paglihok sa balaang espiritu? Ang kasinatian ba mopaila sa usa ka tawo ingon nga usa ka matuod nga Kristohanon? Ang pagsulti ba ug mga dila maoy usa ka bahin sa dalawatong pagsimba karong adlawa? Kining mga pangutanaha nagkinahanglan ug labaw pa kay sa taphaw nga tubag lamang. Ngano? Tungod kay buot nato nga ang atong pagsimba makabaton sa pag-uyon ug panalangin sa Diyos.