Naihap Mo na ba ang Bili?

“UNSA! Imong balibaran ang maayong tanyag?” Ang superbisor halos dili makatuo sa iyang nadunggan. Ang iyang katabang, usa ka babaye nga tinahod sa iyang katakos ug maayong paggawi, mibalidad sa usa ka tanyag sa pagtuon sa laing nasod sulod sa duha ka tuig nga kompaniya ang mogasto. Nganong mibalibad man siya?

Kon dawaton ang tanyag, ang babaye miingon, nagkahulogan nga mahilayo siya gikan sa iyang bana ug duha ka anak sulod sa duha ka tuig. Siya mingawon gayod kanila. Labing hinungdanon, mapasagdan usab niya ang hinatag-sa-Diyos nga mga katungdanan ingong usa ka asawa ug inahan. Ang emosyonal ug espirituwal nga bili mahal kaayo nga ibayad. Busa, human ihapa ang bili, siya mihukom nga balibaran ang tanyag.

Unsay imong buhaton kon ikaw pa ang anaa sa iyang dapit? Dayag, dili ang tanan mouyon sa desisyon nga gihimo niining Kristohanong babaye. Ang uban, sama sa iyang kaubang mga empliyado, tingali mobati nga iyang giusikan ang bulawanong higayon aron moasenso siya sa iyang karera. Tingali akusahon pa siya sa uban nga wala maghunahuna sa kaugmaon sa iyang pamilya, kay, kon hunahunaon, dali ra kaayong molabay ang duha ka tuig. Apan, ang iyang desisyon dili mahinaykon o sentimental. Kadto gipasukad sa maayong katarongan ug layog-abot nga mga prinsipyo. Unsa kini?

Labaw pa sa Igong Buut

Ang labing maalamong tawo nga nabuhi sukad sa yuta, si Jesu-Kristo, mihatag ug giya diha sa usa sa iyang mga sambingay. “Kay kinsa ba kaninyo nga gustong magtukod ug torre nga dili una molingkod ug banabanaon ang gasto, ug tan-awon kon siya aduna bay igong ikapahuman niana?” nangutana si Jesus. “Kay basin ug ipahimutang niya ang pundasyon ug dili makahuman niana, ug ang tanan nga makakita tingalig mosugod sa pagbugalbugal kaniya, nga moingon, ‘Kining tawhana igo rang misugod sa pagtukod apan wala makapahuman.’”​—Lucas 14:28-30.

Ang tanan mouyon nga maalamon ug praktikal ang pag-ihap sa bili sa dili pa mohukom sa pagbuhat ug bisan unsang butang nga hinungdanon. Pananglitan, kon gusto mopalit ang usa ka tawo ug balay, siya ba magdalidali ug pirma sa kontrata nga wala gani usa susiha ang kantidad ug sa pagseguro nga siya dunay igong kuwarta sa pagtapos sa transaksiyon? Siya isipon gayod nga buang kon buhaton niya kana. Oo, igong buut ang pag-ihap sa bili sa dili pa sugdan ang usa ka proyekto.

Apan, unsa sa pagkatinuod ang punto nga gipasiugda ni Jesus sa maong sambingay? Sa wala pa ipailaila ang sambingay, siya miingon: “Bisan kinsa ang dili mopas-an sa iyang kahoy sa pagsakit ug mosunod kanako dili siya mahimong akong tinun-an.” (Lucas 14:27) Busa, ang konteksto nagpakita nga si Jesus wala lamang maghatag ug pipila ka igong buut nga tambag alang sa atong ordinaryo, adlaw-adlaw nga mga hilikayon. Hinunoa, siya naghisgot sa pag-ihap sa gasto maylabot sa pagkahimong iyang tinun-an.

Pinaagi sa iyang sambingay, gipasiugda ni Jesus nga ang pagkahimong iyang tinun-an naglakip ug mga kausaban ug mga pagsakripisyo. Ngano? Tungod kay ang presenteng sistema sa mga butang materyalistiko ug ginapalihok sa kaugalingong kaayohan. Ang pangunang gikabalak-an sa kadaghanan sa mga tawo mao ang pagtagbaw sa ilang unodnong mga tinguha, nagahatag ug diyutay o walay pagtagad sa ilang espirituwal nga mga panginahanglan o sa ilang relasyon sa Diyos. (2 Timoteo 3:1-4) Kini nga tinamdan, o espiritu, hinunoa, sukwahi gayod nianang gipakita ni Jesu-Kristo. “Ang Anak sa tawo mianhi,” siya miingon, “dili aron pagaalagaran, kondili sa pag-alagad ug sa paghatag sa iyang kalag nga usa ka lukat ilis sa daghan.” Iyang gihatagag kinatas-ang bili ang espirituwal inay ang materyal nga mga butang sa dihang siya miingon: “Ang espiritu mao ang nagahatag ug kinabuhi; ang unod walay kapuslanan.”​—Mateo 20:28; Juan 6:63.

Busa, sa dihang gitambagan ni Jesus kadtong buot nga mahimong iyang mga tinun-an sa pag-ihap sa bili, siya naghisgot ilabina, dili sa materyal nga mga bili, kondili sa espirituwal. Unsa ang mas bililhon kanila, ang materyal ba nga mga bintaha nga ginatanyag sa kalibotan o ang espirituwal nga mga kaayohan nga ikatanyag sa pagkahimong tinun-an? Maoy hinungdan nga human ihatag ang sambingay ug sa usa nga nalangkit nga sambingay, siya mihinapos: “Busa, makatino kamo, nga ang bisan kinsa kaninyo nga dili mobiya sa tanan nga iyang ginahuptan, dili siya mahimo nga akong tinun-an.” (Lucas 14:33) Ang umaabot ba nga sumusunod matinguhaon ug andam sa pagsakripisyo, o kini mahal ba kaayo nga bili nga ibayad?

Usa ka Timbang nga Hunahuna

Bisan tuod makahatag ang materyal nga mga butang ug mga kaayohan nga mas daling mamatikdan ug mabatonan, ang mga kaayohan gikan sa espirituwal nga mga tinguha mas malungtaron ug matagbawon. Si Jesus nangatarongan niining paagiha: “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug ang taya nagakutkot, ug diin ang kawatan nagapanakasaka ug nagapangawat. Hinunoa, pagtigom kamo ug bahandi alang kaninyo didto sa langit diin walay tangkob ni taya ang magakutkot ug diin walay mga kawatan nga magapanakasaka ug magapangawat.” (Mateo 6:19, 20) Sa atong panahon, ang implasyon, ang pag-us-os sa bili sa aksiyones nga ginabaligya, mga pagkahapay sa bangko, ug uban pa, makapahinabog kadaot sa daghan nga nagabutang sa ilang pagsalig diha lamang sa materyal nga mga bahandi. Apan si apostol Pablo nag-awhag kanato sa “pagtutok sa atong mga mata dili sa mga butang nga makita, kondili sa mga butang nga dili-makita. Kay ang mga butang nga makita lumalabay lamang, apan ang mga butang nga dili-makita walay kataposan.” (2 Corinto 4:18) Apan, sa unsang paagi atong maugmad kining hunahunaa?

Atong mahimo kana pinaagi sa pagsundog sa atong Sumbanan ug Panig-ingnan, si Jesu-Kristo. Sa dinhi pa sa yuta, siya dili gayod usa ka tawong higpit, ingon sa gipamatud-an sa kamatuoran nga siya usahay nakigbahin sa mga salosalo sa kasal ug sa mga kombira. Apan, dayag nga iyang giuna ang espirituwal nga mga butang. Aron matuman ang kabubut-on sa iyang Amahan, siya andam sa pagsalikway sa mga butang nga giisip nga kinahanglanon. Kas-a siya miingon: “Ang mga milo dunay kalubloban ug ang mga langgam sa kalangitan dunay kabatogan, apan ang Anak sa tawo walay dapit nga kapahulayan sa iyang ulo.” (Lucas 9:58) Iyang giisip ang pagbuhat sa kabubut-on sa iyang Amahan nga hinungdanon kaayo ug makapalipay nga siya miingon uban ang kinasingkasing nga katim-os: “Ang akong pagkaon mao ang pagbuhat sa kabubut-on niya nga nagpadala kanako ug sa pagtapos sa iyang buluhaton.”​—Juan 4:34.

Gipasundayag ni Jesus ang iyang pagpabili sa mga sukdanan pinaagi sa iyang pagsalikway sa mga pagpanulay ni Satanas. Misulay ang Yawa sa paghaylo kang Jesus sa paggamit sa Iyang hinatag-sa-Diyos nga gahom nga makahatag ug kaayohan Kaniya mismo, sa pagtagbaw sa Iyang pisikal nga mga panginahanglan, ug aron mabatonan ang kalibotanong pagkainila ug kabantog. Si Jesus nasayod pag-ayo nga ang maong kaduhaduhaang mga kaayohan pagabayaran ug mahal kaayong kantidad​—ang pagkawala sa pag-uyon sa Diyos—​usa ka kantidad nga mahal ra kaayo alang kaniya nga bayaran, kay iyang gipakahamili ang iyang maayong relasyon uban sa iyang Amahan labaw sa tanan. Maoy hinungdan nga hugot niyang gisalikway ang mga tanyag ni Satanas, nga walay pagpanuko.​—Mateo 4:1-10.

Ingong mga sumusunod ni Kristo, buot gayod natong mabatonan ang samang pagpabili sa mga sukdanan sa atong Agalon. Sa presenteng sistema sa mga butang ubos sa pagmando ni Satanas, dunay daghang mga butang nga daw nagasaad ug maayong mga kaayohan apan sa aktuwal makadaot sa atong relasyon sa Diyos. Ang mga butang sama sa pagpaningkamot sa pagkab-ot sa hataas nga posisyon sa trabaho, sa pagpadayon sa hataas nga edukasyon aron moasenso, pagpangulitawo ug dili mga magtutuo, o makigbahin sa kuwestiyonableng mga plano sa negosyo dali nga motultol sa pagkawala sa pagtuo ug pagkahulog sa ulahi gikan sa pag-uyon ni Jehova. Kinahanglan natong iphon ang bili sa dihang magaatubang ug ingon niini ang mga tintasyon.

Ang Matuod nga Kaalam Usa ka Panalipod

Pipila ka tuig nga milabay, usa ka batan-on Kristohanong lalaki diha sa usa ka dakong siyudad sa Halayong Silangan nakabatog higayon sa pag-adto sa laing nasod aron ipadayon ang iyang pagtuon. Bisag siya duna nay maayong sekular nga edukasyon ug trabaho nga dakog-suweldo, gibati niya nga kini dili pa igo; buot niyang mouswag pa sa iyang kahimtang sa kinabuhi. Gisulayan sa kaubang mga Kristohanon ang pagpangatarongan kaniya uyon sa mga punto sa Bibliya nga bag-o pa natong gihisgotan, apan siya nagmatig-a gayod ug mipadayon sa plano. Bisag gipaningkamotan niyang mahuptan ang iyang pagtuo sa sinugdan, anam-anam nga nawala ang iyang pagpabili sa kamatuoran sa Bibliya, ug misugod sa pagduhaduha. Kapin sa usa ka tuig lamang, bug-os nga nawala ang iyang pagtuo ug miangkon nga usa na siya ka agnostiko. Tugotan ta, ang pagbaton ug hataas nga titulo sa kolehiyo pinaagi sa abanteng sekular nga edukasyon nakahatag kaniyag igong katagbawan. Apan alang sa lumalabay nga kadungganan, pagkadako nga bili ang iyang gibayad​—ang pagkalunod sa iyang pagtuo ug ang kapeligrohang mawad-an sa kinabuhing walay kataposan!​—1 Timoteo 1:19.

Sa laing bahin, kadtong nagadumili gayod sa pagtugot nga madaot ang ilang relasyon sa Diyos makaani ug dakong mga panalangin gikan kang Jehova.

Usa ka pananglitan mao ang bahin sa usa ka ulitawo nga adunay negosyo sa pagdekorasyon ug mga balay sa samang siyudad nga gihisgotan sa itaas. Pipila ka bulan lamang human nga misugod siya sa pagtuon sa Bibliya uban sa mga Saksi ni Jehova, siya giatubang ug usa ka madanihong tanyag​—sa paghimog $30,000 nga trabaho sa pag-ayog tinukod. Apan, masupak ang balaod niini sa pagtukod ug ang mga regulasyon sa pagtukod ug pipila ka ilegal nga edipisyo. Sanglit iyang nakat-onan nga ang mga Kristohanon kinahanglang mosunod sa balaod, siya nahibalo nga ang pagdawat sa trabaho nagkahulogan sa pagkawala sa pag-uyon sa Diyos. (Roma 13:1, 2) Human sa mainampingong pagtimbangtimbang niining butanga, iyang gibaliran ang trabaho. Ang resulta? Kining buhat sa pagtuo nakita nga usa ka lisoanang punto sa iyang espirituwal nga pag-uswag. Sulod sa usa ka tuig, siya miuswag hangtod sa punto sa pagpahinungod ug bawtismo. Iyang gibaligya ang iyang negosyo ug nakakitag trabaho nga nagatugot kaniya ug mas daghang panahon alang sa espirituwal nga mga tinguha. Siya karon nagaalagad kang Jehova nga malipayon ug masiboton.

Kining duha ka ulitawo nag-ihap sa bili. Unsay nagpalahi sa ilang pagpili? Ang diyosnong kaalam! Sa unsang paagi? Ang kaalam mao ang katakos sa paggamit sa kahibalo diha sa paagi nga sagad mohatag ug malungtarong mga kaayohan, ug ang diyosnong kaalam nagkahulogan sa paggamit sa kahibalo nga nahiuyon uban sa katuyoan sa Diyos alang kanato. Samtang ang duha ka batan-ong lalaki may pipila ka kahibalo sa Bibliya, ang ilang pagpadapat niana mitultol ug lahi nga mga resulta. Ang basahon sa Proverbio nag-ingon: “Sa dihang ang kaalam mosulod sa imong kasingkasing ug ang kahibalo mismo mahimong makapahimuot sa imong kalag, ang katakos sa paghunahuna ang magabantay kanimo, ang maayong paghukom magapanalipod kanimo, sa pagluwas kanimo gikan sa daotang dalan.”​—Proverbio 2:10-12.

Ang Pulong sa Diyos, ang Bibliya, mao ang tuboran sa matuod nga kaalam nga kanunay mong kadangpan alang sa paggiya sa dihang maghimo ka ug hinungdanong mga desisyon. Inay magmaalamon sa imong kaugalingong mga mata, pamati sa tambag: “Salig kang Jehova sa tibuok mong kasingkasing ug ayaw pagsalig sa imong kaugalingong pagsabot. Sa tanan mong mga dalan ilha siya, ug siya magatul-id sa imong mga dalan.” (Proverbio 3:5, 6) Kita kinahanglang magmapainubsanon ug andam nga magpatudlo, likayan ang gahi ug independenteng espiritu sa kalibotan nga komun karong adlawa.

Oo, kita dili makalikay sa pag-ani sa atong ginapugas, ug makataronganon ug angay lamang nga atong pas-anon ang mga sangpotanan sa mga desisyon ug mga pagpili nga atong himoon. (Galacia 6:7, 8) Busa ihapa ang bili sa dili pa himoon ang tanang hilikayon. Ayaw itugot nga ang daw bentaha maghikaw kanimo sa imong espirituwalidad o sa imong relasyon uban kang Jehova nga Diyos. Pag-ampo alang sa kaalam ug maayong paghukom aron makahimog hustong mga desisyon, kay ang mga desisyon nga imong himoon karon magkahulogan sa kalainan sa kinabuhi ug sa kamatayon​—sa walay kataposan!​—Itandi ang Deuteronomio 30:19, 20.

[Mga hulagway sa panid 28]

Iya bang ibutang pag-una sa kinabuhi ang espirituwal nga mga buluhaton o ang sekular nga karera?