Aprikanhong mga Hubad sa Bibliya

Ang kinasayohang mga hubad sa tibuok Bibliya ngadto sa usa ka Aprikanhong pinulongan gihimo sa Ehipto. Nailhan ingong Coptic nga mga bersiyon, sila gituohan nga napetsahan gikan sa ikatulo o ikaupat nga siglo K.P. Mga tulo ka siglo sa ulahi, ang Bibliya gihubad ngadto sa Etiopiko.

Ang gatosan ka dili-sinulat nga mga pinulongan nga ginasulti sa habagatan sa Etiopia ug sa Sahara kinahanglan nga mohulat sa pag-abot sa mga misyonaryo niadtong ika-19ng siglo. Pagka 1857 usa ka kauswagan nakab-ot sa dihang si Robert Moffat nakahuman ug usa ka hubad sa Bibliya ngadto sa Tswana, usa ka pinulongan sa habagatang Aprika. Siya usab nagpatik niana sa mga seksiyon pinaagig kinamot nga pagprinta. Mao kana ang unang kompletong Bibliya nga naprinta diha sa Aprika ug usab maoy unang kompletong hubad ngadto sa kanhi dili-sinulat nga pinulongang Aprikanhon. Makaiikag, si Moffat migamit sa balaang ngalang Yehova diha sa iyang hubad. Sa 1872 nga bersiyon nga gipatik sa British and Foreign Bible Society, ang ngalang Yehova gigamit diha sa pangunang mga pahayag ni Jesus sama sa narekord sa Mateo 4:10 ug Marcos 12:29, 30.

Pagka 1990 ang entirong Bibliya nahubad na ngadto sa 119 ka Aprikanhong mga pinulongan, nga may mga bahin niana nga mabatonan diha sa dugang 434.