Mga Pangutana Gikan sa mga Magbabasa

Ang mga Saksi ba ni Jehova nagdumili sa pagsaulog sa mga adlawng natawhan tungod kay ang batasan may pila ka relihiyosong kahulogan sa karaang mga panahon?

Ang pagsaulog ug mga adlawng natawhan naggikan sa patuotuo ug bakak nga relihiyon, apan kana dili bugtong o pangunang katarongan nganong ang mga Saksi ni Jehova naglikay sa maong batasan.

Ang pila ka kustombre nga sa nangagi relihiyoso ug kinaiya dili na karon sa daghang dapit. Pananglitan, ang singsing sa kasal sa nangagi may relihiyosong kahulogan, apan sa daghang dapit karong adlawa, wala na. Busa, daghang tinuod nga mga Kristohanon nagdawat sa lokal nga kustombre sa pagsul-ot ug singsing sa kasal sa paghatag ebidensiya nga ang usa ka tawo maoy minyo. Sa maong mga butang, kon unsay sa kinadak-an makaimpluwensiya maoy sa pagkakaron kon kanang batasana nalangkit sa bakak nga relihiyon.​—Tan-awa ang “Mga Pangutana Gikan sa mga Magbabasa” sa Ang Bantayanang Torre sa Hulyo 15, 1972, ug Oktubre 15, 1991.

Hinuon, walay paglimod, daghang mga reperensiyang basahon nagpadayag nga ang pagsaulog sa adlawng natawhan may matuotuohon ug relihiyosong mga kagikan. Ang The Encyclopedia Americana (1991 nga edisyon) nagpahayag: “Ang karaang kalibotan sa Ehipto, Gresya, Roma, ug Persia nagsaulog sa mga adlawng natawhan sa mga diyos, mga hari, ug mga halangdon.” Kana nagaingon nga ang mga Romano nagbantay sa adlawng natawhan ni Artemis ug sa adlaw ni Apolos. Sa kasukwahi, “bisan tuod ang mga Israelinhon naghupot ug rekord sa mga pangedaron sa ilang lalaking mga molupyo, walay kalig-onan nga sila may mga pagsaulog sa kasumaran sa petsa sa pagkatawo.”

Ubang reperensiyang mga basahon naghatag ug ubay-ubayng detalye mahitungod sa kagikan sa mga pagsaulog sa adlawng natawhan: ‘Mga piging sa adlawng natawhan nagsugod mga katuigan kanhi sa Uropa. Ang mga tawo nagtuo sa maayo ug daotang mga espiritu, usahay gitawag ug maayo ug daotang mga engkanto. Ang tanan nahadlok niining mga espirituha sila magpahinabog kadaot sa nagsaulog ug adlawng natawhan, ug busa siya alirongan sa mga higala ug mga paryente kansang maayong mga panghinaot, ug pinakapresensiya, mopanalipod kaniya batok sa wala hisayri nga katalagman nga mahitabo sa adlawng natawhan. Ang paghatag ug mga gasa nagdala ug mas dakong panalipod. Ang pagpangaon ug dungan nagatagana ug dugang panagang ug makatabang sa pagdala ug mga panalangin gikan sa maayong mga espiritu. Busa ang piging sa adlawng natawhan sa sinugdanan gituyo alang sa paghimo sa usa ka tawo nga luwas gikan sa daotan ug sa pagseguro sa usa ka maayong tuig nga moabot.’​—Birthday Parties Around the World, 1967.

Ang libro nagasaysay, usab, sa sinugdanan sa daghang mga kustombre sa adlawng natawhan. Pananglitan: “Ang katarongan sa [paggamit ug mga kandila] sukad pa sa sayong mga Grego ug mga Romano nga naghunahuna nga ang mga kandila may mga hiyas sa mahika. Sila mopahinungod ug mga pag-ampo ug mohimog mga hangyo nga pagadalhon ngadto sa mga diyos pinaagi sa mga dagkot sa mga kandila. Ang mga diyos unya mopadala sa ilang mga panalangin ug lagmit motubag sa mga pag-ampo.” Ang ubang samang impormasyon sa kagikan gitipon sa mga panid 30 ug 31 sa Nangatarongan Pinasukad sa Kasulatan, nga gipatik sa Watchtower Bible and Tract Society of New York, Inc.

Hinuon, ingon sa nahisgotan, labaw ang nalangkit diha sa pangutana kay sa kon kaha ang pagsaulog sa adlawng natawhan sa gihapon relihiyoso. Ang Bibliya nagpatin-aw sa butang mahitungod sa mga adlawng natawhan, ug ang hamtong nga mga Kristohanon sa kamaalamon maoy matinagdanon sa bisan unsang pagtudlo nga iyang ginahatag.

Ang mga alagad sa Diyos sa kakaraanan nagtimaan kon kanus-a ang mga indibiduwal natawo, nga motugot kanila sa pagkalkulo sa mga edad. Atong mabasa: “Si Noe lima ka gatos ka tuig. Pagkatapos niana si Noe nahimong amahan kang Sem, Ham, ug Japet.” “Sa ikaunom ka gatos ka tuig sa kinabuhi ni Noe, . . . ang tanang mga tuboran sa dagkong kahiladman sa tubig nangaabli.”​—Genesis 5:32; 7:11; 11:10-26.

Sama sa gihisgotan mismo ni Jesus, taliwala sa katawhan sa Diyos ang pagpanganak maoy bulahan, ug malipayong okasyon. (Lucas 1:57, 58; 2:9-14; Juan 16:21) Bisan pa, ang katawhan ni Jehova wala magsaulog sa petsa sa natawhan; sila nagsaulog sa ubang mga kasumaran apan dili sa adlawng natawhan. (Juan 10:22, 23) Ang Encyclopaedia Judaica nag-ingon: “Ang pagsaulog sa mga adlawng natawhan maoy wala mahibaloi sa naandang rituwal sa mga Hudiyo.” Ang Customs and Traditions of Israel nag-ingon: “Ang pagsaulog sa mga adlawng natawhan gihulaman gikan sa mga batasan sa laing mga nasod, kay walay paghisgot bahin niining kustombreha taliwala sa mga Hudiyo ni sa Bibliya, Talmud, o mga sinulat sa ulahing mga Tawong Makinaadmanon. Sa pagkatinuod, kana maoy karaang kustombre sa Ehipto”.

Kanang Ehiptohanong kalambiggitan maoy tin-aw gumikan sa pagsaulog sa adlawng natawhan nga may kalabotan sa Bibliya, usa nga ang matuod nga mga magsisimba wala magsaulog. Kadto maoy kombira sa adlawng natawhan ni Paraon nga nagmando samtang si Jose atua sa sulod sa Ehiptohanong bilanggoan. Ang pila niadtong mga pagano nagkalipay tungod sa kombira, bisan pa ang adlawng natawhan nalambiggit sa pagpunggot sa ulo sa pangunang panadero ni Paraon.​—Genesis 40:1-22.

Ang susamang dili paborableng kamatuoran nadayag pinaagi sa pagsaulog sa adlawng natawhan nga gihubit sa Kasulatan​—ang kang Herodes Antipas, anak ni Herodes nga Bantogan. Kining pagsauloga sa adlawng natawhan wala gayod gipresentar diha sa Bibliya ingong walay lama nga kombirahay. Inay, kana maoy okasyon sa pagpunggot sa ulo ni Juan nga Bawtista. Unya, “ang iyang mga tinun-an nanganha sa pagkuha sa iyang patay nga lawas ug naglubong kaniya ug nangadto ug nagtaho kang Jesus,” kinsa ‘mipahilit gikan didto ngadto sa usa ka awaaw nga dapit sa pag-inusara’ (Mateo 14:6-13) Imo bang gihunahuna nga kadtong nga tinun-an o si Jesus nadani sa pagsaulog sa adlawng natawhan?

Mahitungod niining nahibaloang sinugdanan sa pagsaulog sa mga adlawng natawhan, ug labing hinungdanon, ang dili paborableng kamatuoran nga sila gipresentar diha sa Bibliya, ang mga Saksi ni Jehova may igong katarongan sa paglikay sa batasan. Dili nila kinahanglan nga mosunod niining kalibotanong kustombre, tungod kay sila makahimo sa pagpangaon nga malipayon sa bisan unsang panahon sulod sa tuig. Ang ilang paghatag ug gasa dili kay pinugos o ubos sa pagpit-os sa usa ka sosyal nga panagtigom; kana kinaiyanhon nga pagpaambit ug mga gasa sa bisan unsang panahon tungod sa kamanggihatagon ug tinuod nga paghigugma.​—Proverbio 17:8; Ecclesiastes 2:24; Lucas 6:38; Buhat 9:36, 39; 1 Corinto 16:2, 3.