Ang Espiritu ni Jehova Nagatultol sa Iyang Katawhan

“Ang imong espiritu maayo; hinaot kini motultol kanako ngadto sa yuta sa katul-iran.”​—SALMO 143:10.

1, 2. Unsay nakahatag kaguol sa maunongong mga alagad ni Jehova?

‘NAGUOL kaayo ako! Asa ako makakaplag ug paglipay? Gibiyaan na ba ako sa Diyos?’ Mibati ka na bag ingon niana sukad? Kon mao, wala ka mag-inusara. Bisag ang maunongong mga alagad ni Jehova nagpuyo diha sa malamboon nga espirituwal nga paraiso, atubangon usahay nila ang makaguol nga mga suliran, mga pagsulay, ug mga tintasyon nga komun sa katawhan.​—1 Corinto 10:13.

² Tingali gihasol ka sa usa ka dugay na nga pagsulay o hinungdan sa dakong kalisdanan. Hayan nagbangotan ka sa kamatayon sa usa ka minahal ug mibatig dakong kamingaw. O kaha ang imong kasingkasing nabalaka sa sakit sa usa ka minahal nga higala. Kining mga kahimtanga basin naghikaw sa imong kalipay ug kalinaw ug tingali nagpameligro pa sa imong pagtuo. Unsay imong buhaton?

Pangayo sa Diyos sa Iyang Espiritu

3. Kon may maghikaw kanimo sa maong mga hiyas sama sa kalinaw ug kalipay, unsa ang maalamong buhaton?

³ Kon may butang nga naghikaw sa imong kalinaw, kalipay, o sa ubang diyosnong hiyas, maalamon ang pag-ampo alang sa balaang espiritu sa Diyos, o aktibong gahom. Ngano? Tungod kay ang espiritu ni Jehova mopatungha ug maayong bunga nga makatabang sa Kristohanon sa pag-atubang sa mga suliran, mga pagsulay, ug mga tintasyon. Human mipasidaan batok sa “mga buhat sa unod,” si apostol Pablo misulat: “Sa laing bahin, ang bunga sa espiritu mao ang gugma, kalipay, kalinaw, hataas-nga-pailob, kalumo, pagkamaayo, pagtuo, kaaghop, pagpugong sa kaugalingon. Kining mga butanga wala mahisupak sa bisan unsang balaod.”​—Galacia 5:19-23.

4. Kon magaatubang ug usa ka pagsulay o tintasyon, nganong tukmang magmaespisipiko kita sa atong mga pag-ampo?

⁴ Tungod sa matang sa pagsulay nga imong ginaatubang, tingali imong maamgohan nga nameligro ka nga mawala ang imong kalumo, o malulot nga kinaiya. Nan magmaespisipiko pinaagi sa pag-ampo kang Jehova nga Diyos alang sa bunga sa espiritu nga kalumo. Kon nagaatubang ka ug tintasyon, ilabinang gikinahanglan mo ang bunga sa pagpugong sa kaugalingon. Siyempre, tukma usab ang pag-ampo alang sa tabang sa Diyos aron makasukol sa tintasyon, sa kaluwasan gikan kang Satanas, ug sa kaalam nga gikinahanglan aron maantos ang pagsulay.​—Mateo 6:13; Santiago 1:5, 6.

5. Kon ang mga kahimtang makapaguol kaayo nga wala ka na masayod kon unsa nga bunga sa espiritu ang iampo, unsay mahimong himoon?

⁵ May mga panahon, hinunoa, ang mga kahimtang tingali makaguol kaayo o makalibog nga sa ingon wala ka na masayod kon unsa nga bunga sa espiritu ang imong gikinahanglan. Gani, ang kalipay, kalinaw, kalumo, ug ang ubang diyosnong mga hiyas tingalig nameligro ang tanan. Nan, unsay buhaton? Nganong dili mangayo sa Diyos sa balaang espiritu mismo ug pasagdi nga ipalambo niini ang gikinahanglang mga bunga diha kanimo? Ang gikinahanglang mga bunga tingali mao ang gugma o kalipay o kalinaw o kombinasyon sa mga bunga sa espiritu. Pag-ampo usab nga tabangan ka sa Diyos nga magpasakop sa pagtultol sa iyang espiritu, kay iyang gigamit kini sa pagtultol sa iyang katawhan.

Si Jehova Andam nga Motabang

6. Sa unsang paagi gipasilsil ni Jesus ngadto sa iyang mga sumusunod ang panginahanglan sa walay-hunong nga pag-ampo?

⁶ Sa dihang ang mga tinun-an ni Jesu-Kristo nangayo ug instruksiyon bahin sa pag-ampo, sa usa ka bahin iyang giawhag sila sa pag-ampo alang sa espiritu sa Diyos. Migamit una si Jesus ug usa ka ilustrasyon nga gilaraw sa pagpukaw kanila sa pag-ampo nga walay hunong. Siya miingon: “Kinsa kaninyo nga may higala nga moadto kaniya sa tungang gabii ug moingon kaniya, ‘Migo, pabayloa ako ug tulo ka tinapay, kay miabot ang akong higala nga gikan sa biyahe ug wala akoy ikadulot kaniya’? Ug ang anaa sa sulod motubag, ‘Ayaw ako pagsamoka. Ang pultahan gitrangkahan na, ug ang mga bata ania na uban kanako sa higdaanan; dili na ako makabangon sa paghatag kanimog bisan unsa.’ Sultihan ko kamo, Bisan dili siya mobangon sa paghatag unta kaniyag bisan unsa tungod sa iyang pagkahimong higala, apan kay nagsige man siya ug hangyo siya mobangon na lamang ug hatagan siya sumala sa iyang gikinahanglan.”​—Lucas 11:5-8.

7. Unsa ang diwa sa mga pulong ni Jesus diha sa Lucas 11:11-13, ug unsang pasalig ang gihatag niini kanato bahin sa Diyos ug sa iyang espiritu?

⁷ Si Jehova andam nga motabang sa matag usa sa iyang matinumanon dedikadong mga alagad, ug siya mamati sa ilang mga hangyo. Apan kon ang maong tawo ‘magpadayon sa pagpangayo,’ sumala sa giawhag ni Jesus, kini nagpaila sa kinasingkasing nga tinguha ug usa ka pasundayag sa pagtuo. (Lucas 11:9, 10) Si Kristo midugang: “Sa pagkatinuod, kinsa bang amahana diha kaninyo nga kon ang iyang anak mangayog isda, hatagan hinoon siyag bitin inay isda? O mangayo siyag itlog, hatagan hinoon siyag tanga? Busa, kon kamo, bisag daotan, mahibalo man ganing mohatag ug mga maayong gasa ngadto sa inyong mga anak, labaw na gayod ang inyong Amahan sa langit nga mohatag sa balaang espiritu ngadto sa mga nagapangayo kaniya!” (Lucas 11:11-13) Kon ang usa ka yutan-ong ginikanan, bisag labihan ka daotan o dili kaayo daotan tungod sa napanunod nga sala, mohatag ug maayong mga butang sa iyang anak, siyempre ang atong langitnong Amahan magpadayon sa paghatag sa iyang balaang espiritu ngadto sa kang bisan kinsa sa usa sa iyang maunongong mga alagad nga mapaubsanong nagapangayo niana.

8. Sa unsang paagi ang Salmo 143:10 aplikado kang David, Jesus, ug sa modernong-adlaw nga mga alagad?

⁸ Aron makabaton ug kaayohan gikan sa espiritu sa Diyos, kita kinahanglang andam mosunod sa pagtultol niini sama kang David. Siya miampo: “Tudloi ako sa pagtuman sa imong kabubut-on, kay ikaw mao ang akong Diyos. Ang imong espiritu maayo; ug hinaot kini motultol kanako ngadto sa yuta sa katul-iran.” (Salmo 143:10) Si David, kinsa gihinginlan sa Israelinhong haring Saul, nagpatultol sa espiritu sa Diyos aron matino niya nga ang iyang dalan matul-id. Sa ulahi si Abiathar miabot nga nagdalag lino nga kapa sa saserdote nga gamiton sa pagsuta sa kabubut-on sa Diyos. Ingong hawas nga saserdote sa Diyos, gitudloan ni Abiathar si David sa dalan nga pagalaktan aron mapahimut-an si Jehova. (1 Samuel 22:17–​23:12; 30:6-8) Sama kang David, si Jesus gitultolan sa espiritu ni Jehova, ug tinuod usab kini diha sa dinihogang mga sumusunod ni Kristo ingong usa ka matang. Sa 1918-19, sinalikway sila sa tawhanong katilingban, ug ang ilang relihiyosong mga kaaway nagtuo nga sila makalaglag kanila. Ang dinihogan miampo ug kaikyasan gikan sa ilang walay-kalihokan nga kahimtang, ug sa 1919, gitubag sa Diyos ang ilang mga pag-ampo, giluwas sila, ug gibuhi sila pag-usab diha sa iyang pag-alagad. (Salmo 143:7-9) Sa pagkatinuod, ang espiritu ni Jehova niadto nagtabang ug nagtultol sa iyang katawhan, sama sa ginahimo niini hangtod karong adlawa mismo.

Kon sa Unsang Paagi Motabang ang Espiritu

9. (a) Sa unsang paagi ang balaang espiritu nagsilbing usa ka “magtatabang”? (b) Sa unsang paagi nahibalo kita nga dili usa ka persona ang balaang espiritu? (Tan-awa ang potnot.)

⁹ Gitawag ni Jesu-Kristo ang balaang espiritu nga usa ka “magtatabang.” Kay pananglitan, iyang gisultihan ang iyang mga sumusunod: “Hangyoon ko ang Amahan ug siya maghatag kaninyo ug laing magtatabang nga inyong ikauban sa walay kataposan, ang espiritu sa kamatuoran, diin ang kalibotan dili makadawat, kay ang kalibotan wala man makakita ni makaila niini. Kamo nakaila niini, kay kini nagpuyo man uban kaninyo ug anaa kaninyo.” Lakip sa ubang mga butang, kana nga “magtatabang” mahimong usa ka magtutudlo, kay si Kristo misaad: “Ang magtatabang, ang balaang espiritu, nga ipadala sa Amahan pinaagi sa akong ngalan, magtudlo ra kaninyo sa tanang mga butang ug magpahinumdom kaninyo sa tanang gipamulong ko kaninyo.” Ang espiritu nagpamatuod usab bahin kang Kristo, ug iyang gipasaligan ang iyang mga tinun-an: “Alang sa inyong kaayohan nga ako molakaw. Kay kon dili ako molakaw, dili moanha kaninyo ang magtatabang; apan kon ako molakaw, akong ipadala siya kaninyo.”​—Juan 14:16, 17, 26; 15:26; 16:7.a

10. Sa unsang mga paagi napamatud-ang usa ka magtatabang ang balaang espiritu?

¹⁰ Gikan sa langit, gibubo ni Jesus ang gisaad nga balaang espiritu diha sa iyang mga sumusunod sa adlaw sa Pentekostes 33 K.P. (Buhat 1:4, 5; 2:1-11) Ingong magtatabang, gihatagan sila sa espiritu ug dugang nga pagsabot sa kabubut-on ug katuyoan sa Diyos ug maoy nagbukas sa iyang matagnaong Pulong ngadto kanila. (1 Corinto 2:10-16; Colosas 1:9, 10; Hebreohanon 9:8-10) Kana nga magtatabang naghatag usab ug gahom sa mga tinun-an ni Jesus aron mahimong mga saksi sa tanang bahin sa yuta. (Lucas 24:49; Buhat 1:8; Efeso 3:5, 6) Karong adlawa, ang balaang espiritu makatabang sa usa ka dedikadong Kristohanon nga motubo diha sa kahibalo kon iyang pahimuslan ang espirituwal nga mga tagana nga gihimo sa Diyos pinaagi sa “matinumanon ug maalamong ulipon.” (Mateo 24:45-47) Ang espiritu sa Diyos makataganag tabang pinaagi sa paghatag sa kaisog ug kalig-on nga gikinahanglan sa pagpamatuod ingong usa sa mga alagad ni Jehova. (Mateo 10:19, 20; Buhat 4:29-31) Hinunoa, ang balaang espiritu motabang usab sa katawhan sa Diyos sa ubang mga paagi.

“Uban sa mga Pag-agulo nga Dili Mabungat”

11. Kon daw grabe ang pagsulay, unsay angay buhaton sa usa ka Kristohanon?

¹¹ Kon gihasol ang Kristohanon sa pagsulay nga daw grabe kaayo, unsay angay niyang buhaton? Aw, pag-ampo alang sa balaang espiritu, ug pasagdi nga himoon niini ang iyang buluhaton! “Ang espiritu motabang usab sa atong mga kahuyangan,” miingon si Pablo, “kay kita dili man makamaong moampo sa hustong inampoan, apan ang espiritu mismo mao ang mangamuyo alang kanato uban sa mga pag-agulo nga dili mabungat. Apan siya nga nagasusi sa mga kasingkasing sa mga tawo nahibalo sa kahulogan sa espiritu, tungod kay nagapangayo man kini sumala sa kabubut-on sa Diyos alang sa mga balaan.”​—Roma 8:26, 27.

12, 13. (a) Sa unsang paagi ang Roma 8:26, 27 ikadapat ngadto sa mga pag-ampo nga gitanyag ilabina sa masulayong mga kahimtang? (b) Unsay gihimo ni Pablo ug sa iyang mga kauban dihang nag-antos sila ug grabe nga kalisod sa distrito sa Asia?

¹² Kadtong mga balaan nga alang kanila nangaliyupo ang espiritu sa Diyos mao ang dinihogang mga sumusunod ni Jesus, nga may langitnong paglaom. Apan kon kaha ikaw adunay langitnong pagtawag o usa ka yutan-ong paglaom, ingong Kristohanon ikaw may tabang pinaagi sa balaang espiritu sa Diyos. Si Jehova usahay mohatag ug direktang tubag sa usa ka espisipikong pag-ampo. May mga panahon, hinunoa, nga tingali naguol ka kaayo nga dili ka makaarang sa pagpahayag sa imong mga pagbati ug nangamuyo lamang kang Jehova pinaagi sa wala mabungat nga mga pag-agulo. Sa pagkatinuod, tingali wala ka mahibalo kon unsa ang labing maayo alang kanimo ug tingali nangayo sa sayop nga butang gawas kon ikaw moampo alang sa balaang espiritu. Ang Diyos nahibalo nga maoy imong tinguha nga matuman ang iyang kabubut-on, ug siya nahibalo kon unsa gayod ang imong gikinahanglan. Dugang pa, pinaagi sa iyang balaang espiritu, iyang gipahinabo nga marekord ang daghang mga pag-ampo diha sa iyang Pulong, ug may kalabotan kining mga pag-ampoa sa masulayong mga situwasyon. (2 Timoteo 3:16, 17; 2 Pedro 1:21) Busa, malantaw ni Jehova ang pipila ka pagbati sa maong dinasig nga mga pag-ampo ingong mga ekspresyon nga maoy imong gustong himoon ingong usa sa iyang mga alagad, ug siya makahimo sa pagtubag sa imong mga pag-ampo alang kanimo.

¹³ Si Pablo ug ang iyang mga kauban tingali wala mahibalo kon unsay iampo dihang nag-antos sa kasakit sa distrito sa Asia. Kay ‘ilalom sa grabeng kalisod nga dili nila maantos, ilang gibati nga nadawat na nila ang hukom sa kamatayon.’ Apan mihangyo sila nga mangamuyo ang uban alang kanila ug misalig sa Diyos, nga makabanhaw sa mga patay, ug iyang giluwas sila. (2 Corinto 1:8-11) Pagkamakapalipay nga si Jehova nga Diyos mamati ug motubag sa mga pag-ampo sa iyang matinumanong mga alagad!

14. Unsa nga kaayohan ang mahimong mosangpot kon itugot ni Jehova nga magpadayon ang pagsulay sa dugaydugay nga panahon?

¹⁴ Ang katawhan sa Diyos gihasol kanunay sa mga pagsulay ingong usa ka organisasyon. Sumala sa gipadayag sa sinugdan, sila gilutos sa panahon sa Gubat sa Kalibotan I. Bisan wala pa nila mabatoni niadto ang tin-aw nga pagsabot sa ilang baroganan ug busa wala mahibalo kon unsa gayoy iampo, ang Pulong ni Jehova nasudlan sa matagnaong mga pag-ampo nga iyang gitubag alang kanila. (Salmo 69, 102, 126; Isaias, kapitulo 12) Apan komosta kon itugot ni Jehova nga magpadayon sa dugaydugay nga panahon ang pagsulay? Kini mahimong mosangpot ug pagpamatuod, tingali mopalihok sa uban sa pagdawat sa kamatuoran, ug nagahatag sa mga Kristohanon ug higayon sa pagpakita sa inigsoong gugma pinaagi sa pag-ampo o pagtabang sa nag-antos nga kaubang mga magtutuo. (Juan 13:34, 35; 2 Corinto 1:11) Timan-i nga si Jehova nagatultol sa iyang katawhan pinaagi sa iyang balaang espiritu, nagahimo sa labing maayo alang kanila, ug nagaatiman kanunay sa mga butang sa paagi nga mopasidungog ug mopabalaan sa iyang ngalan.​—Exodo 9:16; Mateo 6:9.

Ayaw Gayod Pagsakita ang Espiritu

15. Ang mga Kristohanon makasalig sa espiritu ni Jehova nga mobuhat ug unsa alang kanila?

¹⁵ Busa, kon alagad ka ni Jehova, pag-ampo alang sa balaang espiritu sa panahon sa mga pagsulay ug sa ubang mga panahon. Unya tinoa nga sundon mo ang pagtultol niini, kay si Pablo misulat: “Ayaw ninyo pagsakita ang balaang espiritu sa Diyos, nga niini gikatimrihan na kamo alang sa adlaw sa pagtubos.” (Efeso 4:30) Ang espiritu sa Diyos niadto ug karon maoy usa ka timri, o usa ka ‘timaan sa butang nga umaabot,’ alang sa matinumanon dinihogang mga Kristohanon​—nga mao, ang dili-mamatay nga kinabuhi sa langit. (2 Corinto 1:22; Roma 8:15; 1 Corinto 15:50-57; Pinadayag 2:10) Ang dinihogang mga Kristohanon ug kadtong may yutan-ong paglaom makasalig sa espiritu ni Jehova nga mohimog daghan alang kanila. Kini mahimong motultol kanila diha sa usa ka kinabuhi sa pagkamatinumanon ug motabang kanila aron makalikay sa makasasalang mga buhat nga mosangpot sa pagkawala sa pag-uyon sa Diyos, pagkawala sa iyang balaang espiritu, ug kapakyasan sa pagbaton ug kinabuhing dayon.​—Galacia 5:19-21.

16, 17. Sa unsang paagi mapasakit sa usa ka Kristohanon ang espiritu?

¹⁶ Sa unsang paagi ang usa ka Kristohanon nagapasakit sa espiritu, nahibalo man siya o wala? Aw, gigamit ni Jehova ang iyang espiritu sa pagpalambo sa panaghiusa ug sa pagtudlo ug may katakos nga mga lalaki diha sa kongregasyon. Busa, kon ang usa ka membro sa kongregasyon nagabagolbol batok sa tinudlong mga ansiano, nagapasa ug makadaot nga tabi, ug uban pa, siya wala magsunod sa mga pagtultol sa espiritu sa Diyos alang sa kalinaw ug panaghiusa. Sa katibuk-ang paagi, iyang gisakit ang espiritu.​—1 Corinto 1:10; 3:1-4, 16, 17; 1 Tesalonica 5:12, 13; Judas 16.

¹⁷ Sa nagsulat ngadto sa mga Kristohanon sa Efeso, si Pablo nagpasidaan batok sa mga kiling sa kabakakan, dugay nga pagkasuko, pagpangawat, dili-angay nga sinultihan, hingaping kaikag sa pakighilawas, makauulaw nga paggawi, ug mahilas nga komedya. Kon tugotan sa usa ka Kristohanon nga siya mapadpad ngadto niining mga butanga, siya nagabatok sa tambag sa Bibliya nga dinasig-sa-espiritu. (Efeso 4:17-29; 5:1-5) Oo, ug sa usa ka sukod iyang gisakit ang espiritu sa Diyos.

18. Unsay mahimong mahitabo ngadto ni bisan kinsang Kristohanon nga mosugod sa pagsalikway sa tambag sa dinasig-sa-espiritu nga Pulong sa Diyos?

¹⁸ Sa pagkamatuod, ang bisan kinsang Kristohanon nga mosugod sa pagsalikway sa tambag sa dinasig-sa-espiritu nga Pulong ni Jehova tingali mosugod sa pag-ugmad ug mga tinamdan o mga kinaiya nga mosangpot sa tinuyo nga sala ug pagkawala sa balaang pag-uyon. Bisag siya tingali karon walay gihimong kasal-anan, mahimong nagapadulong na siya nianang direksiyona. Ang maong Kristohanon nga nagabatok sa pagtultol sa espiritu nagpasakit niana. Sa ingon usab iyang gisuklan ug gisakit si Jehova, ang Tuboran sa balaang espiritu. Wala gayoy mahigugmaon sa Diyos ang buot mobuhat niana!

Padayon sa Pag-ampo Alang sa Balaang Espiritu

19. Nganong ang katawhan ni Jehova ilabinang nagkinahanglan sa iyang espiritu karong adlawa?

¹⁹ Kon usa ikaw ka alagad ni Jehova, padayon sa pag-ampo alang sa iyang balaan nga espiritu. Ilabina niining “kataposang mga adlaw,” uban sa kritikal nga panahon niini nga malisod sagubangon, nga nagkinahanglan ang mga Kristohanon sa tabang sa espiritu sa Diyos. (2 Timoteo 3:1-5) Ang Yawa ug ang iyang mga demonyo, nga gipalayas gikan sa langit ug karon ania na sa kasilinganan sa yuta, nanghasi batok sa organisasyon ni Jehova. Busa, karon sukad masukad, ang katawhan sa Diyos nagkinahanglan sa iyang balaang espiritu sa pagtultol, o paggiya, kanila aron ilang maantos ang mga kalisod ug paglutos.​—Pinadayag 12:7-12.

20, 21. Nganong sundon ang pagtultol sa Pulong sa Diyos, sa espiritu, ug organisasyon?

²⁰ Pakita kanunay ug apresasyon sa tabang nga ginatagana ni Jehova nga Diyos pinaagi sa iyang balaang espiritu. Sunda ang pagtultol sa iyang dinasig-sa-espiritu nga Pulong, ang Bibliya. Kooperar sa bug-os uban sa tinultolan-sa-espiritu nga yutan-ong organisasyon. Ayaw gayod itugot nga mahitipas ka diha sa usa ka dili-kasulatanhong dalan nga sama ra nga nagsakit sa balaan nga espiritu, kay mahimong motultol kini sa ulahi sa pagkamawad-an niana ug busa sa espirituwal nga kadaot.​—Salmo 51:11.

²¹ Ang pagkatinultolan sa espiritu ni Jehova mao lamang ang bugtong paagi sa pagpahimuot kaniya ug mabatonan ang usa ka malinawon, malipayong kinabuhi. Hinumdomi, usab, nga gitawag ni Jesus ang balaan nga espiritu nga usa ka “magtatabang,” o “tiglipay.” (Juan 14:16, potnot) Pinaagi niana, gilipay sa Diyos ang mga Kristohanon ug naglig-on kanila sa pag-atubang sa ilang mga pagsulay. (2 Corinto 1:3, 4) Gihatagan sa espiritu ug gahom ang katawhan ni Jehova sa pagsangyaw sa maayong balita ug ginatabangan sila sa paghinumdom sa mga punto sa Kasulatan nga gikinahanglan aron makahatag ug maayong pagpamatuod. (Lucas 12:11, 12; Juan 14:25, 26; Buhat 1:4-8; 5:32) Pinaagi sa pag-ampo ug sa pagtultol sa espiritu, ang mga Kristohanon makasagubang sa mga pagsulay sa pagtuo uban sa langitnong kaalam. Busa, diha sa tanang mga kahimtang sa kinabuhi, sila nagapadayon sa pag-ampo alang sa balaang espiritu sa Diyos. Ingong sangpotanan, ang espiritu ni Jehova nagatultol sa iyang katawhan.

[Footnote]

Unsay Imong mga Tubag?

◻ Nganong mag-ampo alang sa balaang espiritu ni Jehova?

◻ Sa unsang paagi ang balaang espiritu maoy usa ka magtatabang?

◻ Unsay kahulogan sa pagsakit sa espiritu, ug sa unsang paagi kita makalikay sa pagbuhat niana?

◻ Nganong magpadayon sa pag-ampo alang sa balaang espiritu ug mosunod sa pagtultol niini?

[Hulagway sa panid 15]

Sama sa usa ka mahigugmaong amahan nga nagahatag ug maayong mga butang sa iyang anak, sa ingon si Jehova nagahatag sa iyang balaang espiritu sa iyang mga alagad nga moampo alang niana

[Hulagway sa panid 17]

Nahibalo ka ba kon sa unsang paagi nagapangaliyupo ang espiritu sa Diyos alang sa mainampoong mga Kristohanon?