Ang Pagkanaa sa Mesiyas ug Iyang Pagmando

“Kining maong Jesus nga gidawat sa taas gikan kaninyo ngadto sa langit mobalik ra unya sa paagi nga sama sa inyong nakita sa iyang pag-adto sa langit.”​—BUHAT 1:11.

1, 2. (a) Giunsa paglipay sa duha ka manulonda ang mga apostol ni Jesus sa diha nga mikayab siya sa langit? (b) Unsang mga pangutana ang gipatungha sa kalaoman sa pagbalik ni Kristo?

NAPULOG-USA ka tawo nagtindog sa silangang bakilid sa Bukid sa mga Olibo, nga nagsud-ong sa langit. Sa pila lang ka gutlo nga miagi si Jesu-Kristo nikayab gikan sa ilang taliwala, nga nagkahanap ang iyang panagway hangtod gisalipdan kadto sa panganod. Sa mga katuigan nga sila nag-uban-uban kaniya, kining mga tawhana nakakitag daghan nga pamatuod nga siya mao gayod ang Mesiyas; nakaagom gani silag kaguol sa kasingkasing sa iyang pagkamatay ug kalipay sa iyang pagkabanhaw. Karon wala na siya.

² Duha ka manulonda takulahaw nga mitungha ug misulti niining makapalipay nga mga pulong: “Mga tawong Galileanhon, nganong nagatindog kamo nga nagatutok sa langit? Kining maong Jesus nga gidawat sa itaas gikan kaninyo ngadto sa langit mobalik ra unya sa paagi nga sama sa inyong nakita sa iyang pag-adto sa langit.” (Buhat 1:11) Pagkamapasaligon​—ang pagkayab ni Jesus sa langit wala magpasabot nga wala na siya mabalaka sa yuta ug sa katawhan! Sa kaatbang, si Jesus mobalik. Walay duhaduha nga ang mga apostoles nahupong sa paglaom tungod nianang mga pulonga. Minilyong mga tawo karong adlawa nagahatag usab ug dakong importansiya sa saad nga mobalik si Kristo. Gitawag kana sa pipila nga “Ikaduhang Pag-anhi” o “Pag-abot.” Hinuon, kadaghanan morag nalibog kon unsay tinuod nga kahulogan sa pagbalik ni Kristo. Sa unsang paagi si Kristo mobalik? Kanus-a? Ug sa unsang paagi apektado niini ang atong mga kinabuhi karong adlawa?

Ang Paagi sa Pagbalik ni Kristo

3. Unsay gituohan sa daghang tawo mahitungod sa pagbalik ni Kristo?

³ Sumala sa librong An Evangelical Christology, “ang ikaduhang pag-anhi o pagbalik ni Kristo (parousia) nagatukod sa gingharian sa Diyos, sa pangataposan, sa dayag nga paagi, ug hangtod sa kahangtoran.” Kaylap gituohan nga ang pagbalik ni Kristo dayag nga makita, sa literal makita sa tanang anaa sa planeta. Sa pagpaluyo sa maong hunahuna, ipunting sa daghan ang Pinadayag 1:7, nga mabasa: “Tan-awa! Siya moanhi uban sa mga panganod, ug ang tanang mata makakita kaniya, ug kadtong nagdughang kaniya.” Apan kini bang bersikuloha kinahanglang sabton nga literal?

4, 5. (a) Giunsa nato pagkasayod nga ang Pinadayag 1:7 wala magkahulogang literal? (b) Sa unsang paagi ang kaugalingong mga pulong ni Jesus nagpamatuod niining pagsabota?

⁴ Hinumdomi, ang basahong Pinadayag gipahayag “diha sa mga ilhanan.” (Pinadayag 1:1) Busa, kining kasulatana maoy simboliko gayod; kon buot sabton, sa unsang paagi “kadtong nagdughang kaniya” makakita sa pagbalik ni Kristo? Patay na sila sulod sa duolag 20 ka siglo! Dugang pa, ang mga manulonda miingon nga si Kristo mobalik “sa paagi nga sama” sa iyang pagbiya. Aw, sa unsang paagi siya mibiya? Uban ba sa minilyon nga nanan-aw? Dili, pila lang ka matinuohon ang nakakita sa hitabo. Ug sa diha nga ang mga manulonda nakigsulti kanila, ang mga apostol ba sa literal nakakita sa pagpaingon ni Kristo sa langit? Wala, usa ka panganod misalipod kang Jesus mao nga wala siya makita. Wala madugay human niadto, misulod gayod siya ngadto sa espirituhanong mga langit ingong espiritu, nga dili makita sa mga mata sa tawo. (1 Corinto 15:50) Busa, sa labing dako, ang mga apostol nakakita lang sa sinugdanan sa pagkayab ni Kristo; wala na sila makakita sa pagkatapos niadto, sa iyang pagbalik ngadto sa langit sa atubangan sa iyang Amahan, si Jehova. Sila nakakita lang niadto pinaagi sa ilang mga mata sa pagtuo.​—Juan 20:17.

⁵ Ang Bibliya nagatudlo nga si Jesus mobalik sa sama gayong paagi. Si Jesus mismo miingon sa dayon na sa iyang pagkamatay: “Hamubo na lamang ang panahon ug ang kalibotan dili na makakita kanako.” (Juan 14:19) Siya miingon usab nga “ang gingharian sa Diyos dili moabot nga may talagsaong pagkadayag.” (Lucas 17:20) Nan, sa unsang diwa ang ‘tanang mata makakita kaniya’? Sa pagtubag, gikinahanglan una nato ang tin-awng pagsabot sa pulong nga gigamit ni Jesus ug sa iyang mga sumusunod maylabot sa iyang pagbalik.

6. (a) Nganong ang mga pulong sama sa “pagbalik,” “pag-abot,” “adviento,” ug “pag-anhi” dili igo nga mga hubad sa Gregong pulong pa·rou·siʹa? (b) Unsay nagpakita nga ang pa·rou·siʹa, o “pagkanaa,” molungtad ug dugay pa kay sa yanong kadiyut nga hitabo?

⁶ Ang kamatuoran mao, labaw pa ang ginahimo ni Kristo kay sa yanong “pagbalik.” Kanang pulonga, sama sa “pag-anhi,” “pag-abot,” o “adviento,” nagpasabot sa usa ka hitabo sa kadiyut nga gutlo sa panahon. Apan ang Gregong pulong nga gigamit ni Jesus ug sa iyang mga sumusunod dako pag kahulogan. Ang pulong mao ang pa·rou·siʹa, nga sa literal nagkahulogang “pagka naa sa tupad” o usa ka “presensiya.” Kadaghanang eskolar mouyon nga kining pulonga nagsakop dili lang sa usa ka pag-abot kondili hasta sa mosunod nga pagkanaa​—sama sa opisyal nga pagduaw sa usa ka harianong persona. Ang maong pagkanaa dili lang makadiyut nga hitabo; kini usa ka espesyal nga yugto, usa ka tiniman-ang hugna sa panahon. Sa Mateo 24:37-39, si Jesus miingon nga “ang pagkanaa [pa·rou·siʹa] sa Anak sa tawo” mahisama sa “mga adlaw ni Noe” nga misangko sa Lunop. Si Noe nagtukod sa arka ug nagpasidaan sa mga daotan sulod sa tinagpulo ka katuigan una pa sa pag-abot sa Lunop ug paglaglag niadtong daotang sistema sa kalibotan. Busa, ang dili-makitang pagkanaa ni Kristo susamang molungtad sa usa ka yugto sa tinagpulo ka katuigan sa dili pa kini mosangko sa usa ka dakong kalaglagan.

7. (a) Unsay nagpamatuod nga ang pa·rou·siʹa dili makita sa mga mata sa tawo? (b) Sa unsang paagi ug kanus-a matuman ang mga kasulatan nga nagabatbat sa pagbalik ni Kristo ingong makita sa “tanang mata”?

⁷ Sa walay duhaduha, ang pa·rou·siʹa dili makita sa literal nga mga mata sa tawo. Kon mao pa, nganong si Jesus migugol ug daghan kaayong panahon, sumala sa ato unyang makita, sa paghatag sa iyang mga sumusunod ug usa ka ilhanan sa pag-abag kanila sa pag-ila sa maong pagkanaa?a Hinuon, sa diha nga si Kristo moabot aron sa paglaglag sa tibuok-kalibotan nga sistema ni Satanas, ang kamatuoran sa iyang pagkanaa bug-os madayag sa tanan. Maoy nianang panahona nga “ang tanang mata makakita kaniya.” Bisan ang mga kaaway ni Jesus makaila, sa ilang kaguol, nga ang paghari ni Kristo maoy tinuod.​—Tan-awa ang Mateo 24:30; 2 Tesalonica 2:8; Pinadayag 1:5, 6.

Kanus-a Kini Magsugod?

8. Unsang hitabo ang nagtimaan sa sinugdanan sa pagkanaa ni Kristo, ug diin kini nahitabo?

⁸ Ang pagkanaa sa Mesiyas magsugod uban sa usa ka hitabo nga magatuman sa gisublisubling tema sa Mesiyasnong mga tagna. Siya gipurongpurongan ingong Hari sa langit. (2 Samuel 7:12-16; Isaias 9:6, 7; Ezekiel 21:26, 27) Si Jesus mismo nagpakitang ang iyang presensiya nalambiggit sa iyang pagkahari. Sa daghang sambingay, gipanig-ingon niya ang iyang kaugalingon ngadto sa usa ka agalon nga mibiya sa iyang panimalay ug mga ulipon, nga mipanaw ug hataas nga panahon paingon sa usa ka “layong yuta” diin siya magadawat ug “harianong gahom.” Mihatag siyag usa ka ingong sambingay ingong bahin sa iyang tubag sa pangutana sa iyang mga apostol mahitungod sa kon kanus-a magsugod ang iyang pa·rou·siʹa; ang lain iyang gihatag tungod kay “sila naghunahuna nga ang gingharian sa Diyos ipadayag dihadiha.” (Lucas 19:11, 12, 15; Mateo 24:3; 25:14, 19) Busa sa panahon nga dinhi siya sa yuta ingong tawo, ang pagpurongpurong kaniya maoy layo pa, nga mahitabo sa “layong yuta” nga mao ang langit. Kanus-a ba kana mahitabo?

9, 10. Unsay ebidensiya nga si Kristo karon nagamando na sa langit, ug kanus-a niya sugdi ang iyang paghari?

⁹ Sa diha nga ang mga tinun-an ni Jesus nangutana kaniya: “Unsa ba unya ang ilhanan sa imong pagkanaa ug sa konklusyon sa sistema sa mga butang?” Si Jesus mitubag pinaagi sa paghatag kanilag detalyadong kabatbatan nianang umaabot nga panahon. (Mateo, kapitulo 24; Marcos, kapitulo 13; Lucas, kapitulo 21; tan-awa usab ang 2 Timoteo 3:1-5; Pinadayag, kapitulo 6.) Ang maong ilhanan katumbas sa usa ka detalyadong hulagway sa usa ka samok nga yugto. Kini usa ka panahon nga tiniman-an sa mga gubat tali sa kanasoran, nag-usbaw nga krimen, nagkadaot pamilyahanong kinabuhi, mga epidemya sa sakit, mga kagutmanan, ug mga linog​—dili ingong mga sulirang lokal kondili ingong lukop-sa-kalibotang mga krisis. Sinati ba kining paminawon? Ang matag adlaw nga molabay nagpamatuod nga ang ika-20ng siglo sa hingpit haom sa kabatbatan ni Jesus.

¹⁰ Mouyon ang mga historyano nga ang 1914 usa ka punto sa kausaban sa kasaysayan sa tawo, usa ka tuig nga sukaranan nga tapos niana daghan niining mga sulirana nagsugod sa pagkadili na makontrolar, nga miusbaw sa tibuok-kalibotang sukod. Oo, ang pisikal nga mga panghitabo sa kalibotan ingong katumanan sa tagna sa Bibliya tanan nagpunting sa 1914 ingong ang tuig sa dihang si Jesus nagsugod sa pagmando ingong Hari sa langit. Dugang pa, usa ka tagna sa Daniel kapitulo 4 nagtaganag kronolohikanhong ebidensiya nga mohatod kanato sa samang tuig mismo​—1914—​ingong ang panahon sa dihang ang tinudlong Hari ni Jehova mosugod sa iyang pagmando.b

Nganong Usa ka Panahon sa mga Kasamok?

11, 12. (a) Nganong lisod sa pipila ang pagtuo nga si Kristo nagamando na sa langit pagkakaron? (b) Sa unsang paagi ikailustrar nato kon unsay nahitabo human si Jesus purongpurongi ingong Hari?

¹¹ Apan, ang pila mahibulong, ‘Nganong ang kalibotan samok kaayo kon ang Mesiyas nagamando na sa langit? Dili ba malamposon ang iyang pagmando?’ Makatabang tingali ang usa ka ilustrasyon. Usa ka nasod gimandoan sa usa ka daotang presidente. Nagtukod siyag usa ka hiwi nga sistema uban sa mamandoong impluwensiya nga makaabot sa tanang suok sa yuta. Apan gihimo ang usa ka eleksiyon; nakadaog ang usa ka maayong tawo. Unsay mahitabo karon? Sama sa kahimtang sa pila ka demokratikanhong kayutaan, mosunod ang pila ka bulan nga yugto sa kausaban sa dili pa inagurahan ang bag-ong presidente. Unsay panglihok nianang duha ka tawo sa maong yugto? Ang maayong tawo dihadiha moatake ba ug mobungkag sa tanang kadaotan nga gipahinabo sa iyang gipulihan sa tibuok nasod? Dili ba, hinunoa, hatagan niyag unang pagtagad ang kaulohang siyudad, nga tukoron ang usa ka bag-ong kabinete ug magpuwera sa hiwing mga kasuod ug mga dumadapig sa kanhing presidente? Sa maong panahon, inigkabaton niyag bug-os nga awtoridad, siya makadumala gikan sa hinlo, episyenteng sentro sa gahom. Mahitungod sa hiwi nga presidente, dili ba niya pahimudsan ang mubong panahon nga nahibilin kaniya sa pagkuha gikan sa nasod sa tanang supak-balaod nga ganansiya nga iyang makuha sa dili pa siya kawad-an sa tanang gahom?

¹² Sa pagkamatuod, susama niini ang pa·rou·siʹa ni Kristo. Ang Pinadayag 12:7-12 nagpakita nga sa dihang si Kristo gihimong Hari sa langit, gitambog una niya si Satanas ug ang mga demonyo gikan sa langit, sa ingon naghinlo sa dapit sa Iyang kagamhanan. Kay nakaagom sa maong dugay-nang-gipaabot nga kapildihan, unsay panggawi ni Satanas sulod sa “hamubong panahon” sa dili pa gamiton ni Kristo ang bug-os niyang awtoridad dinhi sa yuta? Sama niadtong hiwi nga presidente, siya mosulay sa pagbaton sa tanan kutob sa iyang mahimo gikan niining daang sistema. Siya wala mag-agpas ug salapi, ang iyang giagpas mao ang tawhanong mga kinabuhi. Buot niyang ipahilayo ang daghang tawo gikan kang Jehova ug sa iyang nagamandong Hari kutob sa Iyang mahimo.

13. Giunsa pagpakita sa Kasulatan nga ang sinugdanan sa pagmando ni Kristo maoy usa ka samok nga panahon dinhi sa yuta?

¹³ Nan, dili katingad-ang ang sinugdanan sa pagmando sa Mesiyas nagkahulogan sa usa ka panahon sa “kaalaotan sa yuta.” (Pinadayag 12:12) Sa susama, ang Salmo 110:1, 2, 6 nagpakita nga ang Mesiyas nagsugod sa iyang pagmando ‘taliwala sa iyang mga kaaway.’ Sa ulahi lamang nga siya sa bug-os magdugmok sa “kanasoran,” uban ang tanang bahin sa hiwing sistema ni Satanas, hangtod sa paghikalimot!

Sa Diha nga ang Mesiyas Magamando sa Yuta

14. Unsay maarangang buhaton sa Mesiyas human niya laglaga ang daotang sistema ni Satanas?

¹⁴ Human sa iyang paglaglag sa sistema ni Satanas ug sa tanang nagapaluyo niini, ang Mesiyasnong Hari, si Jesu-Kristo, sa kataposan makaarang sa pagtuman sa kahibulongang mga tagna sa Bibliya nga nagbatbat sa iyang Milenyong Paghari. Ang Isaias 11:1-10 nagatabang kanato sa pagsabot kon unsa unyang matanga sa magmamando ang Mesiyas. Ang bersikulo 2 nagtug-an kanato nga siya magbaton “sa espiritu ni Jehova . . . , sa espiritu sa kinaadman ug sa pagsabot, sa espiritu sa tambag ug sa kagahom.”

15. Unsa unyay kahulogan sa ‘espiritu sa kagahom’ sa Mesiyasnong pagmando?

¹⁵ Tagda kon unsay kahulogan sa ‘espiritu sa kagahom’ sa pagmando ni Jesus. Sa dinhi pa siya sa yuta, siya nagbaton ug usa ka sukod sa kagahom gikan kang Jehova, nga nakapaarang niya sa paghimog mga milagro. Ug siya nagpakitag kinasingkasing nga tinguha sa pagtabang sa mga tawo, nga miingon, “Buot ko.” (Mateo 8:3) Apan ang iyang mga milagro niadtong mga adlawa mao lamay pasiunang pasiklap kon unsay iyang buhaton sa dihang magamando gikan sa langit. Si Jesus mohimog mga milagro sa tibuok kalibotan nga sukod! Ang mga masakiton, mga buta, mga bungol, mga piang, ug bakol nga katawhan pagaayohon sa tanang panahon. (Isaias 35:5, 6) Ang dagayang pagkaon, nga iangay-angay sa pag-apod-apod, magtapos sa kagutmanan sa walay kataposan. (Salmo 72:16) Komosta ang dili-maihap nga minilyong anaa sa lubnganan nga sa kahimuot hinumdoman sa Diyos? Ang “kagahom” ni Jesus maglakip sa gahom sa pagbanhaw kanila, nga ang matag usa hatagan ug kahigayonan sa pagkinabuhi sa walay kataposan sa Paraiso! (Juan 5:28, 29) Apan, bisan pa nianang tanang kagahom, ang Mesiyasnong Hari sa kanunay mahimong mapaubsanon kaayo. Siya makakaplag ug “kalipay . . . diha sa pagkahadlok kang Jehova.”​—Isaias 11:3.

16. Unsang matanga unya sa Maghuhukom ang Mesiyasnong Hari, ug unsay kalainan niana sa rekord sa tawhanong mga maghuhukom?

¹⁶ Ang maong Hari mahimo usab nga usa ka hingpit nga Maghuhukom. Siya “dili magahukom sumala sa makita sa iyang mga mata, ni magabadlong sumala sa butang nadunggan sa iyang mga igdulongog.” Kinsang tawhanong maghuhukom, sa kagahapon o sa karon, ang mabatbat sa ingong paagi? Bisan ang usa ka maalamon kaayong tawo makahukom lamang pinasukad sa iyang makita ug madungog, nga magagamit sa bisan unsang kaalam o pagsabot nga tingali iyang naangkon. Busa, ang mga maghuhukom ug mga hurado niining daang kalibotan tingali mabuyo o malibog sa inabtik hiwing pangatarongan, mga pakalaki diha sa nga korte, o nagkasumpaking ebidensiya. Sagad mga dato ug gamhanan lamang ang makaabot ug epektibong depensa, nga sa pagkatinuod nagapalit sa hustisya. Dili kana mahitabo ubos sa Mesiyasnong Maghuhukom! Mabasa niya ang mga kasingkasing. Walay makaikyas sa iyang pagmatikod. Ang hustisya, nga timplado sa gugma ug kaluoy, dili na unya mapalit. Sa tanang panahon kana magalungtad.​—Isaias 11:3-5.

Kon sa Unsang Paagi Apektado Ka sa Iyang Pagmando

17, 18. (a) Unsang masilakong hulagway sa umaabot sa katawhan ang gipadayag diha sa Isaias 11:6-9? (b) Kang kinsa mapadapat ilabina kining tagnaa, ug nganong ingon man? (c) Sa unsang paagi kining tagnaa magbaton ug literal nga katumanan?

¹⁷ Hisabtan, ang pagmando sa Mesiyas adunay dakong impluwensiya diha sa mga ginsakpan niini. Kini magpausab sa mga tawo. Ang Isaias 11:6-9 nagapakita unsa ka mabug-oson ang maong mga kausaban. Kining tagnaa nagapadayag sa usa ka makapatandog-sa-balatian nga hulagway sa peligroso, tumutukob nga mga hayop​—mga uso, mga lobo, mga leopardo, mga leyon, mga kobra—​nga kauban sa dili-makadaot aghop nga kahayopan ug bisan sa kabataan. Apan ang mga tumutukob dili na peligroso! Ngano? Ang bersikulo 9 nagatubag: “Sila dili magadaot o magalaglag sa tibuok kong bukid nga balaan; tungod kay ang yuta mapuno sa kahibalo kang Jehova sama sa katubigan nga nagatabon sa dagat mismo.”

¹⁸ Hinuon, ang “kahibalo kang Jehova” walay epekto diha sa literal nga kahayopan; busa kining mga bersikuloha mapadapat ilabina sa katawhan. Ang pagmando sa Mesiyas nagapasiugda sa tibuok-yutang programa sa pag-edukar, nga magatudlo sa katawham mahitungod kang Jehova ug sa iyang mga dalan, nga magatudlo sa tanan nga tagdon ang ilang isigkatawo uban ang gugma, pagtahod, ug dignidad. Sa umaabot nga Paraiso, ang Mesiyas milagrosong magtuboy sa katawhan ngadto sa lawasnon ug moral nga kahingpitan. Ang tumutukob, hayopnong mga taras nga nagadaot sa dili-hingpit tawhanong kinaiyahan mahanaw na. Sa literal nga diwa, usab, ang katawhan makigdait na sa kahayopan​—sa kataposan!​—Itandi ang Genesis 1:28.

19. Sa unsang paagi ang pagmando sa Mesiyas nagaapektar sa mga kinabuhi sa katawhan niining kataposang mga adlaw?

¹⁹ Apan, hinumdomi nga ang Mesiyas nagamando na karon. Bisan karon, ang mga sakop sa iyang Gingharian nagatuon sa pagpuyo sa kalinaw, nga nagatuman sa Isaias 11:6-9 sa usa ka diwa. Dugang pa, sulod sa halos 80 ka tuig, ginatuman na ni Jesus ang Isaias 11:10: “Mahitabo gayod nianang adlawa nga ang gamot ni Isai motindog ingong usa ka ilhanan alang sa mga katawhan. Kaniya ang mga nasod modangop nga mausisaon, ug ang iyang pahulayang-dapit mahimong mahimayaon gayod.” Ang katawhan sa tanang nasod nagadangop sa Mesiyas. Ngano? Tungod kay sukad siya nagsugod sa pagmando, siya “nagatindog ingong usa ka ilhanan.” Siya nagapahibalo sa iyang pagkanaa sa tibuok kalibotan pinaagi sa dako kaayong programa sa pag-edukar nga gibatbat sa itaas. Ngani, si Jesus mitagna nga ang buluhatong pagwali sa tibuok yuta mahimong usa ka talagsaong ilhanan sa iyang pagkanaa sa dili pa ang kalaglagan niining daang sistema.​—Mateo 24:14.

20. Unsang tinamdan ang pagalikayan sa tanang ginsakpan sa pagmando sa Mesiyas, ug ngano?

²⁰ Busa ang pagkanaa ni Kristo nga may Harianong gahom dili halayo, pangagpas lamang nga butang, nga usa lamang ka ulohang gilantugian sa mga teologo. Ang iyang pagmando nagaapektar ug nagausab sa mga kinabuhi dinhi sa yuta, sumala sa gitagna ni Isaias nga himoon niini. Si Jesus nakadanig minilyong ginsakpan alang sa iyang Gingharian gikan niining dunot nga sistema sa kalibotan. Ikaw ba usa sa maong ginsakpan? Nan pag-alagad uban sa bug-os nga kamadasigon ug kalipay nga takos sa atong Magmamando! Tinuod, sayon kaayo nga mapul-an, nga moduyog sa maduhaduhaong patugbaw sa kalibotan: “Hain na ba kining gisaad niyang pagkanaa?” (2 Pedro 3:4) Apan sumala sa giingon mismo ni Jesus, “siya nga moantos hangtod sa kataposan mao ang mamaluwas.”​—Mateo 24:13.

21. Sa unsang paagi kitang tanan makapausbaw sa atong pagpabili sa Mesiyasnong paglaom?

²¹ Ang matag adlaw nga moagi nagpaduol kanato sa dakong adlaw sa diha nga si Jehova magsugo sa Iyang Anak nga ipadayag ang iyang pagkanaa ngadto sa tibuok nga kalibotan. Ayaw gayod itugot nga ang imong paglaom alang nianang adlawa magkahanap. Palandonga ang pagka-Mesiyas ni Jesus ug iyang mga hiyas ingong nagamandong Hari. Sa halalom pamalandong, usab, bahin kang Jehova nga Diyos, ang awtor ug tagmugna sa dakong Mesiyasnong paglaom nga gipahayag diha sa Bibliya. Samtang buhaton nimo kana, sa walay duhaduha mobati ka sa dugang ug dugang sama kang apostol Pablo sa diha nga siya misulat: “Oh pagkalalom sa bahandi ug kaalam ug kahibalo sa Diyos!”​—Roma 11:33.

[Mga footnote]

Unsay Imong Tubag?

◻ Sa unsang paagi si Kristo mobalik?

◻ Giunsa nato pagkasayod nga ang pa·rou·siʹa ni Kristo dili makita ug molungtad ug taastaas nga yugto sa panahon?

◻ Kanus-a magsugod ang pagkanaa ni Kristo, ug giunsa nato pagkasayod niini?

◻ Unsang matang sa langitnong Magmamando ang Mesiyas?

◻ Sa unsang mga paagi ang pagmando ni Kristo nagaapektar sa mga kinabuhi sa iyang mga ginsakpan?

[Hulagway sa panid 15]

Ang paglaom nga si Jesus mobalik dakog kahulogan alang sa iyang matinumanong mga apostol

[Hulagway sa panis 17]

Sa pagmando gikan sa langit, si Jesus mohimog mga milagro sa tibuok-kalibotang sukod

[Credit Line]

Yuta: Pinasikad sa letrato sa NASA