Mga Ansiano—Panugyan Kamo!
SIYA maoy usa ka mapailobon, mapainubsanong tawo, nga may idlot nga panabot sa hustisya nga gitimbangan sa iyang mga kasinatian sa kinabuhi. Busa, kapin sa tulo ka milyong mga lalaki, mga babaye, ug kabataan masaligong midangop kaniya alang sa tambag. Siya naningkamot nga sila dili mapakyas. Gikan sa buntag hangtod sa gabii, siya namati sa ilang mga suliran ug mapailobong gitabangan sila sa pagtino kon sa unsang paagi ang mga kasugoan sa Diyos ikapadapat sa ilang kahimtang. Oo, sa mubo nga panahon, mga 3,500 ka tuig kanhi, ang 12 ka tribo sa Israel nag-inusarang gihukman sa usa ka tawo—si Moises.
Apan, si Jetro, ang ugangan nga lalaki ni Moises, nabalaka. Sa unsang paagi maapas ni Moises ang maong kahimtang? Busa si Jetro miingon: “Dili maayo ang imong gibuhat. Sa pagkamatuod maugtas ka, ikaw ug kini nga katawhan nga uban kanimo, kay kining buluhatona bug-at ra kaayo alang kanimo. Dili ka makahimo niini nga mag-inusara.” (Exodo 18:17, 18) Ang solusyon? Gitambagan ni Jetro si Moises sa pagtugyan sa pipila sa iyang mga kaakohan ngadto sa uban. (Exodo 18:19-23) Pagkamaayong tambag!
Sulod sa Kristohanong kongregasyon karong adlawa, dunay daghang mga ansiano kinsa, sama kang Moises, nagapaningkamot sa pag-atiman nga labaw kay sa ilang mahimo nga nag-inusara. Sila nagaorganisar sa mga tigom ingon man nagapangandam ug unya itanyag ang mga bahin sa programa diha sa usa ka mahusay, epektibong paagi. (1 Corinto 14:26, 33, 40; 1 Timoteo 4:13) Ang mga ansiano usab nagaatiman sa mga panginahanglan sa indibiduwal nga mga membro sa kongregasyon. (Galacia 6:1; 1 Tesalonica 5:14; Santiago 5:14) Sila ang nagapanguna sa labing hinungdanong buluhaton sa pagsangyaw sa maayong balita sa Gingharian. (Mateo 24:14; Hebreohanon 13:7) Sila nagahikay, usab, sa mga suplay sa literatura aron mabatonan sa kongregasyon alang sa pag-apod-apod ngadto sa publiko.
Dugang pa, ang pipila ka ansiano ginahatagan ug mga bahin sa sirkitong asembliya ug sa mga programa sa distritong kombensiyon. Sila nagaalagad sa mga organisasyon sa asembliya ug nagaalagad diha sa hospital liaison committees. Ang uban nagatabang sa pagtukod sa Kingdom Hall. Ug kining tanan maoy dugang sa ilang mga kaakohan sa pamilya ug sa ilang kaugalingong panginahanglan sa pagkaon sa espirituwal. (Itandi ang Josue 1:8; Salmo 110:3; 1 Timoteo 3:4, 5; 4:15, 16.) Sa unsang paagi mabuhat kanang tanan niini nga Kristohanong mga lalaki? Sama kang Moises kinahanglan nila ang tabang. Sila kinahanglang makakat-on sa pagpanugyan. Sa pagkatinuod, ang usa ka tawo nga dili magpanugyan maoy usa ka di-maayong tig-organisar.
Ang Bili sa Pagbansay sa Uban
Adunay dugang mga katarongan alang sa pagtugyan sa mga kaakohan. Diha sa sambingay ni Jesus mahitungod sa mga talento, sa agalon, sa wala pa miggikan sa halayong panaw, nagpatawag sa iyang mga ulipon ug nagtugyan kanila sa nagkalainlaing sukod sa kaakohan. (Mateo 25:14, 15) Sa pagbuhat niana, ang agalon nakahimo sa pagtuman sa ubay-ubayng mga tumong. Una, samtang siya atua sa halayo, ang iyang mga ulipon maoy mipuli sa iyang dapit ug ang hinungdanong buluhaton nagpadayon samtang wala siya. Ikaduha, sanglit ang aksiyon mas mopadayag sa iyang kinaiya kay sa iyang mga pulong, ang agalon makamatikod sa mga katakos ug kamaunongon sa iyang mga ulipon. Ikatulo, ang agalon naghatag sa iyang mga ulipon ug higayon nga makabaton sa gikinahanglan kaayong kasinatian.
Kini nga sambingay dunay kahulogan alang kanato karong adlawa. Sa dihang mibiya si Jesus sa yuta, iyang gitugyan ang kaakohan ngadto sa iyang dinihogang mga tinun-an. Ang mga nahibilin kanila mao gihapon ang nangabaga sa tibuok-yutang mga intereses sa Gingharian. (Lucas 12:42) Niining modernong-adlaw nga pagtuman sa kaakohan sa mga dinihogan sa pagkapiniyalan, ang panalangin ni Jehova nadayag diha sa iyang organisasyon. Ingong sangpotanan, kini katingalahang miuswag. Gani, sa lima ka tuig lamang, kapin sa usa ka milyong mga bag-ohan ang nagpasimbolo sa ilang dedikasyon pinaagi sa bawtismo sa tubig! Kini mipahinabo ug linibong bag-ong mga kongregasyon ug gatosan ka bag-ong mga sirkito.
Sama nga gitugyan ni Jesu-Kristo ang mga kaakohan ngadto sa “matinumanon ug maalamong ulipon,” sila sa ingon nagtudlo usab sa mga kaakohan sa kongregasyon ngadto sa mga ansiano ug ministeryal nga mga alagad sa “ubang mga karnero.” (Mateo 24:45-47; Juan 10:16) Bisan pa, dunay dugang pang panginahanglan sa dedikadong mga lalaki sa pag-atiman sa dakong pag-uswag. Diin ba sila gikan? Ang mga ansiano kinahanglang magbansay kanila. Apan sa unsang paagi mabansay ang maong mga lalaki kon dili sila magtugyan sa angay nga mga kaakohan ngadto sa mga indibiduwal nga nagapakita nga may ikasarang? Sa unsang paagi makahigayon ang mga ansiano sa pagpaniid sa mga katakos ug kamaunongon sa batan-ong mga lalaki?
Unsay Buot Ipasabot sa Pagpanugyan?
Alang sa uban, ang “pagpanugyan” nagpasabot sa paghaw-as, paglikay, pagpasagad, o pagbiya sa ilang mga kaakohan. Apan, kon gamiton sa hustong paagi, ang “pagpanugyan” sa pagkamatuod maoy usa ka paagi sa pagtuman sa mga kaakohan. Ang Ingles nga berbong “to delegate” gihubit ingong, “pagsalig ngadto sa lain; pagtudlo ingong hawas sa usa; paghatag kaakohan o awtoridad.” Bisan pa, ang nagtugyan nagapabiling mao gayod ang may kaakohan sa kon unsay ginahimo.
Ang pipila tingali maglikay sa pagpanugyan kay sila nahadlok nga mawad-an sila ug pagkontrolar. Bisan pa, ang pagpanugyan wala magpasabot sa pagkawala sa pagkontrolar. Bisag dili-makita ug nagmando gikan sa mga langit, si Kristo Jesus mao gayod ang nagkontrolar sa Kristohanong kongregasyon. Sa baylo, iyang gipiyal ang kongregasyon ngadto sa pag-atiman sa may kasinatiang mga lalaki.—Efeso 5:23-27; Colosas 1:13.
Ang uban tingali dili-gustong magpanugyan kay sila naghunahuna nga mas dali nilang matapos ang trabaho. Hinunoa, nakita ni Jesus ang bili sa pagbansay sa uban. Walay usa sa yuta ang mas epektibong nakatudlo kay kang Jesus. (Juan 7:46) Bisan pa, human nga gihatagag mga instruksiyon ang 70 sa iyang mga tinun-an, iyang gisugo sila ngadto sa buluhatong pagsangyaw. Bisag dili makatumbas sa katakos ni Jesus sa pagpanudlo, sila mipauli nga tugob sa kalipay sa ilang nahimong mga kalamposan. Si Jesus nalipay uban kanila ug gidayeg sila, kay siya nahibalo nga sila ang magpadayon sa pagbuhat sa buluhaton sa dugay nga panahon sa dihang mawala na siya ug sa kataposan dako pa ug mahimo kay sa iyang mahimo nga mag-inusara.—Lucas 10:1-24; Juan 14:12.
Ang pagpanugyan usab nagkahulogan sa pagkuhag tabang sa hinungdanong mga detalye. Sa adlaw una pa namatay si Jesus, iyang gitudlo si Pedro ug Juan sa paghimo sa gikinahanglang mga kahikayan alang sa iyang kataposang panihapon sa Paskwa. (Lucas 22:7-13) Si Jesus wala mabalaka bahin sa pagpalit ug karne sa karnero, bino, walay lebadurang tinapay, ug sa mapait nga mga utanon; ni nanghipos pa siya ug mga gamit, sugnod, ug sa mga susama niana. Si Pedro ug Juan ang nag-atiman niadtong mga butanga.
Ang mga ansiano karong adlawa makapahimulos sa samang mga kaayohan kon ilang sundon ang panig-ingnan ni Jesus. Pananglitan, ang usa nga nag-atiman sa literatura mahimong hangyoon sa pagpidido sa gikinahanglang mga suplay sa umaabot nga kampanya. Siya mahimong tudloan sa pag-analisar sa iyang mga rekord sa pagtino kon sa unsang paagi ang susamang mga butang gigamit sa miaging mga kampanya. Iyang timbangtimbangon usab ang mga kinaiyahan sa teritoryo sa kongregasyon sa dili pa mag-andam sa nahiangayng porma sa pagpidido. Unya iyang ihatag ang porma ngadto sa sekretaryo sa kongregasyon aron masusi. Sa dihang mahibalo na ang alagad sa literatura sa iyang trabaho, dili na kinahanglang susihon-pag-usab sa sekretaryo ang miaging mga rekord basta husto lang ang total diha sa porma sa pidido. Sa tin-aw, kining yanong buhat sa pagtugyan sa pag-order sa literatura mas sayon ug mas yano alang sa tanang nalangkit.
Tungod sa maong dakong mga kaayohan, sa unsang paagi ang usa epektibong makapanugyan?
Kon Unsaon sa Pagpanugyan
Ipatin-aw ang trabaho. Una sa tanan, ipatin-aw kon unsa ang gilaomang mga resulta. “Magpatigayon kamo hangtod sa akong pagpauli” mao ang giingon sa “tawong hamili” ngadto sa napulo ka ulipon diha sa sambingay ni Jesus bahin sa mga mina. (Lucas 19:12, 13) Ang agalon naglaom nga ipatigayon sa mga ulipon ang iyang mina aron motubo ug unya itaho ang ilang mga ganansiya inigbalik niya. Sila nahibalo kon unsay ilang himoon. Sa unsang paagi kining prinsipyoha ikapadapat diha sa modernong-adlaw nga proyekto sa Kingdom Hall? Ingong pananglitan, ang igsoon nga natudlo sa pag-ayo sa atop normal nga sultihan kon unsang matanga sa materyales ang gamiton, asa kini makita, ug kanus-a sugdan ang trabaho, kon maayo ba ang panahon sa pagbuhat niana. Ang maong espisipikong mga giya moresulta ug maayong organisasyon.
Labing hinungdanon nga ipatin-aw dili lamang ang nalakip sa trabaho kondili usab kon unsang mga desisyon ang mahimo niyang himoon ug kon unsang mga butanga ang angay niyang ikonsulta sa uban. Gisultihan ni Moises ang iyang mga natudlo nga sila mahimong mga maghuhukom sa gagmayng mga kaso, apan ang dagkong mga kaso ipaagi kaniya.—Exodo 18:22.
Sa dihang magtudlo ug mga kaakohan, bantayi nga dili duha ang mahatagan sa samang katungdanan. Kon sobra sa usa ka tawo ang itudlo sa samang katungdanan, moresulta ang kalibog. Handurawa kon unsay mahitabo kon diha sa usa ka dakong kombensiyon sa mga Saksi ni Jehova, ang Departamento sa Paghinlo ug ang Departamento sa Paghikay sa Pagkaon hatagan sa kaakohan sa paghinlo sa mga baligyaanan sa pagkaon, o kon ang Departamento sa Atendant ug ang Departamento sa Bawtismo itudlo sa paggiya sa mga tumatan-aw sa panahon sa bawtismo.
Pilia ang may katakos nga mga lalaki. Gitambagan ni Jetro si Moises: “Pangitaa gayod ang may katakos, mahadlokon-ug-Diyos nga mga lalaki gikan sa tanang katawhan, matarong ug dili-kahiphipan nga mga lalaki, ug igatudlo sila ibabaw sa katawhan.” (Exodo 18:21, The New English Bible) Matin-aw, ang usa ka tawo kinahanglang makakab-ot una sa espirituwal nga mga kuwalipikasyon. Aron matino kon ang usa “may katakos” sa pagbuhat sa buluhaton, angayng hatagan ug pagtagad ang mga butang sama sa mga kinaiya, kasinatian, pagbansay, ug mga abilidad. Busa, ang usa ka Kristohanon nga ilabinang mahigalaon, malipayon, matinabangon ug disposisyon lagmit maayog mahimo sa pagdumala sa talad sa magasin o ingong atendant. Susama niini, kon mopilig usa ka tawo sa pagtabang sa sekretaryo sa kongregasyon, makataronganon ang paghatag ug pagtagad kon unsa siya kahusay. Siya ba detalyado, siya ba kasaligan, ug makatago ba siyag tinagoan? (Lucas 16:10) Ang paghatag ug pagtagad niining mga butanga dugang pa sa gikinahanglang espirituwal nga mga kuwalipikasyon makatabang sa pagbutang sa hustong tawo diha sa buluhaton.
Itagana ang igong mga kahinguhaan. Ang usa nga nagaalagad nagkinahanglan ug pipila ka kahinguhaan nga iyang magamit sa pagtapos sa gitudlong buluhaton. Tingali nagkinahanglan siyag himan, salapi, o tabang. Itagana ang igong mga kahinguhaan. Pananglitan, usa ka igsoon tingali gihangyo sa gikinahanglang mga pag-ayo sa Kingdom Hall. Dayag, siya sultihan kon unsay kinahanglang himoon, apan tingali siya usab nagkinahanglag diyutayng salapi nga magamit kon dunay panginahanglan sa pagpalit ug mga materyales. Tingali siya nagkinahanglag tabang. Busa ang mga ansiano mahimong mohangyo sa uban sa pagtabang kaniya o mohimog pahibalo ngadto sa kongregasyon bahin niana nga si ‘Igsoong Pulano may ayohon sa tigomanan, ug siya tingali moduol sa pipila kaninyo nga mangayog tabang.’ Ang maong abanteng plano makapugong sa usa gikan sa pagtudlog usa ka buluhaton nga walay pagtagana ug igong mga kahinguhaan. “Ayaw alang-alanga pagpanugyan” maoy pagkapahayag niana sa usa ka konsultante sa pagdumala.
Sa dihang magtugyan ug mga kaakohan, ipahibalo sa uban nga ang tawo nagalihok nga puli nimo. Ang awtoridad sa paglihok sa imong lugar maoy usa usab ka tabang. Si Josue gitudlo ingong bag-ong pangulo sa Israel atubangan sa “tibuok nga katilingban.” Si Moises giingnan nga “ihatag ang pipila sa [iyang] katungdanan diha kaniya.” (Numeros 27:18-23) Diha sa kongregasyon, susama ang mahimo pinaagi sa yanong pagpaskin diha sa paskinan sa pahibalo sa listahan niadtong gitudlo sa mga buluhaton.
Paluyohi ang ilang mga desisyon. Karon ang usa nga gitudlo makapadayon sa iyang trabaho. Apan, hinumdomi ikaw mahimong usa ka tinuod nga tuboran sa pagdasig alang kaniya kon imong paluyohan ang maayong mga desisyon nga iyang himoon. Pananglitan, ikaw ingong usa ka ansiano tingali dunay kaugalingong kagustohan labot sa paagi sa pagpahimutang sa mikropono ug sa mga muwebles diha sa entablado sa Kingdom Hall, tingalig lahi gikan sa ginahimo sa usa ka igsoon nga gitudlo sa pagbuhat niana. Apan, kon ang igsoon nga nagaatiman sa entablado hatagan ug kagawasan sa iyang trabaho, siya lagmit makabaton ug pagsalig ug kasinatian. Gawas pa, siya tingali makapauswag pa sa mga butang. Ang usa ka konsultante sa negosyo miingon: “Itugyan ang trabaho, dili kon unsaon sa pagbuhat niana. . . . Sagad, ang mga abilidad sa pagkamamugnaon mogawas.”
Dugang pa, ang igsoon nga nagtrabaho, kasagaran mas sinati sa usa ka partikular nga situwasyon ug busa mas nakasabot sa mga problema nga nalangkit niana. Siya tingali mosanong sa mga problema nga may mga solusyon nga tinuod nga mosaler. Tingali siya usab nakiglabot sa mga butang nga dili tataw sa mga tumatan-aw. Busa, usa ka Kristohanong magtatan-aw miingon bahin sa usa ka eksperyensiyadong igsoon nga mitabang kaniya: “Kon siya moingon nga siya may suliran, motuo ako sa iyang isulti.”
Oo, ang labing bililhong tabang nga mabatonan sa Kristohanong mga ansiano mao ang dedikadong mga lalaki ug babaye nga andam ug makahimo sa pagtabang diha sa bisan unsang paagi nga sila ginatudlo. Mga ansiano, pahimusli kining maayo kaayong tabang! Ang pagpanugyan maoy usa ka timaan sa kamapaubsanon ug makapakunhod sa kabug-at ug pagkawala sa kadasig. Sa ingon dili lamang makahimo ka sa pagbuhat ug labaw pa kondili makahatag ka sa uban ug higayon nga makabaton sa gikinahanglang kasinatian.