Mga Ansiano—Tul-ira ang Uban Diha sa Espiritu sa Kalumo

ANG kasingkasing sa usa ka tinuod nga Kristohanon mahimong ikaamgid sa espirituwal nga tanaman nga nagapatunghag maayong bunga. Ang gugma, kalipay, kalinaw, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon kinaiyanhong molambo didto. Ug nganong dili? Gawas pa, kini maoy mga bunga sa balaang espiritu nga gihatag ni Jehova nga Diyos ngadto sa iyang dedikadong mga alagad. (Galacia 5:22, 23) Bisan pa, ang matag Kristohanon nga nagatinguha nga maampingan ang tanaman sa iyang kasingkasing ingong dapit nga makapahimuot sa iyang langitnong Amahan kinahanglang makigbisog diha sa makusog, nagapadayong pakiggubat batok sa mga bunglayon sa napanunod nga sala.​—Roma 5:5, 12.

Usahay, usa ka butang nga dili-maayo mosugod sa pagtubo diha sa diyosnon dili-hingpit nga kasingkasing sa tawo. Siya tingali adunay maayo kaayong espirituwal nga rekord. Apan unya didto may motunghang suliran, tingali nagagikan sa dili-maayong mga panag-uban o dili-maalamong desisyon. Sa unsang paagi ang mga ansiano sa kongregasyon makatabang sa maong tawo sa espirituwal?

Ang Tambag sa Apostol

Sa pagtabang sa usa ka Kristohanon nga nakasala, ang mga ansiano kinahanglang mosunod sa tambag ni apostol Pablo: “Mga igsoon, kon ang usa ka tawo nakahimog sayop nga lakang nga wala makaamgo niana, kamo nga may espirituwal nga mga kuwalipikasyon mao ang maningkamot sa pagtul-id sa maong tawo diha sa espiritu sa kalumo, sama sa inyong pagbantay sa inyong kaugalingon, kay basin ug kamo matintal usab.” (Galacia 6:1) Kon ang isigkamagtutuo “nakahimog sayop nga lakang nga wala makaamgo niana,” responsabilidad sa mga ansiano ang pagtanyag ug tabang sa labing madali.

Naghisgot si Pablo ug “usa ka tawo” nga nakahimog sayop nga lakang. Ugaling, ang Gregong pulong (anʹthro·pos) nga gigamit dinhi mahimong ikapadapat sa usa ka lalaki o babaye. Ug unsay kahulogan sa “pagtul-id” sa usa ka tawo? Kining Gregong terminong (ka·tar·tiʹzo) nagkahulogang “pagpasibo sa hustong paagi.” Kini gihapong pulonga ang gamiton alang sa pagpilot ug mga pukot. (Mateo 4:21) Aplikado usab kini sa pagtul-id sa nabali nga tiil. Himoon kini sa doktor sa mainampingong paagi aron dili masakitan nga wala kinahanglana ang iyang pasyente. Sa susama, ang pagtabang sa igsoong lalaki o babaye aron masibo sa hustong paagi sa espirituwal nagkinahanglag pag-amping, taktika, ug kahangawa.

Ang mga ansiano magapamatuod sa ilang kaugalingong espirituwalidad pinaagi sa pagpakita sa espiritu sa kalumo sa dihang naningkamot sa pagtul-id sa usa ka tawo. Siyempre, atimanon sa malumog-kinaiya nga si Jesus kining mga butanga sa kalumo. (Mateo 11:29) Angay ipasundayag sa mga ansiano kining hiyasa ngadto sa usa ka alagad ni Jehova nga nakahimo ug sayop nga lakang tungod kay sila mismo maapsan usab sa sala, nga supak sa mga tinguha sa ilang kasingkasing. Kini mahimong mahitabo sa umaabot kon wala pa kini mahitabo sa miagi.

Kining kuwalipikado sa espirituwal nga mga lalaki kinahanglang mahigugmaong ‘magapas-an sa mga lulan’ sa ilang isigkamagsisimba. Sa pagkatinuod, anaa sa kasingkasing sa mga ansiano ang pagtabang sa igsoong lalaki o babaye sa pakiggubat batok kang Satanas, sa mga tintasyon, sa mga kahuyangan sa unod, ug sa mga kasakit sa sala. Kini sa pagkatinuod maoy usa ka paagi aron ang Kristohanong mga magtatan-aw “makatuman sa kasugoan ni Kristo.”​—Galacia 6:2.

Ang mga lalaki nga dunay tinuod nga espirituwal nga kuwalipikasyon mapainubsanon, nahibalo nga “kon adunay naghunahuna nga siya maayong-laki nga sa pagkatinuoray siya walay bili, naglimbong siya sa iyang kaugalingong hunahuna.” (Galacia 6:3) Bisan unsa pay paningkamot sa mga ansiano sa pagbuhat sa matarong ug makatabang, sila dili gihapon makatumbas sa hingpit ug mahigugmaon mahangawaon nga Anak sa Diyos, si Jesu-Kristo. Apan dili kana katarongan nga dili nila himoon ang ilang labing maayo.

Ang mga ansiano nahibalo nga daotan ang pagsaway sa isigkamagtutuo diha sa paagi nga mapahitas-on, salingkapaw nga pagkabalaan! Dayag nga dili kana himoon ni Jesus. Ngani, iyang gihalad ang iyang kinabuhi dili lamang alang sa iyang mga higala kondili bisan alang sa iyang mga kaaway! Ang mga ansiano maningkamot sa pagpasundayag sa samang gugma dihang maningkamot sa pagtabang sa mga igsoong lalaki o babaye gikan sa kalisod ug ipasuod sila ngadto sa ilang langitnong Amahan ug sa iyang matarong nga mga sukdanan. Unsa ang pila ka paagi nga makatabang sa mga ansiano sa pagtul-id sa kaubang mga magtutuo?

Pipila ka Makatabang nga mga Lakang

Mainampoong mosalig kang Jehova samtang nagasulti ug nagalihok sa malumog-kinaiya nga paagi. Si Jesus malumog-kinaiya, kinasingkasing nga miampo ngadto sa iyang langitnong Amahan alang sa pagtultol, ug kanunay nagbuhat sa mga butang nga makapahimuot Kaniya. (Mateo 21:5; Juan 8:29) Ang mga ansiano angay nga mobuhat ug sama sa dihang nagapaningkamot sa pagtul-id sa usa ka tawo nga nakahimog sayop nga lakang. Ingong malumog-kinaiya nga luyoluyong mga magbalantay, ang mga ansiano makapadasig ug makapalig-on sa sinultihan, dili makahadlok. Sa panahon sa panaghisgot, siya maningkamot sa pagmugnag atmospera diin ang Kristohanon nga nanginahanglag tabang mobating komportable sa pagpahayag sa iyang mga hunahuna kutob sa mahimo. Alang niana, ang kinasingkasing pangbukas nga pag-ampo maoy usa ka dakong tabang. Ang usa nga nagadawat sa tambag nga gihatag nga may kalumo labi pang mobukas sa iyang kasingkasing niana kon siya nahibalo nga, sama kang Jesus, ang magtatambag buot mohimo sa mga butang nga makapahimuot sa Diyos. Ang panapos nga pag-ampo lagmit mopasilsil sa indibiduwal sa panginahanglan sa pagpadapat sa tambag nga iyang gihatag diha sa mahigugmaon, malumog-kinaiya nga paagi.

Human sa pag-ampo, paghatag ug tim-os nga komendasyon. Tingalig nalangkit kini sa maayong mga hiyas sa indibiduwal, sama sa kalulot, pagkakasaligan o kakugihan. Mahimong hisgotan ang iyang rekord sa matinumanong pag-alagad kang Jehova, tingali sa daghang mga tuig. Niining paagiha, atong ginapakita nga kita nagatagad ug may samag-Kristo nga pagtamod sa tawo. Gisugdan ni Jesus ang iyang mensahe ngadto sa kongregasyon sa Tiatira uban sa komendasyon, nga nag-ingon: “Nasayod ako sa imong binuhatan, ug sa imong gugma ug sa pagtuo ug sa ministeryo ug pag-antos, ug nga ang imong ulahing mga nabuhat labaw pa ka daghan kay sa nahauna.” (Pinadayag 2:19) Kadtong mga pulonga naghatag pasalig sa mga sakop sa kongregasyon nga si Jesus nahibalo sa maayong buhat nga ilang ginahimo. Bisag ang kongregasyon may mga sayop​—ang “Jezebel” nga impluwensiya gipalabay—​kini maayog lakat sa ubang mga bahin, ug maoy tinguha ni Jesus nga masayod ang maong igsoong mga lalaki ug babaye nga ang ilang madasigong buluhaton namatikdan. (Pinadayag 2:20) Sa samang paagi ang mga ansiano angay mohatag ug komendasyon kon nahiangay.

Ayaw dumalaha ang sayop nga lakang nga seryoso kaayo kay sa gikinahanglan sa mga kahimtang. Kinahanglang panalipdan sa mga ansiano ang panon sa Diyos ug ampingan ang iyang organisasyon nga mahinlo. Apan ang ubang espirituwal nga mga sayop nga lakang nga nagkinahanglag malig-ong tambag mahimong dumalahon sumala sa hukom sa usa ka ansiano o duha nga dili na magkinahanglag hudisyal nga husay. Diha sa daghang kaso, ang tawhanong kahuyangan imbes tinuyo nga pagkadaotan mao ang hinungdan sa sayop nga lakang sa Kristohanon. Kinahanglang tagdon sa mga ansiano ang panon sa malumo ug hinumdoman kini: “Ang tawo nga dili magpakitag kaluoy pagahukman nga walay kaluoy. Ang kaluoy magadaog batok sa hukom.” (Santiago 2:13; Buhat 20:28-30) Nan, imbes padakoon ang mga butang, atubangon sa mga ansiano ang naghinulsol nga isigkamagtutuo diha sa malumo nga paagi, sama sa atong mahangawaon ug maluloy-ong Diyos, si Jehova.​—Efeso 4:32.

Pagpakitag pagsabot sa mga butang nga tingali maoy naghatod ngadto sa sayop nga lakang. Kinahanglang mamati ang mga ansiano nga maampingon samtang ginabubo sa ilang isigkamagtutuo kon unsay anaa sa iyang kasingkasing. Sanglit ‘ang Diyos dili magatamay sa usa ka nadugmok ug napusgay nga kasingkasing,’ maingon man usab sila. (Salmo 51:17) Ang kakulang sa emosyonal nga pagpaluyo sa kapikas sa kaminyoon tingali mao ang hinungdan sa suliran. Ang grabe ug dugay nga depresyon tingali maoy nakadaot sa kinaiyanhon malig-ong emosyonal nga kusog sa tawo o tingali naglisod kaayo sa paghimog maalamong mga desisyon. Tagdon sa mahigugmaong mga ansiano kining mga butanga, kay bisan si Pablo nag-awhag sa iyang mga igsoon sa “pagtambag sa badlonganon,” siya usab nag-aghat: “Dasiga ninyo ang nagmagul-anong mga kalag, tabangi ang maluyahon, magmainantoson sa tanan.” (1 Tesalonica 5:14) Samtang dili paluyahon sa mga ansiano ang puwersa sa matarong nga mga sukdanan sa Diyos, ilang kinahanglang tagdon ang mga butang nga magpagaan sa hukom, sama sa ginahimo sa Diyos.​—Salmo 103:10-14; 130:3.

Ayaw pagdaota ang pagtamod-sa-kaugalingon sa imong isigkamagtutuo. Dili gayod nato buot kuhaan ang bisan unsang igsoong lalaki o babaye sa dignidad o magpakitag impresyon nga siya walay kapuslanan. Hinunoa, ang mga pasalig nga kita may pagsalig sa Kristohanong mga hiyas sa tawo ug ang gugma alang sa Diyos magsilbing pagpadasig sa pagtul-id sa sayop. Malagmit, ang mga taga Corinto nadasig nga magmahinatagon sa dihang sila gisultihan ni Pablo nga siya nakapasigarbo sa uban bahin sa ilang “pagkaandam sa hunahuna” ug sa “kasibot” niining bahina.​—2 Corinto 9:1-3.

Ipakita nga ang suliran mabuntog pinaagi sa pagsalig kang Jehova. Oo, kinasingkasing tabangi ang indibiduwal nga makakita nga ang pagsalig sa Diyos ug ang pagpadapat sa tambag sa Iyang Pulong makatabang sa pagpatungha sa gikinahanglan nga pagtul-id. Alang niana, ang atong mga pulong kinahanglang ipasukad sa Kasulatan ug sa binase-sa-Bibliya nga mga publikasyon. Ang atong tumong duha: (1) sa pagtabang sa usa nga nagkinahanglag tabang sa pagkakita ug pagkasabot sa hunahuna ni Jehova ug (2) sa pagpakita sa tawo kon sa unsang paagi siya sa usa ka sukod misipyat o napakyas sa pagsunod niining balaang mga giya.

Ubani ang Kasulatanhong tambag ug maluluton apan hinungdanong mga pangutana. Mahimong epektibo kaayo kini sa pag-abot sa kasingkasing. Pinaagi ni propetang Malaquias, gigamit ni Jehova ang pangutana aron makasabot ang Iyang katawhan kon sa unsang paagi sila nahisalaag. “Makapangawat ba diay ang tawo sa Diyos?” siya nangutana, nga nagdugang: “Apan kamo nangawat kanako.” (Malaquias 3:8) Ang kapakyasan sa Israel sa pag-amot sa ikapulong bahin sa ilang mga abot sa uma sumala sa gikinahanglan sa Moisesnong Kasugoan sama ra nga nagapangawat kang Jehova. Aron masulbad kining kahimtanga, kinahanglang tumanon sa mga Israelinhon ang ilang mga obligasyon ngadto sa putli nga pagsimba uban sa pagtuo nga sila dagayang panalanginan sa Diyos. Pinaagi sa nagapukaw sa hunahuna ug mahunahunaong mga pangutana, ikapasiugda sa mga ansiano nga ang pagbuhat sa matarong nga butang karong adlawa naglakip sa pagsalig sa atong langitnong Amahan ug sa pagsunod kaniya. (Malaquias 3:10) Ang pagpadayag nianang hunahunaa diha sa kasingkasing makaamot ug dako sa pagtabang sa atong igsoon aron ‘magmatul-id ang alagianan sa iyang tiil.’​—Hebreohanon 12:13.

Ipasiugda ang mga kaayohan sa pagdawat sa tambag. Ang epektibong tambag naglakip sa pahimangno bahin sa mga sangpotanan sa pagsubay sa sayop nga dalan ug mga pahinumdom sa mga kaayohang makuha gikan sa pagtul-id sa mga butang. Human sa hustong panahong pasidaan, gipasaligan ni Jesus kadtong walay pagtagad sa espirituwal diha sa kongregasyon sa Laodicea nga kon sila maghinulsol sa ilang miaging dalan ug mahimong madasigong mga tinun-an, ilang tagamtamon ang tagsaong mga pribilehiyo, apil ang palaabuton sa pagmando uban kaniya sa langit.​—Pinadayag 3:14-21.

Pakitag kaikag kon gipatalinghogan ba ang tambag. Sama nga ginasusi sa maayong doktor matag karon ug unya kon ang bukog nga iyang gitul-id nasumpay na ba sa husto, sa ingon angay tinoon sa mga ansiano kon gipadapat ba ang tambag sa Kasulatan. Mahimong pangutan-on nila ang ilang kaugalingon: Gikinahanglan ba ang dugang tabang? Angay bang sublion ang tambag, tingali sa laing paagi? Gitambagan ni Jesus ang iyang mga tinun-an sa makadaghang higayon sa panginahanglan sa pagkamapainubsanon. Sa hataas nga yugto sa panahon, siya mapailobong naningkamot sa pagtul-id sa ilang kaisipan pinaagi sa tambag, sa mga ilustrasyon, ug sa praktikal nga mga pagtulon-an. (Mateo 20:20-28; Marcos 9:33-37; Lucas 22:24-27; Juan 13:5-17) Sa susama, ang mga ansiano makatabang sa pagseguro sa bug-os nga pagtul-id sa usa ka igsoong lalaki o babaye pinaagi sa paghikay ug dugang Kasulatanhong mga panaghisgot nga gilaraw sa pagpalambo sa kauswagan sa tawo ngadto sa bug-os nga espirituwal nga kahimsog.

Paghatag ug komendasyon alang sa bisan unsang kauswagang nahimo. Kon ang usa nga nakahimog sayop nga lakang tim-os nga naningkamot sa pagpadapat sa tambag sa Kasulatan, dayega siya nga mainiton. Kini modugang sa gibug-aton sa unang tambag ug malagmit modasig sa dugang kauswagan. Diha sa unang sulat ni Pablo ngadto sa mga taga Corinto, siya napugos sa paghatag kanila ug malig-ong tambag bahin sa daghang mga butang. Wala magdugay human gipahibalo ni Tito ang apostol sa maayo kaayong pagsanong sa iyang sulat, si Pablo misulat sa paghatag kanila ug komendasyon. “Karon ako malipayon,” siya miingon, “dili tungod kay kamo nangaguol, kondili tungod kay kamo nangaguol uban sa kaguol nga nakapahinulsol kaninyo; kay kamo mibati man sa diyosnon nga kaguol.”​—2 Corinto 7:9.

Usa ka Hinungdan sa Pagkalipay

Oo, si Pablo nalipay sa dihang iyang nadunggan nga ang iyang tambag nakatabang sa mga taga Corinto. Sa susama, ang presenteng-adlaw nga mga ansiano may dakong kalipay sa dihang ang isigkamagtutuo maulian gikan sa usa ka sayop nga lakang tungod sa maayo nga pagsanong sa ilang mahigugmaong tabang. Ilang pagakalipayan tinuod ang pagtabang sa usa ka mahinulsolong Kristohanon sa pagluka sa tunokong mga bunglayon gikan sa iyang kasingkasing aron dagayang molambo didto ang diyosnong bunga.

Kon ang mga ansiano molampos sa pagtul-id sa usa ka tawo nga nakahimog pipila ka sayop nga lakang, iyang natalikdan ang usa ka dalan nga bug-os nga makadaot sa espirituwal. (Itandi ang Santiago 5:19, 20.) Alang sa maong tabang, ang dumadawat sa tabang kinahanglang mopadayag ug pasalamat kang Jehova nga Diyos. Ang mga pulong sa tinuod nga apresasyon alang sa mahigugmaong tabang, kahangawa, ug pagsabot sa mga ansiano angay usab. Ug sa dihang bug-os na nga mapasig-uli sa espirituwal, ang tanan nga nalangkit magkalipay nga ang pagtul-id misangpot tungod sa espiritu sa kalumo.