“Dad-a ang Tibuok Ikapulo Ngadto sa Balay-Tipiganan”

“Palihog, sulayi ninyo ako niining bahina, . . . kong dili ba buksan ko kaninyo ang mga tamboanan sa mga langit.”​—MALAKIAS 3:10.

1. (a) Niadtong ika-limang siglo W.K.P., unsang pagdapit ang gihatag ni Jehova sa iyang katawhan? (b) Sa unang siglo K.P., unsay misangpot gumikan sa pag-anha ni Jehova sa templo alang sa paghukom?

NIADTONG ika-limang siglo W.K.P., ang mga Israelinhon nahimong dili matinumanon kang Jehova. Sila wala mohatag sa ikapulo ug midala ug masakitong mga mananap sa templo ingong mga halad. Bisan pa niana, si Jehova nagsaad nga kon ilang dad-on ang tibuok ikapulo ngadto sa balay-tipiganan, iyang ibubo ang panalangin hangtod nga wala nay kawalad-on. (Malakias 3:8-10) Mga 500 ka tuig sa ulahi, si Jehova, nga gihawasan ni Jesus ingong Iyang sinugo sa pakigtugon, miabot sa templo sa Jerusalem alang sa paghukom. (Malakias 3:1) Ang Israel ingong usa ka nasod nakaplagang kulang, apan kadtong mga indibiduwal nga mibalik kang Jehova gipanalanginan sa madagayaon. (Malakias 3:7) Sila gidihogan aron mahimong espirituwal nga mga anak ni Jehova, usa ka bag-ong linalang, “ang Israel sa Diyos.”​—Galacia 6:16; Roma 3:25, 26.

2. Kanus-a ang Malakias 3:1-10 nakabaton ug ikaduhang katumanan, ug sa unsa nga kita gidapit sa pagbuhat may kalabotan niana?

² Hapit 1,900 ka tuig tapos niana, niadtong 1914, si Jesus naentrono ingong Hari sa langitnong Gingharian sa Diyos, ang tagal sa ikaduhang katumanan sa balaanong pagkadinasig nga mga pulong sa Malakias 3:1-10 miabot na. May labot niining makalilipayng hitabo, ang mga Kristohanon karong adlawa gidapit sa pagdala sa tibuok ikapulo ngadto sa balay-tipiganan. Kon atong buhaton kana, kita usab makatagamtam sa mga panalangin hangtod nga wala nay kawalad-on.

3. Kinsa ang sinugo nga magaandam sa dalan sa atubangan ni Jehova (a) niadtong unang siglo? (b) sa wala pa ang unang gubat sa kalibotan?

³ Mahitungod sa iyang pag-abot sa templo, si Jehova nag-ingon: “Tan-awa! Ako magapadala sa akong sinugo, ug siya magaandam sa dalan sa akong atubangan.” (Malakias 3:1) Ingong katumanan niini sa unang siglo, si Juan nga Bawtista miabot sa Israel nga nagwali sa paghinulsol sa mga sala. (Marcos 1:2, 3) Aduna bay pasiunang buluhaton may labot sa ikaduhang pag-anha ni Jehova sa iyang templo? Oo. Sa mga dekada sa wala pa ang unang gubat sa kalibotan, ang mga Estudyante sa Bibliya migimaw sa esena sa kalibotan nga nagatudlo sa putling doktrina sa Bibliya ug nagyagyag sa nagapasipala-sa-Diyos nga mga kabakakan, sama sa Trinidad ug kalayonhong-impiyerno nga mga doktrina. Sila usab nagpasidaan sa umaabot nga kataposan sa mga Panahon sa Hentil sa 1914. Daghan ang misanong niining mga magdadala sa kahayag sa kamatuoran.​—Salmo 43:3; Mateo 5:14, 16.

4. Unsang pangutanaha ang kinahanglang sulbaron sa panahon sa adlaw sa Ginoo?

⁴ Gisugdan sa tuig 1914 ang gitawag sa Bibliya nga “ang adlaw sa Ginoo.” (Pinadayag 1:10) Mahinungdanong mga hitabo ang mamahitabo sulod nianang adlawa, lakip na ang pag-ila sa “matinumanon ug maalamong ulipon” ug ang pagtudlo kaniya “nga magadumala sa iyang [Agalon] tanang katigayonan.” (Mateo 24:45-47) Balik niadtong 1914, libo-libo nga mga simbahan nangangkon nga Kristohanon. Haing pundoka ang pagailhon sa Agalon, nga si Jesu-Kristo, ingong iyang matinumanon ug maalamong ulipon? Kanang pangutanaha pagasulbaron sa dihang si Jehova moanha sa iyang templo.

Mianha sa Espirituwal nga Templo

5, 6. (a)Haing templo si Jehova mianha alang sa paghukom? (b) Unsang paghukom ang madawat sa Kakristiyanohan gikan kang Jehova?

⁵ Ugaling, haing templo siya mianha? Dayag dili sa literal nga templo sa Jerusalem. Ang kataposan niadtong mga temploha gilaglag balik niadtong 70 K.P. Hinuon, si Jehova adunay usa ka mas dakong templo nga gilandongan nianang sa Jerusalem. Si Pablo naghisgot nianang mas dakong templo ug gipakita kon unsa sa pagkatinuod kana kadak-a, nga may balaang dapit sa langit ug usa ka lawak dinhi sa yuta. (Hebreohanon 9:11, 12, 24; 10:19, 20) Dinha nianang dakong espirituwal nga templo nga si Jehova mianha alang sa buluhatong paghukom.​—Itandi ang Pinadayag 11:1; 15:8.

⁶ Kanus-a kini nahitabo? Sumala sa ubay-ubayng ebidensiya nga mabatonan, niadtong 1918.a Unsay resulta? Kon bahin sa Kakristiyanohan, si Jehova nakakita sa usa ka organisasyon kansang mga kamot napuno sa dugo, usa ka dunot relihiyosong sistema nga namiga sa iyang kaugalingon uban sa kalibotan, nga nakig-abin sa iyang kaugalingon uban sa mga adunahan ug sa pagdaogdaog sa mga kabos, nga nagtudlo sa paganong mga doktrina inay hinuon sa pagtuman sa putling pagsimba. (Santiago 1:27; 4:4) Pinaagi ni Malakias, si Jehova nagpasidaan: “Ako mamahimong matulin nga saksi batok sa mga diwatahan, ug batok sa mga mananapaw, ug batok sa mga managpanumpa sa bakak, ug batok kanila nga nanaglugpit sa suhol sa mga sinuholan nga mamumuo, sa balo ug sa ilo.” (Malakias 3:5) Ang Kakristiyanohan nakabuhat niining tanan ug sobra pa. Sa 1919 nasabtan ug tin-aw nga si Jehova naghukom kaniya ngadto sa kalaglagan uban sa nahibilin sa Babilonyang Bantogan, ang tibuok-kalibotan nga gambalay sa bakak nga relihiyon. Sukad niadto, ang pagtawag nagpadayon alang sa maayog-kasingkasing nga mga tawo: “Gumula kamo kaniya, katawhan ko.”​—Pinadayag 18:1, 4.

7. Kinsa ang giila ni Jesus nga iyang matinumanon ug maalamong ulipon?

⁷ Nan, kinsa ang matinumanon ug maalamong ulipon? Niadtong unang siglo, kana nagsugod sa gamayng pundok nga misanong sa buluhatong pagpanaksi ni Juan nga Bawtista ug ni Jesus, ang sinugo sa pakigtugon. Sa atong siglo, mao kadtong pipila ka libo nga misanong sa pasiunang buluhaton sa mga Estudyante sa Bibliya sa mga katuigan nga miagak ngadto sa 1914. Kini sila miantos sa mapintasong mga pagsulay sa panahon sa unang gubat sa kalibotan, apan ilang gipasundayag nga ang ilang kasingkasing anaa kang Jehova.

Usa ka Buluhaton sa Pagputli

8, 9. Balik niadtong 1918, sa unsang mga paagi ang matinumanon ug maalamong ulipon kinahanglang putlion, ug unsay gisaad ni Jehova labot niini?

⁸ Hinuon, bisan kining pundoka kinahanglang pagaputlion. Ang pila nga nakig-uban kanila nadayag nga mga kaaway sa pagtuo ug kinahanglang papahawaon. (Filipos 3:18) Ang uban dili gustong moabaga sa tulobagon nga nalangkit sa pag-alagad kang Jehova ug mipahilayo. (Hebreohanon 2:1) Gawas niana, aduna pay Babilonyanhong mga batasan nga nabilin nga kinahanglang palaon. Usab sa organisasyonal nga kahimtang ang matinumanon ug maalamong ulipon putlionon. Ang haom nga baroganan sa neyutralidad alang ning kalibotana kinahanglan pang tun-an ug ipadapat. Ug samtang ang kalibotan sa dugang ug dugang nagkadunot, kinahanglan nilang makigbugno ug maayo aron mahuptang hinlo sa moral ug espirituwal ang kongregasyon.​—Itandi ang Judas 3, 4.

⁹ Oo, gikinahanglan ang pagputli, apan si Jehova mahigugmaong nagsaad mahitungod sa naentronong si Jesus: “Siya molingkod ingon sa maglulunsay ug mag-uulay sa salapi ug iyang putlion ang mga anak ni Levi; ug iyang pagaulayon sila ingon sa bulawan ug sa salapi, ug sila sa tino alang kang Jehova mamahimong katawhan nga magahalad sa mga halad diha sa pagkamatarong.” (Malakias 3:3) Sugod sa 1918, si Jehova, pinaagi sa iyang sinugo sa pakigtugon, nakatuman sa iyang saad ug giputli ang iyang katawhan.

10. Unsang matanga sa halad ang gidala sa katawhan sa Diyos, ug unsang pagdapit ang gihatag ni Jehova kanila?

¹⁰ Ang dinihogang mga igsoon ni Kristo ug ang dakong panon nga sa ulahi miduyog kanila diha sa pag-alagad kang Jehova tanan nakabenepisyo gikan sa gihimo ni Jehova ingong usa ka maglulunsay ug mag-uulay sa salapi. (Pinadayag 7:9, 14, 15) Ingong usa ka organisasyon sila miabot, ug mangabot pa, nga nagatanyag sa mga halad diha sa pagkamatarong. Ug ang ilang halad maoy “pagpasalamat kang Jehova, maingon niadtong mga adlaw sa kanhing panahon ug maingon niadtong mga katuigan sa kakaraanan.” (Malakias 3:4) Kini sila sa pagkamatagnaon mao ang gidapit ni Jehova: “‘Dad-a ang tibuok ikapulo ngadto sa balay-tipiganan, aron adunay kalan-on diha sa akong balay; palihog, sulayi ninyo ako niining bahina,’ nagaingon si Jehova sa mga panon ‘kong dili ba buksan ko kaninyo ang mga tamboanan sa mga langit ug buboan ko kamo sa panalangin hangtod nga wala nay kawalad-on.’”​—Malakias 3:10.

Mga Halad ug Ikapulo

11. Nganong ang mga paghalad sumala sa sistema sa Mosaikong Kasugoan wala na ibaod?

¹¹ Sa adlaw ni Malakias ang katawhan sa Diyos nagdala sa literal nga mga halad ug ikapulo, sama sa trigo, bunga sa kahoy, ug kahayopan. Ngani sa adlaw ni Jesus, ang matinumanong mga Israelinhon naghalad ug literal nga mga halad sa templo. Ugaling, tapos sa kamatayon ni Jesus kanang tanan nausab. Ang Kasugoan gitapos, lakip ang mga sugo sa paghalad ug espisipikong materyal nga mga halad ug ikapulo. (Efeso 2:15) Gituman ni Jesus ang matagnaong tipo sa mga halad ubos sa Kasugoan. (Efeso 5:2; Hebreohanon 10:1, 2, 10) Nan, sa unsang paagi ang mga Kristohanon makadala ug mga halad ug ikapulo?

12. Unsang matanga sa espirituwal nga mga halad ug mga sakripisyo ang gihimo sa mga Kristohanon?

¹² Alang kanila, ang mga halad maoy ilabinang sa espirituwal nga matang. (Itandi ang Filipos 2:17; 2 Timoteo 4:6.) Pananglitan, si Pablo naghisgot sa pagwaling buluhaton ingong usa ka halad sa dihang siya nag-ingon: “Pinaagi kaniya sa kanunay kita magahalad sa Diyos ug usa ka halad sa pagdayeg, nga mao, ang bunga sa mga ngabil nga nagahimog publikong pagmantala sa iyang ngalan.” Siya mipunting sa usa pa ka espirituwal nga matang sa halad sa dihang siya miaghat: “Ayaw hikalimti ang pagbuhat ug maayo ug ang pagpaambit sa mga butang sa uban, kay ang maong mga halad makapahimuot sa Diyos.” (Hebreohanon 13:15, 16) Sa dihang ang mga ginikanan modasig sa ilang mga anak sa pagsulod sa payunir nga pag-alagad, sila mahimong ikaingon nga naghalad kanila ngadto kang Jehova, sama ra nga si Jepte nagtanyag sa iyang anak babaye ingong “usa ka halad nga sinunog” ngadto sa Diyos, nga naghatag kaniya sa kadaogan.​—Maghuhukom 11:30, 31, 39.

13. Nganong wala ibaod sa mga Kristohanon ang paghatag sa literal nga ikapulo sa ilang kinitaan?

¹³ Bisan pa, komosta na man ang ikapulo? Ang mga Kristohanon ba obligado sa pagpinig ug ikapulo sa ilang materyal nga abot ug ihatag kana sa organisasyon ni Jehova, nga kokaamgid sa ginahimo diha sa pila ka mga simbahan sa Kakristiyanohan? Dili, kana wala kinahanglana. Walay kasulatan nga nagapahayag sa maong lagda alang sa mga Kristohanon. Sa dihang si Pablo nangolektag mga amot alang sa mga nanginahanglan sa Judea, wala siya maghisgot ug espisipikong porsiento nga angayng ihatag. Inay, siya nag-ingon: “Pasagdi ang matag-usa nga maghatag sumala sa pagbuot sa iyang kasingkasing, dili nga magapanuko ni ingon nga pinugos, kay ang Diyos nagahigugma sa malipayong maghahatag.” (2 Corinto 9:7) Sa paghisgot mahitungod niadtong anaa sa espesyal nga pag-alagad, gipakita ni Pablo nga samtang ang pila morag angayan nga suportaran pinaagi sa boluntaryong mga amot, siya andam sa pagtrabaho ug sa pagsuporta sa iyang kaugalingon. (Buhat 18:3, 4; 1 Corinto 9:13-15) Walay ikapulo ang gigahin alang nianang katuyoana.

14. (a) Nganong ang pagdala sa ikapulo wala maghawas sa atong paghatag sa atong tanan kang Jehova? (b) Unsay gisimbolohan sa ikapulo?

¹⁴ Dayag nga, alang sa mga Kristohanon ang ikapulo nagasimbolo, o nagahawas, sa usa ka butang. Sanglit kana usa-sa-napulo ug ang numerong napulo sa subsob nagsimbolo sa yutan-ong pagkabug-os diha sa Bibliya, ang ikapulo ba nagsimbolo sa paghatag nato sa atong tanan kang Jehova? Wala. Sa dihang kita nagdedikar sa atong kaugalingon kang Jehova ug gisimbolohan kana pinaagi sa bawtismo sa tubig, kana maoy paghatag nato sa atong tanan kaniya. Gikan sa panahon sa atong pagpahinungod, wala na kitay nabatonan nga dili iya ni Jehova. Ugaling, si Jehova nagtugot sa matag indibiduwal sa paggamit sa iyang kahinguhaan. Busa ang ikapulo naghawas sa bahin sa atong gipanag-iya nga atong dad-on kang Jehova, o gamiton diha sa pag-alagad kang Jehova, ingong timailhan sa atong gugma alang kaniya ug sa atong pag-ila sa kamatuoran nga kita gipanag-iya niya. Ang modernong-adlaw nga ikapulo wala magkahulogan nga ikapulo lamang. Sa pila ka mga kaso kana mahimong kulang. Sa uban kana mahimong sobra. Ang kada indibiduwal magadala kon unsay gikahimut-an sa iyang kasingkasing sa pagdala ug kon unsay ikatugot sa iyang kahimtang.

15, 16. Unsay nalakip sa atong espirituwal nga ikapulo?

¹⁵ Unsay nalakip niining espirituwal nga ikapulo? Sa usa ka butang, kita nagahatag kang Jehova sa atong panahon ug kusog. Ang panahon nga atong igugol sa mga tigom, sa pagtambong sa mga asembliya ug mga kombensiyon, sa pag-alagad sa kanataran, kining tanan maoy usa ka butang nga ikahatag kang Jehova​—bahin sa atong ikapulo. Ang panahon ug kusog nga atong igugol sa pagduaw sa masakiton ug sa pagtabang sa uban​—usab, kining tanan maoy bahin sa atong ikapulo. Ang pagtabang sa pagpanukod sa mga Kingdom Hall ug pakig-ambit diha sa pagmentinar ug panglimpiyo sa tigomanan maoy bahin usab.

¹⁶ Ang atong ikapulo naglakip usab sa atong pinansiyal nga mga amot. Tungod sa tagsaong pag-uswag sa organisasyon ni Jehova niining ulahing katuigan, nag-uswag usab ang pinansiyal nga mga obligasyon. Bag-ong mga Kingdom Hall gikinahanglan, uban sa bag-ong mga pasilidad sa sanga ug bag-ong mga Assembly Hall, lakip sa pag-atiman niadtong nangatukod na. Ang pagtubag sa mga gastos niadtong nagtanyag sa ilang kaugalingon alang sa espesyal nga pag-alagad​—nga sa subsob mihimog dako personal nga sakripisyo sa pagbuhat niana—​usab naglangkob sa dakong hagit. Sa 1991 ang pagmentinar lamang sa mga misyonaryo, nagapanawng mga magtatan-aw, ug espesyal nga mga payunir mikostar ug kapin sa 40 ka milyon nga dolyares, nga ang tanan gitagana pinaagi sa boluntaryong mga amot.

17. Pila ba gayod ang atong ihatag ingong atong espirituwal nga ikapulo?

¹⁷ Pila ba gayod ang atong ihatag ingong atong espirituwal nga ikapulo? Si Jehova wala magtino ug porsiento. Bisan pa niana, ang pagbati sa dedikasyon, sa tiunay nga gugma kang Jehova ug sa mga kaigsoonan, maingon usab sa pagbati sa kadinalian gumikan sa pagkasabot nga adunay mga kinabuhi nga luwasonon, nagadasig kanato sa pagdala sa atong tibuok espirituwal nga ikapulo. Kita mibating tinukmod sa pag-alagad kang Jehova sa labing masangkaron kon posible. Kon kita mokuto o mohatag sa atong kaugalingon o sa atong kahinguhaan nga nagbagulbol, kini mahimong magkahulogan sa atong pagpangawat sa Diyos.​—Itandi ang Lucas 21:1-4.

Gipanalanginan Hangtod nga Wala nay Kawalad-on

18, 19. Sa unsang paagi gipanalanginan ang katawhan ni Jehova tungod sa pagdala sa ilang tibuok ikapulo?

¹⁸ Sukad sa 1919, ang katawhan ni Jehova naghatag nga madagayaon sa ilang panahon, kusog, ug pinansiyal nga kahinguhaan alang sa panginahanglan sa buluhatong pagwali. Sila sa pagkatinuod nagdala sa tibuok ikapulo ngadto sa balay-tipiganan. Ingong sangpotanan, si Jehova nagatuman sa iyang saad ug nagabubo sa panalangin hangtod nga wala nay kawalad-on. Kini nakita sa labing madulaong paagi diha sa pag-uswag sa ilang gidaghanon. Gikan sa pipila ka libong dinihogan nga nag-alagad kang Jehova sa dihang siya mianha sa iyang templo niadtong 1918, sila midaghan hangtod karong adlawa; ang dinihogan kuyog sa ilang mga kaubanan, ang ubang karnero, nga may gidaghanon nga kapin sa upat ka milyon diha sa 211 ka lainlaing kayutaan. (Isaias 60:22) Kini sila usab gipanalanginan pinaagi sa walay hunong nga pagtubo diha sa pagsabot sa kamatuoran. Ang matagnaong pulong nahimong mas labaw nga kasaligan alang kanila. Ang ilang pagsalig sa katumanan sa mga katuyoan ni Jehova lig-ong natukod. (2 Pedro 1:19) Sila sa pagkatinuod usa ka katawhan nga “natudloan ni Jehova.”​—Isaias 54:13.

¹⁹ Pinaagi ni Malakias, si Jehova mitagna ug dugang mga panalangin: “Niadtong panahona silang nangahadlok kang Jehova nanagsulti sa usag usa, ang usa sa iyang kauban, ug si Jehova namati ug nagpatalinghog. Ug usa ka basahon sa handumanan gisulat sa atubangan niya alang kanilang may kahadlok kang Jehova ug alang kanilang nanagpalandong sa iyang ngalan.” (Malakias 3:16) Sa tanang mga organisasyon nga nangangkon nga Kristohanon, ang mga Saksi ni Jehova lamang ang nagpalandong sa iyang ngalan ug nagpahayag niana taliwala sa mga nasod. (Salmo 34:3) Pagkadako sa ilang kalipay tungod sa pasalig nga si Jehova magahinumdom sa ilang pagkamatinumanon!

20, 21. (a) Unsang bulahan nga relasyon ang gitagamtam sa tinuod nga mga Kristohanon? (b) Kon bahin sa Kristiyanidad, unsang kalainan ang nagkatin-aw ug nagkatin-aw?

²⁰ Ang dinihogang nanghibilin maoy linaing katawhan ni Jehova, ug ang dakong panon, nga nagaganayan sa pagpakig-uban kanila, nag-ani uban kanila sa mga panalangin sa putling pagsimba. (Zacarias 8:23) Pinaagi ni Malakias, si Jehova misaad: “‘Sila gayod mahimong akoa,’ si Jehova sa mga panon nag-ingon, ‘sa adlaw dihang ako magapatungha ug linaing kabtangan. Ug kaluy-an ko sila, sama gayod nga ang usa ka tawo magpakita ug kaluoy sa iyang anak nga nagaalagad kaniya.’” (Malakias 3:17) Pagkadakong panalangin nga si Jehova may mabinationg pagtagad kanila!

²¹ Sa pagkatinuod, ang kalainan tali sa tinuod nga mga Kristohanon ug sa bakak dugang ug dugang nga nagkadayag. Samtang ang katawhan ni Jehova naningkamot sa paghupot sa iyang mga sukdanan, ang Kakristiyanohan dugang ug dugang nga nagkaunlod sa yanang sa kahugawan niining kalibotana. Sa pagkatinuod, ang mga pulong ni Jehova napamatud-ang tinuod: “Kamong katawhan sa makausa pa dayag makakita sa kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.”​—Malakias 3:18.

22. Unsang mga panalangin nga kita makasalig sa pagtagamtam kon kita magpadayon sa pagdala sa tibuok ikapulo?

²² Sa dili madugay, ang adlaw sa panudya moabot alang sa mini nga mga Kristiyano. “‘Tan-awa! ang adlaw magaabot nga nagadilaab sama sa hudno, ug ang tanang mapahitas-on ug ang tanang nanagbuhat ug daotan mamahimong sama sa tuod. Ug ang adlaw nga nagsingabot sa tino magasunog kanila,’ si Jehova sa mga panon nag-ingon.” (Malakias 4:1) Ang katawhan ni Jehova nahibalo nga siya magapanalipod kanila nianang panahona, maingon nga siya nagpanalipod sa iyang espirituwal nga nasod balik niadtong 70 K.P. (Malakias 4:2) Pagkadako sa kalipay nila nga makabaton niana nga pasalig! Busa, hangtod nianang panahona pasagdi nga ang kada usa kanato magpakita sa atong apresasyon ug gugma kang Jehova pinaagi sa pagdala sa tibuok ikapulo ngadto sa balay-tipiganan. Unya kita masaligon nga siya magapadayon sa pagpanalangin kanato hangtod nga wala nay kawalad-on.

[Footnote]

Makasaysay Ka Ba?

◻ Sa modernong panahon, kanus-a si Jehova mianha sa templo kauban sa iyang sinugo sa pakigtugon?

◻ Kinsa ang matinumanon ug maalamong ulipon, ug unsang pagputli ang gikinahanglan nila pagkatapos sa 1918?

◻ Unsang matang sa espirituwal nga mga halad ang gidala sa tinuod nga mga Kristohanon kang Jehova?

◻ Unsang ikapulo nga ang mga Kristohanon gidapit sa pagdala ngadto sa balay-tipiganan?

◻ Unsang mga panalangin ang natagamtam sa katawhan sa Diyos pinaagi sa paghalad sa espirituwal nga ikapulo?

[Hulagway sa panid 15]

Ang atong espirituwal nga ikapulo naglakip sa paghalad sa atong kusog ug kahinguhaan sa pagpanukod ug mga Kingdom Hall

[Hulagway sa panid 16]

Tungod sa mga panalangin ni Jehova sa iyang katawhan, daghang mga pagpanukod ang gikinahanglan, lakip sa mga Kingdom Hall ug mga Assembly Hall