Magbawtismo! Magbawtismo! Magbawtismo!​—Apan Ngano?

“SA PIPILA lang ka bulan nakabawtismo akog kapin sa napulo ka libong lalaki, babaye, ug mga bata.” Matud sa sulat sa misyonaryong Heswita nga si Francis Xavier mahitungod sa iyang buluhaton sa gingharian sa Travancore, India. “Miadto ako gikan sa balangay ngadto sa balangay ug gihimo silang mga Kristiyano. Ug bisan diin ako moadto magbilin akog kopya sa atong mga pangadyeon ug mga kasugoan sa lumad nga pinulongan.”

Kay nahaylo pag-ayo sa mga sulat ni Francis Xavier, si Hari Juan sa Portugal nagmando nga kana basahon ug kusog sa kada pulpito sa tibuok niyang gingharian. Ang sulat nga pinetsahag Enero 1545 nga bag-o lang gikutlo giaprobahan gani aron ipublikar. Ang sangpotanan? “Sa wala madugay katunga sa mga estudyante sa Uropa, ang ‘nangluhod ug nanghilak,’ nga nagpahayag nga mangadto sa India ug kombertihon ang mga pagano,” sumala sa gisulat ni Manfred Barthel sa iyang librong The Jesuits​—History & Legend of the Society of Jesus. Siya midugang: “Ang ideya nga mahimong labaw pa sa pipila lang ka tigbindita ug usa ka puyo nga pulyeto ang gikinahanglan aron kombertihon ang tibuok gingharian morag wala mosantop sa hunahuna sa daghan niadtong panahona.”

Unsa ba gayod ang nalampos niadtong dinaghang pagkombertir? Ang Heswitang si Nicolas Lancilloto sa kamatinud-anon nagtaho sa Roma: “Kadaghanan niadtong nabawtismohan may tinagong motibo. Ang mga ulipon sa mga Arabo ug mga Hindu naglaom nga maangkon ang ilang kagawasan pinaagi niana o mapanalipdan gikan sa madaogdaogong agalon o sa yano aron makadawat ug bag-ong kupo o turbante. Daghan ang naghimo niana aron makalingkawas sa silot. . . . Ang bisan kinsa nga tinukmod sa ilang kaugalingong pagtuo sa pagpangitag kaluwasan diha sa atong mga pagtulon-an giisip nga mga buang. Daghan ang nag-apostata ug ningbalik sa ilang kanhing paganong mga batasan dili dugay tapos sa bawtismo.”

Ang tinguha sa pagkombertir ug pagbawtismo sa mga pagano gihunahuna usab sa Uropanhong mga tigsuhid niadtong panahona. Gikaingon nga si Christopher Columbus nagbawtismo sa unang “mga Indianhon” nga iyang nahibalag sa Caribbeano. “Ang opisyal nga polisa sa Korona sa Espanya nagbutang sa pagkombertir sa lumad nga populasyon sa unang dapit,” matud sa The Oxford Illustrated History of Christianity. “Pagkatapos sa ikanapulog-unom ka siglo, ang 7,000,000 mga Indian sa empiryo sa Espanya maoy, sa labing menos, mga Kristiyano sa ngalan. Sumala sa rekord sa daghang pagkombertir (si Pedro de Gante, paryente ni Emperador Charles V, nga mikuyog sa mga misyonaryo, nagsugilon nga nakabawtismo ug 14,000 sa usa ka adlaw sa tabang sa usa ka kauban), dayag nga walay gihimong pasiunang ugdang instruksiyon.” Ang maong salingkapaw nga mga pagkombertir sagad nga inubanan sa bagis, pintas, madaogdaogong pagtratar sa mga lumad.

Ang importansiya nga gibutang sa bawtismo nagdasig niining mga manunuhid ug mga misyonaryo sa pagpadayon. Niadtong 1439, si Papa Eugenius IV nagluwat ug mando panahon sa Konsilyo sa Florence nga nag-ingon: “Ang Balaang Pagbawtismo maoy una sa mga sakramento, kay kana ang pultahan sa espirituwal nga kinabuhi; tungod niana kita nahimong membro ni Kristo uban sa Simbahan. Ug kay pinaagi sa unang tawo ang kamatayon misulod sa tanan, gawas lang kon kita igaanak pag-usab sa tubig ug sa Espiritu Santo, dili kita makasulod sa gingharian sa Langit.”

Hinuon, mibangon ang panaglalis kon kansang bawtismo ang balido. “Kay kana mao usab ang pangunang seremonyas sa pagsulod sa komunidad sa simbahan, ang pagbawtismo sa madali giangkon nga katungod sa pipila ka magkaindig nga mga simbahan, nga ang matag usa nagtawag sa iyang kaugalingon nga ortodokso ug nagsumbong sa uban nga erehes ug naghimog sekta. Ang pag-usab sa mga seremonyas sa bawtismo sa nagkadaiyang mga sekta dili kalikayan,” matud sa The Encyclopedia of Religion.

Hinuon, ang batasan sa pagbawtismo una pa sa Kristohanong pagtuo. Kana gigamit sa Babilonya ug sa karaang Ehipto, diin ang tugnaw nga tubig sa Nilo giisip nga makadugang sa kusog ug mohatag ug imortalidad. Ang mga Grego usab nagtuo nga ang bawtismo makadalag pagkabata o makahatag ug imortalidad sa bag-ong dinawat. Ang Hudiyong sekta sa Qumran nagbawtismo aron sa pagdawat sa ilang komunidad. Ang mga Hentil nga nakombertir sa Hudaismo gibaoran nga magpatuli ug pito ka adlaw sa ulahi magpabawtismo pinaagig pagtuslob sa atubangan sa mga saksi.

Tataw, dakong importansiya ang gihatag sa bawtismo latas sa katuigan. Apan komosta na man karong adlawa? Kinahanglanon ba kana niining modernong mga panahon? Kon mao, ngano? Sa pagkatinuod, angay ka bang magpabawtismo?