Angay Ka Bang Magpabawtismo?

HAPIT usa ka milyong tawo ang nabawtismohan sa mga Saksi ni Jehova sa milabayng tulo ka tuig. Kini nag-aberids ug 824 kada adlaw, o 4 ka tawo ang bawtismohan kada 7 ka minutos. Kini ba sama ra sa relihiyosong kaukyab niadtong ika-15 ug ika-16 nga siglo?

Dili, kining mga indibiduwala wala pugsa nga magpabawtismo, ingong bahin sa dinaghang pagkombertir, o ingong resulta sa emosyonal nga pagdasig sa relihiyosong orador. Sila gibawtismohan tungod kay si Jesu-Kristo, ang Agalon ug Pangulo sa mga Kristohanon, nagsugo nga kana pagahimoon. Ilang gisunod ang mga lakang ug mga pamaagi nga gilaraw ni Jesus ug gituman sa mga apostoles nga iya mismong gipili ug gibansay.

Tapos sa pagkabanhaw ni Jesus ug sa wala pa siya mokayab sa langit, siya mihatag niining panamilit nga sugo sa iyang mga sumusunod: “Busa panglakaw kamo ug himoang mga tinun-an ang katawhan sa tanang nasod, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa konklusyon sa sistema sa mga butang.” (Mateo 28:19, 20) Sukad niadto paunahan, kini lamang ang bawtismo sa tubig nga may pag-uyon sa Diyos.

Busa, ang Bibliya nagatug-an kanato nga kadtong unang mga sumusunod ni Kristo nahimong “mga saksi ni [Jesus] sa Jerusalem ug sa tibuok Judea ug Samaria ug ngadto sa kinalay-ang bahin sa yuta.” (Buhat 1:8) Ingon sa gitagna ni Jesus, ang ilang pagwali ug pagpanudlo nga buluhaton misangpot sa pagbawtismo sa mga magtutuo nga nahimo usab nga mga sumusunod ni Kristo.

Ang unang natala nga pananglitan niini nahitabo sa Jerusalem sa adlaw sa Pentekostes 33 K.P. Niadtong panahona si apostol Pedro “mibarog uban sa napulog-usa” ug nagwali sa nagkapundok nga panon mahitungod kang Jesus ang Mesiyas. Ang asoy nagpahayag kanato nga tungod sa iyang pakigpulong ‘nasakit sila sa kasingkasing,’ ug nangutana sila kon unsay angay nilang himoon. “Paghinulsol, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala,” matud ni Pedro. Ang resulta mao nga “kadtong sa kinasingkasing midawat sa iyang pulong gibawtismohan, ug niadtong adlawa mga tulo ka libo ka kalag ang nadugang.” (Buhat 2:14-41) Ang sunod nga mga asoy nagpamatuod nga ang pagbawtismo sa mga tinun-an giunhan sa ilang pagkadungog sa Kristohanong mensahe, pagtuo sa maayong balita, ug paghinulsol.​—Buhat 8:12, 13, 34-38; 10:34-48; 16:30-34; 18:5, 8; 19:1-5.

Sa Unsang Paagi?

Apan sa unsang paagi kining bag-ong mga tinun-an pagabawtismohan sa tubig? Kana ba pinaagi sa aspersion (pagwisik), affusion (pagbubo sa ulo), o immersion (bug-os nga pagtuslob)? Unsay gipakita sa talaan sa Bibliya? Sanglit kay si Jesus nagbilin kanato ug hularan aron atong “sundon nga suod ang iyang mga tunob,” sa unsang paagi siya gibawtismohan?​—1 Pedro 2:21.

Ang Bibliya nagpakita nga si Jesus gibawtismohan sa Jordan, usa ka dakong suba. Tapos sa bawtismo, siya “mihaw-as gikan sa tubig.” (Marcos 1:10; Mateo 3:13, 16) Busa si Jesus sa aktuwal natuslob sa Subang Jordan. Siya gibawtismohan ni Juan, kinsa, sa pagpangitag maayong dapit sa pagpamawtismo, nagpili sa usa ka dapit sa Walog sa Jordan duol sa Salim “tungod kay adunay daghang tubig didto.” (Juan 3:23) Ang kamatuoran nga ang bug-os nga pagtuslob sa tubig mao ang dinawat nga batasan taliwala sa mga sumusunod ni Jesus masabtan diha sa mga pulong sa Etiopianhong eunuko. Kay misanong sa pagtudlo ni Filipe, siya mituwaw: “Tan-awa! Usa ka dakong tubig; unsay nakapugong kanako nga mabawtismohan?” Unya atong mabasa nga “silang duha nangadto sa tubig” ug human niadto “mihaw-as gikan sa tubig.”​—Buhat 8:36-39.

Ang sekular ba nga kasaysayan nagpunting usab sa batasan sa pagbawtismo pinaagig pagtuslob taliwala sa mga Kristohanon? Sa pagkatinuod kana nagpunting. Ug makaiikag nga timan-an nga daghan pang dulang sa bawtismo nga haom sa pagtuslob ang naglungtad sa ubay-ubayng kayutaan. “Dili malalis ang arkeolohikanhong ebidensiya nga nagapamatuod sa pagtuslob ingong kasagarang paagi sa pagbawtismo sa unang napulo hangtod napulog-upat ka siglo,” matud sa basahong Ministry. Kana nagdugang: “Taliwala sa kagun-oban sa unang mga tinukod sa Kristohanon, ug usab sa karaang mga simbahan nga gigamit pa, ang kasaysayan sa Kristohanong bawtismo mahimong subayon. Ang mga dibuho diha sa mga lubnganan ilalom sa yuta ug mga simbahan, mga dibuho sa salog, mga bungbong, ug kisame, nagaulbong mga kinulit, ug mga drowing sa karaang Bag-ong Testamento nga mga manuskrito nagdugang ug mga detalye niining kasaysayana . . . Kini maoy dugang sa ebidensiya nga nakita sa tanang sinulat sa mga amahan sa simbahan nga pagtuslob ang naandang paagi sa unang simbahan sa pagpamawtismo.”

Angkon sa New Catholic Encyclopedia: “Tataw nga ang Bawtismo sa unang Simbahan maoy pinaagig pagtuslob.” Nan, dili katingad-an nga atong makaplagan sa mga ulohan sa mantalaan ang sama niini: “Gibalik sa mga Katoliko ang Pagtuslob nga Bawtismo” (The Edmonton Journal, Canada, Septiyembre 24, 1983), “Bawtismo Pinaagi sa Pagtuslob Napopular sa mga Katoliko Dinhi” (St. Louis Post-Dispatch, Abril 7, 1985), “Daghang Katoliko Mipilig Pagtuslob nga Bawtismo” (The New York Times, Marso 25, 1989), ug “Pagtuslob nga Bawtismo Gibalik” (The Houston Chronicle, Agosto 24, 1991).

Sa Unsang Katuyoan?

Nganong gisugo ni Jesus nga bawtismohan ang iyang mga tinun-an? Sa pagkatinuod, kana maoy haom nga simbolo sa ilang tibuok-kasingkasing nga pagpahinungod sa Diyos. Ang “maayong balita” kinahanglang iwali sa tibuok yuta, ug pagahimoong mga tinun-an “ang katawhan sa tanang nasod.” (Mateo 24:14; 28:19) Kini nagkahulogan nga ang Diyos wala na makiglabot sa Hudiyong nasod lamang, nga gilangkoban sa mga tawo nga napahinungod kaniya sukad sa pagkahimugso. Si Cornelio ug iyang pamilya maoy unang mga Hentil, o dili-Hudiyo, nga midawat sa kamatuoran mahitungod kang Jesu-Kristo ug nabawtismohan.

Ang pagtuslob sa tubig nagpakita nga kadtong gibawtismohan namatay sa dalan sa kinabuhi nga nasentro sa ilang kaugalingon. Ang ilang paghaw-as gikan sa tubig nagsimbolo nga sila karon nabuhi na sa pagtuman sa kabubut-on sa Diyos ug nag-una niana sa ilang mga kinabuhi, sama sa gihimo ni Jesus. (Mateo 16:24) Ang mabawtismohan “sa ngalan sa Amahan ug sa Anak ug sa balaang espiritu” nagpaila nga sila nakakat-on ug midawat sa kamatuoran mahitungod sa kada usa niini ug nakaila kanila sa ilang pagkamao. (Mateo 28:19; itandi ang Buhat 13:48.) Ang bawtismo mao lamang ang unang tikang sa pagsugot sa Diyos ug pagpasakop sa iyang kabubut-on.

Ang Kasulatan wala magpaluyo sa kaylap relihiyosong pagtuo nga ang bawtismo usa ka sakramento, nga mao, usa ka relihiyosong seremonyas nga nagadalag merito​—grasya, pagkabalaan, o espirituwal nga kaayohan—​sa usa nga nabawtismohan. Pananglitan, ang papadong lagda ni Papa Eugenius IV nga gikutlo sa gisundang artikulo nagkanayon mahitungod sa bawtismo: “Ang epekto niining sakramentoha mao ang kapasayloan sa sala, orihinal ug aktuwal; ingon usab sa tanang silot nga igapahamtang sa sala. Ingong sangpotanan, dili kinahanglan nga bayran ang miaging mga sala niadtong nabawtismohan; ug kon sila mamatay sa dili pa makahimog bisan unsang sala, sila mokayab dayon sa gingharian sa langit ug makakita sa Diyos.”

Hinuon, si Jesus gibawtismohan bisag siya “wala makasala.” (1 Pedro 2:22) Dugang pa, sumala sa Kasulatan, ang sala mapasaylo lamang pinaagi sa halad lukat ni Jesu-Kristo. Si Ananias miaghat kang Saulo sa Tarso: “Tindog, magpabawtismo ug hugasi ang imong mga sala pinaagi sa imong pagtawag sa iyang [Jesus] ngalan.” (Buhat 22:12-16) Oo, ang kaluwasan posible lamang pinaagi sa giulang dugo ni Jesus ug pinaagi sa “pagtawag sa iyang ngalan” diha sa pagtuo.​—Hebreohanon 9:22; 1 Juan 1:7.

Nan, unsa na man ang mga pulong ni Pedro sa 1 Pedro 3:21? Didto siya miingon: “Kanang nagtumbas niini sa karon usab nagaluwas kaninyo, sa ato pa, ang bawtismo, (dili ang paghugas sa buling sa lawas, apan ang paghangyo sa Diyos alang sa maayong tanlag,) pinaagi sa pagkabanhaw ni Jesu-Kristo.” Gitandi ni Pedro ang bawtismo sa kasinatian ni Noe sa pagkaluwas sa Lunop. (Bersikulo 20) Si Noe, kay nagpakitag bug-os nga pagtuo sa Diyos, nagtukod sa arka alang sa kaluwasan sa iyang pamilya. (Hebreohanon 11:7) Sa susama, pinaagi sa pagpakitag pagtuo kang Jehova nga Diyos ug sa iyang tagana alang sa kaluwasan pinaagi ni Kristo Jesus, ang mga tawo karong adlawa mahimong maluwas gikan niining presenteng daotang kalibotan. Sila usab kinahanglang molihok sumala nianang pagtuoha. Pinaagi sa paghinulsol sa mga sala, pagliso gikan sa sayop nga dalan, ug paghimog walay-panaganang dedikasyon kang Jehova nga Diyos diha sa pag-ampo, ang hangyo gihimo ngadto sa Diyos alang sa usa ka maayong tanlag. Apan pinasikad sa halad ni Jesus, ug sa iyang pagkabanhaw nga pinaagi niana iyang gitanyag ang bili sa maong halad ngadto sa Diyos sa langit, nga ang mga sala mapasaylo ug ang kaluwasan maposible.​—1 Pedro 3:22.

Unsay Imong Buhaton?

Ikaw ba dugay nang nakig-uban sa mga Saksi ni Jehova? Tingali nakahimo ka nag gikinahanglang mga kausaban sa imong kinabuhi sumala sa mga prinsipyo sa Bibliya apan wala pa makahimog mga lakang sa pagpahinungod ug pagpabawtismo. Mahimong gusto nimong tumanon ang kabubut-on sa Diyos, apan basin nahadlok ka nga ang bawtismo maghatag nimog obligasyon. Busa, basin pilion nimong likayan lang una ang maong responsabilidad ug tulobagon. Hapit 11.5 ka milyong tawo ang mitambong sa pagsaulog sa Panihapon sa Ginoo sa miaging tuig. Hinuon, ang kinatas-ang ihap niadtong nakig-ambit sa buluhatong pagwali sa maayong balita sa tibuok tuig kulang sa 4.5 ka milyon. Kini nagkahulogan nga mga pito ka milyong tawo ang nagpakitag apresasyon alang sa kamatuoran sa Diyos, bisan pag sila dili bawtismadong mga Saksi ni Jehova. Siyempre, ang pila niini mga batan-ong anak ug bag-ong mga interesado. Apan ang pila niadtong nakigbahin sa buluhatong pagwali wala pa usab mabawtismohi. Daghang tawo ang nakakuhag tukmang kahibalo sa Bibliya apan wala pa magpahimulos sa bug-os sa ilang kaugalingon sa tagana sa Diyos alang sa kaluwasan pinaagi sa pagpabawtismo.

Usa ka importanteng punto nga hinumdoman mao nga ang kahibalo sa gikinahanglan sa Diyos kanimo maoy nagadalag tulubagon. “Kon ang usa nasayod kon unsaon sa pagbuhat sa matarong apan wala kana buhata, kana usa ka sala alang kaniya,” matud sa Santiago 4:17. Ang Ezekiel 33:7-9 nagpakita nga ang usa ka tawo nga gitudloan sa mga kasugoan ug mga instruksiyon sa Diyos maoy obligado sa pagtuman niana. Busa ang pangutana mao kon kaha ang usa may sinserong gugma sa Diyos ug usa ka tinuod nga tinguha sa pagpahimuot kaniya. Ang tawo nga sa pagkatinuod may ingon nga gugma ug buot ug linaing relasyon uban kang Jehova nga Diyos dili magpanuko sa pagpahinungod sa iyang kinabuhi ngadto kaniya. Ang bawtismo mao ang panggawas nga simbolo nianang maong pagpahinungod. Kana usa ka kinahanglanong lakang alang sa kaluwasan. Ang matuod nga mga magtutuo magpabawtismo.​—Buhat 8:12.

Ang kahibulongang mga kalaoman nga gitagana sa Diyos alang sa matinumanon, dedikadong mga indibiduwal sa umaabot nga bag-ong kalibotan dili gayod matumbasan sa bisan unsang temporaryong mga bentaha nga morag mahatag niining daotang karaang sistema sa mga butang. Ang kahadlok sa isigkatawo mawala sa dihang atong hunahunaon ang gamhanang kamot sa Diyos. (1 Corinto 10:22; 1 Pedro 5:6, 7) Tinuod, kini mao ang panahon sa pagpangutana sa imong kaugalingon, sama sa pagpangutana sa Etiopianhong eunuko kang Filipe: “Unsay nakapugong kanako nga mabawtismohan?”

[Hulagway sa panid 7]

Sama sa Etiopianhong eunuko, imo bang gipangutana ang imong kaugalingon: “Unsay nakapugong kanako nga mabawtismohan?”