Unsay Gikinahanglan Aron Ikaw Mahimong Malipayon?

ANG mga politikong napili sa mga tawo naningkamot pag-ayo sa paghimo sa maong mga tawo nga malipayon. Dayag, ang ilang mga trabaho nagdepende niana. Apan ang usa ka mantalaan naghisgot mahitungod sa “usa ka nalugda ug walay-pakabana nga pumipili” sa Polandiya. Usa ka manunulat nagpatin-aw nga ang Tinipong Bansa maoy usa ka sosyedad nga “napuno sa pagkawalay-pagsalig sa pormal nga politika.” Ang laing manunulat nagtug-an kanato mahitungod sa “nagatubo nga pagkawalay-pakabana sa politika sa Pransiya.” Ang maong kaylap nga pagkawalay-pakabana ug pagkadiskontento​—nga dili lamang nahitabo niining tulo ka nasod—​nagsugyot nga ang mga politiko napakyas sa ilang paningkamot sa paghimo sa mga tawo nga malipayon.

Ang relihiyosong mga lider nagsaad usab ug kalipay, kon dili niining kinabuhia, nan labing menos sa umaabot nga kinabuhi. Gipasukad nila kini sa hunahuna nga ang mga tawo adunay dili mamatay o mobalhin nga kalag, usa ka ideya nga tungod sa daghang mga katarongan gisalikway sa daghang mga tawo ug tin-awng gisupak sa Bibliya. Ang walay-sulod nga mga simbahan ug nagkadiyutay nga membro nagpakita nga minilyon ang wala na mag-isip sa relihiyon nga kinahanglanon alang sa kalipay.​—Itandi ang Genesis 2:7, 17; Ezekiel 18:4, 20.

Wala-Matagbaw nga mga Mahigugmaon sa Salapi

Kon dili sa politika o sa relihiyon, asa makaplagi ang kalipay? Tingali sa natad sa komersiyo? Kini usab nag-angkon nga makatagana ug kalipay. Kini nagpresentar sa mga argumento nga dapig niini pinaagi sa paanunsiyo, nga tin-awng nag-ingon: Ang kalipay naggikan sa pagbaton sa tanang materyal nga mga butang ug mga serbisyo nga mapalit sa salapi.

Ang gidaghanon sa mga tawo nga nangitag kalipay niining paagiha dayag nga nagatubo. Daghang mga katuigan kanhi gikataho nga 50 porsiyento sa mga panimalay sa Alemanya nagumon sa utang. Nan, dili ikahibulong, nga ang iladong mantalaang Aleman nga Die Zeit nagtagna nga “kadaghanan [kanila] walay bisan gamayng purohan nga makalingkawas sa utang.” Kini nagpatin-aw: “Sayon kaayo ang pagkobra ug sobra sa limite nga kanunayng gitagana sa banko kanimo​—ug lisod kaayo nga makagula sa lit-ag sa pagkautangan.”

Susama usab ang kahimtang sa ubang naindustriyalisar kaayong mga nasod. Pipila ka katuigan kanhi, si David Caplovitz, usa ka sosyologo sa City University of New York, nagbanabana nga sa Tinipong Bansa, tali sa 20 ka milyon ug 25 ka milyong panimalay ang nagumon sa utang. “Ang mga tawo nalunod sa utang,” siya nag-ingon, “ug kana nagadaot sa ilang kinabuhi.”

Dili gayod kana matawag nga kalipay! Apan kita ba magdahom sa kalibotan sa komersiyo nga makapalampos kon unsay tin-awng wala mapalampos sa duha (politika ug relihiyon)? Ang adunahang Haring Solomon kanhi misulat: “Kadtong nahigugma sa salapi dili matagbaw sa salapi, ni kadtong nahigugma sa bahandi matagbaw sa kinitaan. Kini usab kakawangan.”​—Ecclesiastes 5:10.

Ang pagpangitag kalipay diha sa materyal nga mga kabtangan sama ra sa pagtukod ug mga kastilyo sa kahanginan. Tingali makapaukyab ang pagtukod kanila, apan ikaw makabatog mga suliran kon ikaw mosulay sa pagpuyo diha kanila.

Makab-ot ang Kalipay Apan sa Unsang Paagi?

Ang apostol Pablo nagtawag kang Jehova “ang malipayong Diyos.” (1 Timoteo 1:11) Pinaagi sa paglalang sa mga tawo diha sa iyang dagway, ang malipayong Diyos naghatag usab kanila sa katakos nga malipay. (Genesis 1:26) Apan ang ilang kalipay nagdepende sa ilang pag-alagad sa Diyos, ingon sa gipakita sa salmista: “Malipayon ang katawhan kansang Diyos mao si Jehova!” (Salmo 144:15b) Mas masabtan kon unsay nalakip sa atong pag-alagad sa Diyos ug sa unsang paagi ang atong pag-alagad motultol sa tinuod nga kalipay kon atong tagdon ang pipila sa 110 ka dapit sa New World Translation diin ang mga pulong “malipayon” ug “kalipay” makita.

Pag-ila sa Espirituwal nga mga Panginahanglan

Si Jesu-Kristo, ang Anak sa Diyos, nag-ingon sa iyang bantog nga Wali sa Bukid: “Malipayon kadtong mahunahunaon sa ilang espirituwal nga panginahanglan.” (Mateo 5:3) Ang kalibotan sa komersiyo naningkamot sa paglingla kanato sa paghunahuna nga ang pagpalit ug luhong mga gamit igo na alang sa kalipay. Kini nagtug-an kanato nga ang kalipay maoy pagbaton ug kompiyuter sa balay, video camera, telepono, kotse, kinaulahiang mga kagamitan sa esports, nausong mga sinina. Ang wala isulti niana kanato mao nga tinagpulo ka milyong tawo sa kalibotan nakulangan niining mga butanga apan nagmalipayon. Bisan pag kini lagmit naghimo sa kinabuhi nga mas hamugaway ug kombenyente, kining mga butanga dili kinahanglanon alang sa kalipay.

Sama kang Pablo, kadtong mahunahunaon sa ilang espirituwal nga panginahanglan nag-ingon: “Kon kita adunay makaon ug ikabisti, magmatagbaw kita niining mga butanga.” (1 Timoteo 6:8) Ngano? Tungod kay ang pagtagbaw sa espirituwal nga mga panginahanglan maoy motultol sa kinabuhing walay kataposan.​—Juan 17:3.

Sayop ba ang pagpahimulos sa maayong mga butang kon kita adunay salapi nga ikapalit kanila? Lagmit dili. Sa gihapon, makapalig-on sa atong espirituwalidad ang pagkat-on nga dili magpatuyang sa tanang kapritso o mopalit sa usa ka butang tungod kay kita makaarang niana. Sa ingon niana kita makakat-on sa pagkakontento ug makahupot sa kalipay, sama kang Jesus, bisan pa kon ang kahimtang niya sa ekonomiya dili mao ang labing maayo sumala sa sukdanan sa kalibotan. (Mateo 8:20) Ug si Pablo wala magpahayag ug kasubo sa dihang siya misulat: “Ako nakakat-on, sa pagpahiigo sa akong kaugalingon, sa bisan unsang kahimtang nga akong nahimutangan. Ako makamaong magkinabuhi sa kakabos, ako makamao usab nga magkinabuhi sa kadagaya. Sa bisan unsa ug sa tanang kahimtang ako nakakat-on sa sekreto sa unsang paagi mahimutang sa kabusog ug sa pagkagutom, sa kadagaya ug sa kawalad-on.”​—Filipos 4:11, 12.

Ang Pagsalig Kang Jehova

Ang pagkamahunahunaon sa espirituwal nga panginahanglan sa usa nagpakita ug pagkaandam sa pagsalig sa Diyos. Kini maghatag ug kalipay, sumala sa gisaysay ni Haring Solomon: “Malipayon ang tawo nga nagasalig kang Jehova.”​—Proverbio 16:20.

Ugaling, dili ba usa ka kamatuoran, nga daghang tawo labawng nagsalig sa salapi ug sa mga kabtangan kay sa Diyos? Nga gilantaw niining maong baroganan, walay mas di-tukmang dapit nga ipakita ang sanglitanan “Sa Diyos Kami Nagasalig” kay sa salapi, bisan kon ang maong pahayag makita sa salapi sa T.B.

Si Haring Solomon, kinsa wala makulangi sa maayong mga butang nga mapalit sa salapi, nakaamgo nga ang pagsalig sa materyal nga mga butang dili motultol sa dumalayong kalipay. (Ecclesiastes 5:12-15) Ang salapi sa bangko mahanaw pinaagi sa pagkabangkaruta sa bangko o pinaagi sa implasyon. Ang balay ug yuta maguba sa makusog nga mga bagyo. Ang mga polisa sa seguro, samtang sa bahin nagailis sa mga napilding kabtangan, dili gayod makatumbas sa emosyonal nga kapildihan. Ang mga stocks ug bonds dihadiha mahimong walay bili sa kalit nga pagkahugno sa stock market. Bisan ang maayog-suweldong trabaho mahimong​—sa daghang katarongan—​anaa karong adlawa ug mawala ugma.

Tungod niining mga katarongan siya nga nagsalig kang Jehova nakasabot sa kaalam sa pagpamati sa pasidaan ni Jesus: “Ayaw kamo pagtigom alang kaninyo ug mga bahandi dinhi sa yuta, diin ang tangkob ug taya nagakutkot, ug diin ang mga kawatan nagapanakasaka ug nagapangawat. Hinunoa, pagtigom alang kaninyo ug mga bahandi sa langit, diin walay tangkob ni taya nga magakutkot, ug diin walay mga kawatan nga magapanakasaka.”​—Mateo 6:19, 20.

May molabaw pa bang pagbati sa kasegurohan ug kalipay kay sa pagkasayod nga ang usa nagbutang sa iyang pagsalig sa Labing Gamhanang Diyos, kinsa kanunayng nagtagana?​—Salmo 94:14; Hebreohanon 13:5, 6.

Pagdawat sa Langitnong Pagbadlong

Ang tambag, bisan pagbadlong, mahinangpong dawaton sa dihang gihatag sa usa ka matuod nga higala diha sa espiritu sa gugma. Ang usa ka nag-angkong higala sa alagad sa Diyos nga si Job kas-a nagpakamatarong-sa-kaugalingon nga nagsulti kaniya: “Malipayon ang tawo nga pagabadlongon sa Diyos.” Bisan matuod ang gipamulong, ang gipasabot ni Eliphaz niining mga pulonga​—nga si Job sad-an sa usa ka seryosong sala—​kadto dili matuod. ‘Pagkasamokang maglilipay’! Bisan pa, sa dihang si Jehova sa ulahi nagbadlong kang Job sa mahigugmaong paagi, mapainubsanong gidawat ni Job ang pagbadlong ug nagbutang sa iyang kaugalingon sa dalan sa labawng kalipay.​—Job 5:17; 16:2; 42:6, 10-17.

Karong adlawa, ang Diyos dili makigsulti sa iyang mga alagad nga direkta sama sa iyang gibuhat ngadto kang Job. Hinuon, siya nagbadlong kanila pinaagi sa iyang Pulong ug sa iyang tinultolan-sa-espiritung organisasyon. Bisan pa niana, ang mga Kristohanon nga nangagpas sa materyalistikanhong mga intereses, kasagaran walay panahon, kusog, o hilig sa pagtuon nga regular sa Bibliya ug pagtambong sa tanang mga tigom nga gitagana sa organisasyon ni Jehova.

Ang tawo nga gibadlong sa Diyos, sumala sa Proverbio 3:11-18, nakaamgo sa kaalam sa pagdawat sa maong pagbadlong: “Malipayon ang tawo nga nakakaplag sa kaalam, ug ang tawo nga nakakab-ot sa pagsabot, kay ang pagbaton niana ingon nga ganansiya mas maayo pa kay sa pagbaton ug salapi ingon nga ganansiya ug ang kaayohan niini labaw pa kay sa bulawan. Kini labi pang bililhon kay sa mga korales, ug ang tanang ubang butang nga gikalipayan nimo dili ikatandi niana. Ang hataas nga mga adlaw anaa sa kamot nga tuo niini; diha sa kamot nga wala niini anaa ang bahandi ug kadungganan. Ang mga dalan niini maoy mga dalan nga kahimut-anan, ug ang tanan niining alagianan maoy pakigdait. Kini maoy kahoy sa kinabuhi kanila nga mokupot niini, ug malipayon ang magahawid niini.”

Pagkahimong Putli ug Mahigugmaon-sa-Kalinaw

Si Jesus nagbatbat sa malipayong katawhan ingon nga “putli sa kasingkasing” ug “makigdaiton.” (Mateo 5:8, 9) Apan sa kalibotan nga nagdasig ug materyalistikanhong estilo-sa-kinabuhi, pagkasayon alang sa hakog, tingali bisan mahugaw, nga mga tinguha nga mogamot sa atong mga kasingkasing! Kon dili magiyahan sa langitnong kaalam, pagkasayon alang kanato nga malingla pa gani ngadto sa pagpangita sa pinansiyal nga kauswagan pinaagi sa katahapang mga paagi nga magdaot sa makigdaitong relasyon sa uban! Makataronganon, ang Bibliya nagpasidaan: “Kay ang gugma sa salapi mao ang gamot sa tanang pagkadaotan, ug tungod sa pagpangab-ot niining gugmaha ang pipila nanghisalaag gikan sa pagtuo ug ilang gipalagbaslagbasan ang ilang kaugalingon sa daghang kasakitan.”​—1 Timoteo 6:10.

Ang gugma sa salapi nagpasiugda ug panghunahuna sa pag-una sa kaugalingon nga nagpasiugda sa pagkadili-tagbaw, pagkadili-mapasalamaton, ug kadalo. Aron sa pagpugong sa paglambo nianang sayop nga espiritu, sa dili pa mohimo ug dagkong mga desiyon maylabot sa panalapi ang pipila ka Kristohanon mangutana sa ilang kaugalingon sa mga pangutana sama sa: Tinuod ba akong nagkinahanglan niana? Labaw ba akong nagkinahanglan niining mahalong butang o niining maayog-suweldo, makahurot-sa-panahon nga trabaho kay sa uban minilyong katawhan kinsa wala niana? Dili ba mas maayo nga gastohon ang akong salapi o ang akong panahon sa pagpalapad sa akong pagpakig-ambit sa matuod nga pagsimba, sa pagpaluyo sa tibuok-kalibotang pagsangyawng bulohaton, o sa pagtabang sa mga tawo nga naglisod kay kanako?

Pagpakita ug Paglahutay

Usa sa mga pagsulay nga napugos si Job sa paglahutay mao ang kalisod sa ekonomiya. (Job 1:14-17) Ingon sa gipakita sa iyang panig-ingnan, ang paglahutay gikinahanglan sa matag bahin sa kinabuhi. Ang pipila ka Kristohanon kinahanglang moantos sa paglutos; ang uban, sa pagsulay; ug ang uban, sa dili maayong kahimtang sa ekonomiya. Apan ang bisan unsang matang sa paglahutay pagagantihan ni Jehova, ingon sa gisulat sa Kristohanong disipulong Santiago maylabot kang Job: “Among gitawag nga malipayon ang tanang nanaglahutay.”​—Santiago 5:11.

Ang pagpasagad sa espirituwal nga mga intereses aron moarang-arang ang atong kahimtang sa ekonomiya tingali magdala ug temporaryong kahupayan, apan makatabang ba kini sa pagpasanag sa atong panglantaw sa dumalayong ekonomikanhong kahupayan ubos sa Gingharian sa Diyos? Kana ba angay nga pangarisgaran?​—2 Corinto 4:18.

Pagkaplag ug Kalipay Karon ug sa Walay Kataposan

Ang pipila ka tawo tatawng nagsupak sa panglantaw ni Jehova kon unsay gikinahanglan aron sa paghimo sa mga tawo nga malipayon. Kay wala makita ang dumalayong mga kaayohan, wala sila makakita ug dihadihang personal nga bentaha sa pagbuhat kon unsay gitambag sa Diyos. Napakyas sila sa pagkaamgo nga ang pagsalig sa materyal nga mga butang kakawangan ug motultol sa kapakyasan. Ang magsusulat sa Bibliya tukmang nangutana: “Sa dihang ang maayong mga butang modaghan, ang magakaon kanila tinong magadaghan. Ug unsa may bentaha sa dakong tag-iya kanila, gawas sa pagtan-aw kanila sa iyang mga mata?” (Ecclesiastes 5:11; tan-awa usab ang Ecclesiastes 2:4-11; 7:12.) Pagkadaling mahanaw ang interes ug ang mga butang nga atong gihunahunang kinahanglang atong mabatonan tagoan lamang ug hikalimtan!

Ang usa ka matuod nga Kristohanon dili motugot sa iyang kaugalingon nga mapiit ngadto sa pagpaningkamot nga dili maiwit sa iyang mga silingan maylabot sa materyal nga mga butang. Siya nasayod nga ang matuod nga bili gisukod, dili sa kon unsay nabatonan sa usa ka tawo, apan kon unsa siya. Walay pagduhaduha diha sa iyang hunahuna kon unsay gikinahanglan aron mahimong malipayon ang usa ka tawo​—tinuod nga malipayon: nagtagamtam sa maayong relasyon uban kang Jehova ug padayong puliki sa pag-alagad Kaniya.

[Hulagway sa panid 20]

Ang materyal nga mga butang lamang dili gayod magdala ug dumalayong kalipay

[Hulagway sa panid 22]

Ang Bibliya nag-ingon: “Malipayon kadtong mahunahunaon sa ilang espirituwal nga panginahanglan”