Mga Pangutana Gikan sa mga Magbabasa

Si Juan ba nga nagbawtismo kang Jesus pagatawgon nga “Juan ang Bawtista” o “Juan ang Tigbawtismo”?

Ang duha ka ngalan husto ug gipaluyohan sa Bibliya.

Si Juan “magaandam alang kang Jehova ug usa ka katawhan nga inandam,” nga iyang gibuhat pinaagi sa “pagwali sa bawtismo agig simbolo sa paghinulsol alang sa kapasayloan sa mga sala.” (Lucas 1:17; 3:3) Si apostol Mateo misulat: “Si Juan ang Bawtista nagwali sa kamingawan sa Judea, nga nag-ingon, ‘Paghinulsol kamo, kay ang gingharian sa mga langit haduol na.’ . . . Unya ang Jerusalem ug ang tibuok Judea . . . nangadto kaniya, ug ang mga tawo iyang gibawtismohan sa Suba sa Jordan, nga sa dayag nagsugid sa ilang mga sala.”​—Mateo 3:1-6.

Matikding si Mateo nagpaila kang Juan ingong “ang Bawtista.” Si Mateo, si kinsa lagmit nagpahaom sa iyang asoy ngadto sa mga Hudiyo, mibati nga ang mga Hudiyo nakaila kon kinsa “ang Bawtista.” Iyang gigamit ang “ang Bawtista” ingong usa ka matang sa bansagon. Si Jesus ug ang iyang mga tinun-an migamit sa “Juan ang Bawtista,” ingon man ang mga sulugoon ni Herodes.a​—Mateo 11:11, 12; 14:2; 16:14.

Ang tinun-ang si Marcos mitaho sa susamang paggamit sa “ang Bawtista.” (Marcos 6:25; 8:28) Apan sa dihang gipailaila si Juan, si Marcos nagtawag kaniyang “Juan ang tigbawtismo.” (Marcos 1:4) Ang Gregong gigamit sa Marcos 1:4 lahi ug diyutay sa iya sa ubang mga bersikulo. Ang Marcos 1:4 mahubad usab nga “ang usang nagbawtismo.” Si Marcos nagpasiugda kon unsay gibuhat ni Juan; siya ang nagbawtismo, ang tigbawtismo.

Hinuon, mopatim-aw nga dili kinahanglang hatagan natog kalainan kining mga paagiha sa pagtawag kang Juan. Sa Marcos 6:24, 25, kita makabasa bahin kang Salome: “Siya migula ug miingon ngadto sa iyang inahan: ‘Unsa bay akong pangayoon?’ Siya miingon: ‘Ang ulo ni Juan ang tigbawtismo.’ Dihadiha midali siya sa pagsulod ngadto sa hari ug nangayo siya, nga nag-ingon: ‘Gusto ko nga karon dayon ihatag mo kanako ang ulo ni Juan ang Bawtista.’” Ang duha ka ngalan giilis-ilis sa paggamit.

Ang pila ka tawo tingali magsabot sa “ang Bawtista” sumala sa ikaduhang kabatbatan diha sa usa ka diksiyonaryo: “Usa ka membro o sumusunod sa usa ka ebanghelikal Protestanteng denominasyon nga tiniman-an sa paagi sa pamunoan sa kongregasyon ug sa bawtismo pinaagi sa pagtuslob sa mga magtutuo lamang.” Si Juan dili sama niana.

Busa, ang “Juan ang Bawtista” ug “Juan ang Tigbawtismo” maoy husto ug angay.

[Footnote]