“Susiha Ako, Oh Diyos”
“Susiha ako, Oh Diyos, ug hibaloi ang akong kasingkasing. . . . Tultoli ako sa dalan nga walay kataposan.”—SALMO 139:23, 24.
1. Sa unsang paagi si Jehova nakiglabot sa iyang mga alagad?
KITANG tanan gustong pakiglabotan sa usa nga masinabuton, usa nga nagatagad sa atong mga kahimtang, usa nga motabang kanato sa dihang kita masayop, usa nga dili mangita ug labaw kay sa atong mahimo. Si Jehova nga Diyos nakiglabot sa iyang mga alagad nianang paagiha. Ang Salmo 103:14 nagaingon: “Kay siya nahibalo sa atong kahimtang, nga nahinumdom nga kita mga abog lamang.” Ug si Jesu-Kristo, kinsa sa hingpit nagsumbalik-silaw sa iyang Amahan, mainitong nagadapit: “Umari kamo, kamong tanan nga nabudlayan ug nabug-atan, ug papahulayon ko kamo. Isangon ang akong yugo diha kaninyo [o, “Mopailalom sa akong yugo,” potnot] ug makakat-on gikan kanako, kay ako malumo ug mapaubsanon sa kasingkasing, ug kamo makakaplag ug kapahulayan sa inyong mga kalag. Kay ang akong yugo maayo ug ang akong lulan magaan.”—Mateo 11:28-30.
2. Itandi ang panglantaw ni Jehova nianang iya sa mga tawo mahitungod kang (a) Jesu-Kristo, ug (b) sa mga sumusunod ni Kristo.
2 Kasagaran ang panglantaw ni Jehova sa iyang mga alagad lahi kaayo gikan nianang iya sa mga tawo. Siya nagatan-aw sa mga butang gikan sa lahi nga baroganan ug nagatagad sa mga bahin nga mahimong wala masayri sa uban. Sa dinhi si Jesu-Kristo sa yuta, siya “gitamay ug gilikayan sa mga tawo.” Kadtong wala motuo kaniya ingong Mesiyas “nagtan-aw kaniya nga walay hinungdan.” (Isaias 53:3; Lucas 23:18-21) Apan, sa mga mata sa Diyos, siya mao ang “Anak [sa Diyos], nga gihigugma,” kang kansa ang Amahan miingon: “Ako may pag-uyon kanimo.” (Lucas 3:22; 1 Pedro 2:4) Taliwala sa mga sumusunod ni Jesu-Kristo maoy mga tawo nga gipakaubos tungod kay sila kabos sa materyal ug nag-antos sa daghang kasakitan. Apan, sa mga mata ni Jehova ug sa iyang Anak, mahimong mga dato ang maong mga tawo. (Roma 8:35-39; Pinadayag 2:9) Nganong may kalainan sa panglantaw?
3. (a) Nganong ang panglantaw ni Jehova mahitungod sa mga tawo kasagarang lahi kaayo gikan nianang iya sa mga tawo? (b) Nganong hinungdanon kaayo nga atong susihon kon unsang matang sa tawo kita sa kahiladman?
3 Ang Jeremias 11:20 nagatubag: “Si Jehova . . . nagasusi sa mga amimislon ug sa kasingkasing.” Siya makakita kon unsa kita sa kahiladman, bisan kadtong mga bahin sa atong personalidad nga natago gikan sa mga mata sa uban. Sa iyang pagsusi, gipasiugda niya pag-ayo ang mga hiyas ug mga kahimtang nga hinungdanon alang sa usa ka maayong relasyon uban kaniya, kadtong labing makaayo kanato sa walay kataposan. Ang atong pagkahibalo niini maoy makapalig-on; kini usab makapahunahunang maugdang. Sanglit si Jehova nagatagad kon unsa kita sa kahiladman, mahinungdanon nga susihon nato kon unsa kita sa kahiladman kon buot natong pamatud-an nga mahimong matang sa mga tawo nga iyang mauyonan sa iyang bag-ong kalibotan. Ang iyang Pulong nagtabang kanato sa paghimo nianang maong pagsusi.—Hebreohanon 4:12, 13.
Pagkabililhon sa mga Panghunahuna sa Diyos!
4. (a) Unsay nakatukmod sa salmista sa pagpahayag nga ang mga panghunahuna sa Diyos maoy bililhon alang kaniya? (b) Nganong kinahanglang mahimo kini nga bililhon alang kanato?
4 Human mamalandong sa gilapdon ug sa giladmon sa kahibalo sa Diyos mahitungod sa iyang mga alagad, ingon man sa talagsaong katakos sa Diyos sa pagtaganag tabang nga tingali ilang gikinahanglan, ang salmista nga si David nagsulat: “Busa, pagkabililhon usab sa imong mga hunahuna alang kanako!” (Salmo 139:17a) Kadtong maong mga panghunahuna, nga gipadayag diha sa iyang nasulat nga Pulong, labi pang hataas kay sa bisan unsang butang gikan sa tawo, bisag unsa pa kon daw unsa ka maayo sa ilang mga ideya. (Isaias 55:8, 9) Ang mga panghunahuna sa Diyos nagtabang kanato sa pagtumong sa atong pagtagad sa tinuod nga importanteng mga butang sa kinabuhi ug mahimong masiboton diha sa pag-alagad kaniya. (Filipos 1:9-11) Kini nagpakita kanato kon unsaon sa pagtan-aw ang mga butang sama sa pagtan-aw sa Diyos. Kini sila nagatabang kanato aron mahimong matinud-anon sa atong mga kaugalingon, aron sa kamatinud-anon dawaton nato kon unsang matang sa tawo kita sa pagkatinuod. Andam ka ba sa paghimo niana?
5. (a) Unsay gidasig sa Pulong sa Diyos nga bantayan nato ug “labaw kay sa tanang butang”? (b) Sa unsang paagi ang talaan sa Bibliya mahitungod kang Cain makahatag ug kaayohan kanato? (c) Bisan tuod kita dili ubos sa Moisesnong Kasugoan, sa unsang paagi kana nagatabang kanato sa pagsabot kon unsay makapahimuot kang Jehova?
5 Ang mga tawo makiling sa paghatag ug labaw nga pagtagad sa panggawas nga dagway, apan ang Kasulatan nagatambag kanato: “Labaw sa tanang butang nga pagaampingan, ampingi ang inyong kasingkasing.” (Proverbio 4:23) Pinaagi sa lagda ug sa mga pananglitan, ang Bibliya nagatabang kanato sa paghimo niana. Kini nagtug-an kanato nga si Cain sa kawalay pagtagad mihalad ngadto sa Diyos samtang sa iyang kasingkasing naghambin siyag kasuko, unya pagdumot, ngadto sa iyang igsoong si Abel. Ug kini nagdasig kanato nga dili mosundog kaniya. (Genesis 4:3-5; 1 Juan 3:11, 12) Kini nagtala sa panginahanglan sa pagsugot sa Moisesnong Kasugoan. Apan kini usab nagpasiugda nga ang pangunang kinahanglanon sa Kasugoan mao nga kadtong nagsimba kang Jehova magahigugma kaniya uban sa ilang tibuok kasingkasing, hunahuna, kalag, ug kusog; ug kini nagpahayag nga ang ikaduhang hinungdanong sugo mao ang paghigugma sa ilang silingan sama sa ilang kaugalingon.—Deuteronomio 5:32, 33; Marcos 12:28-31.
6. Sa pagpadapat sa Proverbio 3:1, unsang mga pangutana ang angayng isukna nato sa atong kaugalingon?
6 Sa Proverbio 3:1, kita gidasig nga dili lamang bantayan ang kasugoan sa Diyos apan tinoon nga ang atong pagsugot maoy kapahayagan kon unsa gayoy anaa sa sulod sa atong kasingkasing. Ang kada usa kanato kinahanglang mosukna sa atong kaugalingon, ‘Kana ba tinuod labot sa akong pagsugot sa mga kinahanglanon sa Diyos?’ Kon atong masabtan nga sa pila ka butang ang atong panukmod o panghunahuna nakulangan—ug walay mausa kanato ang makaingon nga kita walay kakulangan—nan kinahanglang mangutana kita, ‘Unsa bay akong ginahimo sa pagpauswag sa kahimtang?’—Proverbio 20:9; 1 Juan 1:8.
7. (a) Sa unsang paagi ang pagsaway ni Jesus sa mga Fariseo sa Mateo 15:3-9 mahimong makatabang kanato sa pagbantay sa atong kasingkasing? (b) Unsang mga kahimtang nga kita tingali kinahanglang mohimog kusganong mga lakang sa pagdisiplina sa atong hunahuna ug kasingkasing?
7 Sa dihang ang Hudiyong mga Fariseo nagpakaaron-ingnon nga nagpasidungog sa Diyos samtang sa kamalansison nagpaluyo sa batasan nga tinukmod sa pangagpas sa kaugalingong-kaayohan, gisaway sila ni Jesus ingong mga salingkapaw ug gipakita nga ang ilang pagsimba maoy kawang. (Mateo 15:3-9) Si Jesus nagpasidaan usab nga aron mapahimut-an ang Diyos, nga makakita sa kasingkasing, dili igo ang dayag hinlo sa moral nga kinabuhi samtang sa samang higayon, sa pagtagbaw sa kailibgon, kita kanunay usab nga nagapatuyang sa paghanduraw sa imoral nga mga butang. Tingali nagkinahanglan kitag kusganong mga lakang aron madisiplina ang atong mga hunahuna ug kasingkasing. (Proverbio 23:12; Mateo 5:27-29) Ang maong pagdisiplina gikinahanglan usab kon ingong sangpotanan sa atong sekular nga trabaho, atong mga tumong sa edukasyon, o atong pagpili sa kalingawan, kita nahimong mga tigsundog sa kalibotan, nga motugot niana sa paghulma kanato sumala sa mga sukdanan niini. Hinaot nga dili nato kalimtan nga kadtong nangangkong iya sa Diyos apan kinsa buot makighigala sa kalibotan gitawag ni disipulo Santiago nga “mga mananapaw.” Ngano? Tungod kay “ang tibuok kalibotan nahiluna sa gahom sa daotan.”—Santiago 4:4; 1 Juan 2:15-17; 5:19.
8. Aron makabaton sa bug-os nga kaayohan gikan sa bililhong mga hunahuna sa Diyos, unsay kinahanglan natong himoon?
8 Aron makapahimulos sa bug-os gikan sa panghunahuna sa Diyos bahin niini ug sa ubang mga butang, kinahanglang mogahin kitag panahon sa pagbasa o sa pagpatalinghog niini. Labaw pa niana, kinahanglang tun-an nato kini, makighisgot mahitungod niini, ug pamalandongon kini. Daghang tigbasa sa Ang Bantayanang Torre ang regular nga nagatambong sa mga tigom sa kongregasyon sa mga Saksi ni Jehova, diin gihisgotan ang Bibliya. Ilang gipalit ang panahon gikan sa ubang mga pangagpas aron mahimo kini. (Efeso 5:15-17) Ug ang nadawat nila ingong balos maoy labaw pa kay sa materyal nga manggad. Dili ba ingon niana ang imong gibati?
9. Nganong ang pipila nga nagatambong sa Kristohanong mga tigom mas tulin nga nagauswag kay sa uban?
9 Apan, ang pila nga nagatambong niining mga tigom mas tulin ang pag-uswag sa espirituwal kay sa uban. Ilang gipadapat ang kamatuoran nga mas bug-os pa diha sa ilang mga kinabuhi. Unsay nakaingon niini? Kasagaran, ang dakong hinungdan mao ang ilang kakugi sa personal nga pagtuon. Ilang giapresyar nga kita wala magkinabuhi sa tinapay lamang; ang espirituwal nga pagkaon kada adlaw sama gayod ka hinungdanon sa regular nga pagkaon sa pisikal nga pagkaon. (Mateo 4:4; Hebreohanon 5:14) Busa sila naningkamot sa paggugol sa labing menos pila ka panahon kada adlaw sa pagbasa sa Bibliya o sa mga publikasyon nga nagpatin-aw niana. Sila nagapangandam alang sa mga tigom sa kongregasyon, nga nagatuon sa mga leksiyon nga abante ug nagasusi sa mga teksto. Sila nagahimo ug labaw pa kay sa pagbasa sa materyal; sila nagapamalandong niini. Ang ilang sumbanan sa pagtuon naglakip sa ugdang nga paghunahuna sa mahimong epekto sa ilang nakat-onan diha sa ilang kaugalingong kinabuhi. Samtang ang ilang espirituwalidad nagatubo, sila mobati sama sa salmista nga nagsulat: “Oh hilabihan ang paghigugma ko sa imong kasugoan! . . . Ang imong mga pahimangno kahibulongan.”—Salmo 1:1-3; 119:97, 129.
10. (a) Hangtod kanus-a nga makaayo ang padayon nga pagtuon sa Pulong sa Diyos? (b) Sa unsang paagi kini gipakita sa Kasulatan?
10 Bisan pa kon natun-an nato ang Pulong sa Diyos sa usa ka tuig, 5 ka tuig, o 50 ka tuig, kini dili gayod mahimong yanong pagsublisubli—dili kon ang mga panghunahuna sa Diyos maoy bililhon alang kanato. Walay sapayan kon unsa ka dako ang atong natun-an gikan sa Kasulatan, daghan pa ang wala nato mahibaloi. “Oh Diyos, pagkadaghan gayod nila!” matud ni David. “Kon isipon ko sila, labing daghan pa sila kay sa mga balas.” Ang mga panghunahuna sa Diyos maoy saylo sa atong katakos sa pag-ihap. Kon ato pang usa-usahon ang mga panghunahuna sa Diyos sa tibuok adlaw hangtod makatulog ug himoon kana, sa dihang mobangon sa buntag, daghan pa gihapon kaayo ang mahunahunaan. Mao nga si David nagsulat: “Sa akong paghimata, ako anaa gihapon kanimo.” (Salmo 139:17, 18) Sulod sa walay kataposan daghan pa ang makat-onan nato mahitungod kang Jehova ug sa iyang mga dalan. Dili gayod nato maabot ang punto nga mahibaloan nato ang tanan.—Roma 11:33.
Nagadumot sa Ginadumtan ni Jehova
11. Nganong dili lamang ang pagkahibalo sa mga panghunahuna sa Diyos ang mahinungdanon kondili ang pagbaton usab sa iyang mga pagbati?
11 Ang atong pagtuon sa Pulong sa Diyos dili lamang alang sa pagpuno sa atong ulo sa mga kasayoran. Samtang tugotan nato nga motisok ang panghunahuna sa Diyos sa atong kasingkasing, mosugod usab kita sa pagbaton sa mga pagbati sa Diyos. Pagkahinungdanon niini! Kon dili nato maugmad ang maong mga pagbati, unsay mahimong sangpotanan? Bisan ug masag-ulo nato ang ginasulti sa Bibliya, kita tingali, bisan pa niana, molantaw sa mga butang nga gidili ingong tilinguhaon, o lagmit bation nato ingong kabug-at ang butang nga gikinahanglan. Tinuod nga bisan pa ug gidumtan nato kon unsay daotan, kita mahimong may pakigbugno tungod sa tawhanong pagkadili-hingpit. (Roma 7:15) Apan kon dili kita mohimog tinud-anay nga paningkamot aron ang atong kinahiladmang pagkatawo mapahiuyon sa matarong, makadahom ba kita sa pagpahimuot kang Jehova, “ang tigsusi sa mga kasingkasing”?—Proverbio 17:3.
12. Unsa ka hinungdanon ang diyosnong gugma ug diyosnong pagdumot?
12 Ang diyosnong pagdumot maoy usa ka gamhanang panalipod batok sa paghimog daotan, maingon nga ang diyosnong gugma makapahimo sa pagbuhat ug matarong nga usa ka kalipay. (1 Juan 5:3) Sa makadaghan ang Kasulatan nagadasig kanato sa pag-ugmad sa gugma ug pagdumot. “Oh kamong nahigugma kang Jehova, dumti ang daotan.” (Salmo 97:10) “Dumti ang daotan, gumakos sa maayo.” (Roma 12:9) Ginahimo ba nato kana?
13. (a) Sa unsang pag-ampo ni David mahitungod sa kalaglagan sa daotan nga kita uyon sa bug-os? (b) Ingon sa gipakita sa pag-ampo ni David, kinsa ang mga daotan nga iyang giampo nga laglagon sa Diyos?
13 Tin-aw nga gipahayag ni Jehova ang iyang katuyoan sa paglaglag sa mga daotan gikan sa yuta ug ipasulod ang usa ka bag-ong yuta diin magapuyo ang pagkamatarong. (Salmo 37:10, 11; 2 Pedro 3:13) Ang mga mahigugmaon sa pagkamatarong nangandoy nga moabot na ang maong panahon. Sila miuyon gayod sa salmistang si David, kinsa nag-ampo: “Oh nga ikaw, Oh Diyos, magapatay gayod sa usa nga daotan! Unya bisan ang mga tawong sad-an sa dugo mopahilayo gikan kanako, kinsa nagsulti ug mga butang bahin kanimo sumala sa ilang hunahuna; gigamit nila ang imong ngalan sa walay kapuslanan—ang imong mga kaaway.” (Salmo 139:19, 20) Si David sa personal wala mangandoy sa paglaglag sa maong mga daotan. Siya miampo nga ang panimalos magagikan sa kamot ni Jehova. (Deuteronomio 32:35; Hebreohanon 10:30) Kini sila dili mga tawo nga sa usa ka paagi nakapasilo lamang kang David sa personal. Ilang gituis ang ideya mahitungod sa Diyos, nga migamit sa iyang ngalan sa walay kapuslanan. (Exodo 20:7) Sa kadili-matinud-anon, nangangkon sila nga nagaalagad kaniya, apan ilang gigamit ang iyang ngalan aron ipasiugda ang ilang kaugalingong mga laraw. Si David walay gugma alang niadtong mipili nga mahimong mga kaaway sa Diyos.
14. May daotan pa bang mga tawo nga mahimong matabangan? Kon mao, sa unsang paagi?
14 Binilyong tawo ang wala makaila kang Jehova. Daghan kanila diha sa kawalay-alamag naghimo sa mga butang nga gipakita sa Pulong sa Diyos ingong daotan. Kon sila magpadayon niining dalana, sila mahimong maapil niadtong malaglag sa panahon sa dakong kasakitan. Apan, si Jehova dili malipay sa kamatayon sa daotan, ni kita malipay. (Ezekiel 33:11) Samtang itugot sa panahon, maningkamot kita sa pagtabang sa maong mga tawo sa pagkat-on ug sa pagpadapat sa mga dalan ni Jehova. Apan unsa man kon ang pila ka tawo mopadayag ug hilabihang pagdumot kang Jehova?
15. (a) Kinsa kadtong gilantaw sa salmista ingong “tinuod nga mga kaaway”? (b) Sa unsang paagi mapakita nato karong adlawa nga atong “gidumtan” kadtong nagaalsa batok kang Jehova?
15 Mahitungod kanila, ang salmista nag-ingon: “Wala ba nako dumti sila nga hilabihang nanagdumot kanimo, Oh Jehova, ug wala ba ako masilag niadtong nanagpanukol batok kanimo? Gidumtan ko sila uban sa hingpit nga pagdumot. Sila nahimong akong tinuod nga mga kaaway.” (Salmo 139:21, 22) Kini maoy tungod kay ilang gidumtan sa hilabihan si Jehova nga si David nagdumot kanila. Ang mga apostata nalakip niadtong nagpadayag sa ilang pagdumot kang Jehova pinaagi sa pag-alsa batok kaniya. Ang apostasiya, sa pagkatinuod, maoy usa ka pag-alsa batok kang Jehova. Ang pila ka apostata nag-angkon nga nakaila ug nag-alagad sa Diyos, apan ilang gisalikway ang mga pagtulon-an o mga kinahanglanon nga nahan-ay diha sa iyang Pulong. Ang uban nangangkon nga nagtuo sa Bibliya, apan ilang gisalikway ang organisasyon ni Jehova ug aktibong nagasulay sa pagbabag sa buluhaton niana. Sa dihang tinuyo nilang gipili ang maong pagkadaotan human mahibalo kon unsay matarong, sa dihang ang kadaotan nakagamot nga kana maoy usa ka dili-mabulag nga bahin sa ilang kinaiya, nan ang usa ka Kristohanon kinahanglang magadumot (sa Biblikanhong kahulogan sa pulong) niadtong si kinsa nakiglangkit nga dili-mabulag sa pagkadaotan. Ang matuod nga mga Kristohanon nagbaton usab sa mga pagbati ni Jehova ngadto sa maong mga apostata; sila dili mausisaon labot sa apostatang mga panghunahuna. Hinunoa, sila “mibatig kapungot” niadtong naghimo sa ilang mga kaugalingon nga mga kaaway sa Diyos, apan ilang gitugyan kang Jehova ang pagpanimalos.—Job 13:16; Roma 12:19; 2 Juan 9, 10.
Sa Dihang ang Diyos Magasusi Gayod Kanato
16. (a) Nganong gusto ni David nga si Jehova mosusi kaniya? (b) Unsay anaa labot sa atong kasingkasing nga kinahanglang hangyoon nato ang Diyos nga tabangan kita sa pagsabot?
16 Dili gusto ni David nga mahisama sa daotan sa bisan unsang paagi. Daghang tawo ang mosulay sa pagtago kon unsa sila sa kinahiladman, apan si David sa kamapaubsanon nag-ampo: “Susiha ako, Oh Diyos, ug hibaloi ang akong kasingkasing. Sulayi ako, ug hibaloi ang akong natugaw nga mga hunahuna, ug tan-awa kon kanako aduna bay makasakit nga dalan, ug tultoli ako sa dalan nga walay kataposan.” (Salmo 139:23, 24) Sa dihang naghisgot sa iyang kasingkasing, si David wala magpasabot sa pisikal nga organo. Kaharmoniya sa piguratibong kahulogan nianang maong pahayag, gihisgotan niya kon unsa siya sa kinahiladman, ang kinasulorang pagkatawo. Gusto usab nato nga ang Diyos mosusi sa atong kasingkasing ug makasabot kon kaha kita adunay dili-hustong mga tinguha, mga pagbati, mga emosyon, mga katuyoan, mga panghunahuna, o mga motibo. (Salmo 26:2) Si Jehova nagdapit kanato: “Anak ko, ihatag kanako ang imong kasingkasing, ug unta ang imong mga mata mahimuot sa akong mga dalan.”—Proverbio 23:26.
17. (a) Inay nga itago ang mga gikabalak-an, unsay atong himoon? (b) Matingala ba kita kon atong makaplagan ang dili-hustong mga kiling sa atong kasingkasing, ug unsay angay natong himoon labot niini?
17 Kon may natago sa kinasuloran nato nga bisan unsang masakit, gubot nga mga hunahuna tungod sa sayop nga mga tinguha o sayop nga mga motibo o tungod sa pila ka sayop nga panggawi sa atong bahin, nan sa tino gusto natong tabangan kita ni Jehova sa pagtul-id sa mga butang. Inay sa kahubitang “bisan unsang makasakit nga dalan,” ang hubad ni Moffatt migamit sa ekspresyong “sayop nga dalan”; ang The New English Bible nag-ingon: “Ang bisan unsang dalan nga nagapaguol kanimo [nga mao, ang Diyos].” Kita sa atong kaugalingon mahimong wala makasabot sa tin-aw sa atong mga gikabalak-an ug busa wala mahibalo kon unsaon sa pagpahayag sa atong suliran ngadto sa Diyos, apan iyang nasabtan ang atong kahimtang. (Roma 8:26, 27) Dili kita angayng matingala kon adunay daotang mga kiling sa atong kasingkasing; bisan pa, kinahanglang dili nato kini pakamatarongon. (Genesis 8:21) Kinahanglang mangayo kitag tabang sa Diyos sa pagwagtang niini sa hingpit. Kon kita tinuod nga nahigugma kang Jehova ug sa iyang mga dalan, kita makaduol kaniya alang sa maong tabang uban sa pagsalig nga “ang Diyos mas dako kay sa atong mga kasingkasing ug nahibalo sa tanang butang.”—1 Juan 3:19-21.
18. (a) Sa unsang paagi kita gitultolan ni Jehova sa dalan sa walay kataposan? (b) Kon kita mopadayon sa pagsunod sa pagtultol ni Jehova, unsang mainitong komendasyon ang atong madahom nga madawat?
18 Uyon sa giampo sa salmista nga tultolan siya ni Jehova sa dalan sa walay kataposan, si Jehova, sa pagkatinuod, nagatultol sa iyang mapaubsanon, masinugtanong mga alagad. Iyang gitultolan sila dili lamang sa dalan nga magkahulogan sa hataas nga kinabuhi tungod kay sila dili sayong laglagon tungod sa paghimog daotan kondili diha sa diwa nga ang dalan motultol sa kinabuhing walay kataposan. Iyang gisilsil kanato ang atong panginahanglan sa nagatabon-sa-sala nga bili sa halad ni Jesus. Pinaagi sa iyang Pulong ug sa iyang organisasyon, siya nagatagana kanato ug hinungdanong instruksiyon aron kita makaarang sa pagbuhat sa iyang kabubut-on. Iyang gipasiugda kanato ang kahinungdanon sa pagsanong sa iyang tabang aron nga kita sa kahiladman mahimong matang sa pagkatawo nga sa dayag atong gipangangkon. (Salmo 86:11) Ug gidasig kita niya pinaagi sa hingpit nga panglawas, diha sa usa ka matarong nga bag-ong kalibotan uban ang kinabuhing walay kataposan, aron magamit diha sa pag-alagad kaniya, ang bugtong tinuod nga Diyos. Kon kita mopadayon sa pagsanong nga maunongon sa iyang pagtultol, sa pagkatinuod, siya magaingon kanato, sama sa iyang giingon sa iyang Anak: “Giuyonan ko ikaw.”—Lucas 3:22; Juan 6:27; Santiago 1:12.
Unsay Imong Komento?
◻ Nganong ang panglantaw ni Jehova sa iyang mga alagad kasagarang lahi gikan nianang iya sa mga tawo?
◻ Unsay makatabang kanato sa pagsabot kon unsay makita sa Diyos sa dihang iyang susihon ang atong kasingkasing?
◻ Unsang matanga sa pagtuon ang motabang kanato sa pagkat-on sa mga kamatuoran ug sa pagbantay sa atong kasingkasing?
◻ Nganong dili lamang ang ginasulti sa Diyos ang hinungdanong mahibaloan apan ang pagbaton usab sa iyang mga pagbati?
◻ Nganong sa personal kita moampo: “Susiha ako, Oh Diyos, ug hibaloi ang akong kasingkasing”?
[Hulagway sa panid 16]
Sa dihang nagatuon, paningkamoti nga mahimong imong kaugalingon ang mga panghunahuna ug mga pagbati sa Diyos
[Hulagway sa panid 18]
Ang mga panghunahuna ni Jehova “labi pa ka daghan kay sa mga balas”
[Credit Line]
Pictorial Archive (Near Eastern History) Est.