Mga Pangutana Gikan sa mga Magbabasa

Haom ba alang sa usa ka Kristohanon nga makigsosyo sa negosyo uban sa dili-magtutuo, sanglit ang Bibliya nagatug-an kanato: “Ayaw kamo pagpayugo uban sa dili mga magtutuo”?

Atong makaplagan kanang tambaga sa 2 Corinto 6:14-16: “Ayaw kamo pagpayugo uban sa dili mga magtutuo. Kay unsay pakigkomboyahay sa pagkamatarong ug pagkadaotan? O unsa may pakig-ambitay sa kahayag ug sa kangitngit? Dugang pa, unsa may pakig-uyonan ni Kristo kang Belial? O unsa may iya sa tawong matinumanon nga pakigsalohan sa dili-magtutuo? Ug unsa may pakig-uyonan sa templo sa Diyos ug sa mga diyosdiyos?”

Walay katarongan aron tuohan nga si apostol Pablo nagtambag niini sa tuyo nga mohimog espisipikong mga pagdili, sama sa pagsupak sa pagpakigsosyo sa negosyo sa usa ka Kristohanon uban sa dili-magtutuo. Apan, ang iyang tambag may kalabotan niana, maingon man sa ubang mga bahin sa kinabuhi.

Gisulat ni Pablo kanang tambaga alang sa iyang Kristohanong mga igsoon sa karaang Corinto. Kay nagpuyo sa usa ka siyudad nga bantog sa kadunotan, sila kinahanglang moatubang sa moral ug espirituwal nga mga kapeligrohan kada adlaw. Gawas kon sila magmainampingon, ang pagkaladlad sa dili-maayong mga impluwensiya sa inanay makapahuyang sa ilang lig-ong tinguha nga mahimong nalahi nga katawhan, “usa ka pinili nga banay, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.”​—1 Pedro 2:9.

Sa wala pa masulat ang 2 Corinto 6:14-16, si Pablo nagdumala sa usa ka seryosong suliran taliwala sa iyang mga igsoon sa Corinto. Kay gitugotan nila ang usa ka kaso sa tatawng imoralidad nga magpabilin sa ilang taliwala, busa gimandoan sila ni Pablo sa pagpagawas, o sa pagpalagpot, sa dili-mahinulsolong makasasala. (1 Corinto 5:1) Ang daotang buhat sa maong tawo nagpakita nga ang dili-maayong pagpakig-uban o ang pagpatuyang diha sa moral nga kahimtang sa kalibotan makaapektar sa mga Kristohanon.

Ang mga Kristohanon nga taga-Corinto kinahanglang dili makig-uban sa gipalagpot nga tawo, apan kana ba nagpasabot nga ibulag nila sa bug-os ang ilang kaugalingon gikan sa mga dili-magtutuo? Sila ba sa bug-os molikay sa tanang pakigkontak o pakiglabot sa mga dili-Kristohanon, nga mahimong usa ka matang sa sekta sa mga monghe, sama sa mga Hudiyo nga misibog ngadto sa Qumran duol sa Patayng Dagat? Tugoti si Pablo sa pagtubag: “Sa akong sulat ako nag-ingon nga dili na kamo makig-uban sa mga makihilawason, nga wala magpasabot sa tanang makihilawason niining kalibotana . . . Kay kon mao pa, gikinahanglan nga mamahawa kamo niining kalibotana.”​—1 Corinto 5:9, 10.

Tin-aw ang buot ipasabot niining mga pulonga. Nasabtan ni Pablo nga ang mga Kristohanon ania pa niining planeta, nga nagkinabuhi sa taliwala ug halos kada adlaw nakigkontak sa mga dili-magtutuo kansang moralidad maoy ubos ug kansang mga sukdanan maoy lahi. Sanglit kay kana dili gayod malikayan, ang mga Kristohanon kinahanglang magmaigmat sa mga kapeligrohan sa maong mga pakigkontak.

Unya tagdon usab nato ang ikaduhang sulat ni Pablo ngadto sa mga taga-Corinto. Iyang gipunting nga ang dinihogang mga Kristohanon maoy kuwalipikadong mga ministro sa Diyos, mga hawas nga mipuli kang Kristo. Iyang giingnan sila nga magbantay batok sa bisan unsang hinungdan sa kapangdolan nga mahimong makadaot sa ilang ministeryo. (2 Corinto 4:1–6:3) Laktod nga gidasig ni Pablo ang iyang mga igsoon nga taga- Corinto, nga gipanig-ingon sa iyang espirituwal nga mga anak, sa pagpasangkad sa ilang gugma. (2 Corinto 6:13) Human niana siya miawhag: “Ayaw kamo pagpayugo kauban sa mga dili-magtutuo.” Migamit siya sa usa ka serye sa matandiong mga pahayag sa pagpasiugda sa maong punto.

Ang konteksto nagpakita nga si Pablo wala magtunong sa pila ka espisipikong bahin sa kinabuhi, sama sa negosyo o panarbaho, ug sa paghimog usa ka pormal nga lagda aron ipatuman bahin sa maong butang. Hinunoa, siya naghatag ug halapad, maayo, makatabang nga tambag sa mga igsoon nga iyang gihigugma pag-ayo.

Kini bang tambaga mapadapat, pananglitan, sa kaso sa usa ka Kristohanon nga interesado sa kaminyoon? Mapadapat gayod. Sa iyang unang sulat, ang apostol nagtambag sa mga taga-Corinto nga gustong magminyo sa pagpakigminyo “diha lamang sa Ginoo.” (1 Corinto 7:39) Iyang gipasiugda ang kaalam niadtong mga pulonga pinaagi sa iyang gisulat sa ulahi, ingon sa gipahayag sa 2 Corinto 6:14-18. Kon ang usa ka Kristohanon naghunahunang makigminyo sa usa nga dili alagad ni Jehova ug dili sumusunod ni Kristo, siya nagpalandong nga malangkit sa usa ka dili-magtutuo. (Itandi ang Levitico 19:19; Deuteronomio 22:10.) Tin-aw, ang paninugdang pagkadili-angay sa usag usa mopadako sa purohan sa mga suliran, lakip sa espirituwal nga mga suliran. Pananglitan, ang dili-magtutuo mahimong sa pagkakaron o sa umaabot mopadayon sa pagsimba sa usa ka bakak nga diyos. Si Pablo nangatarongan: “Unsa may pakig-uyonan ni Kristo kang Belial?”

Hinuon, komosta na man ang ubang bahin sa kinabuhi​—ang pagpakigsosyo sa negosyo uban sa dili-magtutuo? Sa pila ka kaso ang usa ka Kristohanon mahimong mobati nga ang pagpangitag panginabuhian ug pag-atiman sa iyang pamilya nagkinahanglan sa pagpakigsosyo uban sa usa nga dili isigka-Kristohanon. (1 Timoteo 5:8) Kini mga pananglitan lamang nga atong tagdon:

Ang usa ka Kristohanon tingali gustong magnegosyo sa usa ka matang sa produkto, apan ang paagi lamang mao ang pagpakigsosyo uban sa usa ka tawo nga maoy kuhaanan sa gikinahanglang mga produkto o pondong salapi. Laing Kristohanon gustong manguma (o magbuhig usa ka matang sa hayop); apan walay mabatonang yuta, busa kinahanglang himoon niya kana uban sa usa nga mopaabang niya sa yuta ilis sa usa ka bahin sa bisan unsang ganansiya. Tingali laing Kristohanon dili makatukod sa negosyo sa pagtubero tungod kay si Cesar nagahatag lamang sa pila ka lisensiya, ug nakuha na kanang tanan; ang paagi lamang mao nga siya makigsosyo sa dili-magtutuong paryente nga may lisensiya.​—Marcos 12:17.

Kini maoy mga ilustrasyon lamang. Kami wala magsulay sa paglimiti sa mga kahigayonan, ni magpahayag kami ug pag-uyon o dili pag-uyon. Apan sa paghunahuna niining maong mga pananglitan, dili ba nimo makita nganong ang tambag sa 2 Corinto 6:14-18 dili angayng dili-tagdon?

Ang usa ka Kristohanon nga nakigsosyo uban sa dili magtutuo, paryente man o dili, malagmit nga makasugamak sa wala-damhang mga suliran ug mga tentasyon. Tingali ang kasosyo makahinapos nga ang paagi aron makaganansiyag dakodako mao ang pagtaho sa gipakunhorang kita o modawat ug mga trabahante nga wala malista, bisan pag kana naglapas sa mga lagda sa kagamhanan. Malagmit andam siyang magsaburno sa mga tighatod sa mga epektos nga wala malista sa opisyal nga resibo. Ang usa ba ka Kristohanon makigbahin niana o sa kaamgid nga pagkadili-matinud-anon? Ug unsay himoon sa usa ka Kristohanon inig-abot sa panahon nga sila mopirma na sa mga papeles sa buluhisan o ubang legal nga dokumento mahitungod sa paagi nga ilang gipalakaw ang negosyo?​—Exodo 23:1; Roma 13:1, 7.

O basin gusto sa dili-magtutuong kasosyo nga magpondo ug mga igbabaligya alang sa paganong mga pangilin, mopadala ug mga kard sa adlaw sa pangilin sa ngalan sa kompaniya, ug modayandayan sa opisina alang sa relihiyosong mga pangilin. Si Pablo nangutana: “Unsa may pakig-uyonan sa templo sa Diyos ug sa mga diyosdiyos? Kay kita ang templo sa Diyos nga buhi.” Pagkahaom sa komento: “‘“Busa panggula kamo gikan kanila, ug magpalain kamo,” nagaingon si Jehova, “ug ayaw na kamo paghikap ug mahugaw”’; ‘“ug unya dawaton ko kamo”’”! (2 Corinto 6: 16, 17) Sa pagpadapat nianang maalamong tambag, daghang Kristohanon ang mipili sa matang sa sekular nga trabaho nga moladlad kanila ngadto sa kinamenosang suliran kutob sa mahimo.​—Hebreohanon 13:5, 6, 18.

Ang kongregasyon wala sugoa nga bantayan o imbestigahon ang tanang ginahimo sa mga Kristohanon diha sa ilang sekular nga trabaho, empleyado man o kaha tag-iya sa mga negosyo. Siyempre, kon mahibaloan nga ang usa ka Kristohanon maoy kauban sa daotang-buhat, sama sa pagpaluyo sa bakak nga pagsimba o sa usa ka matang sa pagpamakak o pagpangawat, ang kongregasyon kinahanglang mohimog mga lakang sa pagtuboy sa mga sukdanan ni Jehova.

Hinuon, ang yawing punto mao nga ang dinasig nga tambag ni Pablo, “Ayaw kamo pagpayugo sa dili mga magtutuo,” makatabang sa mga Kristohanon sa paglikay sa mga suliran ug sa bisan unsang gikinahanglang hudisyal nga aksiyon. Ang maalamong mga Kristohanon motuman nianang tambaga ug dili mopili sa pagsulod sa mga kahimtang diin sila mahimong mapailalom sa dugang mga pagpit-os aron ikompromiso ang mga prinsipyo sa Bibliya. Kon ang usa mobati nga kinahanglan niyang makigsosyo sa usa ka dili-magtutuo, ang uban dili kinahanglang magmadalidalion sa paghukom o pagsaway kaniya, nga nag-ilang siya magapas-an sa responsabilidad tungod sa iyang pagpili. Sa panguna, si Pablo wala maghimog pormal, ipatuman nga lagda batok sa pagpakigsosyo uban sa dili-magtutuo. Bisan pa, ang iyang tambag angay gayod nga tagdon. Gidasig sa Diyos kanang tambaga ug gipahinabo nga marekord kana sa Bibliya alang sa atong kaayohan. Kita maalamon kon patalinghogan kana.