Ang Suliran sa Pagtuon sa Paghulat
ANG pagtuon sa paghulat sa mga butang nga atong ginapangandoy tingali mao ang usa sa labing lisod nga mga leksiyon nga kinahanglang dawaton sa tawo. Ang gagmayng mga bata sa kinaiyanhon kulag-pailob. Bisan unsay magustohan sa ilang mata, gusto nila, ug gusto nila kana dihadiha! Apan sama sa imo nang nahibaloan gikan sa kasinatian, usa ka kamatuoran sa kinabuhi nga dili tanang butang mabatonan sumala sa gusto. Bisan sa makataronganong mga pangandoy, kita kinahanglang maghulat sa tukmang panahon nga matagan-an kini. Daghan ang nakakat-on niining leksiyona; ang uban dili gayod makakat-on.
Ang mga tawo nga buot makabaton sa pag-uyon sa Diyos adunay partikular nga katarongan sa pagtuon sa paghulat. Si Jeremias, usa ka una-Kristohanong alagad ni Jehova, mipasiugda niini: “Maayo nga ang tawo maghulat, bisan sa kahilom, sa kaluwasan ni Jehova.” Sa ulahi, ang Kristohanong disipulong si Santiago miingon: “Pagpailob kamo, mga igsoon, hangtod sa presensiya sa Ginoo.”—Lamentaciones 3:26; Santiago 5:7.
Si Jehova adunay iyang kaugalingong orasan aron matuman ang balaang mga katuyoan. Kon kita dili makahulat hangtod sa iyang tinudlong panahon sa pagbuhat sa pipila ka butang, mawala ang atong pagkatagbaw ug pagkakontento, nga makadaot sa kalipay. Kon walay kalipay ang alagad sa Diyos mahimong maluya sa espirituwal, sama sa gipadayag ni Nehemias sa iyang katagilungsod: “Ang kalipay diha sa GINOO mao ang inyong kusog.”—Nehemias 8:10, The New English Bible.
Ang Kaalam sa Pagtuon sa Paghulat
Kinaiyanhon sa mga dili-minyo nga gustong magminyo o sa mga magtiayong walay anak nga manganak. Dugang pa, walay daotan sa pagpangandoy nga matagbaw ang makataronganong materyal mga panginahanglan o mga tinguha. Bisan pa, tungod sa pagtuo nga hapit nang matapos ang mga adlaw niining sistema sa mga butang ug nga diha sa umaabot bag-ong sistema ang Diyos ‘magabuklad sa iyang kamot ug magatagbaw sa tinguha sa tagsatagsa ka buhing butang,’ daghang Kristohanon mihukom sa paghulat aron matuman ang pipila niining mga tinguhaa diha sa mas maayong panahon.—Salmo 145:16.
Ang mga tawo nga walay malig-ong-pagkatukod nga Kristohanong paglaom, hinunoa, dili makakita sa katarongan sa paglangan. Sanglit walay pagtuo kang Jehova, diin “ang tagsatagsa ka maayong gasa ug tagsatagsa ka hingpit nga mga regalo” nagagikan, ilang kuwestiyonon ang kaalam sa paglangan sa mga butang ngadto sa umaabot nga ilang giduhaduhaan nga moabot. Sila nagkinabuhi sumala sa panultihon: “Mangaon ug manginom kita, kay ugma mangamatay na kita.”—Santiago 1:17; 1 Corinto 15:32; Isaias 22:13.
Diha sa sapiang mga nasod gipahimuslan sa kalibotan sa panganunsiyo ang dayag nga hilig sa dihadiha nga pagtagbaw sa kaugalingon. Ang mga tawo gidasig nga patumanan ang ilang gusto. Gipatuo kita sa komersiyo nga ang modernong mga gamit sa kasayon ug mga kaharuhay gikinahanglan kaayo. Aduna bay katarongan sa dili pagbaton niini, pangatarongan pa, ilabina kon ang mga credit card, pagdatadata, ug “palit karon—bayri unya” nga mga laraw nagapaposible man sa pagbaton niining tanan ug sa pagbaton niini karon? Gawas pa, ‘Angay ka sa labing maayo; magmaluloton sa imong kaugalingon! Hinumdomi, pahimusli kini karon o tingali dili na gayod!’ Nagkanayon ang popular nga mga islogan sa panganunsiyo.
Kasamtangan, tinagpulo ka milyong tawo sa pobreng mga nasod nakabaton ug igo lamang aron mabuhi—o kaha mas diyutay pa. May dugang pa bang makapasiugda sa pagkadili-hingpit ug inhustisya sa tawhanong mga sistema sa politika ug ekonomiya?
Ang kaalam sa pagtuon sa paghulat makita sa pagkaagi nga milyonmilyong tawo nga dili makahulat—o sa labing menos wala makakitag maayong katarongan sa paghulat—ang naputos sa utang aron lang matagbaw ang dihadiha nga mga tinguha. Ang dili-mahibaloang mga kahimtang, sama sa sakit o pagkawalay-trabaho, mahimong mohatag kadaot. Ang mantalaang Frankfurter Allgemeine Zietung sa Alemanya nagpatin-aw kon nganong ang gikatahong usa ka milyong tawo sa Alemanya walay mga balay: “Sa kasagaran, ang pagkawalay-balay maoy resulta sa pagkawalay-trabaho o sa pagkadaghag utang.”
Kay dili makabayad sa ilang mga utang, daghan niining alaot nga mga indibiduwal nagaantos sa makasubong pagkawala sa balay ug sa mga kabtangan. Kasagaran, ang nagadugang nga kalisod mohatag tensiyon sa pamilya. Ang mahuyang nga mga kaminyoon mosugod sa pagkabungkag. Ang mga yugto sa depresyon ug ubang mga suliran sa panglawas mahimong komon. Sa kaso sa mga Kristohanon, mahimong madaot ang espirituwalidad, nga mosangpot, sa baylo, sa dili-maayong panghunahuna ug sa dili-maayong paggawi. Ang mga tawo nga misugod sa dili-maalamong pagtinguha sa tanang butang mosangpot hinuon nga mawad-an sa tanan.
Alang sa Kadaghanan, Usa ka Bag-ong Hagit
Gipatin-aw ni Jesus nga kita kinahanglang magbantay kay basig “ang mga kabalaka niining sistema sa mga butang ug ang malimbongong gahom sa bahandi ug ang mga tinguha alang sa uban pang mga butang mosulod ug magalumos sa pulong.” (Marcos 4:19) Kinahanglang atong ibutang sa hunahuna nga walay sistema sa politika ang milampos sa pagwala sa mga kabalaka, apil ang mga kabalaka sa panalapi, nga maoy gihisgotan ni Jesus.
Ang Komunismo nga gisalikway karon sa Sidlakang Uropa naningkamot sa pagtimbang sa mga butang pinaagi sa ekonomiya nga kontrolado-sa-Gobyerno. Kon itandi sa sistema sa libreng pagnegosyo, ang kanhi nga mga sistema naghatag sa mga indibiduwal niadtong mga nasora ug usa ka seguridad sa ekonomiya nga wala ikahatag sa kapitalismo. Sa gihapon, ang mga kabalaka nga gihisgotan ni Jesus naglungtad diha sa dagway sa kakulangan sa mga butang nga gikinahanglan sa tawo ug pagpugong sa personal nga kagawasan.
Sa pagkakaron, gisugdan sa kadaghanan niadtong nasora ang higayon aron ang mga gumagamit makapalit ug ang mga tiggama makabaligya, busa gitanyagan ang ilang mga lungsoranon ug usa ka bag-ong hagit. Usa ka bag-ong report nag-ingon: “Ang katagaw giduyogan sa tinguha sa pag-apas dayon sa sukdanan sa kasadpan sa pagpalit ug sa paggamit sa mga butang.” Aron makab-ot kini “nagkadaghang tawo sa bag-ong Länder sa sidlakang Alemanya ang naputos sa utang diin sila dili na gayod makahaw-as.” Ang report midugang: “Human sa unang kalipay sa bag-ong kagawasan sa ekonomiya ang kahadlok ug kawalay-paglaom karon nagakaylap.” Ang mga kabalaka nagpabilin, bisan pag sila karon ginapalakaw na sa sistema sa kapitalismo.
Ang mas dako nga mga kagawasan sa politika ug sa ekonomiya nagbukas ug bag-ong mga posibilidad sa pag-uswag sa ekonomiya. Busa, daghang indibiduwal hayan matintal sa paghatag seryosong pagtagad sa ideya sa pagbukas ug ilang kaugalingong mga negosyo o sa pagbalhin ngadto sa laing nasod nga adunay mas maayong mga higayon sa panarbaho.
Ang mga desisyong sama niini maoy personal nga mga butang. Dili daotan alang sa usa ka Kristohanon nga magtinguha nga moarang-arang ang iyang pagkabutang. Tingali sila mapukaw tungod sa tinguha sa pag-atiman sa iyang pamilya, nahibalo nga “kon adunay tawo nga wala magtagana alang sa mga iya, ug ilabina alang sa mga sakop sa iyang kaugalingong banay, kini siya nagalimod sa iyang pagtuo ug labi pa siyang daotan kay sa dili magtutuo.”—1 Timoteo 5:8.
Busa, dili maayong sawayon ang desisyong himoon sa uban. Sa samang higayon, kinahanglang hinumdoman sa mga Kristohanon nga dili-maalamong mangitag kahupayan sa panalapi pinaagi sa sobrang pagpangutang nga makalit-ag kanila. Sayop usab ang pagpangitag kahupayan sa panalapi sa usa ka paagi nga mapasagdan ang espirituwal nga mga obligasyon ug mga intereses.
Pagtuon Gikan sa Uban
Sa mga tuig human sa Gubat sa Kalibotan II, libolibong Aleman milalin gikan sa gigusbat-sa-gubat nga Uropa ngadto sa ubang mga nasod, ilabina sa Australia ug sa Canada. Busa miluag ang kahimtang sa panalapi sa kadaghanan, apan walay usa kanila ang bug-os nakaikyas sa mga kabalaka sa panalapi nga gihisgotan ni Jesus. Ang pagsulbad sa mga suliran sa panalapi usahay makamugnag laing bag-ong mga suliran—kamingaw, lahi nga pinulongan, pagpaanad sa bag-ong mga pagkaon, lahi nga mga kustombre, pagpakig-angay sa bag-ong mga higala, o pagsagubang sa lahi nga mga tinamdan.
Ang uban niining mga lalin maoy mga Saksi ni Jehova. Dalayegon, ang kadaghanan kanila wala magpadala sa mga suliran nga iya sa paglalin nga magdaot sa ilang espirituwalidad. Apan may mga eksipsiyon. Ang uban nabiktima sa malimbongong gahom sa mga bahandi. Ang ilang teokratikanhon nga kauswagan wala makaagpas sa ilang kauswagan sa ekonomiya.
Dayag nga nag-ilustrar kini sa kaalam sa mabinantayong pagtimbangtimbang sa atong kahimtang sa dili pa maghimog dili-maalamong mga desisyon. Ang kahilig sa materyal mopaluya kanato sa dili-na-masubli nga buluhaton sa paghimog-tinun-an nga maoy gitudlo sa mga Kristohanon nga pagabuhaton. Kini matuod bisan hain ka nagpuyo, sanglit walay nasod kansang mga lungsoranon ang libre sa mga kabalaka sa panalapi.
Pakigbugno sa Maayong Pakigbugno
Gitambagan ni Pablo si Timoteo: “Tinguhaa ang pagkamatarong, diyosnong debosyon, pagtuo, gugma, pagkamalahutayon, kalumo. Pakigbugno sa maayong pakigbugno sa pagtuo, hupting malig-on ang kinabuhing dayon nga ngadto niini gitawag kamo.” Alang sa mga Kristohanon sa Corinto siya miingon: “Magmalig-on kamo, dili-matarog, magmadagayaon kanunay sa buluhaton sa Ginoo.”—1 Timoteo 6:11, 12; 1 Corinto 15:58.
Ang pagsunod niining maayong tambag mao ang labing maayong paagi aron makabugno sa materyalismo nga malamposon, ug dayag nga adunay daghang buluhaton nga pagabuhaton sa mga Kristohanon! Diha sa pipila ka nasod diin dili kaayo daghan ang mga magwawali sa Gingharian, hilabihan ka daghang tawo ang wala kaayoy higayon nga makadungog sa kamatuoran. Tukmang mitagna si Jesus: “Daghan unta ang anihon, apan diyutay ra ang mga mamumuo.”—Mateo 9:37.
Inay tugotan ang mga kabalaka sa panalapi niining mga nasora sa paglinga kanila gikan sa espirituwal nga buluhaton, gipahimuslan sa mga Saksi ni Jehova ang kahimtang pinaagi sa paggamit sa bug-os sa mga higayon karon. Samtang temporaryo nga walay-trabaho, gipauswag sa daghan kanila ang ilang buluhatong pagsangyaw. Ang ilang pag-alagad, gawas pa nga nagapakusog sa singgit sa pagdayeg ngadto kang Jehova, nakahatag kanilag kalipay sa pagsagubang sa ilang kaugalingong mga suliran sa panalapi.
Gihatagag pangunang pagtagad niining maong mga Saksi ang buluhatong pagsangyaw ug gibutang ang mga kalisod sa panalapi sa ikaduhang dapit, nga nagapasundayag ngadto sa tibuok-kalibotan nga panag-igsoonay nga sila bug-os may pagsalig kang Jehova nga moatiman kanila. Ang iyang saad mao: “Nan, padayon sa pagpangita pag-una sa gingharian ug ang iyang pagkamatarong, ug unya kining tanang mga butang igadugang ra kaninyo.”—Mateo 6:33.
Sukad napasig-uli ang matuod nga pagsimba niadtong 1919, wala gayod pasagdi ni Jehova ang iyang katawhan nga maluya. Iyang gipanalipdan sila latas sa grabeng pagsulay ug sa ubang mga dapit latas sa mga dekada sa tago nga kalihokan. Ang mga Saksi ni Jehova determinado nga kon unsa kadtong napakyas sa pagkab-ot sa Yawa pinaagi sa paglutos, dili niya makab-ot bisan sa mas malalangong lit-ag sa materyalismo!
Nagtuon sa Paghulat sa Tanang Bahin
Ang dagkong mga Kingdom Hall, mahalong gamit sa sound, mga Assembly Hall, ug matahom nga mga puloy-anang Bethel nagahatag himaya sa Diyos ug nagatanyag ug hilom nga pamatuod nga iyang gipanalanginan ang iyang katawhan. Ang mga Saksi ni Jehova diha sa mga nasod diin ang buluhaton dugay nang gidili tingali mobati nga niining bahina sila daghan pag apasonon. Apan ang labing hinungdanon mao nga sila nagpadayon sa pag-uswag sa espirituwal. Ang panggawas nga timaan sa panalangin sa Diyos sa materyal nga paagi mosunod sa tinudlong panahon.
Ang dedikadong mga alagad ni Jehova kinahanglang magbantay kay basin, sa pagtinguhag personal nga kaayohan, sila mosugod sa pagtuo nga dugay na silang nahikawan sa pipila ka materyal nga mga butang. Ang pagpangandoy ug kahupayan gikan sa panalapi ug sa sosyal nga pagkadili-timbang masabot, apan ang katawhan ni Jehova dili makalimot nga ang tanang mga alagad sa Diyos nagapangandoy ug kahupayan. Ang mga buta nagapangandoy nga makakita pag-usab, ang adunay dukot nga sakit nagapangandoy nga mapasig-uli sa mahimsog nga panglawas, ang nagmagul-anon nagapangandoy ug usa ka masanag nga umaabot, ug ang nagbangotan nagapangandoy nga makakita sa ilang mga minahal nga mabuhi pag-usab.
Tungod sa mga kahimtang, ang matag usa ka Kristohanon sa pila ka bahin napugos sa paghulat sa bag-ong kalibotan ni Jehova sa pagsulbad sa iyang mga suliran. Kini angay mopukaw kanato sa pagpangutana sa kaugalingon, ‘Kon ako adunay makaon ug sapot, dili ba angay nga magmakontento ako niining mga butanga ug andam maghulat sa kahupayan gikan sa suliran sa panalapi?’—1 Timoteo 6:8.
Ang mga Kristohanon nga bug-os may pagsalig kang Jehova makatino nga kon sila andam nga mohulat, ang tanan nilang makataronganong mga tinguha ug mga panginahanglan matagan-an sa dili madugay. Walay usa unya ang maghulat sa walay kapuslanan. Atong sublion ang mga pulong ni Pablo: “Magmalig-on kamo, dili-matarog, magmadagayaon kanunay sa buluhaton sa Ginoo, sa nasayran ninyo nga diha sa Ginoo ang inyong pagpangabudlay dili makawang.”—1 Corinto 15:58.
Busa ang pagtuon sa paghulat dako ba gayod nga suliran?
[Hulagway sa panid 10]
Ang pagtuon sa paghulat makaluwas sa imong kinabuhi