Mga Pangutana Gikan sa mga Magbabasa

Ang ekspresyon nga “ginasahan sa espiritu,” nga makita diha sa 1 Corinto 14:37, nagkahulogan ba nga ang usa ka tawo nakadawat ug balaang espiritu sa diwa nga nahimong dinihogan, o kini ba nagpasabot nga siya adunay milagrosong gasa gikan sa espiritu?

Diha sa New World Translation of the Holy Scriptures, kining bersikuloha mabasa: “Kon adunay maghunahuna nga siya usa ka manalagna o ginasahan sa espiritu, ipaila kaniya ang mga butang nga gisulat ko kaninyo, kay sugo kini sa Ginoo.”​—1 Corinto 14:37.

Mahimong kutloon sa magbabasa ang mga pulong “ginasahan sa espiritu” sa pagpunting sa kamatuoran nga ang unang-siglong mga Kristohanon gianak sa espiritu ug nahimong espirituwal nga mga anak sa Diyos. O ang mga pulong mahimong sabton nga aplikado sa usa nga nakadawat ug linaing gasa sa balaang espiritu. Kining ulahi nga kahulogan lagmit mao ang ipasabot, ingon sa ipakita nga tabang sa konteksto.

Si apostol Pablo dinhi migamit sa Gregong pneu·ma·ti·kos’, nga may paninugdang diwa nga “labot sa espiritu, espirituwal.” Ang mga porma niini gigamit diha sa kahubitang “espirituwal nga lawas,” “espirituwal nga panalangin,” “espirituwal nga pagsabot,” ug “espirituwal nga panimalay.”​—1 Corinto 15:44; Efeso 1:3; Colosas 1:9; 1 Pedro 2:5.

Niadtong mga kasoha, gitagsatagsa sa Bibliya ang butang nga gihisgotan (lawas, panalangin, pagsabot, panimalay) nga gihubit sa “espirituwal.” Apan sa ubang mga kaso, ang diwa ug ang hustong paghubad sa “espirituwal” kinahanglang tinoon sumala sa konteksto. Pananglitan, ang 1 Corinto 2:14, 15 nagatandi sa tinamdan sa pisikal nga tawo uban sa ho pneu·ma·ti·kos’, nga sa pagkamakataronganon nagkahulogang “ang espirituwal nga tawo.”

Ang 1 Corinto kapitulo 12 hangtod sa 14 nagpunting sa milagrosong mga gasa sa balaang espiritu. Gihatag kini sa Diyos ngadto sa pipila sa unang mga Kristohanon aron ipakita nga siya wala na mogamit sa kinaiyanhon nga Israel apan karon nagapanalangin sa Kristohanong “Israel sa Diyos.” (Galacia 6:16) Mahitungod niining mga gasaha, si Pablo misulat: “Karon adunay nagkalainlaing gasa, apan adunay mao rang usa ka espiritu.” (1 Corinto 12:4) Ang linaing kaalam, kahibalo, ug pagtuo maoy lakip sa mga gasa sa espiritu, ingon man ang pagpanagna, pagsultig mga pinulongan, ug ang paghubad niini.​—1 Corinto 12:8-11.

Ang mga Kristohanon sa Corinto nga maoy gisulatan ni Pablo gidihogan sa balaang espiritu sa Diyos. Si Pablo miingon: “Apan kamo gihinloan na, apan kamo gibalaan na, apan kamo gipahayag na nga matarong sa ngalan sa atong Ginoong Jesu-Kristo ug diha sa espiritu sa atong Diyos.” (1 Corinto 6:11; 12:13) Oo, ang tanan nakadawat na ug “ilhanan sa umaabot, nga mao, ang espiritu.” (2 Corinto 5:5) Bisan pa, dili ang tanan kanila nakadawat ug linain nga gasa pinaagi sa balaang espiritu. Ug daw daghan ang nadani sa pagsulti ug mga pinulongan, nga naghatag ug sobra nga pagtagad niining gasaha. Si Pablo misulat aron sa pagtul-id sa ilang panghunahuna ug nagpasiugda nga ang mga pinulongan dili makahatag kaayohan sa daghang tawo kay sa ikahatag sa gasa sa pagpanagna. Sa kataposan sa kapitulo 12, gitambagan ni Pablo ang mga taga-Corinto: “Padayon sa madasigong pagtinguha sa labi pa ka dako nga mga gasa.”​—1 Corinto 12:28-31.

Unya, sa pagsugod sa kapitulo 14, siya miagda: “Tinguhaa ang gugma, bisan pa padayon sa madasigong pagtinguha sa [ta pneu·ma·ti·ka’], apan ilabina nga kamo managpanagna.” Pagpaninguha ug unsa? Ang maong mga Kristohanon dili na angay maninguha nga dihogan sa espiritu, kay sila dinihogan na. Sa makataronganon ang gipasabot ni Pablo mao ang “mga gasa” sa espiritu, diin siya, sa kataposan sa kapitulo 12, miagda nga maoy ilang tinguhaon. Busa, ang New World Translation of the Holy Scriptures naghubad sa 1 Corinto 14:1: “Padayon sa madasigong pagtinguha sa espirituwal nga mga gasa.” Ang ubang mga bersiyon sa Bibliya dinhi naghubad sa ta pneu·ma·ti·ka’ nga “ang espirituwal nga mga gasa” o “mga gasa sa Espiritu.”

Uban niana nga kahibalo, atong mamatikdan nga sa duol sa kataposan sa kapitulo 14, gilangkit ni Pablo ang pagpanagna ug pneu·ma·ti·kos’. Sama sa bersikulo 1, ang konteksto nagsugyot nga ang iyang gipasabot mao ang pagkahimong ginasahan sa balaang espiritu. Ang The New Testament in Modern Speech, ni R. F. Weymouth, misagop sa hubad: “Kon may tawo nga nagtuo nga siya usa ka manalagna o usa ka tawo nga adunay espirituwal nga mga gasa, ipaila kaniya ang akong gisulat karon ingong sugo sa Ginoo.”

Oo, ang tanang Kristohanon, kon kaha sila adunay gasa sa pagpanagna o sa bisan unsang ubang gasa sa espiritu, kinahanglang modawat ug ipadapat ang tambag nga gisulat ni Pablo maylabot sa kon sa unsang paagi pagadumalahon ang mga butang diha sa kongregasyon.