Mga Pangutana Gikan sa mga Magbabasa

Sanglit ang karaang saserdote nga ginganlag Melchizedek maoy tinuod nga tawo, nganong ang Bibliya nag-ingon nga siya “walay kagikan”?

Kining pahayaga anaa sa Hebreohanon 7:3. Matikdi ang bersikulo diha sa konteksto niini:

“Tungod niini si Melchizedek, ang hari sa Salem, saserdote sa Labing Hataas nga Diyos, kinsa mitagbo kang Abraham nga nahiuli gikan sa pagpamatay sa mga hari ug nagpanalangin kaniya ug ngadto kang kinsa si Abraham mihatag ug ikapulo sa tanang butang, una sa tanan maoy, sa paghubad, ‘Hari sa Pagkamatarong,’ ug mao usab ang hari sa Salem niadtong panahona, nga mao, ‘Hari sa Kalinaw.’ Sa pagkawalay-amahan, walay-inahan, walay kagikan, nga walay sinugdanan sa mga adlaw ni kataposan sa kinabuhi, apan gihimong sama sa Anak sa Diyos, siya nagpabiling saserdote hangtod sa hangtod.”​—Hebreohanon 7:1-3.

Sumala sa nahisgotan, si Melchizedek maoy tinuod nga tawo, sama ka tinuod kang Abraham, kang kinsa siya may direktang pakiglabot. (Genesis 14:17-20; Hebreohanon 7:4-10) Nga ingon niana, si Melchizedek may mga ginikanan gayod, usa ka amahan ug inahan, ug tingali may mga anak siya. Busa, ingong tawhanon siya may kagikan, o kaliwatan sa banay. Siya namatay usab. Sa usa ka panahon namatay si Melchizedek, uyon sa pahayag ni apostol Pablo sa Roma 5:12, 14. Apan sanglit wala kita masayod kanus-a namatay si Melchizedek ug sa ingon mihunong sa pag-alagad ingong saserdote, nianang bahina nag-alagad siya nga walay nahibaloang kataposan.

Sa Hebreohanon, si Pablo mihimog mga komento mahitungod kang Melchizedek sa dihang naghisgot sa papel ni Jesu-Kristo ingong labaw nga Hataas nga Saserdote. Nga nagtumong kang Melchizedek ingong larawan, o sumbanan, ni Jesus niining saserdotehanong papel, si Pablo nag-ingon: “Si Jesus . . . nahimong usa ka hataas nga saserdote sumala sa paagi ni Melchizedek.” (Hebreohanon 6:20) Sa unsang diwa?

Si Pablo lagmit nakaamgo nga ang talaan sa Bibliya wala maghatag ug mga detalye mahitungod sa kagikan ni Melchizedek​—sa iyang mga katigulangan o sa bisan unsang posibleng mga kaliwat. Kanang maong impormasyon dili lang kay usa ka talaan sa Bibliya. Busa, gikan sa panglantaw sa kon unsay nahibaloan ni Pablo o nahibaloan nato, si Melchizedek mahimong hustong tawgon nga “walay kagikan” (New World Translation of the Holy Scriptures; American Standard Version), “walay talaan sa kagikan” (W. J. Conybeare), o “walay kaliwatan.”​—J. B. Phillips.

Sa unsang paagi sama si Jesus niana? Tinuod, kita nasayod nga ang Amahan ni Jesus mao si Jehova nga Diyos ug nga ang iyang tawhanong inahan nga si Maria maoy sa tribo ni Juda. Bisan pa, may kasamahan tali kang Melchizedek ug kang Jesus. Sa unsang paagi? Si Jesus wala matawo sa tribo ni Levi, ang tribo sa mga saserdote sa nasod sa Israel. Wala, si Jesus wala mahimong saserdote pinaagi sa tawhanong kagikan. Mao man usab si Melchizedek, kinsa wala mahimong saserdote “sumala sa kasugoan nga nagdepende sa unod,” nga mao, pinaagi sa pagkatawo nganha sa saserdotehanong tribo ug pamilya. (Hebreohanon 7:15, 16) Imbes mahimong saserdote pinaagi sa tawhanong amahan nga sa iyang kaugalingon mismo nahimong saserdote, si Jesus “sa linain gitawag sa Diyos nga hataas nga saserdote sumala sa paagi ni Melchizedek.”​—Hebreohanon 5:10.

Dugang pa, si Jesus walay mga kaliwat o mga sumusunod sa iyang pagkasaserdote. Niining maong diwa usab, siya walay kagikan. Sa walay kataposan siya magtuman sa iyang pagkasaserdote ingong matinabangong magtutudlo. Si Pablo mikomento bahin sa iyang walay-kataposang pag-alagad, nga nag-ingon:

“[Si Jesus] tungod sa padayong pagkinabuhi sa walay kataposan walay mga sumusunod sa iyang pagkasaserdote. Sa ingon niana siya makahimo usab sa pagluwas sa bug-os niadtong nagaduol sa Diyos pinaagi kaniya, tungod kay siya kanunayng buhi aron sa paghangyo alang kanila.”​—Hebreohanon 7:24,25.

Busa ang atong pagkonsiderar sa mga pulong ni Pablo sa Hebreohanon 7:3 angayng labaw pa kay sa usa ka tipik sa kahibalo nga tipigan sa atong hunahuna. Kinahanglang kana magpalig-on sa atong pagpabili sa mahigugmaong tagana nga gihimo ni Jehova nga Diyos alang kanato sa pagbaton ug kapasayloan sa sala sa walay kataposan ug sa dalan nga iyang gihikay alang kanato sa pagdawat sa tabang ug giya hangtod sa hangtod.