“Pangitaa Ninyo si Jehova, Kamong Tanang mga Maaghop”
“PANGITAA ninyo si Jehova, kamong tanang mga maaghop sa yuta, nga nanagtuman sa Iyang kaugalingong hudisyal nga desisyon. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”—Sofonias 2:3.
Gipahayag ni manalagnang Sofonias kadtong mga pulonga ngadto sa “mga maaghop sa yuta,” ug iyang giawhag sila sa ‘pagpangita sa pagkamaaghop’ aron pagapanalipdan “sa adlaw sa kasuko ni Jehova.” Tino nga ang pagkamaaghop maoy usa ka kinahanglanon alang sa kaluwasan. Apan ngano?
Nganong Pangitaon ang Pagkamaaghop?
Ang pagkamaaghop mao ang hiyas sa pagkahimong malumo ug kinaiya, nga walay pagkamapahitas-on kun pagkamagarbohon. Kini suod nga nalangkit sa ubang mga hiyas, sama sa pagkamapaubsanon ug kalumo. Kon mao, ang mga tawong maaghop matudloan ug andam modawat ug disiplina gikan sa kamot sa Diyos, bisan tuod daw makapasubo kini sa maong panahon.—Salmo 25:9; Hebreohanon 12:4-11.
Ang pagkamaaghop walay kalabotan sa edukasyon ug kahimtang sa kinabuhi sa tawo. Ugaling, kadtong edukado kaayo o malamposon sa kalibotan kiling sa paghunahuna nga sila adunay katakos sa paghimog mga desisyon sa ilang kaugalingon sa tanang butang, bisan sa mga butang may kalabotan sa pagsimba. Kini makapugong kanila sa pagtugot sa ubang tawo sa pagtudlo kanila o sa pagdawat ug tambag ug sa paghimog gikinahanglang kausaban sa ilang mga kinabuhi. Ang uban nga sapian hayan mahulog sa sayop nga paghunahuna nga ang ilang kasegurohan anaa sa ilang materyal nga mga kabtangan. Busa, sila mobati nga wala magkinahanglan ug espirituwal nga mga bahandi gikan sa Pulong sa Diyos, ang Bibliya.—Mateo 4:4; 5:3; 1 Timoteo 6:17.
Palandonga ang mga eskriba, ang mga Pariseo, ug ang punoang mga saserdote sa mga adlaw ni Jesus. Sa usa ka okasyon sa dihang ang mga polis nga ilang gipadala sa pagdakop kang Jesus mibalik nga wala siya madala, ang mga Pariseo miingon: “Nagpahisalaag ba diay usab kamo? Duna bay usa sa mga punoan o mga Pariseo ang mituo kaniya? Apan kining mga tawhana nga walay kahibalo sa Kasugoan mga tinunglo.” (Juan 7:45-49) Sa laing pagkasulti, alang kanila, ang ignorante ug ang walay edukasyon lamang ang dali-matonto sa pagtuo kang Jesus.
Bisan pa, ang pipila ka Pariseo nakabig sa kamatuoran, ug ila pa ganing gidepensahan si Jesus ug ang mga Kristohanon. Lakip kanila mao si Nicodemo ug si Gamaliel. (Juan 7:50-52; Buhat 5:34-40) Sa pagkamatay ni Jesus, “daghan kaayong saserdote ang nagmasinugtanon sa pagtuo.” (Buhat 6:7) Sa walay duhaduha ang labing talagsaong pananglitan mao si apostol Pablo. Siya giedukar sa tiilan ni Gamaliel ug malamposon kaayo ug tinahod nga tiglaban sa Hudaismo. Apan, sa ulahi siya mapainubsanong misanong sa panawag ni Jesu-Kristo ug nahimong iyang masibotong sumusunod.—Buhat 22:3; 26:4, 5; Galacia 1:14-24; 1 Timoteo 1:12-16.
Kining tanan nag-ilustrar nga bisan unsa pay kagikan sa tawo o bisan unsa pay bation sa tawo bahin sa mensahe gikan sa Bibliya, ang mga pulong ni Sofonias aplikado gihapon. Kon ang usa buot makabaton sa pag-uyon sa Diyos ug matultolan sa iyang Pulong, hinungdanon kaayo ang pagkamaaghop.
Kadtong “Nangita sa Pagkamaaghop” Karon
Milyonmilyong tawo sa tibuok kalibotan nagasanong sa maayong balita sa Gingharian. Ang mga Saksi ni Jehova nagadumala ug kapin sa upat ka milyong pagtuon sa Bibliya kada semana sa mga balay niining mga tawhana. Kini nagagikan sa daghan ug nagkadaiyang kagikan ug lainlaing mga kahimtang sa panalapi ug pagkabutang diha sa katilingban. Bisan pa, usa ka butang nga ilang gikausahan mao nga sila adunay igong pagkamapaubsanon sa pagdawat sa mensahe sa Bibliya nga gipresentar kanila diha sa ilang kaugalingong pultahan o sa ubang dapit. Daghan kanila nagahimog maayong pag-uswag tungod kay sila andam sa pagpaningkamot sa pagbuntog sa kababagan sa ilang dalan. Oo, sila maoy lakip sa “mga maaghop sa yuta” karong adlawa.
Tagda, pananglitan, si Maria sa Mexico. Siya nagtuon ug abogasiya sa unibersidad ug sapian tungod sa usa ka irehensiya. Tungod niini, naugmad niya ang haluag kaayo nga hunahuna nga nakabag-o kaniya, sumala sa iyang pagkapahayag niana, nahimo siyang usa ka “rebelyoso, walay batasan, mapalabilabihon, ug walay gituohang diyos” nga tawo. “Nagtuo ako nga ang tanang butang masulbad sa salapi ug nga ang Diyos dili hinungdanon. Sa pagkamatuod, gibati ko nga siya wala gani maglungtad,” si Maria nahinumdom. “Alang kanako binuang ang relihiyon ug usa lamang ka sosyal nga kinahanglanon,” siya midugang.
Sa kadugayan, si Maria nakamatikod sa kausaban sa iyang ig-agaw human nga nahimo siyang usa sa mga Saksi ni Jehova. “Terible kaayo siya kaniadto, ug karon siya maoy usa na ka malinawon kaayo ug matarong nga tawo,” miasoy si Maria. “Ang mga paryente miingon nga siya usa ka magwawali ug nagabasag Bibliya, ug tungod niana siya dili na moinom o dukirok ug mga babaye. Busa gusto ko nga duawon niya ako ug basahan akog Bibliya tungod kay nagtuo ako nga kini ang paagi nga makaplagan ko ang kalinaw ug kahilom nga gikinahanglan ko kaayo.” Ang resulta mao nga gidawat ni Maria ang pagtuon sa Bibliya uban sa magtiayong Saksi.
Daghang butang ang iyang pagabuntogon, ug nalisdan gayod siya sa pagdawat sa prinsipyo sa Bibliya bahin sa pagkaulo aron magpasakop sa iyang bana. Apan naghimo siya ug dako nga kausaban sa iyang kinabuhi ug tinamdan. Siya miangkon: “Nagtuo ako nga sukad miabot ang mga igsoon sa akong balay ug nagdala uban kanila sa tabang ni Jehova, may kalipay na, kalinaw, ug panalangin sa Diyos ang akong panimalay.” Karon, si Maria maoy usa na ka dedikado, bawtismadong Saksi ni Jehova.
Sa pagtinguha sa matuod nga pagsimba, adunay laing dapit diin ang pagkamaaghop, o ang kakulang niana, nagadulag usa ka hinungdanong bahin. Kasagaran, ang asawa sa pamilya modawat sa kamatuoran ug buot moalagad sa Diyos, apan ang bana dili modawat. Tingali lisod alang sa pipila ka bana ang pagdawat sa ideya nga adunay lain—si Jehova nga Diyos—nga karon magpasakop ang iyang asawa. (1 Corinto 11:3) Usa ka babaye sa Chihuahua, Mexico, mihangyo ug pagtuon sa Bibliya, ug sa kataposan siya ug ang iyang pito ka anak nakadangat sa kamatuoran. Sa sinugdan misupak ang iyang bana. Ngano? Tungod kay dili siya buot nga ang iyang pamilya mosangyaw sa balay ug balay, nga magtanyag ug basahon sa Bibliya. Dayag nagtuo siya nga makawala kini sa iyang dignidad. Ang iyang pamilya, hinunoa, mibarog nga malig-on sa ilang desisyon sa pag-alagad sa Diyos. Sa ulahi ang bana misugod sa pagkakita sa bili sa pagdawat sa kahikayan sa Diyos. Apan 15 ka tuig ang miagi una pa niya gipahinungod ang iyang kaugalingon kang Jehova.
Sa tibuok Mexico, aduna gihapoy hilit nga mga komunidad diin ang lokal nga mga molupyo nagpabilin sa ilang lumad nga mga pinulongan ug mga kustombre. Ang mensahe sa Bibliya nakaabot niining mga tawhana ug ginatabangan sila sa pagpauswag sa ilang nga kahimtang sa kultura, sanglit ang pipila nakakat-on sa pagbasa ug pagsulat samtang nagtuon sila sa kamatuoran. Hinunoa, ang kamatuoran sa pagkamubo ug edukasyon sa mga tawo o pagkadiyutay ug materyal nga kahinguhaan wala magkahulogan nga mas masanongon sila. Ang garbo sa rasa ug ang lig-ong pagtapot sa mga tradisyon sa kagikan usahay nagpalisod sa pipila sa pagdawat sa kamatuoran. Kini mao ang hinungdan usab kon nganong ang pipila ka balangayng Indian, kadtong midawat sa kamatuoran kasagaran ginahasi sa ubang mga taga-balangay. Busa ang pagkamaaghop adunay daghang matang.
Sanong nga Maaghopon
Ikaw komosta? Ikaw ba nagasanong sa kamatuoran sa Pulong sa Diyos? O nalisdan ka ba sa pagdawat sa pipila ka kamatuoran sa Bibliya? Tingali buot nimong susihon ang imong kaugalingon aron masuta kon unsay nagpugong kanimo. Ikaw ba natugaw tungod kay ang kadaghanan sa katawhan nga nakabig sa kamatuoran mga timawa? Nalangkit ba kaha ang personal nga garbo sa imong kaisipan? Maayong palandongon ang mga pulong ni apostol Pablo: “Gipili sa Diyos ang ginapakabuang sa kalibotan, aron iyang mapakaulawan ang mga manggialamon; ug gipili sa Diyos ang ginapakahuyang nga mga butang sa kalibotan, aron iyang mapakaulawan ang mga kusgan; ug gipili sa Diyos ang mga timawa sa kalibotan ug mga tinamay, bisan ang mga butang nga wala maglungtad, aron iyang mawagtang ang mga butang nga nagalungtad, aron walay tawo ang makapasigarbo diha sa panan-aw sa Diyos.”—1 Corinto 1:27-29.
Ibalibag ba nimo ang usa ka bahandi tungod lamang kay nakit-an nimo kini diha sa usa ka dili-nindot nga sudlanang yutang-kolonon? Siyempre dili gayod! Bisan pa, mao kana ang paagi nga gipili sa Diyos sa pagpresentar sa iyang makaluwas ug kinabuhi nga Pulong sa kamatuoran kanato, sama sa gibatbat ni apostol Pablo: “Atong nabatonan kining bahandia diha sa mga sudlanang yutang-kolonon, aron ang gahom nga saylo na sa kasagaran maiya sa Diyos ug dili gikan sa atong kaugalingon.” (2 Corinto 4:7) Ang pagkamaaghop ug pagkamapaubsanon makahimo kanato sa pagkakita sa matuod nga bili sa bahandi ug dili lamang sa “mga sudlanang yutang-kolonon,” o tawhanong mga ahensiya, nga nagahatod niini kanato. Sa paghimo niini, gipadako usab nato ang posibilidad nga kita mahimong “pagatagoan sa adlaw sa kasuko ni Jehova” ug nga malakip sa maaghop nga “makapanunod sa yuta.”—Sofonias 2:3; Mateo 5:5.