Kalinaw sa Hunahuna Diha sa Maindigong Katilingban

“KON adunay buot nga mauna,” si Jesu-Kristo mitambag sa iyang mga apostol, “kinahanglang siya maulahi sa tanan ug maalagad sa tanan.” Ang mga apostol nag-ergo mahitungod sa kon kinsa ang kinalabwan kanila. Nasayod sila nga gidumtan ni Jesus kanang matanga sa espiritu. Wala gayod niya himoa nga ang iyang mga disipulo mag-indigay sa usag usa ingong usa ka paagi sa pagpasiugda ug espirituwal nga pag-uswag.​—Marcos 9:33-37.

Una moanhi sa yuta, si Jesu-Kristo nakigbahin sa paglalang sa unang tawhanong magtiayon ug nasayod kon giunsa sila pagbuhat. (Colosas 1:15, 16) Ang unang mga tawo gilalang nga may katakos nga mouswag nga dili mapintasong makig-indig sa uban. Ang mga tawo dili kinahanglang mag-away sa paghukom kon kinsa ang ilang ulo, ni sila makig-indig sa mga hayop sa pakigbisog nga mabuhi.​—Genesis 1:26; 2:20-24; 1 Corinto 11:3.

Sinugdanan sa Maindigong Espiritu

Nan, sa unsang paagi ang mapintasong espiritu sa pakig-indig nahimong nangibabaw nga gahom sa tawhanong katilingban? Ang unang kaso sa pagpatay sa kasaysayan sa tawo mohatag ug timailhan. Ang maindigong espiritu sa bahin ni Cain, ang kinamagulangang anak lalaki sa unang tawhanong magtiayon, misangpot sa trahedya. Gipatay ni Cain ang iyang igsoong si Abel tungod kay ang halad ni Abel nakapahimuot sa Diyos, samtang ang kang Cain wala. Ug ang Bibliya nag-ingon nga si Cain “naggikan sa daotang usa ug mipatay sa iyang igsoon.”​—1 Juan 3:12; Genesis 4:4-8.

Oo, ang daotang usa, si Satanas nga Yawa, mao ang tagmugna ug tigpasiugda sa maindigong espiritu. Bisan pag siya usa ka manulondang anak sa Diyos nga may hatag-as nga mga pribilehiyo, gusto niyag daghan pa. (Itandi ang Ezekiel 28:14, 15.) Sa dihang iyang gitental si Eva, iyang gipadayag ang iyang kaugalingong tinguha. Siya miingon nga pinaagi sa pagkaon sa gidiling bunga, siya “mahimong sama sa Diyos.” (Genesis 3:4, 5) Sa pagkatinuod, si Satanas mao ang gustong mahisama sa Diyos, nga moindig kang Jehova. Ang espiritu sa pagpakig-indig sa Diyos miaghat kaniya sa pag-alsa.​—Santiago 1:14, 15.

Kining espirituha maoy mananakod. Ubos sa impluwensiya ni Satanas, ang hinatag-Diyos nga kalinaw sa unang kahikayan sa pamilya nahanaw. (Genesis 3:6, 16) Sukad gayod sa iyang pag-alsa batok sa Diyos, si Satanas nga Yawa nagmando sa katawhan, nga mipalambo sa espiritu sa pakig-indig, nga naglimbong pa sa mga lalaki ug mga babaye sa pagtuo nga ang mapintas nga pakig-indig mao ang yawi sa kalamposan. Bisan pa niana, ang Bibliya nagsaysay: “Kon hain ang pangabugho ug pagkamabingkilon, anaa ang kasamok ug matag ngil-ad nga butang.” (Santiago 3:14-16) Sa ingon si Satanas mihikaw sa tawo sa iyang kalipay ug kalinaw sa hunahuna.

Kalamposan nga Walay Pakig-indig

Kasukwahi sa panghaylo ni Satanas, ang Bibliya naghatag ug mga panig-ingnan sa kalamposan nga walay pakig-indig. Kinalabwan mao ang kang Jesu-Kristo. Bisan pag naglungtad sa dagway sa Diyos, siya wala gayod maghunahuna nga mahisama sa Diyos apan nagbaton sa dagway sa usa ka ulipon ug mianhi sa yuta. Labaw pa niana, siya nagpaubos sa iyang kaugalingon ug nagmasinugtanon hangtod sa kamatayon sa usa ka kahoy sa pagsakit. Kining masinugtanong tinamdan, nga walay espiritu sa pakig-indigay, misangpot sa pagkabaton niyag balaang pag-uyon. “Tungod niini mismong katarongana usab ang Diyos mibayaw kaniya ngadto sa usa ka labaw nga katungdanan ug sa maluloton mihatag kaniya sa ngalan nga labaw sa tanang uban pa nga ngalan.” (Filipos 2:5-9) Unsang labaw nga kalamposan ang makab-ot ni bisan kinsang linalang? Gipahimut-an niya ang iyang Amahan sa gidak-on nga wala mahimo sa laing linalang, ug kini iyang gibuhat nga walay espiritu sa pakigparang o panag-indig.​—Proverbio 27:11.

Ang daghang matinumanong mga manulonda sa langit nagpakita niining samang tinamdan. Bisan pag si Jesus, kinsa mao ang ulo sa mga manulonda, nahimong ubos ug diyutay kanila sa dihang mianhi siya sa yuta, sila masinugtanong nag-alagad sa iyang mga panginahanglan. Tin-aw, wala moabot sa ilang hunahuna ang pagpahimulos sa kahimtang ug pagsulay sa pagpuli kaniya ingong Arkanghel.​—Mateo 4:11; 1 Tesalonica 4:16; Hebreohanon 2:7.

Ang ilang pag-ayad sa maindigong mga tinamdan labi pang dayag sa dihang atong palandongon ang paagi sa ilang pagsanong ngadto sa katuyoan sa Diyos nga bayawon ang pila ka dili-hingpit nga mga tawo ngadto sa dili-mamatay espiritung kinabuhi, nga sa maong kahimtang sila “maghukom sa mga manulonda.” (1 Corinto 6:3) Ang mga manulonda adunay daghan kaayong kasinatian sa pag-alagad kang Jehova ug adunay labaw pang katakos sa paghimog maayo kay sa dili-hingpit nga mga tawo. Sa gihapon, ang mga manulonda malipayong nagaalagad sa mga dinihogan sa yuta, nga wala gayod masina kon unsay madawat nila. (Hebreohanon 1:14) Ang ilang maayo, dili-maindigong tinamdan makapasarang nila sa pagpadayon sa pag-alagad atubangan sa trono sa Soberanong Ginoong Jehova.

Unya, palandonga ang karaang matinumanong mga alagad sa Diyos nga pagabanhawon sa yuta. Si Abraham maoy talagsaong panig-ingnan sa pagtuo ug gitawag “ang amahan sa tanan nga nagbatog pagtuo.” (Roma 4:9, 11) Si Job nagpadayag ug masilakong panig-ingnan sa pagkamainantoson. (Santiago 5:11) Si Moises, “hangtod niadtong panahona ang labing maaghop sa tanang tawo diha sa ibabaw sa nawong sa yuta,” maoy nanguna sa nasod sa Israel ngadto sa kagawasan. (Numeros 12:3) Kinsa taliwala sa dili-hingpit nga mga tawo ang naghatag ug mas maayong panig-ingnan sa pagtuo, pagkamainantoson, ug pagkamaaghop kay niining mga tawhana? Bisan pa niana, sila nahalinya nga magapanunod sa yutan-ong dominyo sa Gingharian sa Diyos. (Mateo 25:34; Hebreohanon 11:13-16) Sila, sama kang Juan Bawtista, isipon nga ubos “sa tawo nga ubos diha sa gingharian sa mga langit.” (Mateo 11:11) Maghunahuna ba sila nga moreklamo, nga mopugos nga ang ilang pagtuo, pagkamainantoson, o pagkamaaghop nahisama o sa pila ka kaso milabaw sa iya niadtong pagahatagan ug kinabuhi sa langit? Tino nga dili! Sila mahimong malipayong yutan-ong mga sakop sa Gingharian sa Diyos.

Karong adlawa, usab, ang mga tawo nga dili maindigon ug tinamdan makapahimuot nga ikauban. Si Yasuo, nga gihisgotan sa unang artikulo, nakautang ug dako kaayo gumikan sa pagpangubkob ug bulawan ug nawad-an sa tanan niyang propiedad. Ang iyang “mga higala” mibiya kaniya. Sa pagsugod sa iyang asawa sa pagtuon sa Bibliya uban sa mga Saksi ni Jehova, siya mitambong sa ilang mga tigom tungod sa pagbati sa pagbasol sa gipahinabo niyang pag-antos sa iyang pamilya. Sa ngadtongadto, nahanaw ang iyang pagkamaindigon ug nahimong usa sa mga Saksi ni Jehova. Karon siya malipayon nga gilibotan ug Kristohanong mga higala, ang matang nga andam motabang kaniya sa mga panahon sa kalisdanan.

Kon Unsaon Paghupot nga Padayon ang Kalinaw sa Hunahuna

Dili kanunay sayon ang paghupot nga padayon sa kalinaw sa hunahuna diha sa way-kaluoy, maindigong katilingban. Maayo nga atong matikdan nga ang Bibliya nagsaway sa “mga panagdumtanay, panag-away, pangabugho, mga pagsinta sa kasuko, mga pakigbingkil, mga panagkabahin, mga sekta, mga kasina” ingong “mga buhat sa unod” nga mopugong sa mga tawo sa pagpanunod sa Gingharian sa Diyos. Kining mga buhata ngatanan kaduyog sa maindigong espiritu. Dili katingad-ang si apostol Pablo midasig sa mga taga-Galacia: “Dili kita mahimong mapagawalon sa kaugalingon, nga magaaghat ug pakig-indigay sa usag usa, nga magasinahay sa usag usa.”​—Galacia 5:19-21, 26.

Sa maong konteksto, ang sulat ni Pablo nagpakita sa sekreto sa pagsagubang sa mapagawalong pakig-indig. Matud niya: “Ang bunga sa espiritu mao ang gugma, kangaya, pakigdait, taas-nga-pailob, kalulot, pagkamaayo, pagtuo, kalumo, pagpugong-sa-kaugalingon. Batok sa maong mga butang walay balaod.” (Galacia 5:22, 23) Ang mga bunga sa espiritu motabang kanato sa pagwagtang sa pakig-indig gikan sa atong mga hunahuna. Tagda, pananglitan, ang hiyas nga gugma. “Ang gugma dili abughoan,” misaysay si Pablo. “Kini dili magapanghambog, dili magapaburot, dili magagawing binastos, dili magapangita sa kaugalingon niining kaayohan, dili mapasuko.” (1 Corinto 13:4-7) Pinaagi sa pag-ugmad sa gugma, malangkat nato ang kasina, usa ka matukmorong gahom sa espiritu sa pakig-indig. Ang ubang mga bunga sa espiritu motabang usab kanato sa pagwagtang sa bisan unsang nagpabiling mga timaan sa mapintas, maindigong espiritu gikan sa atong mga kasingkasing ug mga hunahuna. Ngani, pinaagi sa pagpugong-sa-kaugalingon ang bisan unsang nagatubong agda nga makig-indig sa uban aron makadaog bisan unsay mahitabo duol nang mapukgo!​—Proverbio 17:27.

Ugaling, aron maugmad kining mga hiyasa, kinahanglang tugotan natong ang espiritu sa Diyos molihok diha kanato. Madasig nato kining makaayong paglihok sa balaang espiritu pinaagi sa paglahutay sa pag-ampo ug paghangyo nga tabangan kita sa espiritu sa Diyos. (Lucas 11:13) Ingong tubag sa atong pag-ampo, unsay itugot sa Diyos kanato? Ang Bibliya nagtubag: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”​—Filipos 4:6, 7.

Kini nadayag sa kahimtang sa mga apostol ni Jesus. Bisan human sugdi ni Jesus ang Panihapon sa Ginoo sa kataposan niyang gabii uban sa mga apostol, sila naglalis gihapon mahitungod sa kon kinsa kanila ang daw labing dako. (Lucas 22:24-27) Sa lainlaing higayon si Jesus misulay sa pagtabang kanila sa pagtul-id sa ilang panghunahuna, apan ang maong maindigong tinamdan nakadulot ug halalom diha kanila. (Marcos 9:34-37; 10:35-45; Juan 13:12-17) Bisan pa niana, sa dihang sila nakadawat sa balaang espiritu mga 50 ka adlaw human niadtong panaglalis, ang ilang tinamdan nausab. Wala na ing panaglalis mahitungod sa kon kinsay maghawas kanila sa pagpakigsulti ngadto sa mausisaong panon nga nagtigom niadtong adlawa sa Pentekostes.​—Buhat 2:14-21.

Walay dapit ang tawhanong pagmando ibabaw sa Kristohanong kongregasyon. Sa dihang kinahanglang masulbad nila ang usa ka suliran mahitungod sa sirkunsisyon, si Santiago, kinsa dili pa gani usa ka tinun-an sa panahon sa pagkamatay ni Jesus, maoy nagdumala niadtong hinungdanong tigom. Wala ing ilhanan sa panaglalis mahitungod sa kon kinsa ang manguna niadtong panagkatigom sa nagamandong lawas sa Kristohanong kongregasyon. Pagkadakong kausaban gikan sa panahon nga ang mga apostol natakdan sa maindigong espiritu! Sa tabang sa balaang espiritu, ilang nahinumdoman ang mga pagtulon-an ni Jesus ug nasabtan ang kahulogan sa iyang mga gitudlo.​—Juan 14:26.

Kana matuod usab kanato. Sa tabang sa balaang espiritu, kita makabuntog sa bisan unsang nagpabiling agda nga makig-indig sa uban aron moasenso nga sila ang madaot. Hinunoa, maangkon nato ang kalinaw sa hunahuna nga molabaw sa tanang panghunahuna. Ang Bibliya nagpasalig kanato nga ang tinubdan sa mapintas nga pakig-indig, si Satanas nga Yawa, duol nang itambog sa bung-aw, nga himoong dili na makalihok. (Pinadayag 20:1-3) Ang pakig-indig taliwala sa mga silingan mawala na. Ang mosangpot mao ba ang katilingban nga walay pag-uswag? Dili gayod! Ang mga tawo mouswag ngadto sa kahingpitan, dili pinaagi sa pakig-indig sa ilang taliwala, kondili pinaagi sa pagpadapat sa halad lukat ni Jesus nganha kanila.​—1 Juan 2:1, 2.

Si Keinosuke, nga gihisgotan ganina, kinsa sa nangagi nakasinati sa himaya sa kalibotanong kalamposan pinaagi sa pagbaligyag talagsaong gidaghanon sa mga kotse, nahago pag-ayo sa hunahuna ug sa lawas, apan sa kadugayan miundang siya sa iyang trabaho. “Karon, ang akong kinabuhi nahupong sa tinuod nga kalipay,” matud niya. Iyang nasabtan kon nganong ang tinuod nga kalamposan nagtimaan sa kinabuhi ni Jesus. Siya karon nakakaplag ug kahupayan diha sa bisan unsang iyang mabuhat diha sa tibuok-kalibotang kongregasyon sa Diyos. Sa ingon siya ginaandam alang sa bag-ong kalibotan, diin wala nay pakig-indig. Ikaw usab makabatog pasiunang pagtan-aw niining bag-ong kalibotan nga katilingban pinaagi sa pagduaw sa usa sa mga Kingdom Hall sa inyong dapit ug pagpakig-uban sa mga Saksi ni Jehova.

[Hulagway sa panid 7]

Ang kalinaw ug pakigtambayayong matagamtam sa tawhanong katilingban diha sa bag-ong kalibotan sa Diyos