Mga Bunga​—Maayo ug Daotan

“Si Jehova nagpakita kanako, ug, tan-awa! duha ka bukag sa mga igos . . . Mahitungod sa usa ka bukag, ang mga igos maayo kaayo, sama sa mga igos nga sayo; ug mahitungod sa laing bukag, ang mga igos daot kaayo, mao nga sila dili na makaon tungod sa pagkadaot.”​—JEREMIAS 24:1, 2.

1. Sa unsang paagi si Jehova nagpakita ug kaluoy sa iyang katawhan, ang Israel, apan unsay ilang sanong?

ANG tuig maoy 617 W.K.P. Kadto napulo lamang ka tuig una ipatuman ang angay nga paghukom ni Jehova batok sa Jerusalem ug sa katawhan niini. Si Jeremias naghago sa pagwali sa 30 na ka tuig. Matikdi ang tin-aw nga paghubit ni Esdras sa kahimtang, sumala sa makita sa 2 Cronicas 36:15: “Si Jehova ang Diyos sa ilang mga amahan nagpadayon sa pagpadala batok kanila pinaagi sa iyang mga mensahero, nga nagbalikbalik sa pagpadala, kay naluoy siya sa iyang katawhan ug sa iyang puloy-anan.” Unsay sangpotanan niadtong tanang paghago? Ikasubo, si Esdras padayon nga miasoy sa bersikulo 16: “Apan sila nagpadayon pagbiaybiay sa mga mensahero sa matuod nga Diyos ug nagtamay sa iyang mga pulong ug nagbugalbugal sa iyang mga manalagna, hangtod nga misilaob ang kaaligutgot ni Jehova batok sa iyang katawhan, hangtod nga wala nay pagkaayo.”

2, 3. Batbata ang talagsaong panan-awon nga gipakita ni Jehova kang Jeremias.

² Kini ba nagkahulogan nga ang nasod sa Juda sa hingpit mapuo? Aron makita ang tubag, atong hisgotan ang usa ka halandumong panan-awon nga sa maong panahon gihatag kang Jeremias ug gitala sa kapitulo 24 sa basahon nga nagdala sa iyang ngalan. Ang Diyos migamit sa duha ka bukag sa mga igos sa maong panan-awon sa pagsimbolo sa mga panghitabo taliwala sa iyang katawhan sa pakigtugon. Kini pagahawasan sa duha ka magkalaing matang sa mga bunga, ang maayo ug ang daotan.

³ Ang Jeremias kapitulo 24, mga bersikulo 1 ug 2, nagbatbat kon unsay nakita sa manalagna sa Diyos: “Si Jehova nagpakita kanako, ug, tan-awa! duha ka bukag sa mga igos nga gibutang atubangan sa templo ni Jehova, human nga si Nabukodonosor ang hari sa Babilonya nagdalang binihag kang Jeconia ang anak lalaki ni Joacim, ang hari sa Juda, ug sa mga prinsipe sa Juda ug sa batid nga mga magbubuhat ug sa mga magtutukod sa mga kuta, gikan sa Jerusalem aron iyang dad-on sila ngadto sa Babilonya. Mahitungod sa usa ka bukag, ang mga igos maayo kaayo, sama sa mga igos nga sayo; ug mahitungod sa laing bukag, ang mga igos daot kaayo, mao nga sila dili makaon tungod sa pagkadaot.”

Maayong mga Igos sa Panan-awon

4. Unsang makapalipay nga mensahe ang diha sa panan-awon sa mga igos alang sa matinumanong mga Israelinhon?

⁴ Human sa pagsukit kang Jeremias bahin sa iyang nakita, si Jehova mipadayon sa pag-ingon diha sa mga Jer 24 bersikulo 5 ngadto 7: “Sama niining maayong mga igos, mao man ang akong pagtagad sa mga binihag sa Juda, nga akong ipadala gikan niining dapita ngadto sa yuta sa mga Caldeahanon, sa maayong paagi. Ug akong itutok ang akong mata kanila sa maayong paagi, ug ako gayod nga ipahinabo nga sila mobalik niining yutaa. Ug akong tukoron sila, ug dili nako pagagub-on; ug akong itanom sila, ug dili ko lukahon. Ug hatagan ko sila ug kasingkasing sa pag-ila kanako, nga ako mao si Jehova; ug sila mahimong akong katawhan, ug ako mismo mahimong ilang Diyos, kay sila mobalik kanako uban sa bug-os nilang kasingkasing.”

5, 6. (a) Sa unsang paagi ang pila ka Israelinhon ‘gipadala sa maayong paagi’ ngadto sa Caldea? (b) Sa unsang paagi si Jehova ‘mitutok sa iyang mata sa maayong paagi’ sa matinumanong mga Israelinhon nga nahimong binihag?

⁵ Busa mopatim-aw gikan sa gisulti ni Jehova dinhi nga ang mas maayong mga panahon maoy diha sa unahan, nga ang nasod sa Juda dili sa hingpit mapuo. Apan unsa ang kahulogan niining bukag sa maayong mga igos?

⁶ Si Jeconia, o Joacim, nahimong hari ibabaw sa Juda sulod lang sa tulo ka bulan ug napulo ka adlaw una siya sa kinabubut-on misurender sa Jerusalem ngadto kang Haring Nabukodonosor. Apil sa gidalang mga bihag nga kauban niya mao si Daniel ug iyang tulo ka Hebreohanong kauban nga si Ananias, Misael, ug Azarias, ingon man si Ezekiel. Ang ilang mga kinabuhi giluwas sa hari sa Babilonya, mao nga ikaingon nga si Jehova nag-isip niadtong tanang binihag ingon nga gipadala sa maayong paagi ngadto sa yuta sa mga Caldeahanon. Namatikdan mo ba nga si Jehova misaad usab nga ‘itutok ang iyang mata kanila sa maayong paagi’? Sa unsang paagi natuman kini? Niadtong 537 W.K.P., 80 ka tuig sa ulahi, gipahinabo ni Jehova nga luwatan ni Haring Ciro ang usa ka balaod nga nagtugot sa usa ka nahibilin sa ilang mga kaliwat sa pagbalik ngadto sa yuta sa Juda. Kining matinumanong mga Hudiyo nagtukod pag-usab sa siyudad sa Jerusalem; sila nagtukod ug usa ka bag-ong templo alang sa pagsimba sa ilang Diyos, si Jehova; ug sila namalik ngadto kaniya uban sa bug-os nilang kasingkasing. Busa niining tanan, ang maong mga binihag ug ilang mga kaliwat nahisamag maayo kaayong mga igos nga sayo alang kang Jehova.

7. Kanus-a ug sa unsang paagi ang mata ni Jehova diha sa Jeremias nga matang “sa maayong paagi”?

⁷ Makahinumdom ka nga sa nag-unang artikulo mahitungod sa matagnaong mga pulong ni Jeremias, atong nasayran nga kini may kahulogan alang sa atong ika-20ng siglo. Ug ang Jer kapitulo 24 dili eksepsiyon. Panahon sa mangiob nga katuigan sa Gubat sa Kalibotan I, daghan sa dedikadong mga alagad ni Jehova ang naimpluwensiyahan sa Dakong Babilonya sa usa o laing paagi. Apan ang mabinantayong mata ni Jehova ‘gitutok kanila sa maayong paagi.’ Mao nga pinaagi sa Labawng Ciro, si Kristo Jesus, gilumpag ni Jehova ang gahom sa Dakong Babilonya ibabaw kanila ug sa inanay sila gidala ngadto sa espirituwal nga paraiso. Kining espirituwal nga mga Israelinhon misanong ug mibalik kang Jehova uban sa bug-os nilang kasingkasing. Unya, niadtong 1931, sila malipayong nagdawat sa ngalang mga Saksi ni Jehova. Sa pagkatinuod, karon ikaingon nga sila nahimong sama sa usa ka bukag sa maayo kaayong mga igos sa mga mata ni Jehova.

8. Sa unsang paagi ang mga Saksi ni Jehova nagmantala sa halayo sa samag-igos nga katam-is sa mensahe sa Gingharian?

⁸ Ug ang mga Saksi ni Jehova wala magkawang sa katuyoan sa dili-takos nga kalulot sa Diyos sa pagpagawas kanila gikan sa Dakong Babilonya. Sila wala magtipig sa samag-igos nga katam-is sa mensahe sa maayong balita sa Gingharian sa ilang kaugalingon, apan ila kining gisangyaw sa halayo nga nahiuyon sa mga pulong ni Jesus sa Mateo 24:14: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod.” Ug ang sangpotanan? Kapig 4,700,000 ka samag-karnerong mga tawo nga dili espirituwal nga mga Israelinhon ang mibulag sa Dakong Babilonya!

Daot nga mga Igos sa Panan-awon

9. Kinsay gihawasan sa daot nga mga igos sa panan-awon ni Jeremias, ug unsay nahitabo kanila?

⁹ Apan komosta kadtong bukag sa daot nga mga igos sa panan-awon ni Jeremias? Sa maong panahon giwaling ni Jeremias ang iyang pagtagad diha sa mga pulong ni Jehova nga makita sa Jeremias kapitulo 24, mga bersikulo 8 hangtod sa 10: “Ingon sa daot nga mga igos nga dili makaon tungod sa pagkadaot, kini sa pagkamatuod mao ang giingon ni Jehova: ‘Busa itugyan ko si Zedekias ang hari sa Juda ug ang iyang mga prinsipe ug ang nahibilin sa Jerusalem nga nagapabilin ibabaw niining yutaa ug kadtong nagapuyo sa yuta sa Ehipto​—itugyan ko usab sila alang sa pagkauyog, alang sa katalagman, diha sa tanang gingharian sa yuta, alang sa kaulawan ug alang sa sanglitanan, alang sa pagtamay ug sa pagtunglo, diha sa tanang dapit nga didto ako silang patibulaagon. Ug ipadala ko batok kanila ang espada, ang gutom ug ang kamatay, hangtod nga sila modangat sa ilang pagkatibawas gikan sa yuta nga akong gihatag kanila ug sa ilang mga amahan.’”

10. Nganong giisip ni Jehova si Zedekias nga ‘daot nga igos’?

¹⁰ Busa si Zedekias sa pagkatinuod misangpot nga usa ka ‘daot nga igos’ sa mga mata ni Jehova. Dili lamang nga siya mialsa batok kang Haring Nabukodonosor pinaagi sa paglapas sa panumpa sa pagkamaunongon nga iyang gihimo ngadto sa maong hari diha sa ngalan ni Jehova kondili sa bug-os iyang gisalikway usab ang kaluoy ni Jehova nga gipaabot kaniya pinaagi ni Jeremias. Ngani, iya pa ganing gipabilanggo si Jeremias! Dili katingad-ang si Esdras misuma sa tinamdan sa hari sumala sa iyang gihimo diha sa 2 Cronicas 36:12: “Siya mipadayon sa pagbuhat kon unsay daotan sa mga mata ni Jehova nga iyang Diyos. Siya wala magpaubos sa iyang kaugalingon.” Sa mga mata ni Jehova si Zedekias ug kadtong nagpabilin sa Jerusalem nahisama sa usa ka bukag sa daot, dunot nga mga igos!

Dunot nga Masambingayong mga Igos sa Atong Adlaw

11, 12. Kinsay nailhang daot nga mga igos karong adlawa, ug unsay mahitabo kanila?

¹¹ Karon tan-awa ang tibuok kalibotan karong adlawa. Sa imong hunahuna ato bang makita ang masambingayong bukag sa daot nga mga igos? Atong hisgotan kana pinaagi sa pagtandi sa atong adlaw sa iya ni Jeremias. Niining ika-20ng siglo, gigamit ni Jehova ang Jeremias nga matang, ang dinihogang nahibilin, aron sa kanunay pasidan-an ang mga nasod bahin sa iyang umaabot nga kapungot sa dakong kasakitan. Iyang naaghat ang nasodnong mga pundok nga ihatag kaniya ang himaya nga angay sa iyang ngalan, nga simbahon siya pinaagi sa espiritu ug kamatuoran, ug ilhon ang iyang nagaharing Anak, si Kristo Jesus, ingong may-katungod nga Magmamando sa yuta. Unsa ang sanong? Sama ra gayod sa adlaw ni Jeremias. Ang mga nasod nagpadayon sa pagbuhat kon unsay daotan sa mga mata ni Jehova.

¹² Kinsa ba ang mga tawong nagasiba niining maalsahong tinamdan? Kinsa ang nagapadayon sa pagbiaybiay niining samag-Jeremias nga mga mensahero sa Diyos pinaagi sa pagduhaduha sa ilang awtoridad sa pag-alagad nga mga ministro sa Diyos? Kinsay nagapadayon sa pagtamay sa Pulong sa Diyos? Kinsa karong adlawa ang nagpaluyo sa kadaghanan sa paglutos sa mga Saksi ni Jehova? Ang tubag maoy dayag nga makita sa tanan​—kini mao ang Kakristiyanohan, ilabina ang klero! Ug tan-awa lang ang tanang dunot, daot nga mga bunga sa Kakristiyanohan nga nahisgotan sa nag-unang artikulo. Ay, oo, sa pagkatinuod adunay simbolikong bukag sa daot nga mga igos sa yuta karong adlawa. Sa pagkatinuod, si Jehova nag-ingon nga sila dili “makaon tungod sa pagkadaot.” Ang mga pulong ni Jehova pinaagi ni Jeremias milanog abot sa atong adlaw: ‘Sila modangat sa ilang pagkatibawas’! Ang kaaligutgot ni Jehova batok sa Kakristiyanohan dili na mahupayan.

Usa ka Pasidaang Pagtulon-an Alang Kanato

13. Tungod sa mga pulong ni Pablo nga makita sa 1 Corinto 10:11, sa unsang paagi sabton nato ang panan-awon sa duha ka bukag sa mga igos?

¹³ Samtang susihon nato ang mga kahulogan sa dinasig nga mensahe sa pasidaan ni Jeremias, ang mga pulong ni apostol Pablo sa 1 Corinto 10:11 molanog sa atong mga igdulongog: “Karon kining mga butanga nangahitabo kanila ingong mga panig-ingnan, ug sila gikasulat ingong pasidaan kanato nga naabtan sa mga kataposan sa mga sistema sa mga butang.” Sa personal ato bang gibutang sa kasingkasing ang pasidaan nga gipasabot kanato pinaagi nianang panan-awon sa duha ka bukag sa mga igos? Ang ato nang gihisgotan maoy usa ka hinungdanong bahin sa mga butang nga nahitabo sa Israel ingong pasidaang panig-ingnan alang kanato.

14. Unsay sanong sa Israel sa mabinationg pag-atiman ni Jehova?

¹⁴ Sa kataposan, hinumdoman nato ang mga pulong ni Jehova ngadto kang Haring David bahin sa Israel, sumala sa makita sa 2 Samuel 7:10: “Ako magapili gayod ug usa ka dapit alang sa akong katawhan nga Israel ug itanom sila.” Si Jehova mabinationg nag-atiman sa iyang katawhan, ang Israel, sa tanang paagi. Dihay tanang katarongan nga ang mga Israelinhon mamunga ug maayong mga bunga diha sa ilang mga kinabuhi. Kinahanglan lamang nga magpatalinghog sila sa diyosnong pagtulon-an ni Jehova ug bantayan ang iyang mga sugo. Bisan pa, diyutay lang kanila ang naghimo niana. Ang kinabag-an maoy gahian kaayo ug masupilon nga sila namunga ug daot, dunot nga mga bunga.

15. Sa unsang paagi ang espirituwal nga Israel karong adlawa ug ilang samag-karnerong mga kauban misanong sa kaluoy ni Jehova?

¹⁵ Buweno, komosta man diay sa atong adlaw? Si Jehova nakapakita ug dakong kaluoy sa nahibilin sa iyang espirituwal nga Israel ug sa ilang samag-karnerong mga kauban. Ang iyang mata gitutok kanunay kanila sukad sa ilang espirituwal nga kaluwasan niadtong 1919. Sumala sa iyang gitagna pinaagi ni Isaias, sa matag adlaw sila nagdawat ug diyosnong pahimangno gikan sa kinalabwang Magtutudlo sa uniberso, si Jehova nga Diyos. (Isaias 54:13) Kining diyosnong pagtudlo, nga gidumala sa iyang minahal nga Anak, si Jesu-Kristo, misangpot sa dagayang kalinaw sa ilang taliwala ug inanayng nagdala kanila ngadto sa mas suod nga relasyon kang Jehova. Pagkakahibulongan sa espirituwal nga palibot nga gitagana niini alang kanatong tanan sa pagkaila kang Jehova, sa pagpatalinghog kaniya, ug sa pagpadayon sa pagbunga ug maayong mga bunga diha sa atong mga kinabuhi​—mga bunga nga mopatunghag pagdayeg kang Jehova! Kini nagkahulogan sa atong mga kinabuhi mismo!

16. Unsang personal nga pagpadapat ang mahimo sa matag usa kanato sa panan-awon sa duha ka bukag sa mga igos?

¹⁶ Apan bisan pa sa tanang dili-takos nga kalulot sa Diyos, aduna gihapoy pipila nga nahimong maalsahon ug gahiag-kasingkasing, sama sa daghan sa Juda sa kakaraanan, ug namunga sa daot, dunot nga mga bunga diha sa ilang mga kinabuhi. Pagkamakapasubo kini! Hinaot walay usa kanato nga dili magtagad sa pasidaang pagtulon-an nga gidala sa atong pagtagad pinaagi niining duha ka bukag uban sa ilang mga bunga​—ang maayo ug daotan. Samtang sa madali nagsingabot ang angay nga paghukom ni Jehova batok sa apostatang Kakristiyanohan, hinaot ibutang nato sa kasingkasing ang tambag ni apostol Pablo: “Magalakaw nga takos kang Jehova sa katuyoan nga makapahimuot kaniya sa bug-os samtang padayon kamong magapamunga sa tanang maayong buhat.”​—Colosas 1:10.

Pagsubli “Mga Bunga​—Maayo ug Daotan” ug mga parapo 1-4 sa “Pakiglalis ni Jehova Batok sa mga Nasod”

◻ Unsay gihawasan sa bukag sa maayong mga igos?

◻ Sa unsang paagi nadayag ang bukag sa daot nga mga igos sa panan-awon?

◻ Unsang pasidaang pagtulon-an ang gitagana sa mensahe ni Jeremias alang kanato?

◻ Unsay makahuloganon bahin sa tuig 607 W.K.P.? ug sa 1914 K.P.?

[Hulagway sa panid 15]

Samag maayong mga igos, ang katawhan sa Diyos namungag tam-is nga mga bunga sa Gingharian

[Hulagway sa panid 15]

Ang Kakristiyanohan napamatud-ang sama sa bukag sa daot nga mga igos