Mga Magmamantala sa Gingharian Nagtaho
Ang Kamatuoran sa Bibliya Naghiusa sa Usa ka Pamilya
KARONG adlawa, sa daghang bahin sa kalibotan, ang panaghiusa sa pamilya halos wala na maglungtad. Apan, ang Bibliya nagpadayag kon unsay gikinahanglan aron makab-ot ang panaghiusa sa pamilya. Tagda ang mga pulong ni Jesus: “Ang matag usa nga maminaw niining akong mga pulong ug magabuhat kanila mapakasama sa usa ka tawong mabuot, nga mitukod sa iyang balay diha sa dakong-bato.” (Mateo 7:24) Libolibong pamilya taliwala sa mga Saksi ni Jehova nakakab-ot sa panaghiusa pinaagi sa pagpadapat niining mga pulonga ug sa paggamit sa Bibliya ingong patukoranan alang sa pagtukod ug nahiusang pamilya. Ang uban nakakab-ot usab sa maong panaghiusa, ingon sa gipakita sa mosunod nga kasinatian.
Samtang si Daniel nag-alagad sa kasundalohan sa Pransiya, usa ka pari sa kasundalohan misugyot nga si Daniel mopalit ug Bibliya, nga maoy iyang gibuhat, ug siya misugod sa pagbasa niana nga regular. Ngadtongadto siya gibalhin sa Tahiti. Ang pila ka kaubang mga sundalo ni Daniel maoy mga Adventista, ug ang uban mga Mormon. Ang ilang panag-estoryahay sagad moliso sa ulohan sa relihiyon. Usa ka adlaw usa ka pangulong sarhento nagpailaila kang Daniel sa iyang asawa, kinsa usa sa mga Saksi ni Jehova. Siya migugol ug tibuok hapon sa pagtubag sa daghang pangutana ni Daniel ug gipakontak siya sa usa sa lokal nga kongregasyon sa mga Saksi ni Jehova sa Tahiti. Sa wala madugay siya misugod sa regular nga pagtuon sa Bibliya.
Ang mga ginikanan ni Daniel nga nagpuyo sa Pransiya maoy mga sinserong Katoliko. Ang iyang amahan maoy magtatambag sa eskuylahan ug maoy nagdumala sa relihiyosong pagtudlo sa usa ka Katolikong eskuylahan. Kay buot ipakig-ambit sa iyang mga ginikanan ang pipila sa bililhong espirituwal nga kaalam nga iyang gitun-an, si Daniel sa hinayhinay misugod paglakip sa pipila ka hunahuna sa Bibliya ngadto sa iyang mga sulat kanila.
Sa sinugdan nalipay ang inahan ni Daniel, apan unya siya natingala sa pagkaplag sa ngalan ni Jehova diha sa usa sa mga sulat sa iyang anak lalaki. Pipila ka adlaw sa ulahi, nakadungog siyag programa sa radyo nga nagpresentar sa mga Saksi ni Jehova ingong “peligrosong sekta.” Siya misulat kang Daniel, nga naghangyo kaniya sa paghunong dayon sa tanang pakigkontak sa mga Saksi ni Jehova. Bisan pa niana, si Daniel padayong miuswag sa iyang pagtuon sa Bibliya ug sa wala madugay mihimog mga kahikayan sa pagbiya sa kasundalohan ug sa pagbalik sa Pransiya.
Sa dihang nahiuli na siya sa balay, gigugol ni Daniel ang matag gabii—usahay hangtod sa lawom nang kagabhion—sa dugayng panaghisgot sa Bibliya uban sa iyang inahan. Sa kataposan siya miuyon sa pagkuyog kang Daniel ngadto sa usa ka Kingdom Hall. Sa dihang mitambong siya sa iyang unang tigom, nadani kaayo siya nga siya misugod pagtuon nga regular sa Bibliya. Kusog ang iyang pag-uswag ug sa ulahi nabawtismohan.
Ang amahan ni Daniel usa ka matinugotong tawo apan dedikado kaayo sa iyang propesyonal ug relihiyosong mga kalihokan. Sa gihapon, sa usa ka higayon gihatod niya ang iyang asawa ug si Daniel sakay sa kotse ngadto sa usa ka distritong kombensiyon. Kadto maoy Hulyo 14, ug anaa sa iyang hunahuna ang pagtan-aw sa Bastille Day nga parada sa siyudad. Samtang naghulat siya mihukom, gumikan sa pagkamaukiton, nga motan-aw sa sulod sa lawak kombensiyonan. Siya nadani sa kahusay ug kalinaw nga iyang nakita taliwala sa katawhan ni Jehova, ug sa dihang miagi siya sa lainlaing mga departamento sa kombensiyon ang tanan nagsigeg tawag niyag “brader.” Nakalimtan niya ang tanan bahin sa parada sa Bastille Day ug nagpabilin hangtod sa kataposan sa kombensiyon. Mihangyo siyag usa ka panagtuon sa Bibliya ug mihimog kusog nga pag-uswag diha sa pagkat-on sa kamatuoran. Hinunoa, sa mas daghan ang iyang nakat-onan, labi pa siyang mibating dili-komportable tungod sa mga sirkumstansiya sa iyang trabaho, busa sa pangedarong 58, siya mibiya sa iyang trabaho. Karon ang tulo diha sa pamilya maoy dedikado ug bawtismado ug nahiusang nag-alagad kang Jehova.
Ang kamatuoran sa Bibliya mao ang naghiusa sa pamilya ni Daniel. Makapahiusa usab kana sa ubang mga pamilya kon sila mokat-on ug mopadapat niana sa tibuok kasingkasing.