Mga Magmamantala sa Gingharian Aktibo sa Tibuok Yuta

“Kamo mahimong mga saksi nako . . . ngadto sa kinalay-ang dapit sa yuta.”​—BUHAT 1:8.

1. Unsang mensahe ang giingon ni Jesus nga imantala sa iyang mga sumusunod sa atong adlaw?

SA DIHANG gibatbat ang buluhaton nga si Jehova nagpadala sa iyang Anak sa yuta aron buhaton, si Jesus miingon: “Kinahanglan kong ipahayag ang maayong balita sa gingharian sa Diyos.” (Lucas 4:43) Sa susama, sa dihang gihisgotan ang buluhaton nga buhaton sa iyang mga tinun-an sa yuta inigbalik niya uban ang harianong pagbulot-an, si Jesus miingon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”​—Mateo 24:14.

2. (a) Nganong hinungdanon kaayo nga ang mensahe sa Gingharian hatagan ug kaylap nga pagmantala? (b) Unsang pangutana ang angay nga isukna natong tanan sa atong kaugalingon?

² Nganong ang balita bahin sa Gingharian sa Diyos hinungdanon man kaayo? Nganong ang Gingharian kinahanglang kaylap nga imantala? Kay kini mao ang Mesiyasnong Gingharian nga magabindikar sa unibersohanong pagkasoberano ni Jehova. (1 Corinto 15:24-28) Pinaagi niini, ipahinabo ni Jehova ang paghukom batok sa presenteng satanasnong sistema sa mga butang ug tumanon ang iyang saad nga panalanginan ang tanang banay sa yuta. (Genesis 22:17, 18; Daniel 2:44) Pinaagi sa pagpahinabo nga ikahatag ang pamatuod bahin sa Gingharian, si Jehova nakakaplag niadtong kinsa human niadto iyang gidihogan aron mahimong kaubang mga manununod sa iyang Anak. Pinaagi sa pagmantala sa Gingharian, ang usa ka nagabulagbulag nga buluhaton ginahimo usab karong adlawa. (Mateo 25:31-33) Buot ni Jehova nga ang katawhan sa tanang nasod pahibaloon bahin sa iyang katuyoan. Buot niya nga makabaton sila sa higayon nga mopili sa kinabuhi ingong mga ginsakpan sa iyang Gingharian. (Juan 3:16; Buhat 13:47) Aduna ka bay bug-os nga bahin sa pagmantala niining Ginghariana?

Nagdahom sa Kataposan sa Hentil nga Kapanahonan

3. (a) Sa tukma, unsang ulohan ang gihisgotan ni C. T. Russell sa usa ka sayong biyahe aron pag-organisar ug mga grupo alang sa pagtuon sa Bibliya? (b) Unsay naamgohan niadtong unang mga Estudyante sa Bibliya bahin sa dapit nga angay batonan sa Gingharian sa Diyos diha sa ilang mga kinabuhi?

³ Niadtong 1880, si Charles Taze Russell, ang unang editor sa magasing Watch Tower, mibiyahe latas sa amihanan-silangang Tinipong Bansa aron sa pagdasig nga pormahon ang mga grupo sa pagtuon sa Bibliya. Sa pagkahaom, ang ulohang gipakigpulong niya maoy “Mga Butang Mahitungod sa Gingharian sa Diyos.” Ingong gihinumdoman sa unang mga isyu sa Watch Tower, ang mga Estudyante sa Bibliya (ingon nga ang mga Saksi ni Jehova nailhan niadto) nakaamgo nga aron mapamatud-an nga takos sila nga magbaton ug bahin sa Gingharian sa Diyos, kinahanglan nga ang Gingharian himoon nila nga una nilang interes, nga sa pagkamalipayon gamiton ang ilang mga kinabuhi, ilang mga katakos, ug ilang kahinguhaan diha sa pag-alagad niini. Ang tanang ubang butang sa kinabuhi kinahanglang anaa sa ikaduhang dapit. (Mateo 13:44-46) Ang ilang responsabilidad naglakip sa pagmantala ngadto sa uban sa maayong balita bahin sa Gingharian sa Diyos. (Isaias 61:1, 2) Sa unsang gidak-on ilang gihimo kana una pa matapos ang Hentil nga Kapanahonan sa 1914?

4. Sa unsang gilapdon ang gamayng grupo sa mga Estudyante sa Bibliya nanagtag ug mga basahon sa Bibliya sa wala pa ang 1914?

⁴ Gikan sa katuigang 1870 hangtod sa 1914, ang mga Estudyante sa Bibliya diyutay ra ang gidaghanon. Pagka 1914, mga 5,100 lamang ang aktibong nakig-ambit sa paghatag ug publikong pamatuod. Apan pagkatalagsaon kadto nga pamatuod! Sa 1881, duha lang ka tuig human sa unang pagpatik sa Watch Tower, sila nanagtag sa 162-panid nga basahong Food for Thinking Christians. Sulod sa pila ka bulan, sila nakapanagtag ug 1,200,000 ka kopya. Sa pila ka tuig, tinagpulo ka milyong tract ang napanagtag sa matag tuig diha sa daghang pinulongan.

5. Kinsa ang mga colporteur, ug unsang matanga sa espiritu ang ilang gipasundayag?

⁵ Sugod usab sa 1881, ang pipila mitanyag sa ilang mga pag-alagad ingong colporteur nga mga ebanghelista. Sila mao ang mga mag-uuna sa mga payunir (bug-os-panahong mga ebanghelista) karong adlawa. Ang pipila sa mga colporteur, nga nagbaktas o nagbisikleta, personal nga nagsangyaw diha sa halos tanang bahin sa nasod nga ilang gipuy-an. Ang uban nakaabot sa langyawng mga natad ug mao ang unang nagdala sa maayong balita ngadto sa mga dapit nga sama sa Pinlandia, Barbados, ug Burma (nga karon maoy Myanmar). Ilang gipadayag ang misyonaryong kadasig nga sama kang Jesu-Kristo ug sa iyang mga apostol.​—Lucas 4:43; Roma 15:23-25.

6. (a) Unsa ka subsob ang mga biyahe ni Igsoong Russell aron pagsabwag sa kamatuoran sa Bibliya? (b) Unsa pa ang nahimo aron sa pagpauswag sa pagwali sa maayong balita sa langyawng kanataran una pa matapos ang Hentil nga Kapanahonan?

⁶ Si Igsoong Russell mismo nagsigeg biyahe aron pagsabwag sa kamatuoran. Nagbalikbalik siya pag-adto sa Canada; nagpakigpulong sa Panama, Jamaica, ug Cuba; mibiyahe ug dinosenang beses ngadto sa Uropa; ug milibot sa yuta aron sa pagwali. Gipadala usab niya ang ubang mga lalaki aron mosugod ug manguna sa pagwali sa maayong balita diha sa langyawng mga natad. Si Adolf Weber gipadala ngadto sa Uropa sa tungatunga sa katuigang 1890, ug ang iyang pag-alagad nakaabot gikan sa Switzerland ngadto sa Pransiya, Italya, Alemanya, ug Belgium. Si E. J. Coward gisugo ngadto sa dapit Caribbeano. Si Robert Hollister naasayn sa Oriente niadtong 1912. Didto, ang espesyal nga mga tract giandam diha sa napulo ka pinulongan, ug minilyong kopya niana ang gipanagtag sa tibuok India, Tsina, Hapon, ug Korea pinaagi sa lumad nga mga tigpanagtag. Kon ikaw nagkinabuhi pa niadto, ang imong kasingkasing mag-aghat kaha kanimo nga maningkamot nga ipaabot ang maayong balita sa uban diha sa inyong komunidad ug saylo pa?

7. (a) Sa unsang paagi ang mga mantalaan gigamit sa pagpakusog sa pagsangyaw? (b) Unsa ang “Photo-Drama of Creation,” ug pila ka tawo ang nakakita niana sa usa lang ka tuig?

⁷ Samtang ang Hentil nga Kapanahonan nagsingabot sa iyang kataposan, ang mga mantalaan gigamit sa pagpatik sa mga wali sa Bibliya nga gipahayag ni Igsoong Russell. Ang ilang pangunang pasiugda maoy dili sa tuig 1914 kondili, hinunoa, sa katuyoan sa Diyos ug sa pagkasegurado sa katumanan niini. Abot ug 2,000 ka mantalaan sa usa ka panahon, nga nakaabot sa 15,000,000 ka magbabasa, ang regular nga nagpatik sa maong mga wali. Unya, sa namanagbanag ang tuig 1914, ang Sosyedad misugod sa publikong pagpasalida sa “Photo-Drama of Creation.” Sa upat tag-2-ka-oras nga mga salida, kana nagpadayag sa mga kamatuoran sa Bibliya gikan sa paglalang hangtod gayod sa Milenyo. Sulod lamang sa usa ka tuig, ang mga mamiminaw nga mokabat ug kapin sa siyam ka milyon sa Amerika del Norte, Uropa, Australia, ug New Zealand nakakita niana.

8. Pagka 1914, pila ka nasod ang naabot sa mga Estudyante sa Bibliya sa maayong balita?

⁸ Sumala sa mga talaan nga nabatonan, sa ulahing bahin sa 1914, kining madasigong pundok sa mga ebanghelista nakapakaylap sa ilang pagmantala sa Gingharian ngadto sa 68 ka nasod.a Apan sinugdanan lamang kadto!

Madasigong Pagmantala sa Natukod nga Gingharian

9. Sa Cedar Point nga mga kombensiyon, sa unsang paagi ang buluhaton sa pagsangyaw sa Gingharian nahatagag linaing pagdasig?

⁹ Sa dihang ang mga Estudyante sa Bibliya nagtigom sa Cedar Point, Ohio, niadtong 1919, si J. F. Rutherford, kinsa mao niadto ang presidente sa Watch Tower Society, mipahayag: “Ang among bokasyon niadto ug karon mao ang pagpahayag sa umaabot nga mahimayaong gingharian sa Mesiyas.” Sa ikaduhang kombensiyon sa Cedar Point, sa 1922, si Igsoong Rutherford nagpasiugda sa kamatuoran nga sa pagkatapos sa Hentil nga Kapanahonan, sa 1914, ‘ang Hari sa kahimayaan nakadawat sa iyang dakong gahom ug nagsugod paghari.’ Sunod, iyang gipahayag nga direkta ang isyu ngadto sa iyang mamiminaw, nga nag-ingon: “Nagtuo ba kamo nga ang Hari sa kahimayaan nagsugod na sa iyang paghari? Nan bumalik kamo ngadto sa kanataran, Oh kamong mga anak sa labing hataas nga Diyos! . . . Imantala ang mensahe sa halayo. Ang kalibotan kinahanglang mahibalo nga si Jehova maoy Diyos ug nga si Jesu-Kristo maoy Hari sa mga hari ug Ginoo sa mga ginoo. Kini mao ang adlaw sa tanang adlaw. Tan-awa, ang Hari nagmando na! Kamo mao ang iyang mga tinugyanan sa pagmantala.”

10, 11. Sa unsang paagi ang radyo, mga sakyanang may trompa, ug mga plakard tanan gigamit nga epektibo aron ikapaabot ang kamatuoran sa Gingharian sa mga tawo?

¹⁰ Milabay ang kapig 70 ka tuig sukad niadtong mga kombensiyon sa Cedar Point​—duolag 80 ka tuig sukad si Jehova misugod sa pagpahayag sa iyang pagkasoberano pinaagi sa Mesiyasnong pagmando sa iyang Anak. Sa unsang sukod ang mga Saksi ni Jehova aktuwal nga nakahimo sa buluhatong giandam alang kanila diha sa Pulong sa Diyos? Sa personal unsa ang imong bahin niini?

¹¹ Sa sinugdanan sa katuigang 1920, ang radyo nabatonan ingong usa ka instrumento nga magamit sa paghatag ug kaylap nga pagmantala sa mensahe sa Gingharian. Sulod sa katuigang 1930, ang mga diskurso sa kombensiyon nga naghisgot sa Gingharian ingon nga paglaom sa kalibotan gisibya sa mga network sa radyo o mga chain broadcast ug sa mga linya sa telepono nga libot sa yuta. Ang mga sakyanan nga nasangkapan ug mga trompa gigamit usab sa pagpatokar ug mga diskurso sa Bibliya sa publikong mga dapit. Unya, sa 1936, sa Glasgow, Scotland, ang atong mga igsoon misugod pagsul-ob ug mga plakard samtang milatas sila sa komersiyal nga mga distrito aron ianunsiyo ang mga pakigpulong publiko. Kining tanan maoy epektibong mga paagi sa paghatag ug pamatuod sa daghang tawo niadtong panahon nga kita diyutay pa.

12. Sumala sa gipakita sa Kasulatan, unsa ang usa sa labing epektibong mga paagi nga makasangyaw ang matag usa kanato?

¹² Hinuon, ang Kasulatan nagtin-aw nga ingong mga Kristohanon, kita sa tagsatagsa adunay responsabilidad sa pagsangyaw. Kita dili lamang makatugot nga ang mga artikulo sa mantalaan o mga sibya sa radyo ang mohimo sa buluhaton. Libolibong maunongong mga Kristohanon​—mga lalaki, mga babaye, ug mga batan-on​—nagdawat sa maong responsabilidad. Ingong sangpotanan, ang balay-balay nga pagwali nahimong usa ka ilhanan sa mga Saksi ni Jehova.​—Buhat 5:42; 20:20.

Pag-abot sa Tibuok Gipuy-ang Yuta

13, 14. (a) Nganong ang pila ka Saksi mobalhin ngadto sa ubang mga lungsod, bisan ngadto sa ubang mga nasod, aron sa pagpadayon sa ilang ministeryo? (b) Sa unsang paagi ang mahigugmaong kabalaka alang sa katawhan sa nasod nga natawhan sa usa nakatabang sa pagpakaylap sa maayong balita?

¹³ Kay nahibalo nga ang mensahe sa Gingharian kinahanglang iwali sa tibuok gipuy-ang yuta, ang pila ka Saksi ni Jehova ugdang nga naghunahuna kon unsay ilang mahimo sa personal aron maabot ang mga dapit nga saylo sa ilang kaugalingong komunidad.

¹⁴ Daghang tawo ang nakakat-on sa kamatuoran human manglalin gikan sa ilang dapit natawhan. Bisan pag sila tingali nanglalin tungod sa materyal nga kaayohan, nakaplagan nila ang butang nga labi pang bililhon, ug gibati sa pipila nga naaghat nga mobalik ngadto sa nasod o dapit nga ilang natawhan aron ipaambit ang kamatuoran. Niining paagiha, sayo niining sigloha ang pagwali sa maayong balita miabot ngadto sa Scandinavia, Gresya, Italya, mga nasod sa Silangang Uropa, ug sa daghang laing dapit. Bisan karon, sa katuigang 1990, ang mensahe sa Gingharian nagakaylap sa samang paagi.

15. Sa katuigang 1920 ug 1930, unsay nalampos sa pipila kansang tinamdan maoy sama nianang gipahayag sa Isaias 6:8?

¹⁵ Kay nagpadapat sa tambag sa Pulong sa Diyos nganha sa ilang mga kinabuhi, ang pipila nakaarang sa pag-alagad sa mga dapit nga sa nangagi wala nila mapuy-i. Si W. R. Brown (nga sagad gitawag “Bible Brown”) usa kanila. Sa 1923, aron sa pagpauswag sa buluhatong pag-ebanghelyo, siya mipahawa sa Trinidad ug miadto sa Kasadpang Aprika. Sulod sa katuigang 1930, si Frank ug Gray Smith, Robert Nisbet, ug David Norman nahiapil niadtong nagdala sa mensahe sa Gingharian ngadto sa silangang baybayon sa Aprika. Ang uban mitabang sa pag-ugmad sa kanataran sa Amerika del Sur. Sa sinugdanan sa katuigang 1920, si George Young, usa ka Canadiano, nakig-ambit sa buluhaton sa Argentina, Brazil, Bolivia, Chile, ug Peru. Si Juan Muñiz, nga nakaalagad sa Espanya, nagpadayon sa Argentina, Chile, Paraguay, ug Uruguay. Silang tanan nagpadayag sa espiritu nga sama nianang gipahayag sa Isaias 6:8: “Ania ako! Ipadala ako.”

16. Gawas pa sa dagkong mga sentro sa populasyon diin gihimo ang pagsangyaw sa una-gubat nga katuigan?

¹⁶ Ang pagwali sa maayong balita nakaabot pa sa hilit nga mga dapit. Ang mga barko nga gipadagan sa mga Saksi nagduaw sa tanang dunggoanan gawas sa pangunang dunggoanan sa Newfoundland, Norwegianhong baybayon ngadto sa Artiko, kapuloan sa Pasipiko, ug mga dunggoanan sa Habagatan-silangang Asia.

17. (a) Pagka 1935, pila ka nasod ang naabot sa mga Saksi? (b) Nganong ang buluhaton wala pa matapos niadtong tungora?

¹⁷ Katingalahan, sa pagkatuig 1935, ang mga Saksi ni Jehova puliki nga nagwali sa 115 ka nasod, ug sila nakaabot sa laing 34 ka nasod pinaagi sa mga ekspedisyon sa pagsangyaw o pinaagig literatura nga gipadala sa koreyo. Bisan pa niana, wala pa mahuman ang buluhaton. Niadtong tuiga gibuksan ni Jehova ang mga mata ngadto sa iyang katuyoan sa pagtigom sa “usa ka dakong panon” nga makalabang-buhi ngadto sa iyang bag-ong kalibotan. (Pinadayag 7:9, 10, 14) Dako pa gayong pagsangyaw ang pagabuhaton!

18. Sa buluhaton sa pagmantala sa Gingharian, unsang mga papel ang gituman sa Tunghaan sa Gilead ug sa Tunghaan sa Ministeryal nga Pagbansay?

¹⁸ Bisan samtang ang Gubat sa Kalibotan II milukop sa yuta ug may mga pagdili sa literatura o sa kalihokan sa mga Saksi ni Jehova sa tinagkawhaang kayutaan, ang Watchtower Bible School of Gilead misugod sa pagbansayg umaabot nga mga misyonaryo aron tumanon ang mas dako pang buluhaton sa pagmantala sa Gingharian sa tibuok yuta. Hangtod karon, ang mga graduwado sa Gilead nakaalagad na sa kapig 200 ka nasod. Sila wala lamang magpahimutang sa mga basahon ug unya nagpadayon pag-adto sa laing dapit. Sila nagdumalag mga pagtuon sa Bibliya, nag-organisar ug mga kongregasyon, ug nagbansayg mga lalaki aron sa pagpas-an ug teokratikanhong responsabilidad. Karong bag-o pa, ang mga ansiano ug mga ministeryal nga alagad nga nakatapos sa Tunghaan sa Ministeryal nga Pagbansay nakatabang usab sa pagtagana sa hinungdanong mga panginahanglan maylabot niining buluhatona diha sa unom ka kontinente. Ang usa ka lig-ong patukoranan napahimutang alang sa padayong pagtubo.​—Itandi ang 2 Timoteo 2:2.

19. Sa unsang gidak-on ang mga alagad ni Jehova misanong sa pagdapit sa pag-alagad sa mga dapit nga mas dako ang panginahanglan?

¹⁹ Ang uban makatabang ba sa pag-atiman sa pipila sa wala-matrabahong mga teritoryo? Sa 1957, sa mga kombensiyon sa tibuok kalibotan, ang mga indibiduwal ug mga pamilya​—hamtong nga mga Saksi ni Jehova​—gidasig sa pagpalandong sa pagbalhin ngadto sa mga dapit nga may mas dakong panginahanglan aron mopuyo ug magpadayon sa ilang ministeryo didto. Ang pagdapit susama gayod sa pagdapit nga gipaabot sa Diyos kang apostol Pablo, kinsa nakakita sa panan-awon sa usa ka tawong nangaliyupo kaniya: “Umari ka sa Macedonia ug tabangi kami.” (Buhat 16:9, 10) Ang pipila milalin sa katuigang 1950, ang uban sa ulahi. Mga usa ka libo ka Saksi ang nanglalin ngadto sa Irlandia ug Colombia; ginatos ang nanglalin ngadto sa daghang ubang dapit. Tinagpulo ka libo ang nanglalin ngadto sa mga dapit nga may mas dakong panginahanglan sulod sa ila mismong nasod.​—Salmo 110:3.

20. (a) Sukad sa 1935, unsay nalampos ingong katumanan sa tagna ni Jesus sa Mateo 24:14? (b) Sulod sa miaging pila ka tuig, sa unsang paagi gipadali ang buluhaton?

²⁰ Tungod sa panalangin ni Jehova sa iyang katawhan, ang buluhaton sa pagmantala sa Gingharian nagpadayon sa pag-uswag sa talagsaong katulin. Sukad sa 1935 ang gidaghanon sa mga magmamantala miuswag ug hapit kawaloan ka pilo, ug ang proporsiyon sa pag-uswag sa gidaghanon sa mga payunir maoy 60 porsiento nga labaw pa kay sa proporsiyon sa pag-uswag sa gidaghanon sa mga magmamantala. Ang kahikayan sa pagtuon sa Bibliya sa balay gisugdan sulod sa katuigang 1930. Karon adunay aberids nga kapin sa upat ka milyon ug tunga nga gidumala matag bulan. Sukad sa 1935 kapig 15 ka bilyong oras ang nagahin alang sa buluhaton sa pagmantala sa Gingharian. Ang regular nga pagwali sa maayong balita ginahimo na karon diha sa 231 ka nasod. Kay ang mga teritoryo sa Silangang Uropa ug Aprika nabuksan alang sa mas libreng pagwali sa maayong balita, ang internasyonal nga mga kombensiyon gigamit sa epektibong paagi sa pagpaila pag-ayo sa mensahe sa Gingharian atubangan sa publiko. Ingong gisaad ni Jehova sa dugay na kanhi, sa Isaias 60:22, siya gayod ‘nagapadali sa buluhaton sa kaugalingong panahon niini.’ Pagkadakong pribilehiyo nga kita makaapil niini!

Pagpaabot sa Maayong Balita Ngadto sa Tanan nga Posible

21, 22. Sa personal unsay atong mahimo aron mahimong mas epektibong mga Saksi sa bisan diin kita nag-alagad?

²¹ Ang Ginoo wala pa mag-ingon nga natapos na ang buluhaton. Linibo pa ang nagadawat sa matuod nga pagsimba. Busa ang pangutana motungha, Ginabuhat ba nato ang tanang mahimo sa pagpahimulos pag-ayo sa panahon nga gitugot sa pailob ni Jehova alang niining buluhatona?​—2 Pedro 3:15.

²² Dili tanan ang makahimo sa paglalin ngadto sa talagsa-matrabaho nga teritoryo. Apan ikaw ba nagapahimulos sa bug-os sa kahigayonan nga bukas alang kanimo? Ginasangyawan mo ba ang mga kauban sa trabaho? mga magtutudlo ug mga kauban sa eskuylahan? Nakapasibo ka ba sa nag-usab-usab nga mga situwasyon diha sa inyong teritoryo? Kon, ingong sangpotanan sa nag-usab-usab nga mga oras sa trabaho, diyutay ra kaayong tawo ang anaa sa balay sa maadlaw, imo bang gibag-o ang imong eskedyul aron duawon sila sa magabii? Kon ang mga tinukod dili pasudlan sa wala-dapitang mga bisita, ikaw ba nagasangyaw pinaagi sa telepono o sulat? Nagasunod ka ba sa interes nga gipakita ug nagatanyag sa pagdumalag mga pagtuon sa Bibliya sa balay? Imo bang ginatuman sa bug-os ang imong ministeryo?​—Itandi ang Buhat 20:21; 2 Timoteo 4:5.

23. Samtang si Jehova magatan-aw kon unsay atong ginabuhat diha sa pag-alagad kaniya, unsay angayng madayag sa atong kahimtang?

²³ Hinaot kitang tanan magtuman sa atong ministeryo sa paagi nga tin-awng nagpakita kang Jehova nga tinuod natong gipabilhan ang dakong pribilehiyo sa pagkahimong iyang mga Saksi niining halandumong kapanahonan. Hinaot mahimong pribilehiyo nato nga makasaksi samtang ipatuman ni Jehova ang paghukom diha sa dunot nga daang sistema ug ipasulod ang mahimayaong Milenyong Pagmando ni Jesu-Kristo!

[Footnote]

Sa Pagsubli

◻ Nganong hinungdanon kaayo ang pagwali sa mensahe sa Gingharian?

◻ Sa unsang gidak-on ang maayong balita nasangyaw hangtod sa 1914?

◻ Unsa ka dako ang pamatuod nga nahatag sukad sa pagkatukod sa Gingharian?

◻ Unsa ang makahimo sa atong bahin mismo sa ministeryo nga mas mabungahon?

[Kahon sa panid 16, 17]

MGA SAKSI NI JEHOVA—Mga Magmamantala sa Gingharian sa Diyos

Sa ginatos ka kombensiyon sa tibuok kalibotan sulod sa 1993-94, gianunsiyo ang pagluwat sa usa ka bag-ong libro nga nag-ulohang Mga Saksi ni Jehova​—Mga Magmamantala sa Gingharian sa Diyos. Kini maoy labing matulon-anon, bug-os nga kasaysayan sa mga Saksi ni Jehova. Kini maoy 752-panid nga libro, nga nindot ug mga ilustrasyon, nga may kapin sa usa ka libong letrato nga gitigom gikan sa 96 ka lainlaing nasod. Sa pagkatapos sa 1993, kini napatik na sa 25 ka pinulongan ug ginahubad pa sa mas daghang pinulongan.

Unsay naghimo sa maong libro nga tukma sa panahon? Sa katuigang bag-o pa minilyong tawo sa tibuok kalibotan ang nahimong mga Saksi ni Jehova. Silang tanan angay nga mahibalo gayod bahin sa kasaysayan sa organisasyon nga ilang gipakig-ubanan. Dugang pa, ang ilang pagsangyaw ug paagi sa pagsimba nakasuhot sa nasodnon ug rasanhong mga pundok sa tibuok kalibotan ug gisagop sa katawhang bata ug tigulang, sa tanang hut-ong sa pangabuhi ug edukasyon. Ingong sangpotanan, daghan nga nakapaniid kon unsay nagakahitabo adunay mga pangutana mahitungod sa mga Saksi​—dili lang bahin sa ilang mga tinuohan kondili hasta usab bahin sa ilang sinugdanan, ilang kasaysayan, ilang organisasyon, ilang mga katuyoan. Daghan ang nagsulat bahin kanila, bisan pag dili kanunay nga walay-pagkamadapigon. Hinuon, walay usang nahibalo sa modernong-adlaw nga kasaysayan sa mga Saksi ni Jehova nga labaw pa kay sa mga Saksi mismo. Ang mga editor niining libroha naningkamot sa pagpahayag sa kasaysayan sa dili-madapigon ug prangkang paagi. Sa pagbuhat niana, ilang gipamatud-an usab ang katumanan hangtod karon sa makahuloganon kaayong bahin sa ilhanan sa presensiya ni Kristo nga nahitala sa Mateo 24:14, ug ilang gihimo kini uban sa mga detalye nga ikatagana lang niadtong dulot nalangkit sa buluhaton nga gitagna dinha.

Ang libro gibahin sa pito ka dagkong seksiyon:

Seksiyon 1: Kining bahina nagtugkad sa makasaysayanhong sinugdanan sa mga Saksi ni Jehova. Naglakip kini sa minubo, matulon-anong pagsubli sa ilang modernong-adlaw nga kasaysayan sukad sa 1870 hangtod sa 1992.

Seksiyon 2: Ania ang usa ka mabutyagong pagsubli sa progresibong kaugmaran sa mga pagtuo nga nagpalahi sa mga Saksi ni Jehova gikan sa ubang relihiyosong mga grupo.

Seksiyon 3: Kining bahina sa libro nag-usisa sa kaugmaran sa gambalay sa ilang organisasyon. Kini nag-asoy sa makaiikag nga mga kamatuoran mahitungod sa ilang mga tigom sa kongregasyon ug mga kombensiyon, ingon man ang paagi sa ilang pagtukod ug mga Kingdom Hall, mas dagkong mga Assembly Hall, ug mga pasilidad alang sa pagpatik ug mga basahon sa Bibliya. Kini nagpadayag sa kasibot sa pagmantala sa mga Saksi ni Jehova sa Gingharian sa Diyos ug sa gugma nga ilang gipasundayag samtang sila mag-atiman sa usag usa sa mga panahon sa kalisdanan.

Seksiyon 4: Dinhi nimo hikaplagan ang makalingawng mga detalye bahin sa kon sa unsang paagi ang pagmantala sa Gingharian sa Diyos nakaabot ngadto sa dagkong mga nasod ug sa hilit nga kapuloan sa tibuok yuta. Hunahunaa lang​—nagsangyaw sa 43 ka nasod sa tuig 1914, apan sa 229 ka nasod sa pagka 1992! Ang mga kasinatian niadtong nakaambit niining tibuok-yutang pag-uswag tinuod nga makapalipay sa kasingkasing.

Seksiyon 5: Ang pagtuman niining tanang buluhaton sa pagmantala sa Gingharian nagkinahanglan nga matukod ang internasyonal nga mga pasilidad alang sa pagpatik sa mga Bibliya ingon man sa mga basahon sa Bibliya diha sa kapin sa duha ka gatos ka pinulongan. Dinhi imong masayran kanang bahina sa ilang buluhaton.

Seksiyon 6: Ang mga Saksi nakaatubang usab ug mga pagsulay​—ang pipila tungod sa pagkadili-hingpit sa tawo, ang uban tungod sa mini nga mga igsoon, ug mas daghan pa tungod sa laktod nga paglutos. Ang Pulong sa Diyos nagpasidaan nga mahitabo gayod kini. (Lucas 17:1; 2 Timoteo 3:12; 1 Pedro 4:12; 2 Pedro 2:1, 2) Kining seksiyona sa libro tataw nga nag-asoy kon unsay tinuod nga nahitabo ug kon sa unsang paagi ang pagtuo sa mga Saksi ni Jehova nakapaarang nila nga mogulang madaogon.

Seksiyon 7: Ingong konklusyon, ang libro naghisgot kon nganong ang mga Saksi ni Jehova nagtuo sa hugot nga ang organisasyon nga niana sila maoy bahin tinuod nga ginatultolan sa Diyos. Kini naghisgot usab kon nganong gibati nila ang panginahanglan, sa organisasyonal ug sa tinagsatagsa, nga magpadayon sa pagbantay.

Dugang pa sa anaa sa ibabaw, kining madanihon nga pagkadesinyo nga libro naglakip sa nindot ug matulon-anon kaayong 50-panid nga seksiyon sa mga letrato nga dekolor, nga nagapakita sa hedkuwarter sa kalibotan ingon man sa mga pasilidad sa sanga nga ginagamit sa mga Saksi ni Jehova sa tibuok kalibotan.

Kon wala ka pa makahimo sa ingon, tinong makabaton kag kaayohan pinaagi sa pagbaton ug pagbasa sa usa ka kopya niining makalingawng basahon.

Mga Komento sa Pipila nga Nakabasa Niini

Unsa ang mga reaksiyon niadtong nakabasa na niining libroha? Aniay pipila:

“Bag-o pa nakong nahuman ang pagbasa sa makalingaw, tinuod nga dokumentaryong Mga Saksi ni Jehova​—Mga Magmamantala sa Gingharian sa Diyos. Ang organisasyon lamang nga sa kamaunongon ug kamapaubsanon nakapanaad nga motapot sa kamatuoran ang makasulat sa prangka, maisogon, ug sensitibo kaayong paagi.”

“Kon pagabasahon kini sama sa basahong Mga Buhat, tungod sa kamatinud-anon ug kaprangka niini.”

“Pagkamakaiikag nga bag-ong basahon! . . . Kini usa ka obra maestra sa kasaysayan.”

Human sa pagbasag mga katunga sa libro, usa ka lalaki misulat: “Ako nahingangha, wala-makatingog, ug halos makahilak. . . . Sa tanan nakong katuigan, walay laing basahon ang makapatandog kaayo.”

“Mahupong ako sa kalipay matag panahong ako maghunahuna kon sa unsang paagi kining basahona magpalig-on sa pagtuo sa mga batan-on ingon man sa mga bag-ohang mosulod sa organisasyon karong adlawa.”

“Ako sa kanunay nagpabili sa kamatuoran, apan ang pagbasa niining libroha nakapahigmata kanako ug nakatabang kanako sa pagkaamgo nga labaw pa sukad masukad nga ang balaang espiritu ni Jehova maoy nagpaluyo niining tanan.”

[Hulagway sa panid 18]

Daghang tawo ang naabot sa mensahe sa Gingharian bisan pag ang mga Saksi diyutay ra