Makapailob Ka Ba?

SI Jehova miingon kang Abram: “Pahawa gikan sa imong yuta . . . lakaw ngadto sa yuta nga akong ipakita kanimo; ug himoon ko ikaw nga usa ka dakong nasod ug panalanginan ko ikaw ug padakoon ko ang imong ngalan.” (Genesis 12:1, 2) Si Abram niadto maoy 75 anyos. Siya misunod ug maalamong nagpailob sa nahibilin niyang kinabuhi, nga naghulat kang Jehova.

Sa ulahi, ang Diyos mihimo niining saara ngadto sa mapailobong si Abraham (Abram): “Sa pagkatinuod sa pagpanalangin ako magapanalangin kanimo, ug sa pagpadaghan ako magapadaghan kanimo.” Si apostol Pablo midugang: “Ug busa human si Abraham nakapakitag pailob, iyang naangkon kini nga saad.”​—Hebreohanon 6:13-15.

Unsa ang pailob? Gihubit kini sa mga diksiyonaryo ingong ang katakos “sa paghulat nga malinawon sa usa ka butang” o ang pagpakitag “pag-agwanta ilalom sa hagit o kalisod.” Busa ang imong pailob masulayan kon ikaw maghulat sa usa ka tawo o usa ka butang, o kon ikaw mahagit o ilalom sa kalisod. Sa maong mga kahimtang ang tawong mapailobon magpabiling kalmado; ang kulag-pailob madalidalion ug daling-masuko.

Atong Walay-Pailob Modernong Kalibotan

Ilabina sa daghang siyudad, ang gipasiugda dili ang pagpailob kondili ang pagdali. Alang sa minilyong tawo nga nagpuyo diha sa naghuot nga mga siyudad, sugdan ang matag adlaw inigbagting sa relo. Diha magsugod ang pinaspasay nga lihok​—pag-adto sa usa ka lugar, pakigkita sa usa ka tawo, paglampos sa usa ka butang. Katingalahan ba nga daghan ang mobatig tensiyon ug walay-pailob?

Maglagot ka ba kon mag-atubang sa mga kahuyangan sa uban? “Dili ko gusto nga dili moabot sa hustong oras ang akong gipaabot,” matud ni Albert. Ang kadaghanan mouyon nga ang paghulat ug tawo nga lapas na sa oras budlay kaayo, ilabina kon tinagalan ang panahon. Mahitungod sa Duke sa Newcastle, ang ika-18ng siglo Britanikong politiko, kini ang gikaingon: ‘Tunga sa oras sa buntag ang iyang mausik, nga maoy iyang ginagukod sa nahibiling adlaw nga wala gayod makaapas niana.’ Kon magdepende ka sa maong tawo adlaw-adlaw, makapailob ka ba?

Kon magmanehog sakyanan, dali ka bang maglagot, dili makahulat, o matintal sa pagmanehog kusog kaayo? Sa maong mga kahimtang, ang kawalay-pailob sagad mosangpot ug katalagman. Sulod sa 1989, sa kanhi Kasadpang Alemanya, kapin sa 400,000 ka aksidente sa dalan ang miresultag pagkaangol o kamatayon. Taliwala niini, 1 sa 3 ang gipahinabo sa pagmaneho nga kusog kaayo o dip-ig kaayo sa sakyanan sa atubangan. Busa, labing menos sa usa ka sukod ang kawalay-pailob mao ang hinungdan sa pagkaangol o kamatayon sa kapin sa 137,000 ka tawo. Pagkadako sa kapildihang gibayad sa kawalay-pailob!

“Malisdan ako sa pagpailob kon adunay usa nga mosagbat kanunay,” mulo ni Ann, “o kon adunay magsigeg panghambog.” Si Karl-Hermann miangkon nga mahagit ang iyang pailob sa “mga batan-on nga walay-pagtahod sa mga edaran.”

Kini ug ubang mga kahimtang tingali maghimo kanimong dili mapailobon. Nan, unsaon nimo pag-ugmad ang dugang pailob?

Si Jehova Makalig-on sa Imong Pailob

Daghang tawo ang nagtuo nga ang pailob maoy timaan sa pagkadili-makahukom o kahuyangan. Alang kang Jehova, hinunoa, kini maoy timaan sa kalig-on. Siya mismo “mapailobon . . . tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Busa, aron modugang pa ang imong pasensiya pabiling suod kang Jehova ug salig kaniya sa bug-os. Ang paglig-on sa imong relasyon sa Diyos mao ang bugtong labing hinungdanong lakang sa pag-ugmad ug usa ka mapailobong disposisyon.

Dugang pa, hinungdanon nga masayod sa mga katuyoan ni Jehova alang sa yuta ug sa katawhan. Si Abraham “nagpaabot sa siyudad nga may tinuod nga mga patukoranan [Gingharian sa Diyos], nga ang magtutukod ug maghihimo niini nga siyudad mao ang Diyos.” (Hebreohanon 11:10) Sa susama, mapuslanon ang pagbatog tin-awng panglantaw sa diyosnong mga saad ug magmakontento sa paghulat kang Jehova. Unya makaamgo ka nga ang pailob, halayo nga timaan sa pagduhaduha, sa pagkatinuod makadani sa mga tawo sa matuod nga pagsimba. Busa, “isipa ang pagpailob sa atong Ginoo ingong kaluwasan.”​—2 Pedro 3:15.

Komosta kon ang imong kaugalingong mga sirkumstansiya magsulay sa imong pailob nga halos dili na maagwanta? Ang mga dili-magtutuo nakahatag ba kanimog kalagot? Napungot ka ba tungod sa daw usa ka walay-pagkatapos hataas nga panahon? Sa maong kahimtang, palandonga ang gisulat sa tinun-ang si Santiago. Human maghisgot sa sumbanan nga gipakita sa mga manalagna sa pagpailob, gibutyag niya ang sekreto sa pagpabiling malinawon ubos sa grabeng kalisod. Si Santiago miingon: “Aduna bay nagaantos ug daotan taliwala kaninyo? Papadayona siya sa pag-ampo.”​—Santiago 5:10, 13.

Kinasingkasing hangyoa ang Diyos diha sa pag-ampo nga lig-onon ang imong pailob ug tabangan ka nga makontrolar ang imong espiritu ubos sa pagsulay. Dangop kanunay kang Jehova, ug siya motabang kanimo sa pag-ila sa mga sirkumstansiya o sa mga batasan sa uban nga magpameligro ilabina sa imong pagkakalmado. Ang pag-ampo nga abante sa masulayon kaayo nga mga kahimtang motabang kanimo nga magpabiling kalmado.

Hustong Panglantaw sa Kaugalingon ug sa Uban

Aron mahuptan ang malinawong panghunahuna, kinahanglang lantawon nimo sa hustong paagi ang imong kaugalingon ug ang uban. Kini posible pinaagi sa usa ka pagtuon sa Bibliya, kay kini nagpakita nga napanunod sa tanan ang pagkadili-hingpit ug busa adunay mga kahuyangan. Dugang pa, ang kahibalo sa Bibliya motabang kanimo nga mouswag diha sa gugma. Kining hiyasa hinungdanon aron mapasundayag ang pailob ngadto sa uban.​—Juan 13:34, 35; Roma 5:12; Filipos 1:9.

Ang gugma ug ang kaandam sa pagpasaylo makapakalma kanimo sa dihang ikaw masuko. Kon adunay mga batasan nga makapalagot kanimo, ang gugma mopahinumdom kanimo nga ang mga batasan ang imong gikalagotan, dili ang tawo. Palandonga kon unsa ka subsob nga ang imong mga kahuyangan nagasulay sa pailob sa Diyos ug nakapasuko sa uban.

Ang hustong panglantaw sa imong kaugalingon motabang usab kanimo nga maghulat nga mapailobon. Pananglitan, nagapangab-ot ka ba sa mga pribilehiyo diha sa pag-alagad kang Jehova, apan nabalo lamang? Gibati ba nimo nga hapit nang mahurot ang imong pailob? Kon mao kana, nan hinumdomi nga ang grabeng kawalay-pailob nagagikan sa garbo. “Labi pang maayo ang usa nga mapailobon kay sa usa nga mapahitas-on ang espiritu,” miingon si Solomon. (Ecclesiastes 7:8) Oo, ang garbo maoy dakong babag sa pag-ugmad sa pailob. Dili ba tinuod nga mas masayon sa tawong mapaubsanon ang paghulat nga malinawon? Busa, ugmara ang pagpaubos, ug mas makaarang ka sa pagdawat sa kalangan nga may kalinaw sa hunahuna.​—Proverbio 15:33.

Pailob Adunay Tugob nga mga Ganti

Si Abraham ilabinang nailhan tungod sa iyang pagtuo. (Roma 4:11) Bisan pa, ang pailob nagpalig-on sa iyang pagtuo. Unsay iyang ganti sa paghulat kang Jehova?

Si Abraham gihatagan sa nagdakong pagsalig kang Jehova. Busa ang ngalan ni Abraham nahimong dako ug ang iyang kaliwatan nahimong usa ka gamhanang nasod. Ang tanang nasod sa yuta makapanalangin sa ilang kaugalingon pinaagi sa iyang binhi. Si Abraham nag-alagad ingong tigpamaba sa Diyos ug nahimo gani ingong larawan sa Maglalalang. Aduna pa bay mas dakong ganti alang sa pagtuo ug pailob ni Abraham?

“Si Jehova malumo kaayo sa pagmahal” ngadto sa mga Kristohanon nga mapailobong nag-antos sa mga pagsulay. (Santiago 5:10, 11) Ang maong mga indibiduwal nagatagamtam sa mahinlong tanlag tungod kay nagabuhat sa iyang kabubut-on. Nan, sa imong kahimtang, kon maghulat ka kang Jehova ug mapailobong antoson ang mga pagsulay, ang imong pagpasensiya moresulta sa pag-uyon ug panalangin ni Jehova.

Ang pailob nakatabang ug maayo sa katawhan sa Diyos sa tanang bahin sa kinabuhi. Duha sa mga alagad ni Jehova, nga ginganlag Christian ug Agnes, nakadiskobre niini sa dihang sila mihukom nga magminyo. Ilang gipalangan ang ilang pagpakasal agig pagtahod sa Kristohanong mga ginikanan, nga nagkinahanglag panahon aron mailhag maayo si Agnes. Unsay gisangpotan niining lihoka?

“Nasayran namo sa ulahi kon unsa ka hinungdanon ang among pagpailob alang sa akong mga ginikanan,” miingon si Christian. “Ang among mapailobong paghulat wala magtapos sa relasyon tali sa akong asawa ug kanako. Apan kadto ang unang pundasyon sa among relasyon uban sa akong mga ginikanan.” Oo, ang pagpailob nagaanig tugob nga mga ganti.

Ang pagpailob makapalambo usab sa kalinaw. Ang pamilya ug mga higala mapasalamaton kanimo nga wala nimo himoang isyu ang ilang matag sayop. Ang imong pagkakalmado ug pagsabot kon masayop ang uban magpugong sa makauulaw nga mga hitabo. Usa ka sanglitanang Intsik nag-ingon: “Ang pagpailob sa usa ka gutlo sa kasuko maglikay kanimo sa gatosan ka adlaw sa kasubo.”

Ang pagpailob mopauswag sa imong personalidad, sa ingon motabang kanimo nga maampingan ang imong ubang maayong mga hiyas. Kini makapalig-on sa imong pagtuo, ang imong kalinaw dumalayon, ug ang imong gugma dili matarog. Ang kamapailobon motabang kanimo nga magmalipayon samtang nagapakitag kalulot, pagkamaayo, ug kaaghop. Ang pagpailob motukod sa kalig-on nga hinungdanon sa pag-ugmad sa hataas nga pailob ug pagpugong-sa-kaugalingon.

Nan, hulat nga mapailobon alang sa katumanan sa mga saad ni Jehova, ug ikaw makapaneguro sa usa ka kahibulongang umaabot. Sama kang Abraham, hinaot ikaw “pinaagi sa pagtuo ug pailob magapanunod sa mga saad.”​—Hebreohanon 6:12.

[Hulagway sa panid 23]

Ang suod nga relasyon uban kang Jehova motabang kanimo sa pagpakitag pailob, sama kang Abraham