Siya Dili Tigulang Kaayo sa Pag-alagad Kang Jehova
DAGHANG tigulang ang mobati nga ang ilang nahibiling mga tuig naghatag na lamang ug diyutayng paglaom sa kalipay. Usa ka ilado-kaayong tigulang nga artista miingon gani: “Gidaot nako ang akong kinabuhi, ug ulahi na kaayo ang pagbag-o niana . . . Sa dihang maglakaw ako nga mag-inusara, magpalandong akog balik sa akong kinabuhi, ug dili ako malipayon sa paagi sa paghimo ko niana . . . Ako dili mahimutang bisag asa ug dili makapundo.”
Usa ka tigulang nga babaye nga nabuhi duolan sa 2,000 ka tuig nang milabay walay ingon nianang matanga sa suliran. Biyuda siya nga 84-anyos, apan siya aktibo, malipayon, ug katingalahang gipaboran sa Diyos. Ang iyang ngalan mao si Ana, ug siya may linaing hinungdan sa pagkalipay. Unsa kadto?
“Wala Gayod Makapalta Diha sa Templo”
Gipailaila kanato sa magsusulat sa Ebanghelyo nga si Lucas si Ana. “Karon,” matud niya, “dihay si Ana nga usa ka propetisa, anak nga babaye ni Fanuel, sa tribo ni Aser” sa Israel. Ingong usa ka propetisa, siya may gasa sa balaang espiritu o aktibong puwersa sa Diyos, sa linain nga diwa. Ug si Ana may dakong higayon sa pagpanagna sa usa ka halandumong okasyon.
Si Lucas miasoy: “Kini nga babaye hataas na ug panuigon, ug nagpuyo uban sa usa ka bana sulod sa pito ka tuig sukad sa iyang pagkaulay, ug siya karon balo na nga kawaloag-upat ka tuig ang pangedaron.” (Lucas 2:36, 37) Malagmit, si Ana nabiyuda dihang siya batan-on pa. Ang mga biyuda nga Kristohanon bisag pilay edad nahibalo kon unsa ka makapasubo nga mawad-ag usa ka minahal nga bana diha sa kamatayon. Apan, sama sa daghang diyosnong mga babaye sa atong adlaw wala tugoti ni Ana nga kining makasubong hitabo magpahunong sa iyang pag-alagad sa Diyos.
Gisultihan kita ni Lucas nga si Ana “wala gayod makapalta diha sa templo” sa Jerusalem. (Lucas 2:37) Giapresyar gayod niya ang pagkagipanalanginan nga mosangpot sa pag-alagad diha sa balay sa Diyos. Ang iyang mga lihok nagbutyag nga siya, sama sa salmistang-hari nga si David sa Israel, adunay usa lamang ka butang nga gipangayo kang Jehova. Ug unsa kana? Si David miawit: “Usa ka butang ang gipangayo ko kang Jehova—nga pagapangitaon ko, nga makapuyo ako sa balay ni Jehova sa tanang adlaw sa akong kinabuhi, aron sa pagtan-aw sa katahom ni Jehova ug sa pagtan-aw nga may pagpabili diha sa iyang templo.” (Salmo 27:4) Niining bahina, usab, si Ana sama sa Kristohanong mga babaye karong adlawa kinsa nakakaplag ug kalipay sa regular nga pagtambong sa dapit sa pagsimba kang Jehova.
Si Ana naghatag ug balaang pag-alagad ngadto kang Jehova adlaw ug gabii. Iyang gihimo kini “uban ang mga pagpuasa ug mga pangamuyo,” nga nagpailag pagbangotan ug kinasingkasing nga pagpangandoy. (Lucas 2:37) Ang usa ka siglong gidugayon sa Hudiyohanong pagpasakop sa Hentil nga mga gahom, inubanan sa nagkadaot nga relihiyosong mga kahimtang nga miabot bisan ngadto sa templo ug sa mga saserdote niini, tingali maoy hinungdan sa mga pagpuasa ug mga pagpangamuyo ni Ana kang Jehova nga Diyos. Apan siya may katarongan usab nga malipay, ilabina tungod sa butang nga talagsaong nahitabo diha sa usa gayod ka halandomong adlaw sa tuig 2 W.K.P.
Usa ka Wala-Dahomang Panalangin
Niining talagsaon kaayong adlaw, ang masuso nga si Jesus gidala sa templo sa Jerusalem sa iyang inahan, si Maria, ug sa iyang amaama, si Jose. Ang tigulang nga si Simeon nakakita sa bata ug misulti ug matagnaong mga pulong niadtong higayona. (Lucas 2:25-35) Si Ana didto sa templo ingon sa naandan. “Nianang taknaa mismo” mitaho si Lucas, “siya miduol.” (Lucas 2:38) Pagkadako gayod sa kalipay ni Ana samtang ang iyang nagkahanap nga mga mata nakakita sa umaabot nga Mesiyas!
Kap-atan ka adlaw nga una pa, nakurat ang mga magbalantay sa manulonda sa Diyos duol sa Bethlehem uban niining mga pulonga: “Tan-awa! Ako nagapahayag kaninyo ug maayong balita sa dakong kasaya nga mabatonan sa tanang tawo, tungod kay may natawo kaninyo karong adlawa nga usa ka Manluluwas, kinsa maoy Kristo nga Ginoo, sa siyudad ni David.” Usa ka dakong panon sa langitnong kasundalohan midayeg kang Jehova ug midugang: “Himaya ngadto sa Diyos sa kahitas-an, ug nganha sa yuta pakigdait taliwala sa mga tawong maayog kabubut-on.” (Lucas 2:8-14) Ingon man usab, si Ana niadtong tungora napukaw sa pagpamatuod bahin sa Usa nga mahimong Mesiyas!
Sa pagkakita sa batang si Jesus, si Ana “misugod paghatag ug mga pasalamat sa Diyos ug nagasulti bahin sa bata ngadto kanilang tanan nga nagahulat sa kapahigawasan sa Jerusalem.” (Lucas 2:38) Sama sa tigulang nga si Simeon, nga nakapribilehiyo usab sa pagkakita sa masuso nga si Jesus diha sa templo, sa walay duhaduha siya nangandoy, nag-ampo, ug nagpaabot sa gisaad nga Manluluwas. Ang maayong balita nga si Jesus mao kanang Usa wala gayod makapugong sa iyang kaugalingon sa pagsulti ngadto sa uban.
Bisag si Ana tingali wala magdahom nga mabuhi pa sa dihang si Jesus modako, unsay iyang gibuhat? Siya malipayong nagwali ngadto sa uban bahin sa kagawasan nga hapit nang mabatonan pinaagi niining umaabot nga Mesiyas.
Maayong Panig-ingnan ni Ana
Pila ba sa relihiyosong mga tawo sa kalibotan ang mohatag sa maong pagpamatuod o mosimba gihapon sa adlaw ug gabii sa edad nga 84? Tingali, sila nangayo nag pensiyon sa sayo pa nga mga tuig. Si Ana ug Simeon lahi. Sila naghatag ug maayong panig-ingnan sa tanang tigulang nga mga alagad ni Jehova. Sa pagkatinuod, gihigugma nila ang balay sa pagsimba ni Jehova ug nagdayeg kaniya sa tibuok nilang kasingkasing.
Diha kang Ana kita adunay maayong panig-ingnan bahin sa usa ka diyosnong biyuda. Ngani, ang batbat ni Lucas bahin niining mapainubsanong tigulang nga babaye managsama sa mga kuwalipikasyon sa usa ka takos nga biyuda nga gilaraw sa 1 Timoteo 5:3-16. Didto si apostol Pablo nag-ingon nga ang maong biyuda “nagapadayon sa pagpangamuyo ug mga pag-ampo gabii ug adlaw,” maoy “asawa sa usa ka bana,” ug ‘makugihong nagsunod sa tanang maayong buhat.’ Si Ana ingon nianang matanga sa babaye.
Karong adlawa, atong makaplagan ang edarang mga biyuda nga naghatag ug balaang pag-alagad sa Diyos sa gabii ug adlaw sa libolibong kongregasyon sa mga Saksi ni Jehova sa tibuok yuta. Pagkadako sa atong apresasyon nga ania sa taliwala kanato ang modernong “mga Ana”!
Bisag tigulang na, ang mga lalaki ug mga babaye makahimo sa pagpahinungod sa Diyos ug magpasimbolo niini pinaagi sa bawtismo sa tubig. Ang mga tigulang dili gayod mga tigulang kaayo sa pag-alagad kang Jehova ug sa pagpamatuod mahitungod sa Mesiyanikong Gingharian nga karon natukod na sa mga langit ug sa dili madugay magdalag tugob nga mga panalangin ngadto sa masinundanong katawhan. Ang mga tigulang nga karon nagahatag ug balaang pag-alagad sa Diyos makapamatuod sa panalangin ni Jehova diha kanila, sama kang Ana nga ilabinang gipanalanginan sa daghang kasiglohang miagi. Siya dili tigulang kaayo sa pag-alagad kang Jehova ug sa pagdayeg sa iyang balaang ngalan—ug mao man usab sila.