Malipay Ka ba sa Personal nga Pagtuon?

ANG tanang sinserong alagad sa Diyos malipay sa paggugol ug igong gidaghanon sa panahon alang sa personal nga pagtuon sa Bibliya. (Salmo 1:1, 2) Apan, tungod sa dakong panginahanglan sa ilang panahon ug kusog, nalisdan ang kadaghanan sa paggugol ug dakong panahon ug kusog diha sa personal nga pagtuon ingon sa ilang gusto.

Ugaling, aron magpadayon ingong aktibong mga alagad sa Diyos, kinahanglang bag-ohon sa tanan ang ilang kalipay ug kusog sa matag adlaw pinaagi sa pagkakaplag ug bag-o o mas lalom nga mga bahin sa kamatuoran sa Pulong sa Diyos. Ang mga kamatuoran sa Bibliya nga nakapukaw gayod kanimo sa mga tuig nga milabay tingalig wala na kaayo makapukaw kanimo karon. Busa, maayo, gani hinungdanon, nga kita mohimog mahunahunaon ug kanunayng paningkamot aron makabatog lab-as nga pagsabot sa kamatuoran aron magpabilin kita nga madasigon sa espirituwal.

Sa unsang paagi ang karaang mga tawo sa pagtuo naghimo sa ilang kaugalingon nga malig-on sa espirituwal pinaagi sa personal nga pagtuon sa Pulong sa Diyos? Sa unsang paagi ang pipila sa modernong-adlaw nga mga alagad ni Jehova naghimo sa ilang pagtuon nga mas makapalipay ingon man mabungahon? Sa unsang paagi sila gigantihan sa ilang mga paningkamot?

Gibag-o Nila ang Ilang Kaugalingon Pinaagi sa Personal nga Pagtuon

Si Haring Josias sa Juda mihimo sa iyang kampanya batok sa idolatriya uban sa mas dako pang kasibot human mabasa ngadto kaniya ‘ang mismong libro sa kasugoan ni Jehova pinaagi sa kamot ni Moises.’ Walay duhaduha nga dili kadto ang unang higayon nga nadungog niya kining bahina sa Pulong sa Diyos; apan ang pagkadungog sa mensahe direkta mismo sa orihinal nga manuskrito nakapasibot kaniya sa iyang pagpakigbugno alang sa putling pagsimba.​—2 Cronicas 34:14-19.

Ang manalagnang si Daniel nakasabot ‘sa gidaghanon sa mga tuig sa katumanan sa paglumpag sa Jerusalem’ ug kana dayag nga dili lamang gikan sa libro ni Jeremias kondili gikan usab “sa mga libro.” Kini lagmit gayod naglakip sa mga libro sa Levitico (26:34, 35), Isaias (44:26-28), Oseas (14:4-7), ug Amos (9:13-15). Ang iyang napamatud-an pinaagi sa iyang masibotong pagtuon sa mga libro sa Bibliya miagak niining debotadong tawo sa pagpangita sa Diyos diha sa kinasingkasing nga pag-ampo. Ang iyang tim-os nga pangamuyo gitubag uban ang dugang kapadagayan ug pasalig maylabot sa siyudad sa Jerusalem ingon man sa iyang katawhan.​—Daniel, kapitulo 9.

Si Josias, nga mibuhat “sa matarong sa mga mata ni Jehova,” ug si Daniel, kinsa maoy “tawong tilinguhaon kaayo” sa mga mata sa Diyos, sa paninugdan dili lahi gikan kanato karong adlawa. (2 Hari 22:2; Daniel 9:23) Ang ilang personal nga mga paningkamot nga gideboto sa matumonganon kaayo nga pagtuon sa mga Kasulatan nga mabatonan sa maong panahon miagak kanila ngadto sa mas dakong espirituwalidad ug nakatabang kanila nga matagamtam ang mas malig-ong relasyon uban sa Diyos. Susama ang ikasulti sa daghang ubang karaang mga alagad ni Jehova, sama kang Jepte, sa usa ka salmista sa balay ni Asap, Nehemias, ug Esteban. Silang tanan naghatag ug pamatuod sa mainampingong personal nga pagtuon sa bahin sa Bibliya nga nabatonan sa ilang panahon.​—Maghuhukom 11:14-27; Salmo 79, 80; Nehemias 1:8-10; 8:9-12; 13:29-31; Buhat 6:15–7:53.

Himoang Padasig ang Ministeryo

Ang kadaghanan sa mga alagad ni Jehova karong adlawa kinsa nagaalagad kaniya sulod sa daghang katuigan may eskedyul alang sa personal nga pagtuon sa Bibliya. Nakaplagan nila kini nga hinungdanon aron makapabiling alerto sa espirituwal ug bug-os nga tumanon ang ilang Kristohanong mga kaakohan. Bisan pa niana, daghan kanila ang moangkon nga dili kanunay sayon ang pagtimbang sa paggamit sa ilang panahon ug kusog tali sa pagtuon ug sa ubang mga butang nga dili angayng pasagdan.

Sa gihapon, ang pagpabiling alerto sa espirituwal pinaagi sa makugihong personal nga pagtuon hinungdanon sa pagpakiglabot sa mga panginahanglan diha sa Kristohanong ministeryo niining abanteng yugto sa tibuok-yutang buluhaton sa pagsangyaw-sa-Gingharian. Kadtong kinsa malipay sa lab-as ug mas lalom nga mga pagsabot sa Pulong sa Diyos makaatubang sa hagit sa pagtandog sa giuhaw nga mga kasingkasing. Kini tinuod kon gitudlo man ang usa diha sa madahom nga daghang makuha sa paagi sa espirituwal nga pagpangisda o sa usa nga malahutayon sa mga teritoryo diin nangibabaw ang kawalay-pagtagad sa kadaghanan.

Kaon Kanunay sa Pulong sa Diyos

Ang ginabuhat sa uban mohatag kanimo ug ideya kon sa unsang paagi dugang pa nimong kalipayan ang imong rotina sa pagtuon o kon sa unsang paagi magamit nimo ug sa imong pamilya nga mas magantihon ang panahon sa pagtuon. Lakip sa mga butang nga dili buot masipyatan sa usa ka alagad sa Diyos mao ang pagbasa sa Pulong sa Diyos mismo sa regular nga paagi. Gihimo sa daghan nga usa ka tumong ang pagbasa sa labing menos tulo ngadto sa upat ka kapitulo sa Bibliya matag semana. Buot mo bang mabasa ang tibuok Bibliya sulod sa usa ka tuig? Nan malipay ka nga mogugol ug dugang panahon sa pagbasa niana, tingali tunga sa oras sa usa ka adlaw.

Nabasa ba nimo nga dili lamang kas-a ang tibuok Bibliya? Nganong dili maghimog usa ka bag-ong tumong sa sunod higayon? Agig kausaban, usa ka Kristohanong babaye nagbasa sa mga libro sa Bibliya sumala sa pagkahan-ay nga kini gisulat. Nasabtan niya ang daghang detalye, pinasukad sa hitabo sumala sa kronolohiya, nga iyang nasipyatan niadto. Ang laing Kristohanong babaye nagbasa sa Bibliya gikan sa hapin ngadto sa hapin lima ka beses sulod sa milabayng lima ka tuig, nga sa matag panahon may lahi nga panglantaw. Sa unang higayon, iyang gibasa kana nga diretso. Sa ikaduhang pagbasa, iyang gisumaryo ang unod sa matag kapitulo sa usa o duha ka linya diha sa usa ka kuwaderno. Gikan sa ikatulong tuig padayon, siya mibalhin sa dakog-letrang edisyon nga may reperensiya, una mapilion niyang gitan-aw ang mga cross-reference diha sa daplin ug unya gihatagag suod nga pagtagad ang mga potnot ingon man ang impormasyon sa apendise. Sa ikalimang higayon, gigamit niya ang mga mapa sa Bibliya aron pauswagon ang iyang pagsabot bahin sa geograpiya. Siya miingon: “Alang kanako, ang pagbasa sa Bibliya nahimong makagana sama nga nagkaon.”

Ang pipila ka maikagong mga estudyante sa Bibliya nakakaplag nga mapuslanon ang pagbaton ug usa ka kopya sa Bibliya nga gamiton lamang alang sa personal nga pagtuon, sulatan ug mugbong makapaikag nga mga komento ang daplin niini, sa makapapukaw-sa-hunahuna nga mga ilustrasyon, o sa numero sa panid sa ubang mga publikasyon nga ilang magamit sa ulahi. Giisip sa usa ka bug-os panahong ministro nga usa ka kalipay sa kataposan sa matag bulan nga isulat diha sa iyang tun-anang kopya ang bag-ong mga punto nga iyang nakat-onan sulod sa maong bulan. “Ang pagpaabot niining gipakahamili nakong mga oras,” matud niya, “nagatabang kanako sa pagkab-ot sa ubang mga tumong sa bulan sa dili madugay.”

Pipila ka Talagsaong mga Ideya

Gibati mo bang ang imong eskedyul puno sa inadlaw ug senemanang mga hilikayon ug nga gikinahanglan nimo ang pipila ka ideya aron magamit ug maayo ang imong limitadong panahon? Buweno, dalha ang gusto nimong basahon, ug pahimusli ang imong mga gutlo nga wala kaayoy buhat. Sa balay o sa dapit nga imong naandan sa pagtuon, sa gidak-on kutob sa mahimo areglaha ang mga libro ug ubang mga gamit sa pagtuon aron nga kini sayon nga makab-ot. Himoang haruhay ang dapit nga imong tun-anan apan dili kaayo haruhay nga ikaw magduka. Aduna ka bay asaynment nga pakigpulong? Bug-os basaha ang materyal nga labing sayo kutob sa mahimo, unya balaya ang mga ideya kon ikaw nagapahulay o nagabuhat sa nagkalainlaing buluhaton.

Ang uban makatabang kanimo sa pagpahimulos sa panahon alang sa kaayohan ninyong duha. Pananglitan, mahimo nimong ipabasag kusog sa laing tawo ang dali masabtang mga bahin samtang ikaw nagkurikuri o nagdulot ug tsa ngadto sa imong buotang tigbasa. Komosta ang bahin sa tanan diha sa balay nga nagkauyon ug usa ka panahon nga maghilom alang sa personal nga pagtuon? “Unsay gikalipayan nimong nabasa niining bag-o pa?” Usahay imong magamit ang nakat-onan sa imong mga higala pinaagi sa pagsugod ug pagpakigsulti kanila niining paagiha.

Interesado ka ba sa pagpailaila ug lab-as nga mga ideya diha sa imong programa sa pagtuon? Makahikay kag tumong nga panahon alang sa pagtuon sa samang paagi nga daghan ang nakahikay ug tumong nga panahon sa pagpakigsulti bahin sa Bibliya ngadto sa uban. Usa ka bug-os-panahon (payunir) nga magmamantala naghikay ug binulan ginagmayng tumong nga mga oras sa pagtuon ug nalipay sa nakita niya ang iyang tsart sa tumong nga hapit nang mapuno. Gilimitihan sa uban ang panahon sa pagtan-aw ug telebisyon ug nianang paagiha nakakitag panahon alang sa pagtuon. Daghan mopilig tema sa pagtuon nga ilang mapadayon sa taastaas nga panahon, sama sa mga bunga sa espiritu, mga impormasyon sa mga libro sa Bibliya, o arte sa pagpanudlo. Ang uban malingaw sa paghimog mga tsart sa kronolohiya, sama nianang nagpakita sa kalangkitan sa mga hari sa Israel ug sa mga manalagnaa o sa mga Buhat sa mga Apostol ug sa mga sulat ni Pablo.

Mga batan-on, gusto ba ninyo ang mas malig-ong pagtuo? Nganong dili mopilig publikasyon alang sa bug-os nga pagtuon sa panahon sa imong sunod nga bakasyon sa eskuylahan? Gipili sa usa ka bawtismadong estudyante sa hayskol ang Pagpangita sa Katawhan sa Diyos, usa ka librong gipatik sa Watch Tower Society. Kapitulo por kapitulo, siya mihimog mugbong mga sumaryo diha sa usa ka kuwaderno sa iyang nakat-onan. Kadto mahagiton ug nakakuhag daghang panahon kay sa iyang gihunahuna. Bisan pa, sa dihang natapos na niya ang tibuok libro, siya naikag kaayo sa pagkatinuod sa mensahe sa Bibliya.

Labaw Pang Magmaikagon sa Pagkat-on

Daghang modernong-adlawng matinumanong mga alagad ni Jehova aduna nay “daghang buhaton sa buluhaton sa Ginoo.” (1 Corinto 15:58) Bisan sa gisubling eskedyul ug kinasingkasing nga mga paningkamot, ang rotina nga imong ginasunod sa usa ka kasagarang semana tingali wala kaayoy dakong kausaban. Bisan pa, ang padayon nimong pagkamaikagon nga makabaton ug mas lalom nga pagsabot sa kamatuoran ug sa paghupot sa imong kaugalingon nga bug-os nga nagapahiangay sa pagpadayag sa mga katuyoan ni Jehova mohatag ug kalainan.

Makapadasig ang pagkadungog sa mga ganti niadtong kinsa miuswag sa ilang paagi sa pagtuon. Usa ka Kristohanong lalaki, nakaamgo nga siya nawad-ag positibong tinamdan diha sa pagpangitag mas lalom nga pagsabot sa kamatuoran, nag-organisar sa iyang kinabuhi aron siya makagahig dugang sa iyang libreng mga oras alang sa personal nga pagtuon. “Kini nakahatag kanakog kalipay nga wala nako maagii niadto,” siya miingon. “Uban sa nagkadakong pagsalig nga ang Diyos mao ang awtor sa Bibliya, akong nakaplagan nga ako makasulti na ngadto sa uban mahitungod sa akong pagtuo nga may tinuod nga kadasig. Gibati ko nga maayo akong pagkapakaon, malagsik sa espirituwal, ug kontento sa kataposan sa matag adlaw.”

Usa ka nagapanawng magtatan-aw sa mga Saksi ni Jehova, kinsa magduawan sa daghang kongregasyon, nagbatbat sa ubang mga kaayohan niining paagiha: “Kadtong makugihon sa personal nga pagtuon sa katibuk-an malipayon ug tin-aw sa ilang mga pulong. Sila mas maayong makigsandurot sa uban, ug sila dili dayon madani sa negatibong mga komento gikan sa uban. Kon anaa sa ministeryo sa kanataran, sila makapailin-ilin ingon man alerto sa mga panginahanglan sa mga tawo nga ilang ikahibalag.”

Iyang gidugang ang usa ka punto nga mahimong isilsil sa hunahuna sa uban sa dihang ilang usisaon ang ilang paagi sa pagtuon. “Diha sa mga tigom alang sa mga panaghisgot sa Bibliya, daghan ang kiling nga mobasa sa ilang mga komento diha mismo sa pinatik nga panid. Dakong kaayohan ang ilang makuha kon palandongon nila kon sa unsang paagi ang materyal nalangkit sa ilang nakat-onan sa miagi o sa ilang kaugalingong mga kinabuhi.” Nagtuo ka ba nga makapauswag ka niining bahina?

Ang manalagnang si Daniel, human sa kapig 90 anyos sa kinabuhi, wala mobating nakasabot na gayod sa mga dalan ni Jehova. Sa iyang hinapos nga mga tuig, siya nangutana mahitungod sa usa ka butang nga wala niya bug-os masabti: “O akong ginoo, unsa ba ang kataposan niining mga butanga?” (Daniel 12:8) Walay duhaduha kining walay kausaban nga kamaikagon sa pagkat-on ug dugang pa sa kamatuoran sa Diyos mao ang usa ka yawi ngadto sa iyang dalayegong integridad sa tibuok halandomong kurso sa iyang kinabuhi.​—Daniel 7:8, 16, 19, 20.

Ang matag usa sa mga alagad ni Jehova adunay samang kaakohan sa pagbarog nga malig-on ingong usa sa Iyang mga Saksi. Labi pang magmaikagon sa pagkat-on aron magmalig-on ka sa espirituwal. Sulayi ang pagdugang ug usa o duha ka bag-ong mga bahin sa imong senemana, binulan, o tinuig nga eskedyul sa personal nga pagtuon. Tan-awa kon sa unsang paagi panalanginan sa Diyos ang tanang gagmayng paningkamot nga imong mahimo. Oo, kalipayi ang imong personal nga pagtuon sa Bibliya ug ang mga sangpotanan nga ikahatag niini.​—Salmo 107:43.

[Footnote]