Pag-alagad Uban sa Labing Mauswagong Organisasyon
SUMALA SA GIASOY NI ROBERT HATZFELD
Karong adlawa daghan kaayong tawo ang mopasalida sa telebisyon pinaagi sa remote control aron sa pagtan-aw sa balita sa gabii diha sa buhing mga kolor, nga dili mag-isip niana nga usa ka butang nga talagsaon. Apan, daw gahapon lamang nga ako usa ka nahibulong kaayong 12-anyos nga batang lalaki nga nagtan-aw sa usa ka telon sa sinehan sa mas dako pa sa sagad nga gidak-on nga larawan sa usa ka tawo, ug siya nagasulti!
DILI gayod hinungdanong balita, maghunahuna ka tingali. Apan dayag nga kadto usa ka daw modernong-adlaw nga milagro alang kanako balik niadtong 1915, sa sayong mga adlaw sa walay-tingog itom-ug-puti nga pelikula. Usa ka halangdon bungotong tawo ang mipakita sa telon ug miingon: “Ang Photo-Drama of Creation gipasundayag sa I.B.S.A., ang International Bible Students Association.” Sulod sa misunod nga duha ka oras, ang sugilanon sa Bibliya anam-anam nga napadayag kanamo. Ang Kasulatanhong mensahe niini tin-aw ug makalingaw. Apan, ang pelikula, nga gisal-otan sa de-kolor nga mga slayd, ug ang giduyog nga mga pulong ang tinuod nga nakadani sa akong pagtagad.
Wala nako kadto maamgohi niadtong tungora, apan ang akong batan-ong kadasig alang niadtong hinungdanong hitabo sa teknolohiya maoy pasiuna sa usa ka tibuok-kinabuhing karera uban sa labing mauswagong organisasyon sa yuta.
Sayong mga Adlaw
Niadtong 1891 ang akong amahan nga taga-Dillenburg, Alemanya, mibalhin ngadto sa Alemang komunidad sa Allegheny, Pennsylvania, T.B.A. Sa ulahi nahimamat niya ang usa ka dalaga sa usa ka Alemang pamilya didto, ug sila naminyo. Natawo ako sa Hulyo 7, 1903, ug gimatuto nga nagsulti ug Aleman ug Ingles. Sa wala pa magsugod ang Gubat sa Kalibotan I niadtong 1914, ang usa ka epidemya sa tesis nagpahinabo sa kamatayon sa akong mga ginikanan ug naghimo kanakong ilong tuwapos. Ang akong apohang lalaki sa bahin sa inahan namatay gumikan sa estrok halos sa samang panahon.
Ang manghod nga babaye sa akong amahan, si Minna Boemer, malulutong misagop kanako ngadto sa iyang pamilya. “Ako may lima ka anak,” matud niya. “Maayong dugangan pa ug usa.” Bisan tuod gimingaw ako sa akong mga ginikanan, si Tiya Minna naghatag kanakog maayong pinuy-anan.
Ang akong iyaan maoy dugay nang membro sa Kongregasyon sa Allegheny sa mga Estudyante sa Bibliya (ingon sa pagtawag sa mga Saksi ni Jehova niadtong mga adlawa). Sa wala pa ang 1909, si Igsoong C. T. Russell, nga maoy presidente niadtong panahona sa Watch Tower Society, mitambong usab sa maong kongregasyon. Si Tiya Minna nagdala kanako ngadto sa mga tigom. Bisan tuod ang among pamilya wala mohimog nahiusang paningkamot sa pagtuon o pagsangyaw niadtong panahona, kon unsay nadungog namo sa mga tigom, among ipakig-ambit nga di-pormal uban sa mga tawo nga among kaila.
Maoy niining yugtoa nga ang “Photo-Drama” nakapahibulong kanako. Sanglit mahiligon ako sa mekanikal nga mga butang, ang bag-ong mga paagi sa pangletrato ug pagduyog sa tingog/hulagway nakapadani kanako, maingon man usab ang time-lapse nga pangletrato. Ang pagtan-aw sa pagbukhad sa mga bulak maoy kulbahinam!
Niadtong 1916 nasubo kami sa kamatayon ni Igsoong Russell. Sanglit nagpuyo kami sa Allegheny, kami presente sa serbisyo sa paglubong kaniya didto sa Carnegie Hall. Mao kini ang lawak diin gidebate ni Igsoong Russell si E. L. Eaton niadtong 1903. Nakadungog ako ug mga sugilanon mahitungod niining Metodista Episcopalian nga pastor kinsa naghagit kang C. T. Russell ngadto sa usa ka unom-ka-adlaw nga debate, nga naglaom nga mahimong kaduhaduhaan ang pagkaeskolar sa Bibliya ni Igsoong Russell. Hinunoa, gikaingong, si Russell ‘nagtumong sa goma sa tubig ngadto sa impiyerno.’ Si Sara Kaelin, nga usa ka iladong colporteur sa Pittsburgh, personal nga nakaila sa mga Russell. Sa panahon sa paglubong nakita niya si Maria Russell nga nagbutang ug pipila ka bulak diha sa lungon nga may sulat, “Alang sa Akong Minahal nga Bana.” Bisan tuod siya mibulag kaniya mga pipila ka tuig nga sayo pa, si Maria nag-ila gihapon kaniya ingong iyang bana.
Sa pag-aginod sa katuigan, nakabaton akog daghang kahigayonan sa pagbaton ug teknikal nga mga katakos nga magamit sa akong umaabot nga karera. Ang magulang nga lalaki sa akong inahan kinsa maoy akong legal nga tig-atiman maoy usa ka kontraktor sa pagpanukod. Panahon sa akong mga bakasyon sa tunghaan, patrabahoon ko niya uban sa iyang mga elektrisyan, nga nag-usab sa mga suga sa karaang mga mansiyon gikan sa de-gas ngadto sa de-koryente. Niadtong 1918 ang mga estudyante sa among tunghaan naghimo ug bag-ong radyo-telegrapo nga kasangkapan. Nagtigom kami sa magabii aron sa pagtuon ug paghimo ug mga eksperimento diha sa natad uban sa elektrisidad ug magnetismo. Niadtong 1926 usa ka higala ug ako mihukom sa pagkab-ot sa among pangandoy sa bata pa—pagtrabaho diha sa mga barko ug pagbiyahe sa kalibotan. Mipalista kami sa Radio Corporation of America nga eskuylahan alang sa opereytor sa radyo-telegrapo.
Usa ka Bag-ong Kinabuhi sa Bethel
Ang eskuylahan sa radyo nga among gitunghaan maoy didto sa Siyudad sa New York, busa mobiyahe ako tabok sa suba ngadto sa Brooklyn alang sa mga tigom sa mga Estudyante sa Bibliya, nga gihimo sa giabangang awditoryum sa karaang Templo sa mga Mason. Balik niadtong panahona, dihay usa lamang ka kongregasyon sa tibuok siyudad sa New York. Sa dihang ang mga igsoon sa Bethel (ang pinuy-anan sa pamilya sa hedkuwarter sa mga Estudyante sa Bibliya) nakahibalo nga nagtuon ako alang sa usa ka lisensiya sa komersiyal nga radyo, sila miingon: “Nganong moadto ka pa sa dagat? May estasyonan kita sa radyo dinhi ug nagkinahanglag opereytor.” Gidapit ko nila nga moadto sa opisina alang sa usa ka interbiyo. Wala akoy nahibaloan bahin sa Bethel gawas nga kana maoy hedkuwarter sa mga Estudyante sa Bibliya.
Ang mga igsoon nag-interbiyo kanako ug nagrekomendar nga akong taposon ang akong pagtungha, mokuhag lisensiya, ug unya mosulod sa Bethel. Sa dihang nakagraduwar na, inay mosakay sa barko nga mobiyahe sa langyawng kadagatan, giimpaki nako ang pipila nako ka sapot ug misakay sa usa ka tren sa ilawom sa yuta paingon sa Bethel. Bisan tuod ako napahinungod kang Jehova ug nagpakig-ambit sa pagsangyawng buluhaton sulod sa katuigan, wala ako mabawtismohi hangtod sa Disyembre 1926, duha ka semana human sa pag-abot sa Bethel. Dili kadto talagsaon niadtong panahona.
Nga may 150 ka membro, ang Bethel nagdasok niadtong mga adlawa. Diha kamiy upat ka lalaki sa matag kuwarto. Sa wala madugay nasinati nako ang kadaghanan kanila, sanglit kaming tanan nagkaon, nagtrabaho, ug natulog sa usa ka pundok sa mga tinukod, ug siyempre, kaming tanan nagtambong sa bugtong kongregasyon sa Siyudad sa New York. Ang bag-ong Balayng Bethel nakompleto sa 124 Columbia Heights niadtong 1927, ug tagduha na kami sa usa ka lawak.
Niadtong 1927 usab ang bag-ong pabrika sa 117 Adams Street gibuksan. Mitabang ako sa pagbalhin sa mga kasangkapan gikan sa karaang pabrika sa 55 Concord Street. Dugang pa sa kasangkapan sa radyo, sa pabrika dihay mga elebetor, mga imprintahanan, mga kagamitan sa paglaba, mga kosinilya—kon kadto de-koryente, ako kadtong trabahoon.
Hinuon, ang Bethel labaw pa kay sa usa ka pabrika. Ang nakig-ambit sa paggama sa matag libro, matag tract, matag magasin, mao ang panon sa mapaubsanon, kugihang mga alagad. Ang ilang tumong dili mao ang pagkahimong inila sa kalibotan. Hinunoa, buot lamang nilang taposon ang buluhaton sa Ginoo—ug dihay daghang buluhaton nga pagabuhaton!
Pakig-uban Kang Igsoong Rutherford
Nakabaton akog dakong kaayohan gikan sa pribilehiyo nga motrabaho uban kang Joseph F. Rutherford, ang ikaduhang presidente sa Sosyedad. Siya usa ka dakong tawo, kapin sa 183 sentimetros ang gitas-on, dili tambok, kondili lison ug lawas. Daghan sa batan-ong mga igsoong lalaki sa Bethel daw nahadlok kaniya hangtod nga nasinati nila siya. Siya kanunayng magtuon, ug magsulat.
Si Igsoong Rutherford tistisan. Dihay duha ka edarang mga igsoong babaye sa pamilyang Bethel nga diha na sa Bethel sukad sa panahon ni Igsoong Russell. Sila seryoso kaayo ug nagtuo nga dili husto nga mokatawa ug kusog bisan kon adunay butang nga kataw-anan. Usahay sa talad kan-anan si Igsoong Rutherford moasoy ug sugilanon nga makapakatawa sa tanan, nga nakapapikal niining duha ka igsoong babaye. Hinunoa, siya usab sagad nga manguna sa seryosong mga panaghisgot sa Bibliya panahon sa pagpangaon.
Si Igsoong Rutherford maayong kosinero ug malipayng magluto alang sa mga higala. Usa ka panahon ang mga kosinero sa Bethel nagdugmok sa pila ka bukog sa manok sa dihang naghiwa sa mga manok. Misulod siya sa kosina ug gipakita kanila ang hustong paagi sa paghiwa sa manok. Dili niya buot ang dugmok nga mga bukog sa manok diha sa iyang pagkaon!
Sagad kauban ako ni Igsoong Rutherford sa impormal nga mga kahimtang, sama sa diha sa among estasyonan sa radyo, WBBR, o sa iyang lawak-tun-anan sa Staten Island. Siya maluluton kaayo nga tawo ug nagtuman kon unsay iyang gisangyaw. Wala siya magdahom ug bisan unsa gikan sa uban nga dili niya buhaton mismo. Lahi sa may-katungdanang mga indibiduwal sa daghang ubang relihiyosong organisasyon, si Igsoong Rutherford may kinatas-ang espirituwal ug moral nga kinaiya. Dayag nga siya nagkinabuhi alang sa Gingharian ni Jehova.
Malisod nga mga Panahon sa Panalapi
Pipila ka tuig tapos sa akong pag-abot sa Bethel, ang kalibotan misulod sa Dakong Depresyon. Ang pinansiyal nga mga baligyaanan nahapay, ug mius-os ang prisyo sa mga manggad. Nihit ang mga trabaho, ug limitado ang mga pondong salapi. Ang Bethel naglihok tungod sa giamot nga mga salapi, ug si Jehova kanunayng nagtino nga dihay igo aron sa pag-atiman sa buluhaton. Wala gayod kami mawad-ig pagkaon, bisan tuod dili kadto maoy gusto sa matag usa. Nagdaginot kami kutob sa mahimo, ug ang mga igsoon sa gawas sa Bethel mitabang kanamo sa materyal nga paagi sumala sa ilang maarangan.
Niadtong 1932, si Igsoong Robert Martin, ang matinumanong magtatan-aw sa among pabrika, namatay. Ang bayente-siyete-anyos nga si Nathan Knorr gipuli kaniya. Siya maoy abtik kaayo nga batan-ong lalaki. Wala akoy nahinumdoman nga usa nga naglisod pagdawat kaniya ingong magtatan-aw sa pabrika. Ang ubang matinumanong mga igsoon, lakip kanila mao si John Kurzen, George Kelly, Doug Galbraith, Ralph Leffler, ug Ed Becker—ang tanan kong minahal nga kaubang mga trabahante—kinabubut-ong nagdeboto sa ilang katakos ug kamamugnaon ngadto sa pag-alagad sa Gingharian.—Itandi ang Exodo 35:34, 35.
Pagtrabaho sa Radyo
Hangtod sa kinailadman niini, ang among organisasyon bug-os nga napahinungod sa pagpakaylap sa maayong balita sa bisan unsang paagi nga mabatonan. Ang tibuok kalibotan kinahanglan masayod mahitungod sa Gingharian, apan pipila pa lang kami ka libo. Ang teknolohiya sa radyo bag-o pa lang nagsugod human sa Gubat sa Kalibotan I. Hinunoa, ang masinabtanong mga igsoong lalaki mibati nga kining matanga sa komunikasyon maoy gitagana ni Jehova niadtong panahona. Busa niadtong 1923 nagsugod sila pagtukod sa estasyonan sa radyo nga WBBR sa Isla sa Staten, nga usa sa lima ka distrito sa Siyudad sa New York.
Usahay ako lamang ang opereytor sa among estasyonan. Nagpuyo ako didto sa Isla sa Staten apan naghimo sa tulo-ka-oras nga biyahe sa lansa ug tren paingon sa pabrika sa Brooklyn aron sa paghimo ug elektrikal o mekanikal nga buluhaton. Aron makabarog sa kaugalingon ang among estasyonan sa radyo, nag-instalar kamig daynamo. Sa Isla sa Staten diha usab kamiy kaugalingong mga atabay ug usa ka tanaman nga nagtagana ug pagkaon alang sa diyutayng kawani didto, maingon man sa pamilyang Bethel sa Brooklyn.
Hangtod nga miabot ang dugang tabang sa ulahi, ang mga responsabilidad sa trabaho sa radyo naglimite pag-ayo sa akong pagtambong sa tigom ug sa pagsangyaw sa kanataran. Wala gayoy panahon alang sa sosyal nga mga kalihokan o hinapos-semanang mga biyahe gawas sa among tinuig nga bakasyon. Kas-a usa ka tawo nangutana kanako: “Tungod sa maong higpit kaayong eskedyul, wala ka ba maghunahuna sukad nga mobiya sa Bethel?” Sa pagkamatinud-anon, kinahanglang moingon akong: “Wala.” Usa ka pribilehiyo ug kalipay ang pagpuyo ug pagtrabaho duyog sa daghan kaayong debotadong mga igsoong lalaki ug babaye. Ug kanunayng may trabaho nga kinahanglan humanon, mga bag-ong proyekto nga buhaton.
Kami nagmugna ug nagsibya ug makapatandog nga mga drama sa radyo. Kay walay mabatonang plaka sa special-effects, kinahanglang maghimo kami sa among kaugalingong mga paagi. Naghimo kamig makina nga makapatungha pag-usab sa tingog sa hinay nga huyohoy o nagahuros nga unos. Ang tingog sa mga bagol nga gihapak sa hinapinang mga tabla nahimong mga tinagaktak sa kabayo diha sa binakbakan ug batong mga dalan. Ang matag drama maoy talagsaong proyekto. Ug naminaw ang mga tawo. Niadtong mga adlawa nga diyutay ra ang kalingawan, daghang tawo ang molingkod ug maminaw pag-ayo.
Sa katuigang 1920 ug sayong katuigan sa 1930, ang Sosyedad mihimog usa ka butang nga halandumon sa natad sa pagsibya, nga subli-subling nagkonektar pinaagig mga linya sa radyo ug telepono sa kinadaghanang estasyonan alang sa usa ka programa. Sa ingon ang balita sa Gingharian nadunggan sa milyonmilyon sa tibuok kalibotan.
Ang Ponograpo
Sa tungatunga sa katuigan sa 1930 ug sayong katuigan sa 1940, kami nagdesinyo ug naghimog tigkopyag-tingog nga mga makina, mga ponograpo, ug ubang mga kasangkapan sa paningog. Ginamit ang usa ka linaing turnohan, nagturno kami ug orihinal nga mga plaka gikan sa samag-salamin-ka-hamis nga mga plaka nga hinimo gikan sa talo. Unya among susihon pag-ayo ang matag orihinal nga plaka ilalom sa mikroskopyo aron sa pagtino nga wala kiniy daot. Kon diha may mga depekto, kinahanglang sublion ang pagrekord ug laing pagturno ang himoon. Unya ipadala namo ang talo nga orihinal ngadto sa usa ka kompaniya sa plaka, nga mao ang naggama sa mga plaka sa ponograpo ug sa tigkopyag-tingog.
Usa ka kulbahinam nga hitabo nga akong nahinumdoman pag-ayo mao ang pakigpulong ni Igsoong Rutherford niadtong 1933 nga nag-ulohang “Epekto sa Balaang Tuig Diha sa Kalinaw ug Kauswagan.” Ang papa nagpahayag niadtong tuiga ingong usa ka “balaang tuig,” ug pinaagi sa pagsibya sa radyo ug ponograpo, among giyagyag kana ug gipakita nga walay balaang moresulta niana. Ang nahitabo, mimando si Hitler niadtong tuiga nga gipaluyohan sa Iglesya Katolika, busa ang bisan unsang paglaom alang sa kalinaw nahanaw.
Sa Tinipong Bansa, ang Katolikong Aksiyon nga organisasyon giporma aron sa pagpatuman sa gikinahanglan sa iglesya. Gibutang nila ang ilang kaugalingong mga tawo diha sa editoryal nga mga hunta sa dagkong mga mantalaan, mga magasin, ug mga tigpatik sa libro. Sila miapil-apil sa politika ug mihulga nga moboykot sa bisan unsang estasyonan nga nagsibya sa among mga pakigpulong sa Bibliya. Daghang Saksi ang giatake sa mga grupo sa Katolikong Aksiyon, ilabina sa kasikbit nga New Jersey. Kadto maoy kulbahinam nga mga adlaw!
Malipayong Buluhaton sa Kanataran
Sa tungatunga sa katuigang 1950, ang nagauswag nga gidaghanon sa mga magmamantala sa Gingharian nakaabot sa dugang pang mga tawo diha mismo sa mga pultahan sa ilang mga balay. Kini napamatud-ang mas epektibo kay sa radyo diha sa pagtabang sa mga tawo nga makasabot sa kamatuoran sa Bibliya. Busa niadtong 1957 gidesisyonan nga ibaligya ang WBBR ug itumong ang among mga kahinguhaan ngadto sa pagpalapad sa misyonaryong buluhaton sa ubang kayutaan.
Pagka 1955, giasayn ako sa Kongregasyon sa Bedford sa Brooklyn, diin ako regular nga nagdumala sa Pagtuon sa Bantayanang Torre. Ang Sosyedad nagpadala usab kanako ingong nagapanawng mamumulong ngadto sa amihanang New York, Pennsylvania, Connecticut, ug New Jersey. Sa dihang naasayn sa Kongregasyon sa Bedford, ako miingon sa akong kaugalingon, ‘Ako kapin na sa 50 anyos. Mas maayo pa nga makig-ambit ako kutob sa akong mahimo diha sa pagsangyaw sa kanataran karon. Sa ulahi basin masakit akog lumbago ug dili na makapahimulos niana pag-ayo.’
Human sa pagtrabaho niadtong tanang tuig diha sa teknikal nga bahin sa pagsibya sa binhi sa Gingharian pinaagig radyo, akong nakaplagan nga usa ka tinuod nga kahimuot ang pagtanom ug pagbisibis sa mga binhi sa kamatuoran sa Bibliya nga direkta diha sa mga tawo. Nalingaw gayod ako nga magtrabaho uban sa kongregasyon. Lainlaing mga igsoon ang misagop kanako, nga mipabati kanakong komportableng makig-uban kanila. Ang pipila niadtong gagmayng mga bata, nga karon hamtong na, nagtawag gihapon kanakog lolo. Sulod sa 30 ka tuig may malipayon kaming mga panahon sa panag-uban diha sa pagsangyaw sa kanataran, hangtod nga ang mga problema sa akong mga bitiis ug mga tiil naghimo kanako nga dili makasaka sa hagdan o makabiyahe sa tren sa ilawom sa yuta. Pagka 1985, mibalhin ako sa Kongregasyon sa Brooklyn Heights, nga nagtigom didto gayod sa Bethel.
Samtang ang organisasyon ni Jehova nakapahimulos ug dakong pag-uswag, sa personal nakapribilehiyo ako sa pagkakita sa iyang panalangin diha sa langyawng mga kanataran sa dihang ako mitambong sa dagkong mga kombensiyon sa mga Saksi ni Jehova sa lagyong kayutaan. Nakahimo gayod diay ako sa pagbiyahe sa kalibotan! Sugod sa katuigan sa 1950, ang pipila kanamong mga Bethelite nakakita sa mga talan-awon sa London, Paris, Roma, Nuremberg, ug Copenhagen. Mibiyahe kami sakay sa mga pasaheroang ayroplanong tigbombardeyo kanhi, barko, ug tren. Siyempre, nindot ang mga talan-awon apan ang labing kulbahinam nga talan-awon sa tanan mao ang panon sa among mainiton, maabiabihong mga igsoon. Ang ulahing mga dekada nagpahinabog mga biyahe ngadto sa Oriente, sa Kasadpang Uropa na usab, ug labing bag-o sa Sidlakang Uropa. Ang kahibulongang mga kombensiyon sa Polandia, Alemanya, ug Czechoslovakia makapatandog. Pagkakusog mouswag sa among teokratikanhong pamilya sukad nga ako unang nahimong bahin niana!
Balaang Giya
Ang daw gagmayng mga lakang nga gihimo sa organisasyon sa ulahi nahimong dagkong mga lakang. Sa dihang nagtrabaho kami sa bag-ong mga proyekto, nga mga galamiton lamang aron sa pagtabang kanamo nga mohimo sa pagsangyawng buluhaton, kinsay makatagna sa dakong pag-uswag? Miabante kami diha sa pagtuo, nga misanong sa pagtultol ni Jehova.
Kining progresibong organisasyon wala mahadlok sa paggamit sa kinaulahiang teknolohiya nga mabatonan o sa pagmugna ug kaugalingon niini aron sa pagtabang sa pag-atiman sa tibuok-kalibotang kanataran. Lakip sa mga paagi nga gigamit aron mapauswag ang pagwali sa Gingharian mao ang balay-sa-balay nga pagsangyaw, ang paggamit sa mga network sa radyo, pagsangyaw pinaagig ponograpo, ug usa ka programa sa pagdumalag panagtuon sa Bibliya diha sa mga balay sa mga tawo. Ang pagtukod sa among kaugalingong mga imprintahan sa unang mga adlaw ug karon paggamit sa kompiyuterisadong phototypesetting ug offset nga pag-imprinta diha sa daghang pinulongan dili gamayng kalamposan. Ang Watchtower Bible School of Gilead, ang Tunghaan sa Teokratikanhong Ministeryo, ug ang regular nga mga kombensiyon tanan may bahin sa paghimaya kang Jehova nga Diyos ug sa iyang Anak. Akong pribilehiyo nga makapaniid sa personal ug makapakig-ambit niining tanang hitabo.
Tin-aw kanako nga ang gitultolan-sa-espiritu nga organisasyon ni Jehova sa yuta nakadawat ug giya sa kon unsay pagabuhaton ug sa unsang paagi. Ang iyang tibuok unibersohanong organisasyon, makita ug dili-makita, duyog nga nagabuhat.
Wala gayod ako magmahay nga gibiyaan nako ang akong mga plano ingong batan-on nga molawig sa kadagatan. Aw, ang labing kulbahinam, makahuloganong mga kaugmaran sa kalibotan nahitabo dinhi gayod sa sulod sa organisasyon ni Jehova! Busa ang akong panaw sa dalan ngadto sa “pagkatinawag sa itaas” natiman-an sa daghan kaayong kalipay ug mga panalangin ug walay mga pagbasol.—Filipos 3:13, 14.
Kanunay nakong sultihan ang mga batan-on nga hinumdoman ang 1914—nga mao, ang Salmo 19:14, nga nag-ingon: “Itugot nga ang mga pulong sa akong baba ug ang pagpalandong sa akong kasingkasing nga mahimong kahimut-anan sa imong atubangan, Oh Jehova nga akong Bato ug akong Manunubos.” Buot natong pahimut-an si Jehova sa tanang butang ug mag-ampo sama sa giampo ni David: “Ipakita mo kanako ang imong mga dalan, Oh Jehova; itudlo mo kanako ang imong mga alagianan. Palakta ako sa imong kamatuoran ug tudloi ako, kay ikaw mao ang akong Diyos sa kaluwasan. Diha kanimo nagalaom ako adlawng tanan.” (Salmo 25:4, 5) Makahuloganon kaayo kanang mga pulonga. Ang paghinumdom kanila makatabang kanato nga magpabilin diha sa hustong dalan, nga magasubay sa hustong direksiyon, nga duyog sa nagauswag nga organisasyon ni Jehova.
[Hulagway sa panid 23]
Si Igsoong Rutherford malipayng magluto alang sa mga higala
[Hulagway sa panid 25]
Si Robert Hatzfeld diha sa mga kontrol sa estasyonan sa radyo nga WBBR
[Hulagway sa panid 26]
Usa ka bag-ong hulagway ni Igsoong Hatzfeld