Nganong Padayong Nagaduaw ang mga Saksi?

‘ANIA na usab sila! Apan dinhi na sila sa miaging pila ka semana lamang!’ Kana ba ang mosantop sa imong hunahuna kon usa sa mga Saksi ni Jehova ang moduaw kanimo? Minilyon karong adlawa ang regular nga ginaduaw sa mga Saksi ni Jehova. Ikaw tingali mangutana, Nganong sila magpadayon nga unta nahibalo man sila nga ang kadaghanang tawo adunay ilang kaugalingong relihiyon o dili interesado? Kanang pangutanaha nagkinahanglag tubag.

Kaakohan Atubangan sa Diyos

Ang mga Saksi ni Jehova nakakat-on gikan sa Kasulatan nga sukad sa 1914, ang tuig nga misugod ang Gubat sa Kalibotan I, ang mga hitabo sa kalibotan nagatuman sa mga tagna sa Bibliya labot sa kataposan sa presenteng sistema sa mga butang ug sa umaabot nga pagmando sa Gingharian sa Diyos ibabaw niining yutaa. Halos usa ka siglo sa kapintasan, pag-ula ug dugo, ug pagdumot daw labaw pang nagapalayo sa katawhan sukad masukad gikan sa politikanhong solusyon sa ilang mga problema. Ang mga gubat ug terorismo nga nagasakit gihapon sa tawhanong banay maoy pamatuod nga ang pagmando sa tawo napakyas sa pag-usab sa mga kasingkasing, hunahuna, ug mga tinamdan sa mga tawo. Ang dulot nga kayugot tungod sa mga panghitabo nga nahitabo balik sa kasaysayan nagadaot gihapon sa mga relasyon tali sa etniko, rasanhon, ug relihiyosong mga grupo. Matuod kana diha sa mga dapit nga nabahin pag-ayo sama sa Afghanistan, Amihanang Irlandia, Habagatang Aprika, India, Tungang Sidlakan, ug ang kanhi Yugoslavia. Nan, unsa lamang ang dumalayong solusyon?

Unsay Nagadasig sa mga Saksi?

Giila sa mga Saksi ni Jehova nga ang sulbad sa Diyos​—ang iyang gisaad nga Gingharian nga pagmando pinaagi ni Kristo Jesus​—mao lamang ang moobra nga sulbad. Si Jesus naglakip gani ug usa ka hangyo alang niana nga Gingharian nga pagmando diha sa iyang iladong sulondan nga pag-ampo: “Busa, kinahanglang mag-ampo kamo niining paagiha: ‘Amahan namo sa mga langit, balaana ang imong ngalan. Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.’” Ang mga Saksi nagtuo nga kini nga pag-ampo sa pagkatinuod nagahangyo sa pagpangilabot sa Diyos sa mga kalihokan sa katawhan.​—Mateo 6:9-10.

Busa nganong gibati sa mga Saksi ni Jehova ang panginahanglan sa pagduaw kanunay sa balay ug balay aron sa paghatod sa maong mensahe? Tungod sa duha ka sugo nga gipasiugda ni Jesus: “‘Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini ang kinadak-an ug unang sugo. Ang ikaduha, nga susama niini, mao kini, ‘Higugmaon mo gayod ang imong silingan ingon sa imong kaugalingon.’”​—Mateo 22:37-39.

Buot sa mga Saksi ang panalangin sa Diyos alang sa ilang kaugalingon, ug tungod kay gihigugma nila ang ilang mga silingan, buot nila nga ang samang panalangin ilang mabatonan. Busa, sa pagsunod sa panig-ingnan ni Jesus, sila natukmod sa dili-mahakogong gugma sa pagduaw sa ilang mga silingan. Buot nila nga sa labing menos matanyagan silag higayon sa pagkahibalo kon unsa ang gisaad “sa malipayong Diyos” alang sa masinugtanong katawhan diha sa usa ka nahinloang yuta.​—1 Timoteo 1:11; 2 Pedro 3:13.

Ang Kristohanong misyonaryo nga si Pablo nagtuo sa mga saad sa Diyos ug busa nakasulat: “Si Pablo, usa ka ulipon sa Diyos ug usa ka apostol ni Jesu-Kristo sumala sa pagtuo sa mga pinili sa Diyos ug sa tukmang kahibalo sa kamatuoran nga uyon sa diyosnong pagkamahinalaron pinasukad sa paglaom sa kinabuhing walay-kataposan nga gisaad sa Diyos, si kinsa dili makabakak, sa wala pa ang kapanahonan nga dugay nang naglungtad.” Oo, ang Diyos, “si kinsa dili makabakak,” “nagsaad” ug kinabuhing walay kataposan alang niadtong mapainubsanong nagapangita sa pagkahibalo ug sa pag-alagad kaniya.​—Tito 1:1, 2; Sofonias 2:3.

Suweldado ba ang mga Saksi?

May mga panahong ang uban nagtuo nga ang mga Saksi suweldado sa ilang ministeryo. Sayop kaayo kini nga hunahuna! Maugdang nilang gitagad ang mga pulong ni Pablo ngadto sa kongregasyon sa Corinto: “Kami dili mga nagasuroyng-tigbaligya sa pulong sa Diyos ingon sa daghang tawo, apan gumikan sa katim-os, oo, ingon nga mga pinadala gikan sa Diyos, ilalom sa panan-aw sa Diyos, kauban ni Kristo, kami nagapamulong.”​—2 Corinto 2:17.

Ang pipila ka relihiyosong mga lider tinuod nga nagawali tungod sa salapi, suhol man kini alang sa ilang relihiyosong mga serbisyo o pagpalambo sa komersiyal nga mga palakaw diha sa ilang ministeryo sa TV. Ang kadaghanan sa mga relihiyon may suweldadong mga klero.

Sa kasukwahi, ang mga Saksi walay suweldadong mga klero, ug kasagaran ang ilang mga literatura sa Bibliya gitanyag nga may boluntaryong donasyon ngadto sa sinserong mga tigpangita sa kamatuoran. Kini gamiton agig tapal sa mga galastohan niining tibuok yutang buluhatong pagsangyaw. Nahiuyon sa tambag ni Jesus: “Nakadawat kamo nga walay bayad, panghatag nga walay bayad,” ang mga Saksi mainandamong nagagamit sa ilang mga kahinguhaan, lakip na ang panahon ug kusog, sa paggugol ug milyon-milyong oras matag tuig diha sa pag-alagad sa Diyos. Busa, sila nagatudlo sa interesadong mga tawo gikan sa balay ug balay ug pinaagi sa mga pagtuon sa Bibliya sa balay.​—Mateo 10:8; 28:19, 20; Buhat 20:19, 20.

Ang mga kamatuoran nagpakita nga ang mga Saksi ni Jehova walay motibo nga makasapi ang tagsatagsa, ang ilang lokal nga mga kongregasyon, o ang Watch Tower Society. Walay usa ang nagadawat ug bisan unsang bayad tungod sa pagduaw sa balay ug balay. Nan sa unsang paagi gisuportahan ang buluhaton? Pinaagi sa boluntaryong mga amot gikan sa mapabilhong mga tawo sa tibuok yuta. Walay mga koleksiyon sukad ang gihimo.

Ang Epekto sa Ilang Pagsangyaw

Ang balay-ug-balay nga ministeryo ug ang dili-pormal nga pagsangyaw sa mga Saksi nakadani ba sa pagtagad sa publiko? Ang ebidensiya diha sa palumagian sa balita nagtubag ug malanog nga oo sa pangutana. Ang mga Saksi ni Jehova gihisgotan diha sa mga programa sa TV ug sa mga sine sa dihang adunay manuktok sa pultahan. Ang mga karton naghisgot sa mga Saksi. Ang ilang masibotong kalihokan ilado kaayo nga ginakutlo sa mga kartonista sa tibuok kalibotan ang mga Saksi ni Jehova. Daw ipaagi kini nila ug kinomedya, apan kini sagad ginapasukad diha sa positibo hinungdanong kamatuoran​—nga ang mga Saksi ilado sa ilang mapinadayonong pagsangyaw sa balay-ug-balay.​—Buhat 20:20.

Usa ka karton sa dili pa dugay nagpakita sa usa ka tawo nga mikatkat sa usa ka bukid aron magpakisayod sa usa ka “guru.” Siya miingon: “Sultihi ako bahin sa kahibulongang mga butang sa umaabot!” Unsay tubag sa “guru?” “Tan-awon ta . . . Aduna unyay kagutmanan, kamatay, ug mga linog. Ang adlaw mongitngit, ug ang bulan mahimong dugo.” Ang nagpakisayod nangutana: “Unsa ang maayong balita?” Niini ang “guru” mitubag: “Pagapahiran sa Diyos ang tanang luha gikan sa ilang mga mata . . . ug ang kamatayon mawala na ni pagminatay ni kasakit!” Nangutana ang bisita: “Sa unsang paagi nasayod ka sa maong mga butang?” Ang tubag? “Walay makalingkawas sa mga Saksi ni Jehova!” Ug hayan kana tinuod usab sa kartonista mismo!

Ang bili niini nga karton ug sa uban pa nga sama niini mao nga kini nagabutyag dili lamang sa mapinadayonong mga pagduaw sa mga Saksi kondili usab ang pagkapareho sa ilang mensahe. Diha sa pipila lang ka pulong, ang kartonista mihatag ug usa ka hinungdanong bahin sa ilang balay-ug-balay nga pagpamatuod ug pagkutlo sa kasulatan.​—Itandi ang Mateo 24:7, 29; Pinadayag 21:3, 4.

Ang kamatuoran nga daghang tawo ang nagasalikway sa ilang mensahe wala makapaluya sa mga Saksi o makawagtang sa ilang kasibot. Si apostol Pedro nagpasidaan: “Sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa kaugalingon nilang mga tinguha ug manag-ingon: ‘Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.’” Bisan pa niini, gipalihok sa gugma, ang mga Saksi nagapadayon sa pagduaw sa ilang mga silingan ug magpadayon sa paghimo niana hangtod nga taposon sa Diyos ang dunot nga sistema karong adlawa.​—2 Pedro 3:3, 4.

Si Jesus miingon nga sa kataposang mga adlaw, ang maayong balita kinahanglang igawali una. Alang sa dugang pagsusi kon ngano ug sa unsang paagi, tan-awa ang duha ka artikulo nga mosunod.​—Marcos 13:10.

[Hulagway sa panid 9]

Ang mga Saksi ni Jehova walay suweldadong klero nga matang​—ang tanan maoy boluntaryong mga ministro