Himoa Ingong Sumbanan ang mga Manalagna sa Diyos
“Mga igsoon, himoa ninyo ingong sumbanan sa pag-antos sa daotan ug sa pagkamapailobon ang mga propeta, nga sa ngalan ni Jehova namulong.”—SANTIAGO 5:10.
1. Unsay makatabang sa mga alagad ni Jehova nga mahimong malipayon bisan pag sila ginalutos?
ANG mga alagad ni Jehova nagapabanaag ug kalipay bisan pa sa kagul-anan nga kaylap sa tibuok kalibotan niining kataposang mga adlaw. Tinuod kini tungod kay sila nahibalo nga sila nakapahimuot sa Diyos. Ang mga Saksi ni Jehova nagaantos usab sa paglutos ug pagsupak sa ilang publikong ministeryo tungod kay sila nahibalo nga sila nagaantos alang sa pagkamatarong. Gisultihan ni Jesu-Kristo ang iyang mga sumusunod: “Malipayon kamo sa dihang ang mga tawo magpakaulaw kaninyo ug maglutos kaninyo ug sa binakak magsulti sa tanang matang sa tuman-kadaotang butang batok kaninyo tungod ug alang kanako. Pagmaya ug lukso sa kangaya, sanglit dako ang inyong ganti sa mga langit; kay nianang paagiha ilang gilutos ang mga propetang nauna kaninyo.” (Mateo 5:10-12) Sa pagkamatuod, matag higayong magaatubang ang mga alagad sa Diyos ug mga pagsulay sa pagtuo, ilang giisip kini nga usa ka kalipay.—Santiago 1:2, 3.
2. Sumala sa Santiago 5:10, unsay makatabang kanato sa pagpailob?
2 Ang disipulong si Santiago misulat: “Mga igsoon, himoa ninyo ingong sumbanan sa pag-antos sa daotan ug sa pagkamapailobon ang mga propeta, nga sa ngalan ni Jehova namulong.” (Santiago 5:10) Gibatbat ni W. F. Arndt ug F. W. Gingrich ang Gregong pulong nga gihubad dinhi nga “sumbanan” (hy·poʹdeig·ma) ingong “panig-ingnan, modelo, sumbanan, sa maayong diwa ingong usa ka butang nga madasig ang tawo sa pagsundog niana.” Ingon sa gipakita sa Juan 13:15, “kini maoy labaw pa sa usa ka panig-ingnan. Kini tino nga usa ka hularan.” (Theological Dictionary of the New Testament) Nan, ang modernong adlaw nga mga alagad ni Jehova mahimong makasundog sa iyang matinumanong mga manalagna ingong sumbanan kon bahin sa “pag-antos sa daotan” ug “pagkamapailobon.” Unsa pay atong masabtan sa dihang atong tun-an ang ilang mga kinabuhi? Ug sa unsang paagi kini makatabang kanato diha sa atong buluhatong pagsangyaw?
Ilang Giantos ang Kadaotan
3, 4. Unsay reaksiyon ni manalagnang Amos sa pagbatok ni Amasias?
3 Ang mga manalagna ni Jehova sagad nag-antos sa daotan o pagdagmal. Sa ikanuybeng siglo W.K.P., pananglitan, ang nagsimbag-baka nga saserdote nga si Amasias madinaotong misupak sa manalagnang si Amos. Si Amasias sa binakak miingon nga nakigsabot kuno si Amos batok kang Jeroboam II pinaagi sa pagtagna nga ang hari mamatay pinaagi sa espada ug nga ang Israel pagabihagon. Sa matamayon, gisultihan ni Amasias si Amos: “Oh manalagna, kalagiw ngadto sa yuta sa Juda, ug didto kumaon ka ug tinapay, ug didto ka managna. Apan ayaw na panagna pag-usab sa Bethel, kay kini mao ang balaang puloy-anan sa hari ug ang balay sa usa ka gingharian.” Wala mahadlok niini nga atake sa pulong, si Amos mitubag: “Ako dili manalagna, ni anak sa usa ka manalagna; ako hinuon magbalantay sa hayop ug mag-aatiman sa kahoyng sikomoro. Ug gikuha ako ni Jehova gikan sa pagbantay sa karnero, ug si Jehova miingon kanako, ‘Lakaw, panagna sa akong katawhan nga Israel.’”—Amos 7:10-15.
4 Gikunsaran sa espiritu ni Jehova si Amos aron maisogong managna. Handurawa ang reaksiyon ni Amasias sa dihang miingon si Amos: “Pamati sa pulong ni Jehova, ‘Ikaw ba nagaingon: “Ayaw pagpanagna batok sa Israel, ug hunong na sa imong pagpamulong batok sa balay ni Isaac”? Busa mao kini ang giingon ni Jehova: “Bahin sa imong asawa, siya mahimong daotang babaye diha sa siyudad. Ug bahin sa imong mga anak nga lalaki ug sa imong mga anak nga babaye, sila mangapukan pinaagi sa espada. Ug bahin sa imong yuta, kini pagasukdon ug bahinon. Ug bahin kanimo mismo, ikaw mamatay sa yuta nga mahugaw; ug bahin sa Israel, kini mahimong binihag halayo sa kaugalingong yuta niini.”’” Kanang tagnaa natuman. (Amos 7:16, 17) Pagkadako sa kakurat tingali sa apostatang si Amasias!
5. Sa unsang paagi magkaamgid ang kahimtang sa modernong-adlawng mga alagad ni Jehova ug nianang kang manalagnang Amos?
5 Kini kaamgid sa kahimtang sa katawhan ni Jehova karong adlawa. Kita nagaantos sa kadaotan sama niadtong nagamantala sa mga mensahe sa Diyos, ug daghang tawo ang nagayubit sa atong buluhatong pagsangyaw. Matuod, ang atong awtorisasyon sa pagsangyaw dili gikan sa usa ka teolohikal nga seminaryo. Hinunoa, ang espiritu ni Jehova maoy nag-aghat kanato sa pagwali sa maayong balita sa Gingharian. Wala nato usba o sambogi ang mensahe sa Diyos. Hinunoa, sama kang Amos, kita masinundanong nagamantala niana bisan unsa pay reaksiyon sa atong mga tigpatalinghog.—2 Corinto 2:15-17.
Sila Nagpailob
6, 7. (a) Unsa ang mga kinaiyahan sa pagpanagna ni Isaias? (b) Sa unsang paagi ang mga alagad ni Jehova karong-adlawa nagalihok sama kang Isaias?
6 Ang mga manalagna sa Diyos nagpailob. Pananglitan, nagpakitag pailob si Isaias, kinsa nag-alagad ingong manalagna ni Jehova sa ikawalong siglo W.K.P. Ang Diyos miingon kaniya: “Lakaw, ug sultihi kining katawhan, ‘Kamo masubsob nga makadungog, Oh katawhan, apan dili makasabot; ug kamo masubsob nga makakita, apan dili makahibalog bisan unsa.’ Himoa nga makubalan ang kasingkasing niining katawhan, ug himoang dili makadungog ang ilang mga dalunggan, ug papitli ang ilang mga mata, aron ang ilang mga mata dili makakita ug ang ilang mga dalunggan dili makadungog, ug aron ang ilang kaugalingong kasingkasing dili makasabot ug aron sila mangakabig ug mangaayo.” (Isaias 6:9, 10) Ingon gayod niana ang reaksiyon sa mga tawo. Apan nagpahunong ba kini kang Isaias? Wala. Hinunoa, siya mapailobon ug madasigong nagmantala sa mga mensahe sa pasidaan ni Jehova. Ang Hebreohanong pagkabalay sa mga pulong sa Diyos nga mao pay pagkutlo nagpaluyo sa ideya nga “dugay nga pagpadayon” sa mga proklamasyon sa manalagna, nga “masubsob” nga nadunggan sa katawhan.—Gesenius’ Hebrew Grammar.
7 Karon daghan ang nagasanong sa maayong balita sama sa pagsanong sa mga tawo sa mga pulong ni Jehova nga gihatod ni Isaias. Hinunoa, sama niadtong matinumanong manalagna, atong ginasubli ang mensahe sa Gingharian sa “masubsob.” Atong ginahimo kini nga may kasibot ug mapailobong paglahutay tungod kay kini mao ang kabubut-on ni Jehova.
“Ilang Gibuhat ang Gisugo Kanila”
8, 9. Sa unsang mga paagi ang manalagna ni Jehova nga si Moises maoy usa ka maayong panig-ingnan?
8 Ang manalagnang si Moises sulondan sa pailob ug pagkamasinugtanon. Mipili siya nga mobarog uban sa giulipon nga mga Israelinhon, apan siya kinahanglang magpaabot nga mapailobon sa panahon sa ilang kaluwasan. Sulod sa 40 ka tuig siya mipuyo sa Midian hangtod nga gigamit siya sa Diyos sa pagpanguna sa katawhan sa Israel gawas sa pagkaulipon. Sa dihang si Moises ug ang iyang igsoong si Aaron miatubang sa magmamando sa Ehipto, masinundanon nilang gisulti ug gihimo ang gisugo sa Diyos. Sa pagkamatuod, “ilang gibuhat ang gisugo kanila.”—Exodo 7:1-6; Hebreohanon 11:24-29.
9 Mapailobong giantos ni Moises ang 40 ka malisod nga mga tuig sa Israel diha sa kamingawan. Masinugtanong gituman usab niya ang sugo sa Diyos sa pagtukod sa tabernakulo sa Israel ug sa paghimo sa ubang mga butang nga gamiton diha sa pagsimba ni Jehova. Gisunod gayod pag-ayo sa manalagna ang mga instruksiyon sa Diyos nga atong mabasa: “Gibuhat ni Moises ang tanan nga gisugo ni Jehova kaniya. Iyang gibuhat ang gisugo kaniya.” (Exodo 40:16) Sa pagtuman sa atong ministeryo uban sa organisasyon ni Jehova, atong hinumdoman ang pagkamasinugtanon ni Moises ug ipadapat ang tambag ni apostol Pablo nga ‘magmasinugtanon ngadto sa nagapanguna taliwala kanato.’—Hebreohanon 13:17.
Sila Adunay Positibong Tinamdan
10, 11. (a) Unsay nagpaila nga ang manalagnang si Oseas adunay positibong tinamdan? (b) Sa unsang paagi mahuptan nato ang usa ka positibong tinamdan sa dihang moduol kita sa mga tawo diha sa atong mga teritoryo?
10 Gikinahanglan sa mga manalagna ang positibong tinamdan samtang gihatod nila ang mga mensahe sa paghukom maingon man ang mga tagna nga nagpabanaag sa mahigugmaong kabalaka sa Diyos alang sa mga matinumanon nga nagkatibulaag libot sa Israel. Matuod kini kang Oseas, nga usa ka manalagna nga dili momenos sa 59 ka tuig. Sa positibong paagi, siya nagpadayon sa paghatod sa mga mensahe ni Jehova ug gitapos ang iyang matagnaong basahon niining mga pulonga: “Kinsa ang maalamon, aron siya makasabot niining mga butanga? Kinsa ang masinaboton, aron siya makaila kanila? Kay ang mga dalan ni Jehova matarong, ug ang matarong magalakaw diha niini; apan ang mga malapason mahipangdol diha niini.” (Oseas 14:9) Samtang gitugotan pa kita ni Jehova sa paghatag ug pamatuod, magbaton kita ug usa ka positibong tinamdan ug magpadayon sa pagpangita niadtong kinsa maalamong modawat sa dili-takos nga kalulot sa Diyos.
11 Sa ‘pagpapangita sa mga takos,’ kinahanglang molahutay kita ug lantawon ang mga butang sa positibong paagi. (Mateo 10:11) Pananglitan, kon makalimot kita kon diin nato gibutang ang atong mga yawi, mahimong subayon nato ug balik ang atong giagian ug mangita diha sa nagkalainlaing mga dapit nga atong giadtoan. Mahimong atong makit-an kini human lamang sa balikbalik nga paghimo niini. Kita sa susama magpadayon sa pagpangita sa mga karnerohon. Pagkadako sa atong kalipay sa dihang sila mosanong sa maayong balita diha sa kanunay nang ginasangyawan nga teritoryo! Ug pagkadako sa atong kalipay nga ginapanalanginan sa Diyos ang atong buluhaton diha sa kayutaan diin limitado ang atong pagministeryo sa publiko tungod sa mga pagdili sa miagi!—Galacia 6:10.
Mga Tuboran sa Pagdasig
12. Unsang tagna ni Joel ang nagakatuman sa ika-20ng siglo, ug sa unsang paagi?
12 Ang mga pulong sa mga manalagna ni Jehova mahimong dakong pagpadasig kanato diha sa atong ministeryo. Pananglitan, palandonga ang tagna ni Joel. Kini nasudlan sa mga mensahe sa paghukom nga gitumong ngadto sa apostatang mga Israelinhon ug sa uban sa ikanuybeng siglo W.K.P. Bisan pa, si Joel usab gidasig sa pagtagna: “Unya mahitabo sa ulahi nga igabubo ko [Jehova] ang akong espiritu ibabaw sa tanang matang sa unod, ug ang imong mga anak nga lalaki ug ang imong mga anak nga babaye magapanagna. Ang inyong mga lalaking tigulang managdamgo sa mga damgo. Ang inyong mga batan-ong lalaki makakita sa mga panan-awon. Ug ingon man usab ibabaw sa mga sulugoon nga lalaki ug ibabaw sa mga sulugoong babaye niadtong mga adlawa igabubo ko ang akong espiritu.” (Joel 2:28, 29) Natuman kini diha sa mga sumusunod ni Jesus gikan sa Pentekostes 33 K.P. padayon. Ug pagkadakong katumanan niini nga tagna ang atong nakita niining ika-20ng siglo! Karong adlawa kita adunay minilyon nga ‘nagapanagna,’ o nagamantala sa mensahe ni Jehova—taliwala kanila kapin sa 600,000 ang anaa sa bug-os-panahong payunir nga pag-alagad.
13, 14. Unsay makatabang sa batan-ong mga Kristohanon sa pagkaplag ug kalipay diha sa pag-alagad sa kanataran?
13 Daghang magwawali sa Gingharian maoy mga batan-on. Dili sayon kanila ang pagpakigsulti sa mga edaran na bahin sa Bibliya. Usahay ang batan-ong mga alagad ni Jehova sultihan: ‘Nag-usik-usik ka lang sa imong panahon sa pagsangyaw,’ ug ‘angay nga magtrabaho ka ug laing trabaho.’ Sa mataktikanhon ang batan-ong mga Saksi ni Jehova mahimong motubag nga nasubo sila kon mao kanay ilang gibati. Usa ka batan-ong magsasangyaw sa maayong balita nakakita nga makatabang ang pagdugang: “Gibati ko nga nakabenepisyo gayod ako gikan sa pagpakigsulti sa mga tawong edaran sama kanimo, ug nalipay ako niana.” Siyempre, ang pagsangyaw sa maayong balita dili gayod pag-usik-usik ug panahon. Ang mga kinabuhi nameligro. Pinaagi kang Joel, ang Diyos dugang miingon: “Unya mahitabo nga ang tanan nga magatawag sa ngalan ni Jehova pagaluwason.”—Joel 2:32.
14 Ang kabataan nga nagauban sa ilang mga ginikanan diha sa buluhatong pagsangyaw sa Gingharian modawat sa tabang sa ginikanan sa pagbutang ug personal nga mga tumong. Lakang-por-lakang kining mga batan-ona mouswag gikan sa pagbasag usa ka teksto ngadto sa pagpatin-aw sa ilang pinasukad sa Bibliya nga paglaom ug sa pagtanyag ug tukmang basahon sa mga tawong interesado. Samtang makita nila ang ilang kaugalingong pag-uswag ug panalangin ni Jehova, ang batan-ong mga magmamantala sa Gingharian makakaplag ug dakong kalipay sa pagsangyaw sa maayong balita.—Salmo 110:3; 148:12, 13.
Kadasig ug Mahulatong Tinamdan
15. Sa unsang paagi ang panig-ingnan ni Ezekiel makatabang kanato sa pagpadilaab sa atong kadasig sa buluhatong pagsangyaw sa Gingharian?
15 Ang mga manalagna sa Diyos sulondan usab sa pagpakitag kadasig ug mahulatong tinamdan—mga kinaiya nga kinahanglan nato diha sa atong ministeryo karong adlawa. Sa dihang una natong nakat-onan ang kamatuoran gikan sa Pulong sa Diyos, malagmit kita nagdilaab sa kadasig nga nagpalihok kanato sa pagsulting maisogon. Apan daghan nang tuig ang milabay sukad niadto, ug tingali balikbalik na natong nakobrehan ang atong teritoryo sa pagsangyaw. Nagkadiyutay na tingali karon ang mga tawo nga nagadawat sa mensahe sa Gingharian. Kini ba nakapalong sa atong kadasig? Kon mao, palandonga ang manalagnang si Ezekiel, kansang ngalan nagkahulogang “Ang Diyos Nagapalig-on.” Bisan tuod nag-atubang si Ezekiel ug mga tawo nga gahig-kasingkasing sa karaang Israel, gilig-on siya sa Diyos ug sa mahulagwayon gihimo ang iyang agtang nga mas gahi pa kay sa santik. Busa, si Ezekiel nakaarang sa pagtuman sa iyang ministeryo sa daghan, daghan kaayong katuigan mamati man o dili ang mga tawo. Ang iyang panig-ingnan nagpakita nga kita makahimo usab niana, ug kini makatabang kanato sa pagpadilaab pag-usab sa atong kadasig sa buluhatong pagsangyaw.—Ezekiel 3:8, 9; 2 Timoteo 4:5.
16. Unsang tinamdan ni Miqueas ang angay natong ugmaron?
16 Talagsaon sa iyang pailob mao si Miqueas, kinsa nanagna sa ikawalong siglo W.K.P. “Alang kanako,” siya misulat, “ako kanunay nga magatan-aw kang Jehova. Ako magpakita ug mahulatong tinamdan sa Diyos sa akong kaluwasan. Ang akong Diyos magapamati kanako.” (Miqueas 7:7) Ang pagsalig ni Miqueas gipasukad sa iyang malig-ong pagtuo. Sama kang manalagnang Isaias, si Miqueas nahibalo nga kon unsay gimbut-an ni Jehova Iya gayod nga tumanon. Kita nahibalo usab niini. (Isaias 55:11) Busa ugmaron nato ang mahulatong tinamdan diha sa katumanan sa mga saad sa Diyos. Ug iwali ta ang maayong balita nga may kadasig, bisan diha sa mga lugar diin ang mga tawo nagapakitag diyutayng interes sa mensahe sa Gingharian.—Tito 2:14; Santiago 5:7-10.
Pagpakitag Pailob Karon
17, 18. Unsang karaan ug modernong mga panig-ingnan ang makatabang kanato sa pagpailob?
17 Ang ubang mga manalagna ni Jehova mapailobong nagpadayon sa ilang mga buluhaton sa daghang katuigan apan wala makakita sa katumanan sa ilang mga gipanagna. Bisan pa, ang ilang mapailobong paglahutay, kasagaran samtang nag-antos sa pagdaogdaog, motabang kanato sa pagkaamgo nga kita makatuman sa atong ministeryo. Kita makabaton usab ug kaayohan gikan sa panig-ingnan sa matinumanong mga dinihogan sa unang mga dekada sa ika-20ng siglo. Bisan tuod ang ilang langitnong mga paglaom wala matuman dihadiha sumala sa ilang gidahom, wala sila magpadala sa kahigawad sa daw kalangan nga magpaluya sa ilang kadasig sa pagtuman sa kabubut-on sa Diyos sumala sa iyang gibutyag ngadto kanila.
18 Sa daghang katuigan, daghan niining maong mga Kristohanon regular nga nagaapod-apod sa Ang Bantayanang Torre ug ang kauban niini nga basahong, Pagmata!, (gitawag kaniadto ug The Golden Age ug sa ulahi Consolation). Madasigon nilang gipaabot kining bililhong mga basahon ngadto sa mga tawo diha sa kadalanan ug diha sa ilang mga balay nga gitawag nato karon nga mga rota sa magasin. Usa ka edarang sister nga nakatapos sa iyang yutan-ong ministeryo gipangita dayon sa mga lumalabay kinsa naanad sa pagkakita kaniya nga nagsangyaw diha sa dalan. Pagkadako nga pamatuod ang iyang nahatag panahon sa iyang daghang katuigan sa matinumanong pag-alagad, sumala sa gipakita sa mapabilhong mga pulong sa mga tawo nga nakapaniid sa iyang ministeryo sa publiko! Ingong usa ka magwawali sa Gingharian, regular ka bang nagapahimutang sa Ang Bantayanang Torre ug Pagmata! diha sa mga kamot sa mga tawong imong mahibalag sa imong ministeryo?
19. Unsang pagpadasig ang gihatag kanato sa Hebreohanon 6:10-12?
19 Palandonga, usab, ang pailob ug matinumanong pag-alagad sa mga igsoon nga nag-alagad ingong mga membro sa Nagamandong Lawas sa mga Saksi ni Jehova. Ang kadaghanan kanila karon anaa na sa ilang ikanuybe ug ikanapulong dekada sa ilang kinabuhi, apan sila mga magwawali gihapon sa Gingharian nga madasigong nagaatiman sa mga kaakohan nga gitudlo diha kanila. (Hebreohanon 13:7) Ug komosta ang ubang mga tigulang nga adunay langitnong paglaom ug bisan ang uban taliwala sa “ubang mga karnero” nga mga tigulang na? (Juan 10:16) Sila makaseguro nga ang Diyos dili kay dili-matarong nga makalimot sa ilang binuhatan ug sa gugma nga ilang gipakita alang sa iyang ngalan. Uban sa batan-ong isigkamagtutuo, daghang tigulang nga mga Saksi ni Jehova ang nagapadayon sa pagbuhat kutob sa ilang maarangan, nga nagapakitag pagtuo ug pailob sa pag-alagad sa Diyos. (Hebreohanon 6:10-12) Dayon, kon pinaagi man sa pagkabanhaw, duyog sa mga manalagna sa karaan, o pinaagi sa pagkalabang-buhi sa umaabot nga “dakong kasakitan,” ilang maani ang tugob nga ganti nga kinabuhing dayon.—Mateo 24:21.
20. (a) Unsay imong nakat-onan gikan sa “sumbanan” sa mga manalagna? (b) Sa unsang paagi makatabang kanato ang samag-manalagna nga pailob?
20 Pagkamaayong sumbanan ang gibilin kanato sa mga manalagna sa Diyos! Tungod kay ilang gilahutay ang pag-antos, nagpailob, ug nagpakitag ubang diyosnong mga hiyas, sila nakapribilehiyo sa pagsulti sa ngalan ni Jehova. Ingong iyang modernong-adlawng mga Saksi, pasagdi nga mahisama kita kanila ug sama ka matinguhaon kang manalagnang Habacuc, kinsa miingon: “Diha sa akong bantayan ako magpadayon sa pagtindog, ug ako magpahiluna sa lantawan; ug ako magpadayon sa pagbantay, sa pagtan-aw kon unsay isulti [sa Diyos] kanako.” (Habacuc 2:1) Magbaton kita ug samang determinasyon samtang kita sa mapailobon ug malipayon magpadayon sa dayag nga pagpahayag sa mahimayaong ngalan sa atong Dakong Maglalalang, si Jehova!—Nehemias 8:10; Roma 10:10.
Nasabtan Mo ba Kining mga Puntoha?
◻ Unsang maisogong panig-ingnan ang gihatag ni manalagnang Amos?
◻ Sa unsang mga paagi sulondan ang manalagnang si Moises?
◻ Sa unsang paagi ang modernong-adlawng mga Saksi ni Jehova makalihok sama kang Amos ug Isaias?
◻ Unsay makat-onan sa Kristohanong mga ministro gikan sa paggawi ni Oseas ug Joel?
◻ Sa unsang paagi kita makabaton ug kaayohan gikan sa mga panig-ingnan ni Ezekiel ug Miqueas?
[Hulagway sa panid 16]
Bisan pa sa grabeng pagbatok ni Amasias, gikunsaran sa espiritu ni Jehova si Amos aron managna nga maisogon
[Hulagway sa panid 18]
Ang matinumanong mga dinihogan nagpakitag maayong panig-ingnan sa pagpailob diha sa pag-alagad kang Jehova