Ginatabangan Mo ba ang Imong Anak sa Pagpili Kang Jehova?

“GIBATI ko nga laay ug kapoy kaayo ang pagtuon ug Bibliya. Sa tago, nakahukom ako sa akong kasingkasing nga dili ako mahimong Saksi ni Jehova sa akong pagdako,” pahayag sa usa ka batan-ong lalaki. Bisan tuod makalaom nga kadaghanan sa mga anak sa Kristohanong mga panimalay sa ulahi mopili nga mobarog sa kiliran ni Jehova, ang mga batan-on nga sama kaniya mahimong malisdan sa pagpili kang Jehova ingong ilang Diyos.

Ang mga ginikanan usahay dili segurado kon unsaon paggiya sa ilang mga anak sa epektibong paagi. Mihimo silag daghang pagsusi sa kaugalingon, sama sa mabalak-ong amahan nga kas-a miingon: “Sa pagkatinuod, dihay mga panahon sa dihang nagsud-ong ako sa mga nawong sa nangatulog nakong mga anak, nga ang mga luha sa kahigawad anaa pa sa ilang mga aping, ug nakapangutana sa akong kaugalingon kon kinahanglan ba nga mahimo akong mas matugoton.” Ang iyang duha ka anak nga lalaki midagko ug mipili sa pag-alagad kang Jehova.

Apan adunay mga batan-on nga mitalikod kang Jehova ug mibiya sa Kristohanong pundok aron makigbahin sa kalibotan ni Satanas. Busa sa unsang paagi molampos ang mga ginikanan sa pagtabang sa ilang kabataan sa pagpili kang Jehova? Sa pagtubag nianang pangutanaha, tan-awon una nato kon nganong ang pipila ka batan-on mitalikod kang Jehova sa dihang ang ilang mga ginikanan gusto gayod nga sila magpabilin uban kaniya.

Kon Nganong ang Pipila ka Batan-on Mitalikod ni Jehova

Usa sa kasagaran kaayong mga hinungdan mao nga ang pipila ka batan-on wala gayod makaila kang Jehova o sa iyang mga dalan. Bisan tuod magtambongan sa Kristohanong mga tigom sukad sa masuso pa, sila mihimo lamang niana nga wala sa ilang buot, ug walay tininuod nga pagpangita kang Jehova. (Isaias 55:6; Buhat 17:27) Ang batang lalaki nga gihisgotan sa ibabaw gilaayan sa Kristohanong mga tigom tungod kay wala siya makasabot kon unsay gipanulti sa mga mamumulong diha sa plataporma.

Ang mga binhi sa kamatuoran napugas diha sa pipila, apan gitugotan nila nga mahaylo ang ilang mga kasingkasing sa daw may-kagawasan, materyalistikong estilo sa kinabuhi sa kalibotan ni Satanas. Dili mabuntog sa pipila ang kusganong tinguha nga makig-uban ug mosundog sa ilang mga katalirongan.​—1 Cronicas 28:9; Lucas 8:12-14; 1 Corinto 15:33.

Hinunoa, sa tibuok kalibotan daghang kabataan sa Kristohanong panimalay ang mipili sa pagbarog dapig kang Jehova. Aduna bay makat-onan gikan sa positibong mga aksiyon nga gihimo sa ilang mga ginikanan?

Pagsugod ug Sayo

Usa ka hinungdanong yawi sa pagtabang sa imong mga anak sa pagpili kang Jehova mao ang pagsugod ug sayo. Sa kadaghanang kaso, ang nasilsil nga mga butang ug mga leksiyon nga nakat-onan sa dihang linghod pa ug madinawaton ang kasingkasing magpabilin sa tibuok kinabuhi. (Proverbio 22:6) Busa sultihig sayo ang imong mga anak bahin sa pagkamaayo ni Jehova, sa iyang gugma ug pagkahalangdon, nga paningkamotang matukod diha sa ilang mga kasingkasing ang gugma kang Jehova ug apresasyon sa kon unsay gihimo ni Jehova alang kanila. Aron malampos kini, daghang ginikanan ang malamposong nakagamit sa daghang artikulo bahin sa kalalangan ni Jehova nga makaplagan diha sa mga publikasyon sa Watchtower Society.

Ang pagsugot ug pagtahod kang Jehova ug sa iyang pagsimba maoy nalakip sa ubang mga hiyas nga kinahanglang isilsil sa sayong bahin sa kinabuhi. Makapalipay nga makita ang wala pa magtungha nga mga bata diha sa Kristohanong mga tigom nga naningkamot sa pagkuhag simpleng mga nota ug sa pagpakli sa mga teksto diha sa ilang kaugalingong mga Bibliya o mouban sa ilang mga ginikanan ngadto sa banyo aron hilam-osan ang ilang mga nawong ug bugnawng tubig sa dihang sila katulgon. Kini maoy yanong mga butang, apan pagkahinungdanon nga masilsil kini diha sa linghod nga mga hunahuna nga ang pagtahod ug pagsugot kinahanglang ipakita kang Jehova!

Ang seryosong personal nga instruksiyon sa Bibliya kinahanglang magsugod usab ug sayo. Sa dihang duha pa ka tuig ang pangedaron sa ilang mga anak lalaki, gisugdan sa usa ka magtiayon ang pagbasa uban kanila sa librong Pagpatalinghog sa Dakong Magtutudlo.a Sa ulahi, sa dihang ang mga batang lalaki nagtungha sa eskuylahan, sila mobangon ug sayo ug magtuon kada buntag uban sa ilang inahan sa mga librong Akong Basahon sa mga Estorya sa Bibliya ug Ikaw Mabuhing Walay Kataposan sa Paraiso sa Yuta.* Kini sundan sa panaghisgot sa inadlaw nga teksto nga gidumala sa amahan una mamahaw. Ang mga paningkamot sa ginikanan madagayaong gigantihan sa dihang ang ilang mga anak niining bag-o pa mipili sa pag-alagad kang Jehova, nga nagpasimbolo sa ilang pagpahinungod pinaagi sa bawtismo sa tubig sa pangedarong 10 ug 11.

Usa ka buotang batan-ong lalaki nga nagaalagad sa sangang buhatan sa Watch Tower Society sa Hapon nahinumdom nga sa dihang siya bata pa kaayo, gitabangan siya sa iyang inahan sa pag-ugmad ug relasyon uban kang Jehova pinaagi sa paglingkod tapad kaniya sa gabii, nga nagtabang kaniya sa pag-ampo. Wala gayod siya makalimot sa gitudlong leksiyon​—bisag asa siya moadto o kon unsay iyang himoon, si Jehova kanunay nga anaa sa duol ug andam nga motabang.

Ang malamposong mga ginikanan nakakat-on sa pag-ila sa daotang mga hilig nga gumikan sa napanunod nga pagkadili-hingpit sa ilang mga anak, ug ang mga ginikanan nagsugod ug sayo sa pagtabang sa ilang mga anak sa pagtul-id niana. (Proverbio 22:15) Ang mga hilig sa kahakog, kagahig-ulo, garbo, sobrang pagkahinawayon sa uban, kinahanglang masumpo ug sayo. Kon dili, ang maong mga binhi motubo ngadto sa pag-alsa batok sa Diyos ug sa iyang mga paagi sa ulahi. Pananglitan, ang maayog-tuyo apan hinobra ka matugotong mga ginikanan subsob nga magtugot sa ilang mga anak nga maugmad ang maakoakohong mga tinamdan. Kining mga bataa malisdan sa pagtahod sa ilang mga ginikanan o kang Jehova, nga mahimong sama sa ‘mga dili-mapasalamaton’ nga gihisgotan sa Bibliya. (Proverbio 29:21) Sa laing bahin, ang mga bata nga gihatagan ug buluhaton sa panimalay ug gitudloan nga magmaalisto sa mga panginahanglan sa uban hayan mahimong mas mapasalamaton sa ilang mga ginikanan ug kang Jehova.

Ang laing kinahanglanon mao ang sayo nga pagbutang ug teokratikanhong mga tumong nga makataronganong makab-ot sa usa ka bata. Kon dili kini himoon ug sayo ug mapadayonon, pun-on sa uban ang iyang hunahuna ug kasingkasing sa lahi nga mga tumong. Ang pagbasa sa tibuok Bibliya, pagtuon sa personal sa usa sa mga publikasyon sa Watchtower Society, pagpatala sa Tunghaan sa Teokratikanhong Ministeryo, pagkahimong magmamantala sa maayong balita, ug pagpabawtismo kinahanglang ilakip niining mga tumonga.

Si Takafumi nahinumdom nga ang iyang inahan nakabuyo kaniya sa pagbatasan ug basa sa mga magasing Bantayanang Torre ug Pagmata! pinaagi sa pagsulat ug yanong mga pangutana ug ibutang kana sa talad sa kusina aron makit-an niya sa iyang pagpauli gikan sa tunghaan. Si Yuri nahinumdom nga ang pagpuyo ug pipila ka adlaw uban sa mga payunirb nga nag-alagad diin dako ang panginahanglan sa Kristohanong mga ministro, pag-uban kanila sa ministeryo, pagtan-aw kanila nga magluto ug maayong mga pagkaon, ug pagpaniid sa ilang kalipay ug kadasig nakaimpluwensiyag dako sa iyang tinguha sa pag-alagad kang Jehova sa samang paagi. Daghang batan-on nahinumdom nga regular silang dad-on sa ilang mga ginikanan ngadto sa Bethel, nga maoy tawag sa mga hedkuwarter ug mga sangang buhatan sa Watch Tower Society, diin makapaniid sila sa ubang batan-ong mga lalaki ug mga babaye nga malipayong nagaalagad kang Jehova. Daghan niadtong miduaw sa bata pa karon nag-alagad na sa mga Bethel sa tibuok kalibotan.

Hatagi ang Imong mga Anak sa Imong Panahon

Ang gidaghanon ug kalidad sa panahon nga imong gigugol uban sa imong mga anak malagmit adunay direktang impluwensiya sa ilang pagpili nga moalagad kang Jehova o dili. Dali silang makasabot kon unsa ka dakong panahon ug pagpangandam ang imong gihimo sa pagdumala nimog pagtuon sa Bibliya uban kanila. Kon dili nimo mahinumdoman kon asa kamo mihunong sa miagi ninyong pagtuon o kon imong kanselahon ang pagtuon tungod sa mabaw nga mga katarongan, nagahatag ka ug mensahe nga ang pagtuon dili ingon niana ka importante. Hinunoa, sa dihang ilang makita nga ang mga ginikanan naghimog mga pagsakripisyo alang sa pagtuon, nangandam ug maayo alang niana ug regular nga nagadumala sa pagtuon bisag unsa pang mga babag ang mobangon, usa ka bug-os lahi nga mensahe ang ginapasa niini. Bisan tuod kini dili usa ka kinahanglanon, ang pipila ka inahan mag-ilis alang sa pagtuon sa ilang mga anak, sama sa ilang gihimo sa dihang magatambong sa mga tigom o magadumalag pagtuon sa Bibliya uban sa usa ka silingan. Ang impresyon nga gihatag mao nga ang pagsimba kang Jehova importante.

Dakong panahon ug paningkamot ang gikinahanglan aron mahimong makalilipay ang pagtuon sa Bibliya alang sa imong mga anak, nga nagaabot sa ilang mga kasingkasing. Ang gagmayng mga bata ilabinang malingaw sa dihang ilang makita ang mga butang nga ilang nakat-onan nga gidula sa ilang atubangan. Usa ka amahan, pananglitan, mitabang sa iyang mga anak sa paghanduraw sa pagkabanhaw pinaagi sa pagdula sa asoy sa Bibliya bahin sa pagkabanhaw ni Lazaro. Misulod siya sa aparador ug dayon migula ingong nabanhawng Lazaro.​—Juan 11:17-44.

Samtang nagakahingkod ang mga bata, nagkinahanglan kini ug labaw pang panahon ug kahanas sa pagdumala tungod sa ilang giatubang nga bul-og sa mga pagbati, mga pagduhaduha, ug mga kabalaka. Ang panahon nga gigahin sa mahigugmaon ug masinabotong mga ginikanan niining yugtoa importante kaayo aron ang mga anak makaugmad ug pagsalig kang Jehova. Usa ka malamposong amahan sa upat ka anak miasoy nga sa dihang ang iyang mga anak nag-atubang sa lainlaing mga suliran, mangita siya ug materyal diha sa mga publikasyon sa Watchtower nga may kalabotan sa maong suliran ug hisgotan kana uban kanila matag adlaw hangtod ang suliran sa bug-os mabuntog.

Usa ka puliki nga payunir nga inahan sa duha ka bata nakamatikod nga ang iyang anak babaye nahimong tigpalain ug walay kalipay diha sa teokratikanhong mga kalihokan. Busa giseguro sa inahan nga diha na siya sa balay inigpauli sa iyang anak gikan sa eskuylahan kada hapon, nga nakig-estorya sa iyang anak babaye samtang nag-tsa sila. Pinaagi sa suod inahan-anak nga mga panagkabildo, ang dalagita nakadawat ug tabang nga iyang gikinahanglan. Karon, pagkagraduwar sa hayskul, miduyog siya sa iyang inahan sa payunir nga pag-alagad.​—Proverbio 20:5.

Maayong Panag-uban ug Panig-ingnan

Dugang pa sa paghatag sa ilang panahon, ang mga ginikanan kinahanglang magtaganag maayong panag-uban alang sa ilang mga anak. Ang Proverbio 13:20 nag-ingon: “Siya nga nagalakat uban sa mga tawong manggialamon mahimo usab nga manggialamon, apan siya nga adunay mga pakiglabot uban sa mga buangbuang dili maayo ang dangatan.”

Daghang malamposong ginikanan ang miila sa kamatuoran nianang maong panultihon. Usa ka amahan sa upat nag-ingon: “Sa dihang akong hinumdoman ang nangagi, nagtuo ako nga ang daghang higala diha sa kamatuoran ang nagpalihok sa among mga anak sa pag-alagad kang Jehova. Gidasig nako sila nga makighigala sa mga igsoon sa ubang kongregasyon ingon man sa among kongregasyon ug palamboon kanang maong mga panaghigala.” Usa ka Kristohanong ansiano nga nakaalagad sa Bethel sulod sa daghang tuig nahinumdom: “Sa dihang bata pa ako, nagpuyo kami sa usa ka gamayng balay, apan kana gitanyag kanunay ingong sak-anan sa magtatan-aw sa sirkito. Dugang pa, ang mga espesyal payunir sa among kongregasyon sa regular kauban namo sa panihapon. Nangaligo sila sa among balay ug nakig-uban kanamo. Ang pagkadungog sa ilang mga eksperyensiya ug pagkakita sa ilang kangaya nakatabang kanako sa pag-ugmad ug apresasyon alang sa bug-os-panahong pag-alagad.”

Ang maayong panag-uban makatabang niadtong kinsa nagaatubang sa mga kalisdanan. Usa ka inahan kansang anak lalaki naproblema pag-ayo mihisgot sa suliran uban sa usa ka nagapanawng magtatan-aw sa mga Saksi ni Jehova. Gisugyot niya nga ikuyog sa inahan ang bata sa pag-alagad sa kanataran. “Kon imo kanang himoon, ang iyang espirituwalidad ug ang tanan niyang ubang suliran moarang-arang,” matud sa magtatan-aw. Siya nagtaho: “Sa among kongregasyon dihay kahikayan sa pagsangyaw magabii, ug daghang nag-eskuylang mga bata, daghang mas edaran nga mga regular payunir, ug labing menos usa ka ansiano ang nakig-ambit niana. Sa sinugdan lisod kaayong pagawason sa kanataran ang akong anak nga regular, apan wala kadto magdugay kay kanunay siyang mopauli nga mas malipayon ug nadasig sa maayong pakig-uban. Samtang siya usa ka estudyante sa hayskul, nabawtismohan siya ug mialagad ingong oksilyare payunir matag bulan, ug sa dihang siya migraduwar, nagregular payunir siya.” Ang maayong panag-uban dinuyogan sa pagbuhat sa kabubut-on ni Jehova magadala ug maayong mga resulta.

Mahimong walay mga batan-on sa lokal nga maayog impluwensiya sa imong anak, apan ang sublisubli nga pahayag sa daghang batan-on kinsa mipili sa pag-alagad kang Jehova naglangkit sa panig-ingnan sa ilang mga ginikanan. Daghang batan-on ang nakadayeg sa ilang mga ginikanan ug gustong mosundog kanila. Si Yuri nahinumdom nga ang iyang inahan maabiabihon ug matinagdanon sa uban, nga nagtelepono kanila ug naglutog pagkaon alang sa masakiton. Si Tatsuo, nga gikan sa usa ka pamilya nga upat ang anak lalaki, nga karon mga hamtong na ang tanan ug nagaalagad kang Jehova, nag-ingon: “Si Mama dili makadumalag pagtuon kanamo sa regular tungod kay si Papa dili magtutuo ug siya gisupak gayod sa mga paryente. Apan ang pagpaniid sa iyang pagbarog dapig sa kamatuoran ug sa iyang kalipay sa pag-alagad kang Jehova nakaimpluwensiya kanako ug dako. Andam usab siya nga magpulaw hangtod sa kaadlawon aron tabangan kami sa among mga suliran.” Ang maalamong mga pulong sa ginikanan adunay gahom sa dihang paluyohan sa matinumanong mga buhat. Si Yoichiro nagpahayag bahin sa iyang mga ginikanan: “Wala akoy mahinumdoman nga nakapahayag sila sukad ug negatibong mga hunahuna bahin sa uban diha sa kongregasyon; ni tugotan nila kaming mga bata nga magtabitabi bahin sa mga kasaypanan sa uban.”​—Lucas 6:40-42.

Kalipay sa Pagtan-aw sa mga Anak nga Mipili Kang Jehova

Walay hingpit nga pormula sa pagtabang sa imong mga anak sa pagpili kang Jehova. Aduna gayoy daghang makapabalakang mga yugto. Apan ang mabalak-ong amahan nga unang gihisgotan nag-ingon: “Ingong mga ginikanan naningkamot gayod kami kanunay sa pagsunod nga matinumanon sa mga sugyot sa makitang organisasyon ni Jehova. Dako kinig tabang sa pagbuntog sa mga suliran.” Ang ilang mga paningkamot milampos.

Oo, pinaagi sa paghimo sa imong labing maayo sa pagsunod sa mga giya sa Bibliya, nga magatudlo sa imong mga anak ug maayong mga katarongan sa paghigugma kang Jehova, nga paluyohan sa imong matinumanong panig-ingnan ug sinserong mga paningkamot nga makatabang, ikaw usab sa ulahi makakaplag nga ang imong mga paningkamot purongpurongan sa kalamposan. Nahinumdom sa batang lalaki nga unang gihisgotan, nga kas-a nakahukom nga dili mahimong Saksi ni Jehova? Aw human siya matabangi nga malamposon sa iyang inahan nga makasagubang latas sa iyang lisod nga katuigan, siya miingon: “Nalipay ako nga wala gayod siya molunga!” Mahimong ikaw makabaton ug samang resulta sa imong mga anak.​—Galacia 6:9.

[Footnote]

[Hulagway sa panid 30]

Malipay ka bang maghinumdom bahin sa pagmatuto ug bata?