Mga Pangutana Gikan sa mga Magbabasa

Haom ba nga modawat ug usa ka bakuna o uban pang ineksiyon nga tambal nga adunay albumin nga gikuha gikan sa dugo sa tawo?

Sa direktang pagkasulti, ang matag Kristohanon kinahanglang personal nga modesisyon bahin niini.

Ang mga alagad sa Diyos gustong motuman sa hustong paagi sa sugo nga makaplagan sa Buhat 15:28, 29, nga maglikay sa dugo. Busa, ang mga Kristohanon dili mokaon ug karne nga wala paagasi sa dugo o mga produkto sama sa sorisong dugo. Apan ang balaod sa Diyos mapadapat usab sa medikal nga natad. Ang mga Saksi ni Jehova nagadaladalag dokumento nga nagapahayag nga sila modumili sa ‘pag-abuno sa dugo, kompletong dugo, pulang mga selula, puting mga selula, platelets, o plasma sa dugo.’ Apan, komosta na man ang mga ineksiyon nga serum nga adunay diyutayng protena sa dugo?

Ang mga Saksi dugay nang nakasabot nga kini maoy usa ka butang alang sa pribadong desisyon nga nahiuyon sa nabansay-sa-Bibliya nga tanlag sa matag usa. Kini gipatin-aw diha sa “Mga Pangutana Gikan sa mga Magbabasa” sa Ang Bantayanang Torre sa Hunyo 1, 1990, nga naghisgot mahitungod sa serum nga mga ineksiyon nga mahimong irekomendar sa usa ka doktor kon ang usa naladlad sa pipila ka matang sa mga sakit. Ang aktibong mga sangkap sa maong mga ineksiyon dili mismo plasma sa dugo kondili antibodies gikan sa plasma sa dugo niadtong mga tawo o hayop nga nakapatunghag resistensiya. Ang pila ka Kristohanon kinsa mibati nga mahimong makadawat sa maong mga ineksiyon uban ang maayong konsensiya nagpahayag nga ang antibodies gikan sa dugo sa usa ka babayeng mabdos motabok ngadto sa dugo sa bata diha sa iyang tagoangkan. Ang “Mga Pangutana Gikan sa mga Magbabasa” naghisgot niini, maingon man sa kamatuoran nga ang pipila ka albumin motabok gikan sa babayeng mabdos ngadto sa iyang anak.

Nakaplagan kini sa daghan nga takos tagdon, sanglit ang pipila ka bakuna nga wala himoa gikan sa dugo mahimong adunay diyutay ra kaayong albumin sa plasma nga gigamit o gidugang aron mabalanse ang mga sangkap diha sa sambog. Sa pagkakaron ang diyutayng albumin gigamit usab diha sa mga ineksiyon sa sentitikong hormone nga EPO (erythropoietin). Ang pipila ka Saksi midawat sa mga ineksiyon sa EPO tungod kay kini makapadali sa pagporma sa pulang mga selula sa dugo ug sa ingon mahimong makahupay sa usa ka doktor sa pagbati nga basig kinahanglanon ang pag-abuno sa dugo.

Ang ubang medikal nga mga sambog mahimong gamiton sa umaabot nga nag-apil ug diyutay kaayong albumin, sanglit ang mga kompaniya sa tambal nagamugnag bag-ong mga produkto o nagausab sa mga pormula sa naglungtad nang mga produkto. Busa gusto tingaling tagdon sa mga Kristohanon kon kaha ang albumin maoy bahin sa bakuna o sa ubang ineksiyon nga girekomendar sa doktor. Kon sila nagduhaduha o adunay katarongan sa pagtuo nga ang albumin maoy usa ka sangkap, mahimo silang makapangutana sa ilang doktor.

Ingon sa gipahayag, daghang Saksi ang wala motutol sa pagdawat sa ineksiyon nga adunay diyutayng albumin. Sa gihapon, ang bisan kinsa nga gustong magtuon pa pag-ayo bahin niining butanga una pa mohimog personal nga desisyon kinahanglang magrepaso sa impormasyon nga gipresentar diha sa “Mga Pangutana Gikan sa mga Magbabasa” sa Ang Bantayanang Torre sa Hunyo 1, 1990.