Pag-antos sa Tawo—Nganong Gitugotan Kini sa Diyos?

SA SINUGDANAN sa tawhanong kasaysayan, wala gayoy mga luha sa kaguol o kasakit. Ang tawo wala mag-antos. Ang katawhan gihatagan ug hingpit nga sinugdanan. “Nakita sa Diyos ang tanang butang nga iyang gibuhat ug, tan-awa! kini maayo kaayo.”​—Genesis 1:31.

Apan ang pipila mosupak, ‘Ang sugilanon bahin ni Adan ug Eva sa tanaman sa Eden maoy usa ka sugilambong lamang.’ Ikasubo, daghang klerigo sa Kakristiyanohan ang nagsulti niini. Apan, ang taas ug awtoridad nga si Jesu-Kristo nagpalig-on mismo nga makasaysayanhon ang mga hitabo sa Eden. (Mateo 19:4-6) Dugang pa, ang bugtong paagi sa pagsabot kon nganong ang Diyos nagtugot nga mag-antos ang tawo mao ang pagsusi niining mga hitaboa sa sayong kasaysayan sa tawo.

Ang unang tawo, si Adan, gihatagan sa makapatagbawng buluhaton nga mag-atiman sa tanaman sa Eden. Dugang pa, ang Diyos nagbutang atubangan kaniya sa tumong nga padak-on ang iyang Edenikong puy-anan ngadto sa usa ka tibuok-yutang tanaman sa kahimuot. (Genesis 1:28; 2:15) Aron tabangan si Adan sa pagtuman niining dakong buluhaton, ang Diyos nagtagana kaniya ug usa ka kapikas sa kaminyoon, si Eva, ug namulong kanila nga magmabungahon ug magdaghan ug maggahom sa yuta. Apan lain pa ang gikinahanglan sa pagtino sa kalamposan sa katuyoan sa Diyos alang sa yuta ug katawhan. Kay hinimo sa dagway sa Diyos, ang tawo adunay kagawasan sa pagpili; busa, gikinahanglan nga ang kabubut-on sa tawo dili gayod mosukwahi sa iya sa Diyos. Kay kondili, may kasamok sa uniberso, ug ang katuyoan sa Diyos nga pun-on ang yuta sa usa ka malinawong tawhanong pamilya dili matuman.

Ang pagpasakop sa pagmando sa Diyos dili awtomatiko. Kini kinahanglang usa ka mahigugmaong pahayag sa kagawasan sa pagpili sa tawo. Pananglitan, mabasa nato nga sa dihang si Jesu-Kristo nag-atubang ug usa ka grabeng pagsulay, siya miampo: “Amahan, kon buot mo, kuhaa kining kopa gikan kanako. Hinuon, ipahinabo, dili ang akong kabubut-on, apan ang imoha.”​—Lucas 22:42.

Sa susama, nag-agad kang Adan ug Eva ang pagpamatuod kon sila ba buot magpasakop sa pagmando sa Diyos. Tungod niining maong katuyoan, si Jehova nga Diyos naghimo ug usa ka yanong pagsulay. Ang usa sa mga kahoy sa tanaman gitawag nga “ang kahoy sa kahibalo sa maayo ug daotan.” Kini naghawas sa katungod sa Diyos sa pagtino sa mga sukdanan sa hustong panggawi. Sa tin-awng pinulongan, ang Diyos nagdili sa pagkaon sa prutas gikan niining linain nga kahoy. Kon si Adan ug Eva mosupak, kini mosangpot sa ilang kamatayon.​—Genesis 2:9, 16, 17.

Ang Pagsugod sa Pag-antos sa Tawo

Usa ka adlaw ang usa ka espiritung anak sa Diyos nangahas sa pagduhaduha sa paagi sa Diyos sa pagmando. Naggamit ug usa ka bitin ingong tigsulti, siya nangutana kang Eva: “Tinuod ba nga ang Diyos nag-ingon nga kinahanglang dili kamo mokaon gikan sa tanang kahoy sa tanaman?” (Genesis 3:1) Busa misugod pagduhaduha si Eva kon husto ba ang paagi sa Diyos sa pagmando.a Gihatag ni Eva ang hustong tubag, nga iyang nakat-onan gikan sa iyang bana. Hinunoa, ang espiritung linalang misupak dayon sa Diyos ug milimod sa mga sangpotanan sa pagsupak, nga nag-ingon: “Ikaw tinong dili mamatay. Kay ang Diyos nasayod nga sa adlaw mismo sa inyong pagkaon gikan niana ang inyong mga mata mabuka ug kamo mahisama sa Diyos, nga nasayod sa maayo ug daotan.”​—Genesis 3:4, 5.

Ikasubo, si Eva nalimbongan sa paghunahuna nga ang pagsupak mosangpot, dili sa pag-antos sa tawo, kondili sa mas maayong kinabuhi. Sa dugay niyang tinan-aw sa prutas, labi pa kining tilinguhaon tan-awon, ug siya misugod sa pagkaon niana. Sa ulahi, gidani niya si Adan sa pagkaon usab niana. Ikasubo, si Adan mipili nga mahuptan ang pag-uyon sa iyang asawa inay ang pag-uyon sa Diyos.​—Genesis 3:6; 1 Timoteo 2:13, 14.

Pinaagi sa paghulhog niining maong rebelyon, ang espiritung linalang naghimo sa iyang kaugalingon nga usa ka magsusupak sa Diyos. Busa siya gitawag nga Satanas, gikan sa Hebreohanong pulong nga nagkahulogang “magsusupak.” Namakak usab siya bahin sa Diyos, nga naghimo sa iyang kaugalingon nga mapasipalahon. Busa, gitawag usab siya ug Yawa, gikan sa Gregong pulong nga nagkahulogang “mapasipalahon.”​—Pinadayag 12:9.

Sa ingon, misugod ang pag-antos sa tawo. Tulo sa mga linalang sa Diyos ang miabuso sa ilang gasa nga kagawasan sa pagpili, nga nagpili sa mahakogong paagi sa kinabuhi nga supak sa ilang Maglalalang. Motungha karon ang pangutana, Unsaon pagdumala sa Diyos kining maong rebelyon sa matarong nga paagi nga magpasalig sa uban niyang intelihenteng linalang, lakip sa matinumanong mga manulonda sa langit ug sa umaabot nga mga kaliwat ni Adan ug Eva?

Maalamong Tubag sa Diyos

Ang pila mangatarongan tingali nga labing maayo unta nga gilaglag dayon sa Diyos si Satanas, si Adan, ug si Eva. Apan dili kana maghusay sa mga isyu nga gipatungha sa rebelyon. Si Satanas nagduhaduha sa paagi sa pagmando sa Diyos, nga nagpasabot nga ang mga tawo magpahimulos ug mas maayong kinabuhi nga bulag sa pagmando sa Diyos. Dugang pa, ang iyang kalamposan sa pagpasupak sa unang duha ka tawo batok sa pagmando sa Diyos nagpatungha sa ubang mga pangutana. Sanglit nakasala si Adan ug Eva, nagpasabot ba kini nga may sayop sa paagi sa paglalang sa Diyos sa tawo? Aduna kahay magmatinumanon sa Diyos dinhi sa yuta? Ug komosta ang mga manulondang anak ni Jehova nga nakasaksi sa rebelyon ni Satanas? Sila ba molaban sa pagkamatarong sa Iyang pagkasoberano? Dayag, gikinahanglan ang igong panahon sa paghusay niining mga isyuha. Mao kanay hinungdan nga gitugotan sa Diyos nga maglungtad si Satanas hangtod sa atong adlaw.

Mahitungod kang Adan ug Eva, sa adlaw sa ilang pagsupak, gihukman sila sa Diyos nga mamatay. Busa ang proseso sa pagkamatay nagsugod. Ang ilang mga kaliwat, nga gipanganak human si Adan ug Eva makasala, nakapanunod sa sala ug kamatayon gikan sa ilang dili-hingpit nga mga ginikanan.​—Roma 5:14.

Si Satanas nagsugod uban sa unang duha ka tawo nga midapig kaniya sa isyu. Gigamit niya ang panahon nga gitugot kaniya sa pagpaningkamot nga mailalom sa iyang pagmando ang tanang kaliwat ni Adan. Milampos usab siya sa paghaylo sa pipila ka manulonda nga moduyog kaniya sa iyang rebelyon. Hinunoa, ang kadaghanan sa manulondang mga anak sa Diyos maunongong milaban sa pagkamatarong sa pagmando ni Jehova.​—Genesis 6:1, 2; Judas 6; Pinadayag 12:3, 9.

Ang isyu mao ang pagmando sa Diyos batok sa kang Satanas, usa ka isyu nga naglungtad sa mga adlaw ni Job. Kining matinumanong tawo nagpamatuod pinaagi sa iyang kagawian nga siya mipili sa matarong nga pagmando sa Diyos inay sa satanasnong independensiya, ingon sa gibuhat na sa mahinadlokon-sa-Diyos nga mga tawo sama kang Abel, Enoch, Noe, Abraham, Isaac, Jacob, ug Jose. Si Job nahimong tema sa usa ka kabildohay nga nahitabo sa langit atubangan sa matinumanong mga manulonda sa Diyos. Ingong pagpaluyo sa Iyang matarong nga pagmando, ang Diyos namulong kang Satanas: “Gipalandong mo ba si Job nga akong alagad, nga walay usa nga sama kaniya diha sa yuta, usa ka tawo nga walay ikasaway ug matarong, mahinadlokon sa Diyos ug nagpahilayo sa daotan?”​—Job 1:6-8.

Nagdumili sa pagdawat sa kapildihan, si Satanas nangangkon nga si Job nag-alagad sa Diyos tungod lamang sa hinakog nga mga katarongan, sanglit ang Diyos dagayang nagpanalangin kang Job sa materyal nga kauswagan. Busa si Satanas mipatuo: “Ingong kausaban, bakyawa ang imong kamot, palihog, ug tandoga ang tanan niyang nabatonan ug tan-awag dili ka ba niya tunglohon sa imong nawong mismo.” (Job 1:11) Si Satanas mipadayon pa gani, nga nagduhaduha sa integridad sa tanang linalang sa Diyos. “Ang tanan nga iya sa usa ka tawo iyang ihatag tungod sa iyang kalag,” siya mipatuo. (Job 2:4) Kining mapasipalahong atake naglakip dili lamang kang Job kondili sa tanang matinumanong mga magsisimba sa Diyos sa langit ug sa yuta. Gipasabot ni Satanas nga mobiya sila sa ilang relasyon kang Jehova kon mameligro ang ilang mga kinabuhi.

Si Jehova nga Diyos may bug-os nga pagsalig sa integridad ni Job. Naghatag ug ebidensiya niana, gitugotan niya si Satanas nga paantoson si Job. Pinaagi sa iyang pagkamatinumanon si Job wala lamang maghinlo sa iyang ngalan kondili, labi pang hinungdanon, milaban sa pagkamatarong sa pagkasoberano ni Jehova. Ang Yawa napamatud-ang bakakon.​—Job 2:10; 42:7.

Apan, ang labing maayong panig-ingnan sa pagkamatinumanon ilalom sa pagsulay mao si Jesu-Kristo. Ang Diyos nagbalhin sa kinabuhi niining manulondang Anak gikan sa langit ngadto sa tagoangkan sa usa ka ulay. Busa si Jesus wala makapanunod sa sala ug pagkadili-hingpit. Hinunoa mitubo siya ingong usa ka hingpit nga tawo, ang tukmang katumbas sa unang tawo una mawad-i ang maong tawo sa iyang kahingpitan. Si Satanas naghimo kang Jesus nga usa ka linaing tumong, nga nagpahinabo ug daghang tentasyon ug mga pagsulay diha kaniya, nga misangko sa makauulawng kamatayon. Apan si Satanas napakyas sa pagbungkag sa integridad ni Jesus. Sa bug-os nga paagi, si Jesus milaban sa pagkamatarong sa pagmando sa iyang Amahan. Gipamatud-an usab niya nga ang hingpit nga tawo nga si Adan walay ikapasangil sa pagduyog niya sa rebelyon ni Satanas. Si Adan mahimo untang magmatinumanon ilalom sa iyang mas gamay nga pagsulay.

Unsa pa ang Napamatud-an?

Duolan sa 6,000 ka tuig sa pag-antos sa tawo ang milabay sukad sa rebelyon ni Adan ug Eva. Sulod niining panahona ang Diyos nagtugot sa katawhan sa pag-eksperimento sa daghang lainlaing mga dagway sa gobyerno. Ang makalilisang nga rekord sa pag-antos sa tawo nagpamatuod nga ang tawo dili makaarang sa pagmando sa kaugalingon. Sa pagkatinuod, ang kagubot mikaylap karon sa daghang dapit sa yuta. Ang pagbulag sa Diyos, ingon sa gipasiugda ni Satanas, maoy malaglagon.

Si Jehova walay angay pamatud-an sa iyang kaugalingon. Nasayod siya nga ang iyang paagi sa pagmando maoy matarong ug alang sa kaayohan sa iyang mga linalang. Hinunoa, aron matubag pag-ayo ang tanang isyu nga gipatungha sa rebelyon ni Satanas, gihatagan niya ang iyang intelihenteng mga linalang ug kahigayonan sa pagpakita sa ilang pagpili sa iyang matarong nga pagmando.

Ang mga ganti sa paghigugma sa Diyos ug pagkahimong matinumanon kaniya labi pa kay sa temporaryong yugto sa pag-antos diha sa kamot sa Yawa. Ang kaso ni Job nag-ilustrar niini. Si Jehova nga Diyos nag-ayo kang Job gikan sa sakit nga gipahinabo sa Yawa kaniya. Dugang pa, ang Diyos “nagpanalangin sa ulahi nga panahon ni Job nga labaw pa kay sa iyang sinugdanan.” Sa kataposan, human sa 140-ka-tuig nga lugway sa kinabuhi, “si Job namatay, tigulang ug tugob sa mga adlaw.”​—Job 42:10-17.

Ang Kristohanong magsusulat sa Bibliya nga si Santiago naghisgot niini, nga nag-ingon: “Kamo nakadungog sa pag-agwanta ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug mabination.”​—Santiago 5:11, potnot.

Ang panahon hapit nang matapos alang kang Satanas ug sa iyang kalibotan. Sa dili madugay, wad-on sa Diyos ang tanang pag-antos nga gipahinabo sa rebelyon ni Satanas diha sa katawhan. Bisan ang mga patay pagabanhawon. (Juan 11:25) Unya, ang matinumanong mga tawo nga sama kang Job makabaton ug kahigayonan nga makaangkon ug kinabuhing walay kataposan sa paraiso sa yuta. Kining umaabot nga mga panalangin nga igabubo sa Diyos ibabaw sa iyang mga alagad magbindikar kaniya sa walay kataposan ingong usa ka matarong nga Soberano nga sa pagkatinuod “malumo kaayo sa pagmahal ug mabination.”

[Footnote]

[Kahon/Hulagway sa panid 8]

MAPINTAS NGA MGA DIYOSDIYOS SA MGA TAWO

ANG mga diyosdiyos kanhi subsob gihulagway ingong uhaw sa dugo ug unodnon. Sa pagpahimuot kanila, sunogon pa gani sa mga ginikanan ang ilang mga anak nga buhi diha sa kalayo. (Deuteronomio 12:31) Sa laing paghingapin, ang paganong mga pilosopo nagtudlo nga ang Diyos walay mga pagbati sama sa kasuko o kaluoy.

Ang dinasig-sa-demonyo nga mga panglantaw niining maong mga pilosopo nakaimpluwensiya sa nag-angkong katawhan sa Diyos, ang mga Hudiyo. Ang Hudiyong pilosopo nga si Philo, usa ka kadungan ni Jesus, nagpatuo nga ang Diyos “dili matandog sa bisan unsang pagbati.”

Bisan ang mga Pariseo nga estriktong sekta sa Hudiyo wala makalingkawas sa impluwensiya sa Gregong pilosopiya. Ilang gisagop ang mga pagtulon-an ni Plato nga ang tawo gisakpan sa imortal nga kalag nga napriso sa lawas sa tawo. Dugang pa, sumala sa unang-siglong historyador nga si Josephus, ang mga Pariseo nagtuo nga ang mga kalag sa daotang mga tawo “magaantos sa walay kataposang silot.” Apan, ang Bibliya wala maghatag pasikaran sa maong panglantaw.​—Genesis 2:7; 3:19; Ecclesiastes 9:5; Ezekiel 18:4.

Komosta na man ang mga sumusunod ni Jesus? Ila bang gitugotan ang ilang kaugalingon nga maimpluwensiyahan sa paganong pilosopiya? Sa pag-ila niini nga kapeligrohan, gipasidan-an ni apostol Pablo ang isigka-Kristohanon: “Pagbantay kamo: basin ug adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.”​—Colosas 2:8; tan-awa usab ang 1 Timoteo 6:20.

Ikasubo, ubay-ubay sa nag-angkong Kristohanong mga magtatan-aw niadtong ikaduha ug ikatulong mga siglo wala magtagad nianang pasidaana ug nagtudlo nga ang Diyos walay mga pagbati. Ang The Encyclopedia of Religion nag-ingon: “Sa kinatibuk-an, ang mga hiyas sa Diyos labaw nga gisabot sumala sa gipahayag sa Hudiyo ug pilosopikanhong panghunahuna niadtong panahona . . . Ang ideya nga ang Diyos nga Amahan magbaton ug mga pagbati sama sa kaluoy . . . sa kasagaran giisip nga dili madawat hangtod sa labing menos sa ulahing bahin sa ikakawhaang siglo.”

Mao nga, gisagop sa Kakristiyanohan ang bakak nga pagtulon-an sa usa ka diyos nga mapintas nga magasilot sa mga makasasala pinaagi sa pagpaantos kanila sa walay-kataposang pagsakit. Sa laing bahin, tin-aw nga gipahayag ni Jehova nga Diyos diha sa iyang Pulong, ang Bibliya, nga “ang suhol nga ginabayad sa sala maoy kamatayon,” dili walay-kataposang pagsakit.​—Roma 6:23.

[Credit Lines]

Ibabaw: Acropolis nga Museyo, Gresya

Kortesiya sa Britanikong Museyo

[Hulagway sa panid 7]

Ang katuyoan sa Diyos nga himoon ang yuta nga usa ka Edenikong paraiso kinahanglang matuman!