Ang Ganti ni Job​—Usa ka Tuboran sa Paglaom

“Si Jehova . . . nagpanalangin sa ulahi nga panahon ni Job labaw pa kay sa iyang una nga panahon.”​—JOB 42:12.

1. Unsay buhaton ni Jehova alang sa iyang katawhan, bisan pag mapaluya kaayo sila sa mga pagsulay?

SI Jehova “nahimong tigganti sa mga matinuorong nagapangita kaniya.” (Hebreohanon 11:6) Iyang ginaagda usab ang iyang debotadong katawhan sa pagpamatuod nga maisogon, bisan pa kon ang mga pagsulay nagpahimo kanila nga maluya sama sa mga patay. (Job 26:5; Pinadayag 11:3, 7, 11) Tinuod kana sa kaso sa nag-antos nga si Job. Bisag gibutangbutangan sa tulo ka maot nga mga maglilipay, siya wala mapahilom tungod sa kahadlok sa mga tawo. Hinunoa, siya mihatag ug maisogon nga pagpamatuod.

2. Bisan pag sila nag-antos sa paglutos ug kalisod, sa unsang paagi nakalahutay ang mga Saksi ni Jehova sa mga pagsulay?

² Daghang presenteng-adlawng mga Saksi ni Jehova ang nag-antos ug samang dagkong paglutos ug kalisod nga sa ingon sila nag-ungaw sa kamatayon. (2 Corinto 11:23) Hinunoa, sama kang Job, sila nakapakitag gugma sa Diyos ug nagbuhat ug pagkamatarong. (Ezekiel 14:14, 20) Ilang naantos usab ang ilang mga pagsulay nga determinado sa pagpahimuot kang Jehova, napalig-on sa paghatag ug maisogon nga pagpamatuod, ug tugob sa tinuod nga paglaom.

Si Job Mihatag ug Maisog nga Pamatuod

3. Unsang matanga sa pagpamatuod ang gihatag ni Job diha sa iyang kataposang pakigpulong?

³ Diha sa iyang kataposang pakigpulong, si Job mihatag ug labaw pa ka dako nga pagpamatuod kay sa gihatag niya sa una. Bug-os niyang napahilom ang iyang maot nga mga maglilipay. Pinaagi sa mahalang nga sulti, siya miingon: “Pagkadako sa imong tabang sa usa nga walay gahom!” (Job 26:2) Gidayeg ni Job si Jehova, kansang gahom maoy nagbitay sa atong yutan-ong globo nga walay gibitayan diha sa wanang ug maoy nagputos sa mabagang mga panganod ibabaw sa yuta. (Job 26:7-9) Bisan pa, si Job miingon nga ang maong mga katingalahan ‘maoy kadaplinan lamang sa mga dalan ni Jehova.’​—Job 26:14.

4. Unsay giingon ni Job bahin sa integridad, ug nganong nakasulti siya niadto?

⁴ Nakatino sa iyang pagkawalay-sala, si Job miingon: “Hangtod nga ako mamatay dili ko gayod isalikway ang akong integridad gikan sa akong kaugalingon!” (Job 27:5) Sukwahi sa bakak nga mga sumbong nga gipahamtang kaniya, siya walay nahimo nga takos sa nahitabo kaniya. Si Job nahibalo nga si Jehova dili mamati sa mga pag-ampo sa mga apostata apan moganti sa mga maghuhupot sa integridad. Kini magpahinumdom kanato nga sa dili madugay ang bagyo sa Armageddon moluka sa daotan gikan sa ilang dapit sa gahom, ug sila dili makaikyas sa mabangis nga kamot sa Diyos. Hangtod unya, ang katawhan ni Jehova magalakaw diha sa ilang integridad.​—Job 27:11-23.

5. Sa unsang paagi gihubit ni Job ang tinuod nga kaalam?

⁵ Handurawa ang tulo ka tawo nga maalamon sa kalibotan nga namati samtang gipakita ni Job nga gigamit sa tawo ang iyang mga katakos sa pagpangitag bulawan, plata, ug ubang mga bahandi sa yuta ug sa dagat. “Apan,” siya miingon, “ang bag nga puno sa kaalam labaw pag bili kay sa usa ka bag nga puno sa mga mutya.” (Job 28:18) Ang maot nga mga maglilipay ni Job dili makapalit ug tinuod nga kaalam. Ang tuboran niini mao ang Maglalalang sa hangin, sa ulan, sa kilat, ug sa dalogdog. Sa pagkamatuod, ang matahaon nga “kahadlok kang Jehova​—mao ang kaalam, ug ang paglikay sa daotan mao ang salabotan.”​—Job 28:28.

6. Nganong gihisgotan ni Job ang iyang unang panahon sa kinabuhi?

⁶ Bisan pa sa iyang mga pag-antos, si Job wala mohunong sa pag-alagad kang Jehova. Imbes talikdan ang Labing Hataas, kining tawo sa integridad nangandoy sa iyang kanhing “pagkasuod sa Diyos.” (Job 29:4) Si Job wala mangandak sa dihang iyang giasoy kon sa unsang paagi iyang ‘giluwas ang mga sinakit, gisul-oban ang iyang kaugalingon sa pagkamatarong, ug nahimong usa ka tinuod nga amahan sa kabos.’ (Job 29:12-16) Hinunoa, iyang gikutlo ang mga panghitabo sa iyang kinabuhi ingong usa ka matinumanong alagad ni Jehova. Ikaw ba nakatukod nag sama niana ka maayo nga rekord? Siyempre, giyagyag usab ni Job ang bakak nga mga sumbong nga gihimo sa tulo ka relihiyosong limbongan.

7. Unsang matanga sa tawo si Job sa una?

⁷ Si Job gikataw-an sa mas batan-ong mga lalaki ‘kansang mga amahan dili gayod niya ikabutang uban sa mga iro sa iyang kahayopan.’ Siya giayran ug gilud-an. Bisag grabe na ang iyang kasakit, si Job wala pakitaig konsiderasyon. (Job 30:1, 10, 30) Tungod kay bug-os ang iyang debosyon kang Jehova, hinunoa, siya may hinlo nga konsensiya ug nakaingon: “Ako iyang timbangon diha sa husto nga mga timbangan ug mahibaloan sa Diyos ang akong integridad.” (Job 31:6) Si Job dili usa ka mananapaw ni manglilingla, ug siya wala mapakyas sa pagtabang sa nanginahanglan. Bisag siya bahandianon, wala gayod siya magsalig sa materyal nga bahandi. Dugang pa, si Job wala makigbahin sa pagsimba sa diyosdiyos pinaagi sa paghatag ug debosyon sa walay-kinabuhi nga mga butang sama sa bulan. (Job 31:26-28) Nagsalig sa Diyos, siya naghatag ug maayong pananglitan ingong usa ka maghuhupot sa integridad. Bisan pa sa tanan niyang mga pag-antos ug sa presensiya sa maot nga mga maglilipay, si Job mihimog hinashasan kaayong depensa ug mihatag ug maayo kaayo nga pamatuod. Ang iyang mga pulong sanglit natapos na, siya nagpaabot sa Diyos ingong iyang Maghuhukom ug Maggaganti.​—Job 31:35-40.

Si Elihu Misulti

8. Kinsa si Elihu, ug sa unsang paagi gipasundayag niya ang iyang pagtahod ug kaisog?

⁸ Diha sa duol mao ang batan-ong lalaki nga si Elihu, usa ka kaliwat sa anak ni Nahor nga si Buz ug busa layo nga paryente sa higala ni Jehova nga si Abraham. (Isaias 41:8) Nagpakitag pagtahod si Elihu sa mas gulanggulang nga mga lalaki pinaagi sa pagpamati sa duha ka kiliran sa debate. Bisan pa, maisogon siya nga misulti labot sa mga butang nga niana sila nasayop. Pananglitan, misilaob ang iyang kasuko kang Job “sa pagtawag sa iyang kaugalingong kalag nga matarong inay ang Diyos.” Ang kasuko ni Elihu ilabinang gitumong batok sa maot nga mga maglilipay. Ang ilang mga pulong daw nagbayaw sa Diyos apan sa pagkatinuod nagbiaybiay kaniya pinaagi sa paglaban sa kiliran ni Satanas sa kontrobersiya. “Puno sa mga igsusulti” ug gipalihok sa balaang espiritu, si Elihu maoy usa ka walay-gidapigang saksi ni Jehova.​—Job 32:2, 18, 21.

9. Sa unsang paagi gipasumbingay ni Elihu ang pagkapasig-uli ni Job?

⁹ Si Job mas nabalaka sa pagbayaw sa iyang kaugalingon kay sa Diyos. Sa pagkatinuod, siya nakiglalis sa Diyos. Apan, sa dihang hapit nang mamatay ang kalag ni Job, dihay timaan nga mapasig-uli. Sa unsang paagi? Aw, si Elihu napukaw sa pagsulti nga gipaboran ni Jehova si Job niini nga mensahe: “Luwasa siya gikan sa pagkahulog sa gahong! Nakakaplag ako ug usa ka lukat! Pabag-oha ang iyang unod labi pa kay sa bata; pabalika siya sa mga adlaw sa iyang batan-ong kusog.”​—Job 33:24, 25.

10. Diin kutob nga nasulayan si Job, apan bahin sa unsa nga kita makatino sumala sa 1 Corinto 10:13?

¹⁰ Gibadlong ni Elihu si Job sa pag-ingon nga walay kapuslanang malipay diha sa Diyos pinaagi sa paghupot sa integridad. Miingon si Elihu: “Halayo gikan sa matuod nga Diyos nga siya maghimo ug kadaotan, ug ang Labing Makagagahom nga magbuhat siya ug pagkadili-matarong! Kay sumala sa binuhatan sa yutan-ong tawo siya magaganti kaniya.” Si Job nagdalidali sa paglihok sa pagpasiugda sa iyang kaugalingong pagkamatarong, apan iyang gihimo kadto tungod sa kakulang ug igong kahibalo ug pagsabot. Si Elihu midugang: “Tugoti nga masulayan si Job sa bug-os tungod sa pagtubag niya sama sa mga tawong daotan.” (Job 34:10, 11, 35, 36) Sa susama, ang atong pagtuo ug integridad bug-os nga mapatud-an kon kita ‘bug-os nga masulayan’ sa usa ka paagi. Bisan pa, ang atong mahigugmaon langitnong Amahan dili motugot nga kita matental nga labaw sa atong maantos.​—1 Corinto 10:13.

11. Sa dihang grabe nga pagasulayon, unsa ang angay natong hinumdoman?

¹¹ Samtang nagpadayon si Elihu, iyang gipakita pag-usab nga gipasobrahag pasiugda ni Job ang iyang kaugalingong pagkamatarong. Ang pagtagad angay isentro diha sa atong Dakong Magbubuhat. (Job 35:2, 6, 10) Ang Diyos “dili magatipig nga buhi sa bisan kinsa nga daotan, apan ang katarongan maoy iyang ihatag sa mga sinakit,” miingon si Elihu. (Job 36:6) Walay usa ang makaduhaduha sa paagi sa Diyos ug moingon nga siya dili-makataronganon. Siya labaw pa nga hataas kay sa atong nahibaloan, ug ang gidaghanon sa iyang mga tuig dili-matugkad sa kawalay-kataposan. (Job 36:22-26) Sa dihang sulayan sa hilabihan, hinumdomi nga ang atong buhi-kanunay nga Diyos matarong ug magaganti kanato sa atong matinumanong mga buhat sa iyang kadayeganan.

12. Unsay gipaila sa panghinapos nga mga pulong ni Elihu mahitungod sa pagpakanaog sa Diyos ug paghukom sa daotan?

¹² Samtang nagsulti si Elihu, dihay talisugod nga unos. Sa dihang kini nagkaduol, ang iyang kasingkasing misugod sa pagkubakuba. Iyang gihisgotan ang dagkong mga butang nga nahimo ni Jehova ug miingon: “Pamatia kini, Oh Job; hunong ug palandonga ang katingalahang mga buhat sa Diyos.” Sama kang Job, kinahanglang atong palandongon ang katingalahang mga buhat ug makapukawg-kahadlok nga dignidad sa Diyos. “Mahitungod sa Makagagahom, kita wala pa makakaplag kaniya,” miingon si Elihu. “Siya dako uyamot sa kagahom, ug hustisya ug sa kadagaya sa pagkamatarong siya dili mobiaybiay. Busa pasagdi nga mahadlok ang mga tawo kaniya.” (Job 37:1, 14, 23, 24) Ang pangataposang mga pulong ni Elihu nagpahinumdom kanato sa dihang ipakanaog sa Diyos sa dili madugay ang paghukom diha sa daotan, dili niya biaybiayon ang hustisya ug ang pagkamatarong ug magatipig nga buhi niadtong may kahadlok kaniya ingong iyang matinahurong mga magsisimba. Pagkadakong pribilehiyo nga mahilakip sa maong mga maghuhupot sa integridad kinsa nagaila kang Jehova ingon nga mao ang Soberano sa Uniberso! Lumahutay sama kang Job, ug ayaw gayod itugot nga mapalayo ka sa Yawa gikan sa imong gipanalanginang dapit taliwala niining malipayong mga panon.

Gitubag ni Jehova si Job

13, 14. (a) Bahin sa unsa nga misugod si Jehova sa pagpangutana kang Job? (b) Unsang mga punto ang makat-onan gikan sa ubang mga pangutana nga gisukna sa Diyos kang Job?

¹³ Pagkadako seguro sa katingala ni Job sa dihang nakigsulti si Jehova kaniya pinaagi sa alimpulos! Kadto nga unos maoy usa ka buhat sa Diyos, dili sama sa dakong hangin nga gigamit ni Satanas sa pagpahugno sa balay ug sa pagpatay sa mga anak ni Job. Si Job wala makatingog samtang nangutana ang Diyos: “Diin ka man sa pagtukod ko sa kalibotan? . . . Kinsa man ang nagpahiluna sa pamag-ang niana, sa dihang nagdungan sa pag-awit ang mga bituon sa kabuntagon, ug ang tanang mga anak sa Diyos misugod sa pagsinggit sa kalipay?” (Job 38:4, 6, 7) Gisigihan ni Jehova ug pangutana si Job bahin sa dagat, sa panganod nga maoy bisti niini, sa kaadlawon, sa mga ganghaan sa kamatayon, sa kahayag ug kangitngit, ug sa hugpong sa mga bituon. Si Job walay ikasulti sa dihang gipangutana: “Nasayod ba ikaw sa mga balaod sa kalangitan?”​—Job 38:33.

¹⁴ Ang ubang mga pangutana nagpakita nga sa wala pa lalanga ang tawo ug gipamando ibabaw sa isda, sa langgam, sa mga hayop, ug sa nagakamang nga mga linalang, sila gitagan-an sa Diyos​—nga walay bisan unsang tawhanong tabang o tambag. Ang dugang nga mga pangutana ni Jehova naghisgot sa mga linalang sama sa ihalas nga turong baka, sa ostrich, ug sa kabayo. Si Job nangutana: “Tungod ba sa imong mando nga magalupad sa itaas ang agila ug magabalay sa iyang salag sa kahitas-an?” (Job 39:27) Siyempre dili gayod! Handurawa ang reaksiyon ni Job sa dihang gipangutana siya sa Diyos: “Angay ba nga makiglantugi sa Makagagahom ang tigpangitag-sayop?” Dili ikahibulong nga si Job miingon: “Tan-awa! ako walay pulos. Unsay akong ikatubag kanimo? Gitakpan ko ang akong baba sa akong kamot.” (Job 40:2, 4) Sanglit husto kanunay si Jehova, kon kita matental sa pagreklamo batok kaniya, angay natong ‘ibutang ang atong kamot sa atong baba.’ Ang mga pangutana sa Diyos nagpadako usab sa iyang pagkalabaw, dignidad, ug kusog, sama sa gipasundayag diha sa kalalangan.

Behemoth ug Leviathan

15. Ang Behemoth gituohan nga unsang matanga sa hayop, ug unsa ang pipila ka kinaiyahan niini?

¹⁵ Sunod nga gihisgotan ni Jehova ang Behemoth, nga sagad gituohan nga mao ang hippopotamus. (Job 40:15-24) Talagsaon tungod sa pagkadako niini, sa kabug-at, ug sa lig-on nga panit, kining sagbot-ug-kinaon nga mananap ‘nagakaon ug lunhawng balili.’ Ang iyang gahom ug kusog anaa sa iyang mga bat-ang ug sa ugat sa iyang tiyan. Ang mga bukog sa iyang mga batiis kusgan sama sa “mga tubo nga tumbaga.” Ang Behemoth dili matarantar sa kalit nga pagbaha apan makasungsong uban sa dakong kasayon sa bul-og sa tubig.

16. (a) Ang paghubit sa Leviathan mohaom sa unsang mananapa, ug unsa ang pipila ka kamatuoran bahin niini? (b) Ang gahom sa Behemoth ug Leviathan mahimong magsugyot ug unsa bahin sa pagtuman sa mga buluhaton diha sa pag-alagad kang Jehova?

¹⁶ Gipangutana usab sa Diyos si Job: “Makuha ba nimo ang Leviathan sa taga-sa-isda, o mabitik mo ba sa pisi ang iyang dila?” Ang paghubit sa Leviathan mohaom sa buaya. (Job 41:1-34) Kini dili mohimog pakigsabot sa pakigdait kang bisan kinsa, ug walay tawo nga maayog kabuot ang mangahas sa pagpukaw niining mananapa. Ang mga pana dili makaabog kaniya, ug “kataw-an niini ang hinadyong sa usa ka bangkaw.” Kutawon sa nasuko nga Leviathan ang kahiladman sama sa nagbukal nga kolon sa lana. Ang kamatuoran nga ang Leviathan ug Behemoth mas gamhanan kay kang Job nakatabang sa pagpaubos kaniya. Atong dawaton usab nga mapainubsanon nga dili kita gamhanan sa atong kaugalingon. Kita nagkinahanglan sa hinatag-sa-Diyos nga kaalam ug kusog aron makalikay sa mga tango ni Satanas, ang Serpente, ug sa pagtuman sa atong mga buluhaton diha sa pag-alagad kang Jehova.​—Filipos 4:13; Pinadayag 12:9.

17. (a) Sa unsang paagi si Job ‘nakakita sa Diyos’? (b) Unsay gipamatud-an sa mga pangutana nga wala makatubag si Job, ug sa unsang paagi kini makatabang kanato?

¹⁷ Bug-os nga napaubos, si Job midawat sa iyang sayop nga hunahuna ug miadmiter nga siya misulti nga kulang sa kahibalo. Bisan pa, siya nagpahayag ug pagtuo nga iyang “makita ang Diyos.” (Job 19:25-27) Sa unsang paagi mahitabo kana, sanglit walay tawo ang makakita ni Jehova ug magpabiling buhi? (Exodo 33:20) Sa pagkamatuod, nakita ni Job ang pagpasundayag sa diyosnong gahom, nakadungog sa pulong sa Diyos, ug nabuksan ang iyang mga mata sa pagsabot aron makakita sa kamatuoran bahin kang Jehova. Busa ang tanang gipanulti ni Job iyang ‘gibakwi ug naghinulsol sa abog ug abo.’ (Job 42:1-6) Ang daghang pangutana nga wala niya matubag nagpamatuod sa pagkalabaw sa Diyos ug nagpakita sa pagkagamay sa tawo, bisan sa usa nga debotado kang Jehova sama kang Job. Kini makatabang kanato sa pagkakita nga ang atong mga intereses dili angay pagaunahon kay sa pagbalaan sa ngalan ni Jehova ug sa pagbindikar sa iyang pagkasoberano. (Mateo 6:9, 10) Ang angay natong hatagag pangunang pagtagad mao ang pagpabiling maunongon kang Jehova ug ang pagpasidungog sa iyang ngalan.

18. Unsa ang kinahanglang buhaton sa maot nga mga maglilipay ni Job?

¹⁸ Apan, komosta ang bahin sa nagpakamatarong-sa-kaugalingon nga maot nga mga maglilipay? Si Jehova may katarongan unta sa pagpatay kang Eliphaz, Bildad, ug Sophar tungod sa ilang pagsultig dili-tinuod bahin kaniya, sama sa gihimo ni Job. “Pagkuha kamo ug pito ka torong baka ug pito ka karnero ug adtoa ang akong alagad nga si Job,” miingon ang Diyos, “ug maghalad kamo ug halad nga sinunog alang sa inyong kaugalingon; ug si Job nga akong alagad mag-ampo alang kaninyo.” Ang tulo nagpaubos ug misunod. Ang maghuhupot sa integridad nga si Job maoy miampo alang kanila, ug nakita ni Jehova ang iyang pag-ampo nga dalawaton. (Job 42:7-9) Apan unsay ikasulti bahin sa asawa ni Job, kinsa miagda kaniya sa pagtunglo sa Diyos ug magpakamatay? Mopatim-aw nga nagkauli sila ni Job tungod sa kaluoy sa Diyos.

Gisaad nga mga Ganti Mohatag Kanatog Paglaom

19. Labot kang Job, sa unsang paagi gipakita ni Jehova ang Iyang pagkalabaw batok sa Yawa?

¹⁹ Sa dihang mihunong na si Job sa pagkabalaka bahin sa iyang mga pag-antos ug napasig-uli diha sa pag-alagad sa Diyos, gibag-o ni Jehova ang mga butang alang kaniya. Human nakaampo si Job alang sa tulo ka tawo, ang Diyos ‘nagbakwi sa iyang binihag nga kahimtang’ ug gihatagan siya ug ‘duha ka pilo sa iyang nabatonan kaniadto.’ Gipakita ni Jehova ang Iyang pagkalabaw kay sa Yawa pinaagi sa pagpahunong sa makahatag ug sakit nga kamot ni Satanas ug milagrosong giayo si Job. Gipasibog usab sa Diyos ang mga panon sa demonyo ug gipugngan sila pinaagi sa pagbutang ug panalipod na usab kang Job pinaagi sa Iyang nagkampo nga manulonda.​—Job 42:10; Salmo 34:7.

20. Sa unsang mga paagi gigantihan ug gipanalanginan ni Jehova si Job?

²⁰ Ang mga igsoong lalaki, mga igsoong babaye, ug mga kaila kaniadto ni Job nangabot ug nangaon uban kaniya, nakigduyog sa iyang pagbati, ug naglipay kaniya bahin sa tanang kadaot nga gitugot ni Jehova nga modangat kaniya. Ang matag usa kanila mihatag kang Job ug salapi ug singsing nga bulawan. Gipanalanginan ni Jehova ang ulahi nga panahon ni Job kay sa iyang una nga panahon, mao nga siya nakabaton ug 14,000 ka karnero, 6,000 ka kamelyo, 1,000 ka baka nga igdadaro, ug 1,000 ka asno nga baye. Si Job nakabaton na usab ug pito ka anak nga lalaki ug tulo ka anak nga babaye, mao gihapong gidaghanon nga iyang nabatonan sa una. Ang iyang mga anak nga babaye​—si Jemimah, Keziah, ug Keren-happuch​—mao ang labing maanyag nga mga babaye sa yuta, ug gihatagan sila ni Job ug kabilin uban sa ilang mga igsoong lalaki. (Job 42:11-15) Dugang pa, si Job nabuhi ug laing 140 ka tuig ug nakakitag upat ka kaliwatan sa iyang mga anak. Ang asoy gitapos: “Sa kataposan si Job namatay, tigulang ug puno sa mga adlaw.” (Job 42:16, 17) Ang paglugway sa iyang kinabuhi maoy milagrosong buhat ni Jehova nga Diyos.

21. Sa unsang paagi kita matabangan sa asoy sa Kasulatan mahitungod kang Job, ug determinado kita sa pagbuhat ug unsa?

²¹ Ang asoy sa Kasulatan bahin kang Job magpaamgo pa kanatog dugang sa mga laraw ni Satanas ug motabang kanato sa pagkakita kon sa unsang paagi ang pagkasoberano sa uniberso nalangkit sa tawhanong integridad. Sama kang Job, ang tanan nga nahigugma sa Diyos pagasulayan. Apan kita makalahutay sama kang Job. Iyang naantos ang iyang mga pagsulay uban ang pagtuo ug paglaom, ug daghan kaayo ang iyang ganti. Ingong mga alagad ni Jehova karong adlawa, atong nabatonan ang matuod nga pagtuo ug paglaom. Ug pagkadakong paglaom ang gitagana sa Dakong Maggaganti sa atubangan sa matag usa kanato! Ang pagsilsil diha sa hunahuna sa langitnong ganti makatabang sa mga dinihogan sa pag-alagad sa Diyos nga maunongon sa nahibilin sa ilang kinabuhi sa yuta. Daghan niadtong adunay yutan-ong palaabuton dili na gayod mamatay pa, apan kadtong mangamatay pagagantihan ug pagkabanhaw diha sa Paraiso sa yuta, uban kang Job mismo. Uban niining tinuod nga paglaom diha sa kasingkasing ug hunahuna, pasagdi nga kadtong tanan nga nahigugma sa Diyos magpamatuod kang Satanas nga usa ka bakakon pinaagi sa pagbarog nga malig-on diha sa kiliran ni Jehova ingong mga maghuhupot sa integridad ug malig-ong mga tigpaluyo sa iyang pagkasoberano sa uniberso.

Unsaon Nimo Pagtubag?

◻ Unsa ang pipila ka punto nga gihimo ni Job diha sa iyang kataposang tubag sa iyang maot nga mga maglilipay?

◻ Sa unsang paagi napamatud-an si Elihu nga usa ka walay gidapigang saksi ni Jehova?

◻ Unsa ang pipila ka pangutana sa Diyos kang Job, ug unsay epekto niini?

◻ Sa unsang paagi nakabenepisyo ka gikan sa asoy sa Kasulatan bahin kang Job?

[Hulagway sa panid 18]

Ang mga pulong ni Jehova bahin sa Behemoth ug Leviathan nakatabang sa pagpaubos kang Job