Pakigtigom Uban Niadtong Nahadlok sa Diyos

“ANG mga tawo sa tanang dapit nangandoy ug kagawasan gikan sa kahadlok​—kahadlok sa kapintasan, kahadlok sa kawalay-trabaho, ug kahadlok sa grabeng sakit. Kita nangandoy usab niana. . . . Kon mao, nganong hisgotan nato ang pag-ugmad sa kahadlok?” Kanang makapainteres nga pangutana gibangon sa mamumulong sa pasukaranang pakigpulong sa matag “Diyosnong Kahadlok” nga Distritong mga Kombensiyon, nga gisugdan niadtong Hunyo 1994.

Ang minilyong mitambong​—una sa Amerika del Norte, dayon sa ulahi sa Uropa, Sentral ug Sur Amerika, Aprika, Asia, ug mga kaislahan sa dagat​—naghinamhinam nga makakat-on sa pag-ugmad sa maong matang sa kahadlok. Ngano? Tungod kay ang atong pagkadawat ug bahin sa mga panalangin nga gitagana ni Jehova nga Diyos alang sa iyang katawhan nagdepende sa atong pagbaton ug diyosnong kahadlok. Ang mga kombensiyonista nagtigom aron makakat-on bahin sa diyosnong kahadlok, ug sulod sa tulo ka adlaw nga programa, daghan silag nakat-onan bahin niining hinungdanong Kristohanong hiyas.

‘Kahadloki ang Diyos ug Bantayi ang Iyang mga Sugo’

Mao kana ang tema sa unang adlaw sa kombensiyon, binase sa Ecclesiastes 12:13. Unsay kahulogan sa pagkahadlok sa Diyos? Sa una gayong bahin sa programa, gipatin-aw sa tsirman sa kombensiyon nga ang diyosnong kahadlok nagbanaag sa kahingangha ug halalom nga pagtahod kang Jehova ingon man sa maayong kahadlok nga dili makapahimuot kaniya. Ang maong diyosnong kahadlok dili daotan; makaayo kini ug husto.

Sa unsang paagi kining maayong kahadlok makahatag ug kaayohan kanato? Ang sunod nga pakigpulong, “Ayawg Kalaay ug Ayawg Undang,” nagpatin-aw nga ang diyosnong kahadlok magpalihok kanato aron bantayan ang mga kasugoan sa Diyos uban ang kalipay. Inubanan sa gugma alang sa Diyos ug silingan, ang maong kahadlok mohatag kanato ug espirituwal nga kusog. Oo, ang diyosnong kahadlok motabang kanato aron dili maglangaylangay diha sa lumba alang sa kinabuhing walay kataposan.

Sunod sa programa maoy mga interbiyo nga nagpakitag buhing mga pamatuod nga ang diyosnong kahadlok makapatunhay kanato. Kadtong mga giinterbiyo misugilon kon sa unsang paagi ang matinahorong kahadlok sa Diyos nakaimpluwensiya kanila nga magpadayon sa ministeryo bisan pa sa kakulang sa pagbati, kawalay-pagtagad, o paglutos ug nakatabang kanila sa pag-agwanta bisan sa atubangan sa malisod personal nga mga pagsulay.

Apan, nganong ang pipila ka tawo dunay diyosnong kahadlok samtang ang uban wala? Sa pakigpulong “Pag-ugmad ug Pagpahimulos Gikan sa Diyosnong Kahadlok,” gibatbat sa mamumulong sa pasukaranang pakigpulong nga sa Jeremias 32:37-39, si Jehova misaad nga hatagan Niya ug mahinadlokon-sa-Diyos nga kasingkasing ang Iyang katawhan. Gitanom ni Jehova ang diyosnong kahadlok sa atong mga kasingkasing. Sa unsang paagi? Pinaagi sa iyang balaang espiritu ug sa iyang dinasig nga Pulong, ang Bibliya. Apan, dayag nga kinahanglang maningkamot kita sa pagtuon sa Pulong sa Diyos ug sa pagpahimulos sa bug-os sa dagayang espirituwal nga mga tagana nga iyang gihimo. Kini naglakip sa atong mga kombensiyon ug mga tigom sa kongregasyon, nga nagatabang kanato sa pagkat-on sa pagkahadlok kaniya.

Ang programa sa hapon gibuksan pinaagi sa pahamangno nga mosalig kang Jehova ug sa iyang Pulong. Kini gisundan sa usa ka panaghisgot labot sa pangunang mga paagi nga ang Gingharian angayng makatandog sa atong kinabuhi ingong mga Kristohanon.

Dayon gipresentar diha sa kombensiyon ang una sa tulo ka simposyum sa kombensiyon. “Diyosnong Kahadlok Nagadasig Kanato sa Pagsugot sa Balaang mga Kinahanglanon” maoy tema niining simposyum, nga mihatag ug pagtagad sa pamilya. Ang mosunod mao ang pipila ka pananglitan sa Kasulatanhon​—ug praktikal​—nga tambag nga gihatag.

□ Alang sa mga bana: Ang diyosnong kahadlok kinahanglang magpalihok sa lalaki aron higugmaon ang iyang asawa sama sa iyang kaugalingong lawas. (Efeso 5:28, 29) Ang usa ka lalaki dili motuyo sa pagsamad sa iyang kaugalingong lawas, pakaulawan ang iyang kaugalingon sa atubangan sa iyang mga higala, o manabi sa iyang kaugalingong mga kahuyangan. Mao nga, kinahanglang iyang tratahon ang iyang asawa nga may dignidad ug pagtahod nga iyang gihatag sa iyang kaugalingon.

□ Alang sa mga asawa: Ang diyosnong kahadlok ni Jesus nagpalihok kaniya nga ‘pahimut-an kanunay ang Diyos.’ (Juan 8:29) Usa kini ka maayong kinaiya nga sundogon sa mga asawa sa pagpakiglabot sa ilang mga bana.

□ Alang sa mga ginikanan: Ang Kristohanong mga ginikanan makapakita ug diyosnong kahadlok pinaagi sa pagkahimong seryoso sa ginikananhong mga kaakohan, nga nagalantaw sa ilang mga anak ingong panulondon gikan kang Jehova. (Salmo 127:3) Ang pangunang tumong sa mga ginikanan mao ang pagmatuto sa ilang mga anak aron mahimong tinuod nga mga Kristohanon.

□ Alang sa mga anak: Si Jehova nagtudlo sa mga anak nga sugton ang ilang “mga ginikanan kahiusa sa Ginoo.” (Efeso 6:1) Mao nga, ang pagsugot sa ilang mga ginikanan maoy pagsugot sa Diyos.

Ang paniklop nga pakigpulong sa maong adlaw nakatandog sa atong mga balatian, tungod kay kini naghisgot sa dulot nga mga pagbati nga naeksperyensiyahan natong tanan sa dihang mamatyan kita ug minahal. Hinunoa, sa mga tungatungang bahin sa pakigpulong dihay sorpresa. Gilipay sa mamumulong ang mga mamiminaw pinaagi sa pagpahibalo sa giluwatang bag-ong brosyur nga Sa Dihang ang Imong Minahal Mamatay. Kining 32-ka-panid, upat-ug-kolor nga publikasyon daghag ikasulti nga makatabang niadtong nagbangotan aron makasabot ug makasagubang sa mga pagbati ug mga emosyon nga motungha human sa kamatayon sa usa nga minahal. Naagian ba nimo nga wala kay ikasulti sa usa nga nagbangotan? Usa ka seksiyon niining maong brosyur naghisgot kon sa unsang paagi kita makatabang niadtong nagbangotan. Samtang naminaw sa mamumulong, daghan diha sa mamiminaw ang naghunahuna kon kinsa kadtong makabenepisyo gikan niining bag-ong brosyur.

‘Paghimog Sagradong Pag-alagad Uban sa Diyosnong Kahadlok ug Kahingangha’

Mao kadto ang tema sa ikaduhang adlaw, binase sa Hebreohanon 12:28. Sa programa sa buntag gipahayag ang ikaduhang simposyum, “Mga Kongregasyon nga Nagalakaw Diha sa Kahadlok Kang Jehova.” Ang unang bahin naghisgot sa pagtambong sa mga tigom. Ang atong presensiya sa mga tigom nagpasundayag sa atong pagtahod sa Diyos ug sa iyang espirituwal nga mga tagana. Pinaagi sa pagtambong, atong gipakita nga kita nahadlok sa iyang ngalan ug ikag nga motuman sa iyang kabubut-on. (Hebreohanon 10:24, 25) Gipatin-aw sa ikaduhang mamumulong nga aron ang kongregasyon ingong kinatibuk-an magalakaw diha sa kahadlok kang Jehova, ang matag indibiduwal kinahanglan mohimo sa iyang bahin sa pagmentinar sa maayong batasan. Ang kataposang mamumulong naghisgot bahin sa pribilehiyo ug kaakohan nga nabatonan sa tanang Kristohanon​—pagwali nga walay hunong sa maayong balita. Hangtod kanus-a nga padayon kitang magawali? Hangtod si Jehova moingon nga husto na.​—Isaias 6:11.

“Ang Kangaya ni Jehova Maoy Inyong Kuta” mao ang tema sa misunod nga pakigpulong, ingon sa gikobrehan karon sa tun-anang mga artikulo niining magasina. (Nehemias 8:10) Nganong ang katawhan ni Jehova magmangayaon? Gilaraw sa mamumulong ang daghang katarongan. Ang usang hinungdanon kaayo mao nga ang suod nga relasyon uban sa Diyos naghimo kanato nga labing malipayong katawhan sa yuta. Hunahunaa ra, pahinumdom sa mamumulong ngadto sa mga kombensiyonista, duna kitay pribilehiyo nga maapil sa katawhan nga gidani ni Jehova ngadto kang Jesu-Kristo. (Juan 6:44) Pagkakusganong katarongan alang sa kalipay!

Ang lutaw nga punto sa matag kombensiyon mao ang bawtismo, ug ang “Diyosnong Kahadlok” nga mga Kombensiyon wala mahigawas niini. Sa pakigpulong “Pagpahinungod ug Bawtismo sa Kahadlok Kang Jehova,” gisaysay sa mamumulong nga ang personal nga mga obligasyon sa tanang bawtismadong tawo maoy upat ka pilo: (1) Kinahanglang tun-an nato ang Pulong sa Diyos uban sa tabang sa mga publikasyon nga makatabang sa pagsabot ug pagpadapat niana; (2) kinahanglang moampo kita; (3) kinahanglang makig-uban kita sa isigkamagtutuo sa mga tigom sa kongregasyon; ug (4) kinahanglang magpamatuod kita bahin sa ngalan ug Gingharian ni Jehova.

Ang programa sa Sabado sa hapon gisugdan pinaagi sa makahatag-pagsalig nga ulohan nga “Usa ka Katawhan nga Wala Isalikway ni Jehova.” Katloan-ug-lima ka siglo kanhi, sa dihang ang nasod sa Israel nag-atubang sa malisod nga mga panahon, mihatag ug garantiya si Jehova pinaagi kang Moises, nga nagaingon: “Si Jehova nga imong Diyos . . . dili magpasagad kanimo ni magabiya kanimo sa bug-os.” (Deuteronomio 31:6) Si Jehova napamatud-ang matinud-anon sa maong garantiya pinaagi sa pagpanalipod sa mga Israelinhon sa dihang sila misulod sa Yutang Saad ug nanag-iya niana. Karong adlawa, sa dihang nag-atubang sa malisod nga mga pagsulay, kita usab makabaton ug bug-os nga pagsalig nga dili kita pasagdan ni Jehova, basta suod kita nga magpabilin kaniya ug maminaw sa mga tambag sa iyang Pulong.

Sa unsang paagi ikaw makakaplag ug kalipay sa pagbasag Bibliya? Sa pakigpulong “Basaha ang Pulong sa Diyos, ang Balaang Bibliya, Adlaw-adlaw,” gisugyot sa mamumulong ang pagbasa uban ang mausisahong hunahuna ug nangutana sa mga pangutanang sama niini: Unsay gitudlo niining maong asoy bahin sa mga hiyas ug mga paagi ni Jehova? Sa unsang paagi ako labaw pang mahisama kang Jehova niining mga bahina? Ang pagbasa sa Bibliya niining paagiha maoy makalilipay ug magantihong kasinatian.

Sunod nga gipunting ang pagtagad sa ikatulong simposyum sa programa, “Mga Tagana sa Pagtabang Niadtong Nahadlok Kang Jehova.” Bisan tuod si Jehova dili mohimog mga milagro alang sa iyang mga alagad karon, sa walay duhaduha siya nagatabang niadtong nahadlok kaniya. (2 Pedro 2:9) Kining maong simposyum nagtagad sa upat ka tagana gikan ni Jehova aron tabangan kita niining malisod nga mga panahon: (1) Pinaagi sa iyang espiritu, si Jehova nagahatag kanato ug gahom nga labaw sa atong kaugalingong kusog aron humanon ang iyang mga buluhaton. (2) Pinaagi sa iyang Pulong, siya nagataganag tambag ug giya alang kanato. (3) Pinaagi sa lukat, siya nagahatag kanato ug mahinlong tanlag. (4) Pinaagi sa iyang organisasyon, lakip sa mga ansiano, siya nagatagana kanato ug direksiyon ug panalipod. (Lucas 11:13; Efeso 1:7; 2 Timoteo 3:16; Hebreohanon 13:17) Pinaagi sa paggamit sa bug-os niining maong mga tagana, makaarang kita sa pag-agwanta ug sa ingon makabaton sa pag-uyon ni Jehova.

Ang kataposang pakigpulong sa Sabado sa hapon nag-ulohang “Ang Kulbahinam nga Adlaw ni Jehova Haduol Na,” pinasikad sa tagna ni Malakias. Dihay kulbahinam nga mga adlaw sa milabayng kasaysayan, maingon niadtong pagpahamtang ug paghukom sa Jerusalem niadtong 70 K.P. Apan ang labing kulbahinam sa tanang adlaw nga maagian sa tawo mao ang umaabot nga adlaw ni Jehova sa dihang ‘ang panimalos ipahamtang kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus.’ (2 Tesalonica 1:6-8) Unsa na ka duol kana? Ang mamumulong nagpahayag: “Ang kataposan haduol na! Si Jehova nasayod nianang maong adlaw ug takna. Dili niya usbon ang iyang tagal. Kita ginahangyo sa paglahutay nga mapailobon.”

Lisod tuohan nga duha na ka adlaw ang milabay. Unsa kahay programa sa kataposang adlaw?

“Kahadloki ang Diyos ug Ihatag Kaniya ang Himaya”

Ang tema sa ikatulong adlaw gipasikad sa Pinadayag 14:7. Sa programa sa buntag, usa ka seryal sa mga pakigpulong ang nagpalutaw sa pipila ka doktrinal nga mga pagtulon-an nga nagpalahi sa mga Saksi ni Jehova gikan sa tanang ubang relihiyosong mga organisasyon.

Sa pakigpulong “Dunay Pagkabanhaw sa mga Matarong,” nagbangon ug makaiikag nga pangutana ang mamumulong: “Sulod nianang usa ka libo ka tuig nga Adlaw sa Paghukom, kanus-a pagabanhawon kadtong mga nangamatay nga matinumanon niining kataposang katuigan sa sistema sa mga butang ni Satanas?” Ang tubag? “Ang Bibliya wala mag-ingon,” saysay sa mamumulong. “Hinunoa, dili ba makataronganon nga kadtong mamatay sa atong adlaw pagabanhawon ug sayo aron makapakig-ambit sa dakong panon sa mga nakalabang buhi sa Armageddon sa dakong edukasyonal nga buluhaton nga mahitabo sa tibuok Adlaw sa Paghukom? Oo, sa pagkatinuod!” Duna ba kahay mga makalabang buhi? Aduna gayod. Ang mga pagtulon-an ug mga pananglitan sa Bibliya nga nagapasalig niini kanato tin-aw nga gipahayag sa misunod nga pakigpulong, “Naluwas nga Buhi Latas sa Dakong Kasakitan.”

Dugay nang nasabtan sa mga Saksi ni Jehova nga ang Bibliya nagpresentar ug duha ka mga sangpotanan​—walay-kataposang kinabuhi sa usa ka paraisong yuta alang sa dili-maihap nga minilyon ug imortal langitnong kinabuhi alang sa limitadong gidaghanon nga magamando uban kang Kristo sa iyang Gingharian. Ang langitnong paglaom gihisgotan sa pakigpulong nga “Ayawg Kahadlok, Gamayng Panon.” (Lucas 12:32) Tungod sa presenteng kahimtang sa kalibotan, ang gamayng panon kinahanglang walay kahadlok; ang matag usa kanila kinahanglang molahutay hangtod sa kataposan. (Lucas 21:19) “Ang ilang pagkawalay-kahadlok,” matud sa mamumulong, “nagadasig niadtong membro sa dakong panon. Sila usab kinahanglang mougmad sa tinamdan sa pagkawalay-kahadlok samtang ilang gidahom ang kaluwasan sa panahon sa kinagrabehang panahon sa kasamok nga sukad nasinatian sa kalibotan.”

Sa kataposang bahin sa programa sa buntag, ang mga tumatambong nalipay sa pagtan-aw sa drama sa Bibliya nga Mga Pagpili nga Imong Atubangon. Sa mga adlaw ni Josue, ug usab sa propetang si Elias, ang mga Israelinhon kinahanglang mohimog desisyon. Kinahanglang mopili. Si Elias miingon: “Hangtod kanus-a ba nga magkiangkiang kamo taliwala sa duha ka lainlaing mga hunahuna? Kon si Jehova ang tinuod nga Diyos, sumunod kamo kaniya; apan kong si Baal man, sumunod kamo kaniya.” (1 Hari 18:21) Karon, usab, ang katawhan kinahanglang mohimog desisyon. Dili kini ang panahon aron magkiangkiang sa duha ka lainlaing mga hunahuna. Unsa ang hustong pagpili? Sama ra sa gihimo ni Josue sa kakaraanan. Siya miingon: “Alang kanako ug sa akong panimalay, magaalagad kami kang Jehova.”​—Josue 24:15.

Daw kalit lang, Dominggo na sa hapon ug panahon na sa pakigpulong publiko nga nag-ulohang “Kon Nganong Kahadlokan ang Matuod nga Diyos Karon.” Sa Pinadayag 14:6, 7, ang tanang katawhan giawhag: “Kahadloki ninyo ang Diyos ug ihatag kaniya ang himaya.” Nganong ang pagkahadlok sa Diyos dinalian karon? Tungod kay, sama sa padayong giingon sa kasulatan, “ang takna sa iyang paghukom miabot na.” Pinaagi sa iyang Anak, nga karon naentrono ingong Hari sa langitnong Gingharian sa Diyos, si Jehova magatapos sa presenteng mahugaw, rebelyosong sistema sa mga butang. Gipatin-aw sa mamumulong nga mao lamang kini ang paagi aron dad-an ug kahupayan kadtong nahadlok sa Diyos ingon man aron luwason ug ipreserbar ang atong yutan-ong puloy-anan. Sanglit kini maoy kataposang mga adlaw niining sistema sa mga butang, dinalian nga kahadlokan nato ang Diyos karon!

Sunod sa sumaryo sa tun-anan sa Bantayanang Torre alang nianang semanaha, ang kataposang mamumulong misaka sa entablado. Ingong sangpotanan sa programa sa kombensiyon, ang diyosnong kahadlok nahimong labi pang makahuloganon alang sa mga kombensiyonista, saysay niya. Iyang gipasiugda ang daghang kaayohan nga modangat niadtong nahadlok sa Diyos. Gipahibalo sa mamumulong ang pagluwat sa usa ka bag-ong video​—United by Divine Teaching. Kini nagpalutaw sa talagsaong mga bahin sa “Diyosnong Pagtulon-an” Internasyonal nga mga Kombensiyon nga gihimo niadtong 1993-94. Samtang naghinapos ang pakigpulong, daghan ang nahibulong, ‘Unsay atong madahom sa sunod nga tuig?’ Tulo-ka-adlaw nga distritong mga kombensiyon sa daghang dapit.

Sa pagtapos, ang mamumulong mihisgot sa Malakias 3:16, nga nag-ingon: “Niadtong panahona ang may kahadlok kang Jehova nakigsulti sa usag usa, ang matag usa uban sa iyang kauban, ug si Jehova nagapamati ug nagapatalinghog. Ug ang usa ka basahon sa handumanan gisulat sa atubangan niya alang niadtong may kahadlok kang Jehova ug alang niadtong nanagpalandong sa iyang ngalan.” Ang mga kombensiyonista namauli uban ang tin-aw nga determinasyon nga maghunahuna sa ngalan ni Jehova ug alagaran siya uban sa diyosnong kahadlok.

[Hulagway sa panid 24]

Mga kandidato sa bawtismo kinahanglang padayon nga magpadayag sa diyosnong kahadlok

[Hulagway sa panid 25]

Ang dramang “Mga Pagpili nga Imong Atubangon” misilsil diha sa mga mamiminaw sa panginahanglan nga mahimong determinado sa pag-alagad kang Jehova

[Hulagway sa panid 26]

Ang mga kombensiyonista nalipay sa pagkadawat sa bag-ong brosyur nga “Sa Dihang ang Imong Minahal Mamatay”